Acts 2

Kiyaghneghem Kayagtekek Agleghnalghiik Taghneghak

1Pentecost‑em aghneghanun Jerusalem‑eghmiit ugpeqat qerngughutkat ataasimi mangteghami. 2Taagken nuuskagllagan anuqeghllagestun sulugllagem qilagmeng pamaken ukigluni imiqaa mangteghaq. 3Taagken llangaqa ulusugnilnguut kenghhaat allgeqat, esghapakiit ilameggnun nekeghqaallghiit. 4Enkaam Kiyaghneghem imiqii Agleghnalghiigneng Taghneghagneng qamaglluki tawanlenguut. Taghnegham aghtughyaghqaanghilleghmikun akuzistekii nakumiistun.

5Tamaanguq Jerusalem‑emi, Jews‑et Kiyaghneghmun qaatkutngalghiit. Naken nunaneng tagiiqluteng Jerusalem‑eghmiingughquutkat. 6Nagaquusameng sulugllagmeng uplegutkiit ugpeqat qerngughfigitnun. Kaasalghiimeng nakumiistun ugpeqat akuziteghllaguftut repall kukriqutkegkiit. 7Saghiighayagusimiita pikat, “Ukut akuzillghiit Galilee‑ghmiinguut. 8Naten ukut qamaglluta akuzillemtestun akuziit nallukngwaaqameggneng? 9Whaa whaantutut Parthia‑ghmiit, Media‑ghmiit, Elam‑eghmiit, Mesopotamia‑ghmiit, Judea‑ghmiit, Cappadocia‑ghmiit, Pontus‑eghmiit, Asia‑ghmiit, 10-11Phrygia‑ghmiit, Pamphylia‑ghmiit, Egypt‑eghmiit, Libya‑ghmiit Cyrene‑em tunganganeng pit, Crete‑eghmiit, Arabia‑ghmiit, whaa whaantutlu Rome‑emeng laalightat Jews‑et, Gentile‑etlu maniguutkayuget Jews‑estun. Nagataput akuzillemtestun ungipaghtut Kiyaghneghem apeghiilleghllaganeng.” 12Qamagtengngwaaghluteng saghiighayagutkiitlu kukriqutkegkiitlu ugpeqat, enkaam ellmeggneng aapqughwaaghutkat, “Saaqat ukut?”

13Iwernga ilangita nenglaghyugsaatkumiita pikiit, “Ukut yuget megheghllaguut!”

Peter‑em Aleghquqangi Yuget

14Peter‑llu tawanlenguq apostle‑elgutmini. Nekevluni iglagtuluni yuget pikii, “Jew‑lgutemni, nagatngwaaqaghtengnga. 15Megheghllagunighngaaghpesikut megheghllagunghitukut nutaanqun 9‑eklaakanga unaanguluku. 16Una whaten aneghtelleq Joel‑em uuknaliqutkegkaqaa whaten:

17‘Kiyaghneq pikaaguq,

Kingulighni aghneghni Taghneghagka kayagsaghqaqagka tamaghhaanun yugnun.

Enkaam ighnesi, panisi uuknaliqsaghqaagut,

nukalpigasi esghaghwaaghyaghqaagut,

nanevgasi qavangughyaghqaagut.

18Talwa qepghaghtemnun yugnunllu aghnanunllu Taghneghagka kayagsaghqaqagka uuknaliqesqelluki.

19Yugnun esghaghtesaghqaqanka sangwaat saghiighanalghiit qilagmillu nunamillu:

aakwh, keneq, agepsughllak,

20siqiineq mamlegsaghqaq, tanqiq kavighsaghqaq aawestun.

Tamaakut kingungitneng megnunapiglleghhii Atanghem nanqigtivigkaa aghneq piyaghqaaguq.

21Iwernga aghneq taana kaatestegpenaan,

kina alngunak seghevutesqelghii Ataneghmun yugulillengyaghqaaguq.’

Tawaten Joel uuknaliqegkaaguq.

22“Israel‑eghmiini, nagataghtengnga, liisimakegkaghsi Nazareth‑eghmii Jesus, uglapiglluku allaaghlluwhaghtighllagaataqaalghii. Kiyaghneghem tawaten pistekaqaa aghtughyaghqaanghilleghmikun elpesinun liitesqelluku ellminun nakmikegkaqutni. 23Kiyaghneghem liisimalleghmikun tuunegkaqaa Jesus elpesinun piyukelleghpesistun pisqelluku. Taagken elpesi qaquuraghtestaghsi tamaakunun waakigalngughnun Kiyaghneghem Liilightuusaanun. 24Iwernga Kiyaghneghem tuqulleghmeng unguvaghtestekaqaa, itemutkaqaa tuqullghem asighqutellghaneng, talwa tuqullghem nuqneghpagningitkaqaa. 25David‑em akuzitkegkaqaa Jesus whaten:

‘Esghaghaqaqa Ataneq sivumnilluku quunpeng:

unisigataanga, enkaangam seghleghmun qapragtesnaanghitunga.

