ရူဝ်းမႃႉ ၵႂၢမ်းၼမ်း
ၵႂၢမ်းၼမ်း
လိၵ်ႈတြႃးပုၼ်ႈၵူၼ်းဝဵင်းရူဝ်းမႃႉၼႆႉၵေႃႉတႅမ်ႈမၼ်းပဵၼ်တမၢၼ်ႇၸဝ်ႈပေႃးလူႉဢၼ်ပဵၼ်တမၢၼ်ႇၸဝ်ႈၼၼ်ႉလႄႈတႅမ်ႈမိူဝ်ႈပီႊၸဝ်ႈၶရိၸ်ႈ 57-58 ၵႃႈတီႈဝဵင်းၵေႃးရိၼ်ႇထူႉဢေႃႈ။ တမၢၼ်ႇၸဝ်ႈပေႃးလူႉတႅမ်ႈပၼ်ၵႂႃႇပုၼ်ႈတၵ်းလႆႈမႄးႁႅၼ်းသဵၼ်ႈတၢင်းဢၼ်မၼ်းဢၢင်ႈတၵ်းၵႂႃႇလႄႇထိုင်ၸိူဝ်းၸဝ်ႈဝဵင်းရူဝ်းမႃႉဢေႃႈ။ မၼ်းဢၢင်ႈဢၢၼ်းၵႂႃႇပွင်ၼႃႈၵၢၼ်သႃႇသၼႃႇၶရိၸ်ႈယၢၼ်ႇၵႃႈတီႈၼၼ်ႈၸူဝ်ႈၼိုင်ႈၶၢဝ်းၼိုင်ႈသေယဝ်ႉ၊ ဢၢင်ႈယွၼ်းတၢင်းၸွႆႈထႅမ်ၵႃႈတီႈၶဝ်သေလႄႈဢၢၼ်းသိုပ်ႇၶၢဝ်းတၢင်းၵႂႃႇၸူးမိူင်းသပဵၼ်ႇပုၼ်ႉဢေႃႈ။ မၼ်းတႅမ်ႈမွၵ်ႇလၢတ်ႈၼႄလွင်ႈတြႃးတၢင်းဢၼ်ယုမ်ႇမၢတ်ႈၸဝ်ႈၶရိၸ်ႈ ဢိၵ်ႇတင်းလွင်ႈတၢင်းဢၼ်ၶရိၸ်ႈယၢၼ်ႇထုၵ်ႇလီၵမ်ၵျၢင်ႉၸိူဝ်ႉၼင်ႇႁိုဝ်ၼၼ်ႉဢေႃႈ။ ၵႃႈၼႂ်းၽိုၼ်လိၵ်ႈတြႃးၼၼ်ႉလၢတ်ႈလွင်ႈဢၼ်တမၢၼ်ႇၸဝ်ႈပေႃးလူႉႁေႃးလၢတ်ႈၼုၵ်ႈၵပၢတ်ႈၸဝ်ႈၸေးၸေးၸုမ်ႇၸုမ်ႇဢေႃႈ။
ဝၢႆးသေဢၼ်တၵ်ႉလၢတ်ႈၸိူဝ်းၸဝ်ႈသေယဝ်ႉ မွၵ်ႇလၢတ်ႈလွင်ႈဢၼ်မၼ်းသူးတွင်းပုၼ်ႈၶဝ်ၼၼ်ႉယဝ်ႉၸိုင်၊ တမၢၼ်ႇၸဝ်ႈပေႃးလူႉတၢင်ႇပျႃႉလၢတ်ႈၼႄလွင်ႈႁူဝ်ႁုပ်ႈၽိုၼ်လိၵ်ႈဢၼ်ဝႃႈ၊ “ၶၢဝ်ႇငၢဝ်းတြႃးသိူဝ်းပျေႃႇၸဝ်ႈၽုၺ်ႇပျႃႉလၢတ်ႈၼႄလွင်ႈဢၼ်ၽြႃးပဵၼ်ၸဝ်ႈႁဵတ်းႁႂ်ႈၵူၼ်းႁွတ်ႈထိုင်တၢင်းဢၼ်သိုဝ်ႈတေႃႇ ဢၼ်တႄႇၼိူဝ်တၢင်းဢၼ်ယုမ်ႇမၢတ်ႈၸဵမ်တီႈၸႃႉတေႃႇတီႈသုတ်း၊” ၼၼ်ႉဢေႃႈ (1:17)။
