Genesis 47
47
Фараон Иосиф ащеԓ пӑ йайԓаԓ пиԓән пŏтәртәԓ
1Иосиф йŏхтәс пӑ фараона айкеԓ верәс пӑ йастәс: «Ащем пӑ йайԓам, ай пӑ ун вой тащԓаԓ пиԓән, пӑ иса мўй ԓыв тӑйԓәт, Ханаан мўв эԓты йŏхәтсәт; пӑ ин ԓыв Гесем мўвән».
2Йайԓаԓ эԓты вет хŏйат ўс пӑ фараон йэщаԓт ԓощәԓтәсԓы.
3Фараон ԓўв йайԓаԓ иԋщәссәԓы: «Мўй верман уԓԓәты?» Ԓыв фараона йастәсәт: «Мўӈ ащиԓув иты ош тащ шавиты йох, нӑӈ митйохԓан».
4Щӑԓта ԓыв фараона йастәсәт: «Мўӈ тӑм мўва уԓты щира йŏхәтсув, тащ ԓапәтты мўв ӑнтом урәӈән, Ханаан мўвән шек ԓэԓԓы йӑт йŏхтәс; щишән, митйохԓан Гесем мўвән уԓты эсԓаԓән».
5Фараон Иосифа йастәс: «Ащен пӑ йайԓан нӑӈ хŏщайэн йŏхәтсәт;
6Египет мўв нӑӈ йэԓпенән: ащен пӑ йайԓан мет йӑм мўвән уԓты мийаԓән; Гесем мўвән ԓыв ат уԓԓәт; щӑԓта вер йӑма уйәтты хŏйатәт ԓыв кўтэԓән уйәтԓән ки, ма тащԓам вантыты хŏйатәт ԓыв эԓтыԓаԓ пŏна».
7Щӑԓта Иосиф Иаков ащеԓ фараон пиԓән уйтантыты тусԓы. Иаков фараон Турәм йӑмән мӑсԓы.
8Фараон Иаков пеԓа йастәс: «Нӑӈ нуптэн мўй арат тӑԓ?»
9Иаков фараона йастәс: «Ма касԓыйәм хӑтәԓԓам сот хŏԉмаӈ тӑԓ; ма уԓәм тӑԓԓам шимԓәт пӑ шукәӈәт, пӑ аратэԓән ащиԓам касԓыйәм тӑԓәта ӑт йŏхәтԓәт».
10Щӑԓта Иаков фараон Турәм йӑмән мӑсԓы, пӑ фараон эԓты этәс.
11Иосиф ащеԓ пӑ йайԓаԓ Египет мўвән уԓты хӑйсәԓы, Египет мет йӑм мўвән, Раамсес мўвән, ԓывиԓаԓа мўв щуӈ тӑйты мӑсԓы, хŏты фараонән партса.
12Иосиф ащеԓ пӑ йайԓаԓ, пӑ хŏԓ иса ащеԓ тыхәԓ тэԓ тӑрәмты аратән ԋаԋән мийԓысԓы, кашәӈ хот тэԓ тӑрәмты аратән.
Иосиф ԓэԓԓы йӑт Египет хŏща кущайа уԓ
13Мўв ԓŏватән ԋаԋ ӑнтом ус, мет ԓэԓԓы йӑт йŏхтәс, щишән, Египет пӑ Ханаан мўвәт ԓэԓԓы шукащсәт.
14Египет мўвән пӑ Ханаан мўвән мўй арат щел ŏх ус, щи ŏх тыныйәм ԋаԋ ԓат сӑхат Иосиф хŏԓ ӑкәтсәԓы пӑ фараон хотән шависԓы.
15Щиты Египет мўвән пӑ Ханаан мўвән щел ŏх хŏԓас. Египет мўв хŏйатәт Иосиф хŏща йŏхәтсәт пӑ йастәсәт: «Мўӈева ԋаԋ мийа; щел ŏхев хŏԓәм урәӈән, нӑӈ ватман, мўӈев мўй пӑрты мосәԓ?»
16Иосиф йастәс: «Тащԓән ты воштаԓән, войԓән сӑхат ԋаԋән мӑԓԓам, ŏхԓән ки хŏԓасәт».
17Ԓыв тащԓаԓ Иосиф хŏща воштәсԓаԓ; Иосиф пӑ ԓывиԓаԓа ԋаԋ мийԓыйәс ԓовәт сӑхат, ош тащәт, мис тащәт пӑ осёл войәт сӑхат; щи тӑԓ ԓывиԓаԓ хŏԓ войԓаԓ сӑхат ԋаԋән ԓўв мийԓысԓы.
