ယူဝ်းႁၢၼ်ႇ 19
19
1မိူဝ်ႈၼၼ်ႉၶုၼ်ပီႉလတ်ႉဢဝ်ယေႇသူႉလႄႈ ပေႃႉယႅၼ်ႉသေယဝ်ႉ၊- 2ၵူၼ်းသိုၵ်းတင်းလၢႆဢဝ်ပၢၼ်းၵုမ်းဢၼ်ဢဝ်တင်းၼၢမ်သၢၼ်ႁဵတ်းၼၼ်ႉ တၢင်ႇသႂ်ႇၵႃႈၼိူဝ်ႁူဝ်မၼ်းၸဝ်ႈလႄႈ ဢဝ်ၶူဝ်းၼုင်ႈဢၼ်လႅင်ၵမ်ႇၼုင်ႈပၼ်မၼ်းၸဝ်ႈသေယဝ်ႉ၊ ဢွၼ်ၵၼ်မႃးၸူးတီႈမၼ်းၸဝ်ႈသေလႄႈလၢတ်ႈဝႃႈ၊- 3ၶုၼ်ႁေႃၶမ်းယူႉတႃႉတီႈၶႃႈဢိူၺ်း၊ ႁႂ်ႈၸဝ်ႈႁဝ်းမီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆလႄႈ ယႅၼ်ႉတူပ်ႇမၼ်းၸဝ်ႈဢေႃႈ။
4ၶုၼ်ပီႉလတ်ႉသမ်ႉၶိုၼ်းဢွၵ်ႇၸူးလႄႈလၢတ်ႈဝႃႈ၊ ၼင်ႇႁိုဝ်သူတၵ်းႁူႉလွင်ႈဢၼ်ၵဝ်ဢမ်ႇထူပ်းဢပႅတ်ႈတီႈၵေႃႉၼႆႉသေၸိူဝ်ႉသေပိူင်ၼၼ်ႉၸိုင်ၵဝ်ဢဝ်ၵေႃႉၼႆႉ ဢွၵ်ႇၼႄတီႈသူဢေႃႈ၊ ဝႃႈၼင်ႇၼႆဢေႃႈ။- 5မိူဝ်ႈၼၼ်ႉယေႇသူႉၵေႃႈတိုဝ်းပၢၼ်းၵုမ်းၼၢမ်ယူႇ၊ ၼုင်ႈတင်းၶူဝ်းဢၼ်လႅင်ၵမ်ႇယူႇသေလႄႈဢွၵ်ႇၵႂႃႇဢေႃႈ။ ၶုၼ်ပီႉလတ်ႉၵေႃႈ လၢတ်ႈတီႈၶဝ်လႄႈဝႃႈ၊ တူၺ်းၵူၼ်းၵေႃႉၼႆႉလူး၊ ဝႃႈၼင်ႇၼႆဢေႃႈ။
6ယိတ်ႈပရေႃးႁဵၵ်ႈလူင် ဢိၵ်ႇတင်းၵူၼ်းဢွၼ်ႇၸၢႆးၸိူဝ်းၼၼ်ႉ ႁၼ်မၼ်းၸဝ်ႈသေယဝ်ႉ၊ ႁွင်ႉသႅၼ်ႇသေလႄႈဝႃႈ၊ ဢဝ်မၼ်းတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈသေၵမ်းၶႃႈ။ တွၵ်ႇဝႆႉသေၵမ်းၶႃႈ၊ ဝႃႈၼင်ႇၼႆဢေႃႈ။ ၶုၼ်ပီႉလတ်ႉၵေႃႈလၢတ်ႈလႄႈဝႃႈ၊ သူဢဝ်မၼ်းတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈတႃႉ။ ၵဝ်ဢမ်ႇထူပ်းဢပႅတ်ႈတီႈမၼ်းၼႆႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 7ၵူၼ်းယူႉတႃႉၸိူဝ်းၼၼ်ႉၵေႃႈ၊ လဝ်ႊလၢတ်ႈလႄႈဝႃႈ၊ ႁဝ်းၶႃႈမီးထမ်ႇမသၢတ်ႈယူႇၶႃႈဢေႃႈ။ ပိူဝ်ႈဢၼ်ၵေႃႉၼႆႉႁဵတ်းၸိူဝ်ႉၼင်ႇႁၢင်ႈပဵၼ်လုၵ်ႈၽြႃးပဵၼ်ၸဝ်ႈလႄႈ ၸွမ်းၼင်ႇထမ်ႇမသၢတ်ႈၼၼ်ႉ မၼ်းထိူၵ်ႈၶၢမ်ႇတၢင်းတၢႆၶႃႈဢေႃႈ၊ ဝႃႈၼင်ႇၼႆဢေႃႈ။
8မိူဝ်ႈဢၼ်ငိၼ်းၵႂၢမ်းၼၼ်ႉၸိုင် ၶုၼ်ပီႉလတ်ႉ ယဵင်ႈၶႅၼ်းၵူဝ်ၼႃႇလႄႈ၊- 9သမ်ႉၶိုၼ်းၶဝ်ႈၵႃႈၼႂ်းႁေႃသေယဝ်ႉ၊ ထၢမ်ယေႇသူႉလႄႈဝႃႈ၊ မႂ်းပဵၼ်ၵႃႈတီႈလႂ်မႃး၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉဢမ်ႇၶိုၼ်း လၢတ်ႈၵႂၢမ်းသေၶေႃႈသေၵမ်း။- 10ၵမ်းၼၼ်ႉ ၶုၼ်ပီႉလတ်ႉၵေႃႈလၢတ်ႈလႄႈဝႃႈ၊ မႂ်းဢမ်ႇလၢတ်ႈၵႂၢမ်းတေႃႇၵဝ်ႁိုဝ်။ မႂ်းဢမ်ႇႁူႉလွင်ႈဢၼ်ၵဝ်ပိူင်ႇပွႆႇမႂ်းလွတ်ႈ ဢိၵ်ႇတင်းလွင်ႈဢၼ်ၵဝ်ပိူင်ႇဢဝ်မႂ်းတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 11ယေႇသူႉၶိုၼ်းလၢတ်ႈလႄႈဝႃႈ၊ ပေႃးဢမ်ႇလႆႈဢၶႂၢင်ႉၵႃႈတီႈၼိူဝ်ၸိုင်၊ ၶုၼ်လူင်ဢမ်ႇပိူင်ႇႁဵတ်းတီႈၵဝ်လႆႈသေၸိူဝ်ႉသေပိူင်။ ပိူဝ်ႈၼႆလႄႈ ၵေႃႉဢၼ်ဢဝ်ၵဝ်ဢၢပ်ႈၼႂ်းမိူဝ်ႈၶုၼ်လူင်ၼၼ်ႉ ယဵင်ႈၶႅၼ်းမီးဢပႅတ်ႈဢၼ်ယႂ်ႇၼႃႇဢေႃႈ၊ ဝႃႈၼင်ႇၼႆဢေႃႈ။- 12ၸႃႉၸဵမ်မိူဝ်ႈၼၼ်ႉလႄႈၶုၼ်ပီႉလတ်ႉၼၼ်ႉ ၵျၢမ်ႇႁႃႁႂ်ႈလႆႈပွႆႇမၼ်းၸဝ်ႈလွတ်ႈယူႇဢေႃႈ။ ၵူၼ်းယူႉတႃႉၸိူဝ်းၼၼ်ႉၵေႃႈႁွင်ႉသႅၼ်ႇသေလႄႈဝႃႈ၊ ပေႃးၸဝ်ႈႁဝ်းပွႆႇၵေႃႉၼႆႉလွတ်ႈၸိုင်၊ ၸဝ်ႈႁဝ်းဢမ်ႇပဵၼ်ၵေႃႉပဵၼ်သေႈၵၼ်တင်း ၶုၼ်ႁေႃၶမ်းၵေႇသႃႇ ၶႃႈယဝ်ႉ။ ၵေႃႉဢၼ်ႁဵတ်းၶုၼ်ႁေႃၶမ်းၸမ်ႉ၊ ပဵၼ်ရၢၼ်ႇသူႇၶုၼ်ႁေႃၶမ်းၵေႇသႃႇၶႃႈဢေႃႈ၊ ဝႃႈၼင်ႇၼႆဢေႃႈ။