တမၢၼ်ႇၸဝ်ႈပေႃးလူႉလၢတ်ႈသမ်ႉထႅင်ႈလွင်ႈႁူဝ်ႁုပ်ႈၽိုၼ်လိၵ်ႈဢၼ်ဝႃႈ၊ ၵူၼ်းမဵဝ်းတင်းသဵင်ႈတင်းလူင်ၸႃႉၸဵမ်ၵူၼ်းမဵဝ်းယူႉတႃႉလႄႈၵူၼ်းတၢင်ႇၸိူဝ်ႉတၢင်ႇၶိူဝ်းလူဝ်ႇပဵၼ်ၵူၼ်းသိုဝ်ႈတေႃႇ၊ ၵွပ်ႈပိူဝ်ႈၵူၼ်းတင်းလၢႆမီးတႂ်ႈဢႃႇၼႃႇဢပႅတ်ႈမိူၼ်မိူၼ်ၵၼ်ၼၼ်ႉဢေႃႈ။ ၵူၼ်းတင်းလၢႆလႆႈပဵၼ်ၵူၼ်းသိုဝ်ႈတေႃႇမႃးၵႃႈၼႂ်းတၢင်းဢၼ်ယုမ်ႇမၢတ်ႈၸဝ်ႈယေႇသူႉၶရိၸ်ႈဢေႃႈ။ တမၢၼ်ႇၸဝ်ႈပေႃးလူႉသမ်ႉမွၵ်ႇလၢတ်ႈၼႄထႅင်ႈလွင်ႈၸူဝ်ႈတႃႇဢသၢၵ်ႈဢၼ်မႂ်ႇဢၼ်လႆႈပဵၼ်ၵူၼ်းသိုဝ်ႈတေႃႇၼႂ်းၸဝ်ႈၶရိၸ်ႈလႄႈ လႆႈၶၢမ်ႇဢဝ်ဢၵျူဝ်းတြႃးမိၵ်ႉသႃႇႁႃယႃႉဢၼ်မႂ်ႇ ၼႂ်းၽြႃးပဵၼ်ၸဝ်ႈၼၼ်ႉဢေႃႈ။ ၵူၼ်းၸိူဝ်းယုမ်ႇမၢတ်ႈတင်းလၢႆ လႆႈယူႇၼိမ်လီၼႂ်းၽြႃးပဵၼ်ၸဝ်ႈ ဢိၵ်ႇတင်းလႆႈလွတ်ႈသေတၼ်းၶူဝ်းဢပႅတ်ႈတင်းတြႃးတၢင်းတၢႆ ၵွပ်ႈပိူဝ်ႈဝီႉၺိၺ်ႇၽြႃးပဵၼ်ၸဝ်ႈဢေႃႈ။ ၵႃႈၼႂ်းဢၶၢၼ်းလူင် 5 တေႃႇ 8 ၼၼ်ႉတမၢၼ်ႇၸဝ်ႈပေႃးလူႉယင်းၽုၺ်ႇၼႄ ၼႄးဢူႉပတေႇၽြႃးပဵၼ်ၸဝ်ႈ ဢိၵ်ႇတင်းတၼ်းၶူဝ်းဝီႉၺိၺ်ႇၽြႃးပဵၼ်ၸဝ်ႈ ပွင်ႁဵတ်းပွင်မႄးၵႃႈၼႂ်းၸူဝ်ႈတႃႇဢသၢၵ်ႈၵူၼ်းၸိူဝ်းယုမ်ႇမၢတ်ႈၼၼ်ႉဢေႃႈ။ မိူဝ်ႈၼၼ်ႉတမၢၼ်ႇၸဝ်ႈပေႃးလူႉသမ်ႉသပ်းလႅင်းလွင်ႈဢၼ်ၵူၼ်းမဵဝ်းယူႉတႃႉၶဝ် တင်းၵူၼ်းတၢင်ႇၸိူဝ်ႉတၢင်ႇၶိူဝ်းထိူၵ်ႈၶၢမ်ႇဢဝ်ဢၵျူဝ်းတၢင်းဢၼ်ၽြႃးပဵၼ်ၸဝ်ႈၶိုင်ပွင်ပုၼ်ႈၵူၼ်းလေႃးၵီႇတင်းလၢႆၼၼ်ႉဢေႃႈ။ မၼ်းဝူၼ်ႉထိုင်ဝႃႈ ၽြႃးပဵၼ်ၸဝ်ႈမီးဢၵျၢမ်ႇဢဝ်တၢင်းဢၼ်ၵူၼ်းမဵဝ်းယူႉတႃႉၶဝ်ပႄႇပႅတ်ႈၸဝ်ႈယေႇသူႉၼၼ်ႉႁႂ်ႈမဵဝ်းၵူၼ်းတင်းသဵင်ႈတင်းလူင်ႁပ်ႉၶၢမ်ႇၵျေးၸူးၽြႃးပဵၼ်ၸဝ်ႈၼႂ်းၸဝ်ႈၶရိၸ်ႈလႄႈ ၶဝ်တၵ်းပႄႇပႅတ်ႈသေႇသေႇဢမ်ႇၸႂ်ႈၼၼ်ႉဢေႃႈ။ တီႈသုတ်းတီႈၵွႆမၼ်းတႅမ်ႈလွင်ႈၶရိၸ်ႈယၢၼ်ႇ တၵ်းလႆႈႁဵတ်းၸိူဝ်ႉႁိုဝ်ၼႂ်းတၢင်းဢၼ်ႁဵတ်းဝၢတ်ႈၽြႃး ဢိၵ်ႇတင်းဝူတ်ႈတြႃးၶရိၸ်ႈယၢၼ်ႇၼင်ႇၵၼ်ၵၼ်၊တင်း လွင်ႈၸႂ်ဢၼ်ႁူႉတူဝ်ၸဝ်ႈၵဝ်ႇၼၼ်ႉဢေႃႈ။ မၼ်းဢဝ်တင်းၵႂၢမ်းဢၼ်တၵ်ႉလၢတ်ႈတီႈၵေႃႉလႂ်ၵေႃႉၼၼ်ႉလႂ် တင်းတၢင်းဢၼ်ယွင်ႈယေႃးၵျေးၸူးၽြႃးပဵၼ်ၸဝ်ႈၼၼ်ႉလူပ်းၶေႃႈၵႂၢမ်းမၼ်းဢေႃႈ။
ႁူဝ်ၶေႃႈဢၼ်ၶဝ်ႈပႃးၸမ်ႉ
ၵႂၢမ်းၼမ်းဢိၵ်ႇတင်းႁူဝ်ႁုပ်ႈၽိုၼ်လိၵ်ႈ 1:1-17
ၵူၼ်းလူဝ်ႇတြႃးတၢင်းဢၼ်ၵႄႇၶျွတ်ႈဢဝ် 1:18-3:20
သဵၼ်ႈတၢင်းတြႃးတၢင်းဢၼ်ၵႄႇၶျွတ်ႈဢဝ် 3:21-4:25
ၸူဝ်ႈတႃႇဢသၢၵ်ႈဢၼ်မႂ်ႇၼႂ်းၸဝ်ႈၶရိၸ်ႈ 5:1-8:39
ၵူၼ်းမဵဝ်းဢီႉသရေႇလႃႉၼႂ်းဢလူဝ်ႇၽြႃးပဵၼ်ၸဝ်ႈ 9:1-11:36
ဝူတ်ႈတြႃးၶရိၸ်ႈယၢၼ်ႇလႂ် 12:1-15:13
လူပ်းၶေႃႈၵႂၢမ်း တင်းၵႂၢမ်းတူင်ႉတၵ်ႉ 15:14-16:27
Currently Selected:
ရူဝ်းမႃႉ ၵႂၢမ်းၼမ်း: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship