Acts 3

Piyugigalnguq Yuuk Naallghullghii

1Taagken Peter‑enkuk John‑enkuk aglaqak Temple‑mun 3‑klaagem yughaatellghani. 2Taawanguq yuuk piyugigalnguq ima allgenghhaghhaatmineng, aqumluni tungangakun Temple‑em iteghvigani atilqelghii, Pinighnalghii Amigllak. Aghhutanga tamaghhaan kinkut kevegtughaqegkangat tawavek naghughtaneng tungsighniighesqelluku manimeng. 3Esghaghyamikek Peter‑enkuk John‑enkuk itelghiik Temple‑mun tungsighvikegkakek manimeng. 4Qerngaagmek esghaghluku yuuk tawavek, Peter‑em pikaa, “Ukavek qiivi whangkutegnun.” 5Sighimapiglluni tuunaqniluni qiivegkakek. 6Peter‑em pikaa, “Maniqraggiitngwaaghtunga iwernga sameng tuunaqamken. Aatghakun Jesus Christ‑am Nazareth‑eghmiim, piyugi!” 7Tuguluki aghenqigneghi iiggi nekevesimaluku yugem itegiillu tukughiillu iknaqughtekat, 8repall qetgeqaamaghmi nekevegkaq aga piyuginaamaghmi pikaq. Taagken maligllukek iitqaq Temple‑mun piyugumaghmi, qetgeqaghaqluni, usuqumaan Kiyaghneq. 9Temple‑metullghiim esghaqaat piyulghii, usuqilghii Kiyaghneghmeng. 10Liisuqegkaat tungsighraghtenguyalghii aqumluni tungangani iteghvigan Temple‑em. Saghiighayagutkaat esghaghyamegteggu yuuk piyulghii.

Peter‑em Ungipallgha Temple‑mi

11Paninang naallghutkam yugem Peter‑enkuk John‑enkuk qetngamalukek, yulghutem saghiighayugumaghmeng kanglluqaghtekiit Solomon‑em Porch‑ngani. 12Peter‑em esghaghyamiki pikii, “Israel‑eghmiini, sangafsi saghiighayugetsi? Sangamta esghapagtuutestekut? Piyugtesneghitaghpung una yuuk aghtughyaghqaanghillemtegnegun, nalighmeng piniitemtegneng. Piyugigalnguum yugem Jesus ugpeqsaqminigu naallghutuq. 13Abraham‑enkut, Isaac‑enkut, Jacob‑enkut, sivunemtallu qamaglluteng maniguqiita Kiyaghneghem quulvaghaa Qepghaghteni Jesus. Iwernga elpesi aglaatkaqaghsi Pilate‑mun nanqigtesqelluku, ighsakegkaqaghsillu Pilate‑em itemusugaqngagu. 14Yeghlegi Pilate‑mun yugtaghalqaq itemutesqegkaqaghsi ighsakluku Jesus, Seghleghqumangilnguq, Qaatkutngaghllalghii. 15Tawaten pilleghpesigun tuqutestekaqaghsi Unguvallghem Allgeghvigpigaa, iwernga Kiyaghneghem unguvaghtestekaqaa tuqulleghmeng. Liisimakngwaaghaghpung, qayughllak esghaqaqaghpung unguvallghan kingunganeng enkaam apeghyaghqaqaghpung. 16Esghaqesi una yuuk nekevghalghii sivugpesini, qamagllusi liisimakaghsi piyugigasalghiinguuq ima allgenghhaghhaatmineng. Iknaqughtekaaguq ugpeqluku aatgha taam ataasim Jesus‑em Kiyaghneghem unguvaghtekaan tuqulleghmeng. Aa‑a, ugpeqillghan Jesus‑kun naallghutngwaaghaa, esghaqesi maaten.

17-18“Jew‑lgutemni, neghighluku Kiyaghneghem aapqaa uuknaliqistetgun nakmikegkani Christ‑a ikfiqluni tuqulleqniluku. Taana uuknaliqellghat apeghiiqaaguq igleghutistekullghiini tuqutestaqngafsigu Jesus, nallukluku Christ‑angutanga. 19Tamaaken apalluqluku avuteghqellusi, seghleghqennanighlusi qiivitek Kiyaghneghmun. Ugpeqiteggu Ataneq enkaam sangiglleqii seghleghqellesi. 20Tawaten pikufsi Atanghem nutaghtaqnaaghii taghneghasi, kayaggneqiglleqaallu Jesus nakmikegkani Christ‑anguluku elpesinun. 21Iwernga Jesus tagivagilgami qilagmesaghqaaguq kenlanga Kiyaghneghem nutaghtellghanun sangwaa qamaglluku. Tawaten Kiyaghneq akeqikaaguq neghighluku uuknaliqistetgun aaftekamikun ellminun qepghaghtenguluki. 22Moses pikaaguq, ‘Atanghem Kiyaghneghem uuknaliqista nakmikelleqaa yugpesineng, whanga nakmikelleghmitun uuknaliqistengulunga. Nagatngwaaghnakesi akuzillgha qamaglluku. 23Tamaakut naganneghilnguut uuknaliqistemun Kiyaghneghem yuganeng aafluki tuqusaghqaagut.’

24“Sangwaa maana atughput kiyaghtellemnni Samuel‑em uuknaliqutkegkaqaa. Samuel‑em kingunganeng ilangitallu uuknaliqistet uuknaliqutqegkaqiit. 25Kingunqiisi uuknaliqistet enkaam Kiyaghneghem aapqii akequsat ellngitgun, elpesinunllu pinguut. Tawateghpigaq Abraham‑emllu kingunqiisi. Tamaaken apalluqluku Kiyaghneghem akeqaqngamiki sivunesi Abraham‑kun whaten,

‘Abraham, kinguneghpegun quyasleqanka qamagtengngwaaghluki nunam yugi,’

akequsaq taana elpesinunllu pinguuq. 26Enkaangam Kiyaghneghem nakmikegkani Qepghaghteni kayagsuwhaaqaqaa elpesinun. Kayagtekaqaa quyasnalusi qamagllusi tunutestelleghmikun seghleghqumalleghpesineng.”

Currently Selected:

Acts 3: ess

Highlight

Copy