13မိူဝ်ႈဢၼ်ငိၼ်းၵႂၢမ်းၼၼ်ႉၸိုင်၊ ၶုၼ်ပီႉလတ်ႉဢဝ်ယေႇသူႉဢွၵ်ႇၵႂႃႇၵႃႈၼွၵ်ႈသေယဝ်ႉ၊ ၼင်ႈယူႇၵႃႈၼိူဝ်ပလၢင်ႇတြႃးၼႂ်းတီႈဢၼ်လႆႈႁွင်ႉႁဵၵ်ႈ မၢၵ်ႇႁိၼ်သိူဝ်ႇ၊ ဢၼ်ၸွမ်းၼင်ႇၵႂၢမ်းၽႃႇသႃႇႁေႇပြႄး ႁွင်ႉႁဵၵ်ႈ ၵပ်ႉပထႃႉၼၼ်ႉဢေႃႈ။- 14ဝၼ်းၼၼ်ႉၸမ်ႉ၊ ပဵၼ်ဝၼ်းၽိတ်ႈပႃႉသၶႃႇလႄႈ ပဵၼ်ၶိင်ႇႁူၵ်းၼႃႇရီႇၸမ်ၸမ်ဢေႃႈ။ ၶုၼ်ပီႉလတ်ႉၵေႃႈလၢတ်ႈတီႈၵူၼ်းယူႉတႃႉၸိူဝ်းၼၼ်ႉလႄႈဝႃႈ၊ တူၺ်းၶုၼ်ႁေႃၶမ်းသူၼႆႉလူး၊ မိူဝ်ႈဢၼ်ဝႃႈၼင်ႇၼႆၸိုင်၊- 15ၶဝ်ၼၼ်ႉၵေႃႈႁွင်ႉသႅၼ်ႇသေလႄႈဝႃႈ၊ ဢဝ်မၼ်းဢွၵ်ႇပႅတ်ႈသေၵမ်းၶႃႈ။ ဢဝ်ဢွၵ်ႇပႅတ်ႈသေၵမ်းၶႃႈ။ ဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈသေၵမ်းၶႃႈ၊ ဝႃႈၼင်ႇၼႆဢေႃႈ။ ၶုၼ်ပီႉလတ်ႉၵေႃႈၶိုၼ်းထၢမ်လႄႈဝႃႈ၊ ၵဝ်တၵ်းလႆႈဢဝ်ၶုၼ်ႁေႃၶမ်းသူ တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ယိတ်ႈပရေႃးႁဵၵ်ႈလူင်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ တီႈႁဝ်းၶႃႈၼႆႉလိူဝ်သေၶုၼ်ႁေႃၶမ်းၵေႇသႃႇၼၼ်ႉ ဢမ်ႇမီးၶုၼ်ႁေႃၶမ်းသေပႃးၶႃႈ၊ ဝႃႈၼင်ႇၼႆဢေႃႈ။- 16မိူဝ်ႈၼၼ်ႉၶုၼ်ပီႉလတ်ႉဢဝ်မၼ်းၸဝ်ႈ ဢၢပ်ႈပၼ်ၵႃႈၼႂ်းမိုဝ်းၶဝ် ႁႂ်ႈၶဝ်လႆႈဢဝ်ယေႇသူႉ တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈလႄႈ ၶဝ်ၼၼ်ႉဢဝ်မၼ်းၸဝ်ႈဢွၵ်ႇၵႂႃႇဢေႃႈ။
ဢဝ်ၸဝ်ႈယေႇသူႉတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈ
(တူၺ်း၊ မၢတ်ႈ 27:33-44။ မႃႇ 15:22-32။ လူႉ 23:33-43)
17မၼ်းၸဝ်ႈ ႁၢပ်ႇသဝ်လၵ်းဝႃးၵၢပ်ႈ တူဝ်ၸဝ်ႈၵဝ်ႇသေလႄႈ ဢွၵ်ႇၵႂႃႇၸူးၵႃႈတီႈဢၼ်လႆႈႁွင်ႉႁဵၵ်ႈၸိုဝ်ႈ တီႈၵွၵ်းႁူဝ်ၼၼ်ႉဢေႃႈ။ တီႈၼၼ်ႉၸမ်ႉ၊ ၸွမ်းၼင်ႇၵႂၢမ်းၽႃႇသႃႇ ႁေႇပြႄး လႆႈၸိုဝ်ႈ ၵေႃးလႃႉၵေႃးထႃႉဢေႃႈ။- 18ၶဝ်ဢဝ်မၼ်းၸဝ်ႈဢိၵ်ႇတင်း ၵူၼ်းတၢင်ႇတီႈသွင်ၵေႃႉလႄႈ တွၵ်ႇဝႆႉၵႃႈၼိူဝ် သဝ်လၵ်းဝႃးၵၢပ်ႈၵႃႈတီႈၼၼ်ႈဢေႃႈ။ ယေႇသူႉတူၵ်းၵႃႈတီႈၶိုင်ႈၵၢင် ၶဝ်သွင်ၵေႃႉၼၼ်ႉဢေႃႈ။- 19ၶုၼ်ပီႉလတ်ႉၵေႃႈ တႅမ်ႈလိၵ်ႈသေလႄႈဢဝ်ဝႆႉၵႃႈၼိူဝ်သဝ်လၵ်းဝႃးၵၢပ်ႈမၼ်းၸဝ်ႈဢေႃႈ။ လိၵ်ႈဢၼ်တႅမ်ႈဝႆႉၼၼ်ႉဝႃႈၸမ်ႉ၊ ယေႇသူႉၵူၼ်းဝဵင်းၼႃႇၸရႅတ်ႈ၊ ၶုၼ်ႁေႃၶမ်းယူႉတႃႉ၊ ဝႃႈၼင်ႇၼႆဢေႃႈ။
20ၵွပ်ႈပိူဝ်ႈဢၼ်တီႈဢၼ်ၶဝ်ဢဝ်ယေႇသူႉ တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈၼၼ်ႉ ၸမ်ၵၼ်တင်းဝဵင်းဢိၵ်ႇတင်းၵွပ်ႈပိူဝ်ႈဢၼ်ၶဝ်ဢဝ်တင်းၵႂၢမ်းႁေႇပြႄးတင်း ၵႂၢမ်းႁေႇလသႃႉ တင်းၵႂၢမ်းရူဝ်းမႃႉတႅမ်ႈလိၵ်ႈၼၼ်ႉဝႆႉၼၼ်ႉလႄႈ ၵူၼ်းယူႉတႃႉၼမ်ၼႃႇၽတ်းတူၺ်းဢေႃႈ။- 21ပိူဝ်ႈၼႆလႄႈ ယိတ်ႈပရေႃးႁဵၵ်ႈလူင်ယူႉတႃႉၸိူဝ်းၼၼ်ႉ ၶဝ်ႈၸူးၵႃႈတီႈၶုၼ်ပီႉလတ်ႉသေလႄႈလဝ်ႊလၢတ်ႈလႄႈဝႃႈ၊ ၶႅၼ်းတေႃႈယႃႇပေတႅမ်ႈလႄႈဝႃႈ၊ ၶုၼ်ႁေႃၶမ်းယူႉတႃႉ၊ ဝႃႈၼင်ႇၼႆၼၼ်ႉသေၵမ်းၶႃႈ။ ၸဝ်ႈႁဝ်းၶႅၼ်းတေႃႈတႅမ်ႈဝႆႉ လွင်ႈဢၼ်မၼ်းဝႃႈ၊ ၵဝ်ပဵၼ်ၶုၼ်ႁေႃၶမ်းယူႉတႃႉဢေႃႈ၊ ဝႃႈၼင်ႇၼႆၼၼ်ႉသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 22ၶုၼ်ပီႉလတ်ႉၵေႃႈၶိုၼ်းလၢတ်ႈလႄႈဝႃႈ၊ ဢၼ်ၵဝ်တႅမ်ႈဝႆႉယဝ်ႉၼၼ်ႉၵဝ်တႅမ်ႈဝႆႉယဝ်ႉ၊ ဝႃႈၼင်ႇၼႆဢေႃႈ။