18Щи тӑԓ щиты хӑщәс; йухәт тӑԓ ԓўв хŏщайәԓа йŏхәтсәт пӑ ԓўвеԓа йастәсәт: «Мўӈ кущайэв эԓты ӑт хӑԋатԓэв, ŏхев хŏԓас, тащԓув па кущайэв пеԓа питсәт; кущайэва мӑты урәӈән нэмәԓты ӑт хӑщәс, мўӈ эԓԓув пӑ мўӈ мўвԓув тўмпийән;
19мўй урәӈән мўӈева, нӑӈ сэмԓан ватман, пӑрты пӑ мўвԓув таԓты хӑйты? Мўӈиԓув пӑ мўӈ мўвԓув ԋаԋ сӑхат ԓутаԓән, пӑ мўӈ, мўвԓув пиԓән веккеша фараон митйоха питԓув, нӑӈ пӑ мўӈева ԋаԋ сэмәӈ ԓат мийа, мўӈев ԓыԓӈа хӑщты пӑ ӑт пӑрты урәӈән пӑ мўвев таԓты ӑт хӑйты урәӈән».
20Щиты Иосиф хŏԓ Египет мўв фараон урәӈән ԓутсәԓы, Египет мўвәӈ хŏйатәт кашәӈ ԓўв мўв хӑрәԓ тынысԓы ԓыԓӈа хӑщты урәӈән. Фараон пеԓа мўв иса питәс.
21Египет мўв и оԓӈәԓ эԓты кимет оԓӈәԓ унты уԓты мир хŏԓ митйоха Иосиф версәԓы.
22Туп йир верты хŏйатәт мўвәт Иосиф ӑт ԓутсәԓы, ԓыв фараон эԓты йўкан ŏхән мийԓысайәт, фараон мийәм ŏх эԓты ԓэсәт; щишән мўвеԓ ԓыв ӑт тынысэԓ.
23Иосиф мир пеԓа йастәс: «Тӑта щи, фараон кеша нынан пӑ нын мўвԓән ма ԓутсәԓам; тӑта щи нынана ԋаԋ сэмәӈ ԓат, пӑ мўва пŏнаԓән;
24ԋаԋ ӑкәтты пŏра йŏхәттаԓән, ветмет пелкәԓ фараона мийаԓән, ԋӑԓ пелкәԓ пӑ мўва омәсты пӑ нынана пӑ хотәӈ ŏтԓән пӑ ԋаврэмԓән ԓапәтты урәӈән хӑщәԓ».
25Ԓыв йастәсәт: «Нӑӈ мўӈ ԓыԓэв шависэн; йӑм сэмән кущайэв мўӈ пеԓэва ат ватәԓ пӑ фараона митйоха питԓув».
26Щиты Иосиф Египет мўвән тӑм хӑтәԓ унты уԓты закон постәс: ӑктәм ԋаԋ ԓат ветмет пелкәԓ фараона мӑты, туп йир верты хŏйатәт ӑктәм ԋаԋ ԓат тўмпийән, ԓыв мўвеԓ фараон пеԓа ӑт ԓўӈтәсәс.
Иаков хӑйәм йасәӈ
27Щиты Израиль Египет мўвән ус, Гесем мўв щуӈән, щи мўвән ԓыв тӑйтаӈаӈа уԓты питсәт, пӑ ԋаврэмәӈа йисәт, пӑ шек ара йисәт.
28Иаков Египет мўвән ԓапәтхŏщйаӈ тӑԓ ус; пӑ аратәԓ тӑԓԓаԓ щирән ԓўв сот ветйаӈ пеԓа ԓапәт тӑԓ ус.
29Израиль пӑрты хӑтԓаԓ ванамәс, Иосиф пŏхәԓ вохсәԓы пӑ ԓўвеԓа йастәс: «Йӑм сэмән ма пеԓайэм ватԓән ки, йошен ма пещ иԓпема пŏныԓыйи пӑ йасәӈ мийа, нӑӈ мӑнэм щаԉәтԓэн пӑ ӑт ԓэпәԓԓэн, Египет мўвән мӑнэм ӑт лоттәԓэн,
30ащиԓам пиԓән мӑнэм ŏԓты урәӈән; Египет мўв эԓты мӑнэм тўви пӑ ԓыв ŏԓты хŏшапәӈ кевеԓән мӑнэм лотты». Иосиф йастәс: «Нӑӈ йасӈен щирән верԓэм».
31Пӑ йастәс: «Мӑнэма йасәӈ мийа». Иосиф йасәӈ ԓўвеԓа мӑс. Израиль пӑ ԓўв ŏԓттәхайәԓ ŏсмәԓән, ŏх пŏнман, иԓ ԋўрәс.
Currently Selected:
Genesis 47: ХБ
Highlight
Share
Copy
Want to have your highlights saved across all your devices? Sign up or sign in
Institute for Bible Translation, Finland
