Juan 19

1Maabae Pilatoba Jesús pebewabisii. 2Maka b̶uud̶e Romad̶ebena kokoroarãba boro jũra ʉri kad̶a Jesús borod̶e jʉ̃ b̶usid̶au, maud̶e anab̶ari jʉ̃barii pupuchia b̶uu jʉ̃ b̶usid̶au. 3Maabae Jesús kaita need̶aped̶a jarasid̶au:

—¡Ãrea biꞌia nii, judiorã rey!

Maka jarad̶aped̶a juaba ichi kĩedarrmaa sĩsibachid̶au.

4Maabae Pilato waya awara judiorãmaa wãped̶a jarasii:

—Ũrísturu. Mʉʉba nau ẽbẽra awara machimaa eneei, mʉʉmaarã nauba kachirua wauwẽa b̶uu kuitaad̶amera.

5Jesús awara adoeduud̶e boro jũra ʉri kad̶a maud̶e anab̶ari jʉ̃barii pupuchia b̶uu jʉ̃ nibasii. Maud̶e Pilatoba jarasii:

—Naubʉ chi ẽbẽra.#19:5 Naubʉ chi ẽbẽra. Pilatoba Jesús awara adoebisiid̶e ẽbẽra mia wapea nii unubiasii. Maamina waabenarãba chi bed̶ea «ẽbẽra» ũrisid̶aud̶e, mau chi Ẽbẽra Ba B̶uad̶a kʉ̃risiasid̶aud̶aa b̶uu. Juan 1:1,14.

6Maamina Jesús unuuduud̶e paare mechiurã maud̶e Dachi Akõre de nubadaurãba jĩwa b̶ia jarasid̶au:

—¡Jãu cruzd̶e jirab̶u beabise! ¡Cruzd̶e jirab̶u beabise!

Maud̶e Pilatoba jarasii:

—¡Machiaburu adoed̶aped̶a cruzd̶e jirab̶u beásturu! Mʉʉmaarã, jãuba kachirua wauwẽa b̶uu.

7Maamina judiorãba panausid̶au:

—Daiba Moisesba b̶ʉd̶a uru panuu. Mau Moisesba b̶ʉd̶ad̶e jara b̶uu kĩra jãu biui b̶uu ichi Dachi Akõre Warr a b̶uud̶eeba.#Levítico 24:15-16.

8Mau bed̶ea ũrisiid̶e Pilato ãrea wapeasii. 9Maabae waya ichi de mechiud̶e ed̶a wãped̶a Jesusmaa id̶isii:

—¿Bichi samabenama?

Maamina Jesusba panaubasii. 10Maka b̶uud̶e Pilatoba jarasii:

—¿Panauwẽka? ¿Adua b̶uka mʉʉba bichi poyaa cruzd̶e jirab̶u beabi b̶uu maud̶e poyaa ida bʉi b̶uu?

11Maud̶e Jesusba panausii:

—Dachi Akõreba bichi chi Romad̶ebena karr b̶ud̶awãe basirã bichiba mʉ ab̶a bid̶a maka waubai basii. Mauburu chi mʉ bichi juad̶e dead̶aba bichi audeara kachirua aude wausii.

12Mau ũrisiid̶e Pilato kʉ̃risia b̶eesii Jesús saka ida bʉi. Maamina judiorãba waya jĩwa jara kopaneesid̶au:

—Bichiba jãu ẽbẽra ida bʉiruubʉrã bichiba Romad̶ebena chi aude mechiu ome biawãra kõpaerowãe. Barikiuba ara ichi rey nii aaruubʉrã, mau ẽbẽra Romad̶ebena chi aude mechiu ome kĩramaa nii.

13Pilatoba mau ũrisiid̶e Jesús awara adoebisii. Maabae Pilato ichi juez ãkaud̶e akʉ b̶eesii, dud̶a Mo Kakayaa Waud̶a abadaumare. Hebreo bed̶ead̶e Gabatá abadau. 14Judiorã Pascua ewari norema baid̶eeba ãchi ne wau panasid̶au. Ʉmada jipa baaruud̶e Pilatoba judiorãmaa jarasii:

—Ichiásturu. Cha nau machi reybʉ.

15Maamina ãchiba jĩwa jarasid̶au:

—¡Beabise! ¡Beabise! ¡Cruzd̶e jirab̶u beabise!

Maud̶eeba Pilatoba jarasii:

—¿Makarã mʉʉba machi rey cruzd̶e jirab̶u beabi kʉ̃ria panuka?

Maabae chi paare mechiurãba panausid̶au:

—¡Dai rey june wãꞌãe panuu, César Augusto awara!#19:15 Dachi Akõre bed̶ead̶e jara b̶uu Israel puurud̶ebenarã rey ara Dachi Akõre maka nii. Jueces 8:23; 1 Samuel 8:7.

16Maabae Pilatoba Jesús Romad̶ebena kokoroarãmaa deasii cruzd̶e jirab̶u bead̶amera. Ara makʉd̶e ichi adoesid̶au.

Jesús cruzd̶e jirab̶uped̶aad̶a

Mateo 27:32-44; Marcos 15:21-32; Lucas 23:26-43

17Jesusba ichi cruz atauped̶a kokoroarãba ichi adoesid̶au drua “Boro B̶ʉʉrʉ” abadaumaa. Hebreo bed̶ead̶e Gólgota abadau. 18Aria ãchiba Jesús cruzd̶e jirab̶usid̶au. Maud̶e ichi jãkaa ẽbẽra ome cruzd̶e jirab̶usid̶au, ab̶a jua biare, ab̶a jua sordoare. 19Mau awara Pilatoba bed̶ea b̶ʉd̶a Jesús boro ʉ̃rʉed̶e nub̶ubisii. Naka b̶ʉsii: «Jesús Nazaretd̶ebena, judiorã Reybʉ». 20Mau bed̶ea hebreo bed̶ead̶e b̶ʉsii, latín bed̶ead̶e maud̶e griego bed̶ead̶e.#19:20 Romad̶ebenarãba latín bed̶ea berreabachid̶au. Hebreo bed̶ea judiorãba berreabachid̶au. Griego bed̶ea beraa joma druachabenaba b̶istĩika kuitaa nureasii. Griego bed̶ead̶e berreabachid̶au druacha ne nedobʉid̶ai baita. Ãrea judiorãba mau bed̶ea unusid̶au, Jesús cruzd̶e jirab̶uped̶aad̶a puuru kaita b̶uud̶eeba. 21Judiorã paare mechiurãba mau bed̶ea ʉ̃risid̶aud̶e Pilatomaa jarasid̶au:

—B̶ʉrã́se “Judiorã Rey”. Maumaarã b̶ʉse: “Nau ẽbẽraba jarasii ichi judiorã rey”.

22Maamina Pilatoba jarasii:

—Mʉʉba b̶ʉd̶a ara maka b̶eeruu.

23Maad̶akare Romad̶ebena kokoroarãba Jesús cruzd̶e jirab̶usid̶aud̶e ichiba anab̶ari jʉ̃barii jʉ̃ b̶uad̶a kimare kõetad̶aped̶a ãchicha adausid̶au. Ichiba chi mau ekare jʉ̃ b̶uad̶a sid̶a adausid̶au. Mau ʉtʉʉba ed̶aa b̶ari kaapirud̶a b̶uasii. 24Maud̶e kokoroarãba ãchi du ab̶a jarasid̶au:

—Nau kõetad̶aabai panuu. Bari bibuara b̶uu jemened̶ai, kaiba chi paru adooi kuitaad̶ai baita.

Mau makasii Dachi Akõre bed̶ead̶e nabẽraed̶e b̶ʉd̶a kĩra:

«Mʉ anab̶ari jʉ̃barii ãchicha adausid̶au; mʉʉba ekare jʉ̃ b̶uad̶a adaud̶ai baita jemenesid̶au».#Salmos 22:18.

Biawãra kokoroarãba maka wausid̶au.

25Jesús cruzd̶e jirab̶u kaita Jesús nawe maud̶e chi nawe neekau panasid̶au. Cleofás kima María maud̶e María Magdalena panasid̶au. 26Jesusba ichi nawe unusiid̶e maud̶e ichi baara nibabarii «ichiba ãrea kʉ̃ria b̶uu» abadau. Mau ara jãma b̶uasii. Maud̶e Jesusba ichi nawemaa jarasii:

—Dana, nau bichi warrbʉ.

27Maabae ichi baara nibabariimaa jarasii:

—Nau bichi nawebʉ.

Mau ewarid̶eeba waitaa Jesús nawe Jesús baara nibabarii ded̶e b̶uabachii.

Jesús cruzd̶e biud̶a

Mateo 27:45-56; Marcos 15:33-41; Lucas 23:44-49

28Maka jarasiid̶e Jesusba kuitaasii joma ichiba waui b̶uad̶a wausii. Maud̶e jarasii:

—Mʉ obisia b̶uu.

Mau jarasii Dachi Akõre bed̶ead̶e jara b̶uu kĩra.#Salmos 22:15; 69:21.

29Maud̶e aria chokod̶e uva b̶aa orekea waabiru nub̶uasii. Chi nureerãba mau uva b̶aa orekead̶e modaa b̶uuba sũra adausid̶au. Mau hisopo bakuru juad̶e jʉ̃d̶aped̶a Jesús iimaa tusid̶au. 30Jesusba mau uva b̶aa orekea do chaaped̶a jarasii:

—Mʉʉba waui b̶uad̶a joma wausii.