26Tamaaken apalluqluku qaamnaka quyaghllaguuq,

akuzillghenka quyalleperewaaghmeng ayuqut.

Tuquyaghqaaghngaaghma sighimaknaqamken Ataneq,

27qayughllak uninnaanghitagken unguvasigka tuqumalghiini,

talwa Seghleghqumangilnguum yugusii aghusnaanghitan.

28Apeghtuqaqaghpenga kenlengilngughmeng unguvallengelleghqameng,

whangamnisimanginalleghpek quyasteghllawaanga.’”

29Peter‑em nagneghutkii, “Jew‑lgutemni, whateghlluwaaq apeghyugaqa sivuneghput David. Liisimakaghput tuqukaaguq, lliivghallu naantulanga liisimakaghput. 30-31Unguvanguluku Kiyaghneghem akeqegkaqaa, ‘Ipapestaaq kingunghen ataasiq igleghutiyaghqaaguq yugpeneng.’ David‑em uuknaliqistengutmineng liisimakegkaqaa Kiyaghneghem akequsaa. Uuknaliqutkegkaqaa Christ‑a tuqumalghiininnaanghinniluku talwa yugusii aghunaanghinniluku, unguvaqaaniluku tuqulleghmeng. 32Taananguuq Jesus Kiyaghneghem unguvaghtekaa tuqulleghmeng enkaam whangkuta liisimakistenguukut. 33Kiyaghneghem nekegtekaqaa Jesus aghenqigneghmikun, tawaten quulvaqaqaa. Akeqelleghmitun Jesus, tuunegkaqaak Agleghnalghiik Taghneghak ellnganun, enkaam Jesus‑em whangkunnun tuunaak. Tamaakut saghiighanalghiit esghaqesi, nagaskesi Taghnegham aghtughyaghqaanghillghakun pillghuut.

34-35“David pikaaguq whaten:

‘Atanghem pii Atanqa,

Aqumi aghenqignemkun kenlanga kayaalqestellemnun anguyagten.’

David mayuumangitutmineng qilagmun Jesus‑etun, ellmineng akuzitkengngunghituq, akuzitkengngwaa Jesus.

36“Ungipaataghllamsi qamagllusi Israel‑eghmiini, Kiyaghneghem ipapestaaq nakmikegkaqaa Jesus Atanghulukullu Christ‑angulukullu. Taananguuq Jesus qaquuraqaghsi!”

37Yuget nagalluku Peter, seghleghyugllakat enkaam Peter‑llu apostle‑elgutangillu aaptekiit, “Ugpeqaalgutemnni, sanaqesta?”

38Peter‑em kiimsiqii, “Avuteghqellusi, seghleghqennanighlusi qiivitek Kiyaghneghmun, paaptaayeteklu Aatghakun Jesus Christ‑am, seghleghqellesi seghevutellengesqelluki, enkaam Kiyaghneghem tunusakek Agleghnalghiik Taghneghak allgeghtekek. 39Ataneq Kiyaghneghput tawaten piyaghqaaguq, qayughllak akequsaqegkaqaak Taghneghagni elpesinun, kinguneghpesinun, kitumunllu alngunak uyavaghpansaghngaan tuqluqaminun.”

40Peter‑em tawatenginaq pigpenaki wata sameng allaaghhiinaghmeng pikii. Kelengasaaqiillu, “Kiyaghneghem aghyuughyaghqaqii seghletun pistet, enkaam ellngistun seghletun pigpenasi luuraq elpesillu aghyuughyaaghiisi.” 41Taagken ugpeqilghiit ungipaaneng paaptaayekat. Enkaam tawani aghneghmi 3,000 yuuk ilatkaq ugpeqanun.

Ugpeqat Kiyaghtaallghit

42Ugpeqat iiwleng qerngughutngulghiit liinnaluteng apostle‑eneng. Christ‑akun anglegutkullghiistun kiyaghtaaghet, neghaqelghiit, yughaghaqelghiit qerngaghmeng. 43Apostle‑et uglaghngaan allaaghlluwhaghtikaalghiit Kiyaghneghem aghtughyaghqaanghillghakun. Enkaam qamaglluni saghiighayukaalghii, tallughyagutkaqegkangatlu Kiyaghneq. 44Ugpeqat qamaglluteng nagneqaalghiit ataasistun, saghyateng atunem atuqluki. 45Akikluki nunatengllu saghyatengllu, allgeghtateng manit tuunaqegkangit sameng aklulghiinun. 46Aghhutanga tamaghhaan qerngughutaqelghiit Temple‑mi. Neghelgutengllaghaqluki ilateng, quyakusiqinaghluki neqeteng upughatusiqaqegkangit. 47Kitumun alngunak piniqnighllaget, usuqumanginaghaqegkangatlu Kiyaghneq. Aghhutanga tamaghhaan Atanghem yugulingukangi yuget, enkaam ugpeqat nulamanginaqat.

Currently Selected:

Acts 2: ess

Highlight

Copy