Genesis 48
48
Иаков Манассия пӑ Ефрем йӑмән мӑԓԓы
1Щи йўпийән Иосифа йастәса: «Щиты, нӑӈ ащен кӑшаӈ». Пӑ ԓўв Манассия пӑ Ефрем пŏхӈәԓаԓ пӑтән ўсԓы.
2Иакова айкеԓ верса пӑ йастәса: «Щиты, Иосиф пŏхен нӑӈ хŏщайэн йиԓ». Израиль хӑщәм йурԓаԓ ӑктәс пӑ ŏԓттӑхайәԓән нŏх опсәс.
3Иаков Иосиф пеԓа йастәс: «Иса Верәтты Турәм Луз вошән, Ханаан мўвән, ма хŏщайэм этәс пӑ йӑмән мӑнэм мӑсԓы,
4пӑ мӑнэма йастәс: ‘Ма нӑӈен рутмӑԓтԓэм, ара верԓэм, ар мир нӑӈ эԓтэн питәԓ, пӑ тӑм мўв нӑӈ йўпенән нӑӈ тыхԓэна веккеша тӑйты мӑԓэм’.
5Ин нӑӈ пŏхӈәԓан, ма йŏхәттэм йэԓпийән Египет мўвән сэма питәм пŏхӈәԓан, ԓын мӑнэӈәԓам; Ефрем пӑ Манассия, ԓын Рувим пӑ Симеон иты, мӑнэӈәԓам питԓәӈән;
6ԓын йўпанән сэма питты ԋаврэмԓән нӑӈиԓан питԓәт; ԓыв щӑха йайӈәԓән нэм хўват йайӈәԓән мўвәт эԓты мўвән ортԓайәт йэԓԓы тӑйты урәӈән.
7Месопотамия эԓты мӑнмемән, Ханаан мўвән, Ефрафа унты йэша ӑт йŏхәтмемән, Рахиль пӑрәс, ма ԓўвеԓ щита, Ефрафа пеԓа мӑнты йуш пўӈәԓән, лоттәсэм», Ефрафа щит ин Вифлеем.
8Щӑԓта Израиль Иосиф пŏхӈән кащаԓәс пӑ йастәс: «Щит хŏйӈән?»
9Иосиф ащеԓа йастәс: «Щит ма пŏхӈәԓам, Турәмән тӑта мӑнэм мийәм пŏхӈәԓам». Иаков йастәс: «Ма пўӈԓэма ԓынан тўваԓән, ма ԓынан йӑмән мӑԓԓам».
10Пирща йўвәм Израиль ики сэмԓаԓ нўшайа йисәт, йӑма ӑт нысайәт. Иосиф пŏхӈәԓаԓ ԓўв пўӈԓәԓа тусԓы, ԓўв ԓынан мосәԓтәсԓы пӑ ӑпәԓсәԓы.
11Израиль Иосифа щиты йастәс: «Нӑӈ веншен шийаԓәты ӑт нумисысәм; ин пӑ Турәмән ԋаврэмԓан мӑнэм хŏԓна этәԓтәсайәт».
12Иосиф ԓынан ԓўв шаншŏхԓаԓ эԓты йэԓшәк тусԓы пӑ ԓўв йэԓпеԓән мўв унты, ŏх пŏнман, иԓ ԋўрәс.
13Щӑԓта Иосиф пŏхӈәԓаԓ кинтак ўсԓы, Ефремәԓ йӑм пеләк йошәԓа, Израиль пӑрта пеләк йош шŏма, Манассияйәԓ пӑ пӑрта пеләк йошәԓа, Израиль йӑм пеләк йош шŏма, пӑ ԓўв хŏщайәԓ вана тусԓы.
14Израиль пӑ йӑм пеләк йошәԓ Ефрем ŏха пŏтсәԓы, кўш щитәԓ айшәк ус, пӑрта пеләк йошәԓ пӑ Манассия ŏха пŏтсәԓы. Номәс тӑйман йошӈиԓаԓ щиты, пеләтман, пŏтсәԓы, кўш Манассия оԓәӈ пŏх ус.
15Щитәԓән Израиль Иосиф йӑмән мӑсԓы пӑ щиты йастәс:
«Турәм, Хŏй йэԓпийән Авраам пӑ Исаак ащеӈәԓам устән,
пӑ мӑнэм уԓтэм хўват тӑм хӑтәԓ унты шавийәм Турәм,
16атәм вер эԓты мӑнэм нŏх пайтыԓыты ангел,
тӑм энәмты пŏхӈән йӑмән ат мӑԓԓы;
ԓын нэмԓән йастытыйән,
ма нэмем пӑ, Авраам пӑ Исаак ащеӈәԓам нэмӈән,
ищи ат нумәԓмиԓайәт,
пӑ ԓын тыхәԓ тэԓԓән мўвән ара ат йиԓтән».
17Иосиф кащаԓәсԓы, ащеԓ йӑм пеләк йошәԓ Ефрем ŏха пŏнмаԓ; нŏпсәԓ щит эԓты шӑкәс. Ащеԓ йош ўсԓы пӑ Ефрем ŏх эԓты Манассия ŏха пŏнты ўтщисԓы,
18пӑ ащеԓа йастәс: «Ӑнта, ащи, тӑта щи – оԓәӈ пŏхем; ԓўв ŏхәԓа йӑм пеләк йошен пŏны».
19Ащеԓ пӑ ԓўв пиԓәԓән ӑт кашащәс пӑ йастәс: «Уйәтԓэм, пŏхийэ, уйәтԓэм; ԓўв эԓтэԓ ищи вŏԓаӈ мир тыйәԓ, туп апщеԓ ԓўв эԓтэԓ унашәк питәԓ, ԓўв эԓтэԓ ар мир тыйәԓ».
20Щи хӑтәԓ ԓынан йӑмән мӑсԓы, йастәман:
«Нын нэмԓән хўват израиль йох хŏйатәта йасәӈән йӑм мӑты питԓәт, пŏтәрман:
‘Турәм Ефрем пӑ Манассия иты нӑӈена ат верәԓ’».
Щиты Ефрем Манассия эԓты унашәк пŏтсәԓы.
21Щӑԓта Израиль Иосифа йастәс: «Щи, ма пӑрты хӑтԓэм йŏхтәс; Турәм нын пиԓанән питәԓ пӑ ащиԓән мўва нынан йŏхԓы туԓԓы;
22амор йох эԓты аԓтты кешемән пӑ йухԓэмән ма йŏра шитәм мўвем нӑӈена мӑԓэм, щит йайԓан мўв эԓты аршәк, йайԓан кўтән уна уԓтэн урәӈән».
Currently Selected:
Genesis 48: ХБ
Highlight
Share
Copy
Want to have your highlights saved across all your devices? Sign up or sign in
Institute for Bible Translation, Finland