Maabae ichi boro ed̶aa jaab̶arisiid̶e biusii.

Jesús orrd̶e miasuba sud̶a

31Judiorã Pascua ewari norema baaruud̶eeba ne wau panasid̶au. Mau bari panabadau ewari mechiud̶eeba ãchiba kʉ̃riad̶awẽa panasid̶au ẽbẽra cruzd̶e jirab̶ud̶ai. Maud̶eeba Pilatomaa id̶isid̶au cruzd̶e jirab̶u b̶ʉʉrʉsiu b̶ʉikuabimera isa biubid̶aped̶a chi kakua ed̶aa jirad̶amera. 32Maud̶eeba kokoroarã wãd̶aped̶a Jesús baara cruzd̶e jira panuu ab̶a chi b̶ʉʉrʉsiu b̶ʉitasid̶au. Ara mau kĩra chi ab̶abena b̶ʉʉrʉsiu sid̶a b̶ʉitasid̶au. 33Maamina Jesusmaa neesid̶aud̶e unusid̶au ichi biusii. Maud̶eeba ichi b̶ʉʉrʉsiu b̶ʉitad̶aabasii.

34Maka b̶uud̶e kokoroaba Jesús orrd̶e miasuba susii biawãra biusii kuitaa. Ara makʉd̶e oa bania baara chesii. 35Chi nau karta b̶ʉd̶aba biawãra mau unusii. Ichiba jara b̶uu biawãra b̶uu.#19:35 Juanba jara b̶uu Jesús biud̶ad̶eeba biawãra ẽbẽra basii. Juan chõra b̶uasiid̶e waabenarãba jarabachid̶au Jesús ẽbẽra kĩra b̶uasii maamina nau kakuad̶e neewẽa basii. Ichiba jara b̶uu biawãrabʉ, kuitaa b̶uu chi biawãra bed̶ea jara b̶uu machia bid̶a sõd̶eeba ijãad̶amera. 36Joma mau biawãra makasii Dachi Akõre bed̶ead̶e b̶ʉ kub̶uu kĩra. Naka b̶ʉ kub̶uu: «Ichi b̶ʉʉrʉ ab̶a bid̶a b̶ʉitad̶aabai».#Éxodo 12:46; Números 9:12; Salmos 34:20. 37Maud̶e Dachi Akõre bed̶ead̶e nau sid̶a b̶ʉ kub̶uu: «Ãchiba suped̶aad̶amaa ichiad̶ai».#Zacarías 12:10.

Jesús jau b̶uped̶aad̶a

Mateo 27:57-61; Marcos 15:42-47; Lucas 23:50-56

38Joma nau maad̶akare judio José abadau Pilatomaa wãsii. Mau José Arimatea puurud̶ebena basii. Mau Jesús baara nibabarii basii, maamina ab̶aumaa bid̶a jarawẽa b̶uasii waabenarã judiorã wapea b̶uud̶eeba. Ichiba Jesús kakua Pilatomaa id̶isii jau b̶ud̶e adooi baita. Maud̶eeba Pilatoba ida adoebisii. Ara makʉd̶e Joseba Jesús kakua adaud̶e wãped̶a jau b̶ud̶e adoesii. 39Mau awara Nicodemo, chi naed̶e Jesusmaa ẽsabud̶e berread̶e nee b̶uad̶aba mirra kera jãra áloe ome perad̶a adoesii.#Juan 3:1-15. Mau chikʉa 34 kilos b̶uasii.#19:39 34 kilos. Griego bed̶ead̶e b̶ʉ kub̶uu: 100 litros. Mau jara b̶uu 75 libras. Mirra, áloe sid̶a bakuru piumaa panuu. Chi kera jãra basii. 40Ãchiba Jesús kakua adoed̶aped̶a mau mirra jãra kera áloe ome perad̶a paru torroad̶e posid̶au. Pod̶aped̶a ichi kakua mau paru torroaba bʉrasid̶au judiorãba naed̶e maka jau b̶ubachid̶au kĩra. 41Jesús cruzd̶e jirab̶uped̶aad̶a kaita ne uu nub̶uasii. Mau ne uu nub̶uud̶e biud̶a jau b̶ubachid̶aud̶e chob̶ea b̶uasii mo chob̶ea korod̶a wid̶i. Aria biud̶a wabid̶a jau b̶ud̶akau basii. 42Mau chob̶ea ara kaita b̶uud̶eeba maud̶e judiorã bari panabadau ewari ʉ̃rʉ ba b̶uasiid̶eeba Jesús aria jau b̶usid̶au.

Currently Selected:

Juan 19: cmi

Highlight

Copy