23ၵူၼ်းသိုၵ်းၸိူဝ်းၼၼ်ႉဢဝ်ယေႇသူႉတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈသေယဝ်ႉ၊ တႅပ်းၶူဝ်းၼုင်ႈမၼ်းၸဝ်ႈႁဵတ်းသီႇပွတ်းသေလႄႈ ဢဝ်ယေႈၵေႃႉယေႈပွတ်းဢေႃႈ။ သိူဝ်ႈလွင်ႁိူဝ်ႇလွင်ၶႆးၸဝ်ႈၸမ်ႉ၊ ယင်းဢမ်ႇယဵပ်ႉလႄႈ တေႃးၸႃႉၸဵမ်တီႈသုတ်းတၢင်းၼိူဝ် တေႃႇထိုင်ႁွတ်ႈတီႈသုတ်းတၢင်းတႂ်ႈဢေႃႈ။- 24ပိူဝ်ႈၼႆလႄႈၶဝ်ၼၼ်ႉၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊ သိူဝ်ႈၼႆႉၸိုင်ယႃႇပေသိၵ်ႇတႃႉႁဝ်း။ တူၵ်းၸႃႇၵွၵ်ႈလွင်ႈဢၼ် ၽူႈလႂ်တၵ်းလႆႈဢဝ်ၼၼ်ႉတႃႉႁဝ်း၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ လွင်ႈၼင်ႇႁိုဝ်ၵႂၢမ်းဢၼ်မႃးၼႂ်းၵျၢမ်းလိၵ်ႈလႄႈဝႃႈ၊ ၶဝ်ဢဝ်ၶူဝ်းၼုင်ႈၵဝ်ၶႃႈၽႄမႅင်ႇၵၼ်လႄႈ ဢဝ်သိူဝ်ႈၵဝ်ၶႃႈတူၵ်းၸႃႇၵွၵ်ႈတီႈၶႃႈဢေႃႈ၊ ဝႃႈၼင်ႇၼႆၼၼ်ႉတၵ်းပျေႉၸုမ်ႇၸိုင် ၵူၼ်းသိုၵ်းၸိူဝ်းၼၼ်ႉ ၸင်ႇႁဵတ်းၸိူဝ်ႉၼင်ႇၼၼ်ဢေႃႈ။
25မႄႈၸဝ်ႈဢိၵ်ႇတင်း ၼွင်ႉယိင်းမႄႈၸဝ်ႈမႃႇရီႉ ဢၼ်ပဵၼ်မႄႈၵလေႃးၽႃႉ တင်းမႃႇရီႉမႃႇၵတလႃႉၸိူဝ်းၼၼ်ႉၸုၵ်းယူႇ ၵႃႈတီႈႁိမ်းသဝ်လၵ်းဝႃးၵၢပ်ႈ ယေႇသူႉဢေႃႈ။- 26ပိူဝ်ႈၼႆလႄႈ မိူဝ်ႈဢၼ်ယေႇသူႉႁၼ်မႄႈၸဝ်ႈ တင်းတပႄးၸဝ်ႈ ဢၼ်မၼ်းၸဝ်ႈႁၵ်ႉၼၼ်ႉၸုၵ်းယူႇၵႃႈတီႈႁိမ်းၼၼ်ႉၸိုင်၊ မၼ်းၸဝ်ႈလၢတ်ႈတီႈမႄႈၸဝ်ႈလႄႈဝႃႈ၊ မႄႈယိင်းဢိူၺ်း၊ တူၺ်းလုၵ်ႈၸၢႆးမႂ်းသေၵမ်း၊ ဝႃႈၼင်ႇၼႆလႄႈ၊- 27သမ်ႉလၢတ်ႈတီႈတပႄးၸဝ်ႈၼၼ်ႉလႄႈဝႃႈ၊ တူၺ်းမႄႈမႂ်းသေၵမ်း၊ ဝႃႈၼင်ႇၼႆဢေႃႈ။ ၸႃႉၸဵမ်မိူဝ်ႈၼၼ်ႉလႄႈ တပႄးၸဝ်ႈၼၼ်ႉဢဝ်မႄႈၸဝ်ႈဝႆႉၵႃႈၼႂ်းႁိူၼ်းမၼ်းဢေႃႈ။
လွင်ႈတၢင်းတၢႆၸဝ်ႈယေႇသူႉ
(တူၺ်း၊ မၢတ်ႈ 27:45-56။ မႃႇ 15:33-41။ လူႉ 23:44-49)
28လိုၼ်းၼၼ်ႉ မိူဝ်ႈဢၼ်ယေႇသူႉႁူႉလွင်ႈဢၼ်လွင်ႈတၢင်းၵႃႈမီးတင်းသဵင်ႈတင်းလူင် သဵင်ႈမူတ်းယဝ်ႉၼၼ်ႉ၊ ၼင်ႇႁိုဝ်ၵျၢမ်းလိၵ်ႈတၵ်းပျေႉၸုမ်ႇၸိုင်၊ မၼ်းၸဝ်ႈလၢတ်ႈလႄႈဝႃႈ၊ ၵဝ်တွင်ႉမႆႈၼမ်ႉဢေႃႈ၊ ဝႃႈၼင်ႇၼႆဢေႃႈ။- 29ပိူဝ်ႈဢၼ်မီးမေႃႈဢၼ်တဵမ်ဝႆႉတင်းၼမ်ႉပုင်းယေႇလုၵ်းၼိုင်ႈၵႃႈတီႈၼၼ်ႈလႄႈ၊ ၶဝ်ၼၼ်ႉဢဝ်ႁိပ်ႇၼမ်ႉဢၼ်ႁႂ်ႈတဵမ်ဝႆႉတင်းၼမ်ႉပုင်းယေႇၼၼ်ႉ သႂ်ႇၵႃႈတီႈပၢႆၵိင်ႇမႆႉႁုတ်ႉသူပ်ႇသေလႄႈ ဢဝ်ၸပ်းသႂ်ႇဝႆႉ ၵႃႈတီႈသူပ်းမၼ်းၸဝ်ႈဢေႃႈ။- 30ယေႇသူႉၶၢမ်ႇဢဝ်ၼမ်ႉပုင်းယေႇသေယဝ်ႉ၊ လၢတ်ႈလႄႈဝႃႈ၊ လွင်ႈတၢင်းယဝ်ႉတူဝ်ႈယဝ်ႉ၊ ဝႃႈၼင်ႇၼႆသေလႄႈ ၵူမ်ႈႁူဝ်မၼ်းၸဝ်ႈတူၵ်းလႄႈ ၸုၼ်ႉဢသၢၵ်ႈမၼ်းၸဝ်ႈသေဢေႃႈ။
31ပိူဝ်ႈဢၼ်ဝၼ်းၼၼ်ႉ ပဵၼ်ဝၼ်းၽိတ်ႈလႄႈ ဝၼ်းမိူဝ်ႈၽုၵ်ႈၵေႃႈ ပဵၼ်ဝၼ်းၵမ်သိၼ်ဢၼ်ယႂ်ႇမျၢတ်ႈၼႃႇၼၼ်ႉလႄႈ၊ ၼင်ႇႁိုဝ်တူဝ်တၢႆၸိူဝ်းၼၼ်ႉ တၵ်းဢမ်ႇလႆႈမီးၵႃႈၼိူဝ်သဝ်လၵ်းဝႃးၵၢပ်ႈ ၼႂ်းဝၼ်းၵမ်သိၼ်ၸိုင်၊ ၵူၼ်းယူႉတႃႉၸိူဝ်းၼၼ်ႉ ၶဝ်ႈၸူးၵႃႈတီႈၶုၼ်ပီႉလတ်ႉသေယဝ်ႉ၊ ယွၼ်းဢၶႂၢင်ႉႁႂ်ႈလႆႈႁၵ်းတိၼ်ၶဝ်သေလႄႈ ဢဝ်ၶဝ်ၵႂႃႇပႅတ်ႈဢေႃႈ။- 32မိူဝ်ႈၼၼ်ႉၵူၼ်းသိုၵ်းၸိူဝ်းၼၼ်ႉၵႂႃႇလႄႈ ႁၵ်းတိၼ်ၵေႃႉၼိုင်ႈသေယဝ်ႉ၊ ႁၵ်းတိၼ်တၢင်ႇၵေႃႉဢၼ်ဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။- 33မိူဝ်ႈဢၼ်ၶဝ်ႁွတ်ႈထိုင်ၵႃႈတီႈယေႇသူႉလႄႈ ႁူႉႁၼ်လွင်ႈဢၼ်ဢသၢၵ်ႈမၼ်းၸဝ်ႈဢမ်ႇမီးၼၼ်ႉၸိုင်၊ ၶဝ်ယင်းဢမ်ႇႁၵ်းတိၼ်မၼ်းၸဝ်ႈလႄႈယူႇဢေႃႈ။- 34ၵူၺ်းၵႃႈၵူၼ်းသိုၵ်းၵေႃႉၼိုင်ႈဢဝ်ႁွၵ်ႇတႅင်းသႂ်ႇပဵမ်ႉမၼ်းၸဝ်ႈၼၼ်ႉလႄႈ လိူတ်ႈတင်းၼမ်ႉ ဢွၵ်ႇမႃးၵမ်းလဵဝ်ဢေႃႈ။
35ၵေႃႉဢၼ်ႁၼ်လွင်ႈတၢင်းၼၼ်ႉၶၢမ်ႇသၢၵ်ႈသေႇဢေႃႈ။ တၢင်းဢၼ်မၼ်းၶၢမ်ႇသၢၵ်ႈသေႇၼၼ်ႉၵေႃႈ ပဵၼ်ဢၼ်မၢၼ်ႇဢၼ်မႅၼ်ႈဢေႃႈ။ ၼင်ႇႁိုဝ်သူတၵ်းယုမ်ႇမၢတ်ႈၸိုင်၊ မၼ်းႁူႉလွင်ႈဢၼ် ၵႂၢမ်းဢၼ်မၼ်းၸဝ်ႈလၢတ်ႈၼၼ်ႉ ပဵၼ်ဢၼ်မၢၼ်ႇဢၼ်မႅၼ်ႈၼၼ်ႉဢေႃႈ။- 36လွင်ႈတၢင်းၸိူဝ်းၼၼ်ႉၸမ်ႉ၊ လွင်ႈၼင်ႇႁိုဝ်ၵျၢမ်းလိၵ်ႈဢၼ်ဝႃႈ၊ လုပ်ႇမၼ်းၸိုင်ဢမ်ႇလႆႈႁၵ်း၊ ဝႃႈၼင်ႇၼႆၼၼ်ႉ တၵ်းပျေႉၸုမ်ႇၸိုင်၊ ၸင်ႇပဵၼ်ဢေႃႈ။- 37ၵျၢမ်းလိၵ်ႈသမ်ႉမႃးထႅင်ႈလႄႈဝႃႈၸမ်ႉ၊ ၶဝ်တၵ်းလႆႈဢွၼ်ၵၼ်တူၺ်းႁၼ်ၵေႃႉဢၼ်ၶဝ်တႅင်းပွင်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။
သၢင်းၵျူဝ်ႇၸဝ်ႈယေႇသူႉ
(တူၺ်း၊ မၢတ်ႈ 27:57-61။ မႃႇ 15:42-47။ လူႉ 23:50-56)
38လိုၼ်းၼၼ်ႉ ယူဝ်းသႅပ်ႈ ၵူၼ်းဝဵင်းဢရီႉမသႄး ဢၼ်ပဵၼ်တပႄးၸဝ်ႈဢမ်ႇထၢင်ႇဢမ်ႇသႃးၵွပ်ႈပိူဝ်ႈဢၼ်ၵူဝ်ၵူၼ်းယူႉတႃႉတင်းလၢႆၼၼ်ႉ ၶဝ်ႈၸူးၵႃႈတီႈၶုၼ်ပီႉလတ်ႉသေလႄႈ ယွၼ်းဢၶႂၢင်ႉႁႂ်ႈလႆႈဢဝ်တူဝ်တၢႆယေႇသူႉၵႂႃႇဢေႃႈ။ မိူဝ်ႈဢၼ်ၶုၼ်ပီႉလတ်ႉ ပၼ်ဢၶႂၢင်ႉယဝ်ႉၼၼ်ႉၸိုင်၊ မၼ်းၼၼ်ႉၵႂႃႇလႄႈ ဢဝ်တူဝ်တၢႆယေႇသူႉၵႂႃႇဢေႃႈ။- 39ၼီႉၵေႃးတိၼ်ႇ ဢၼ်မႃးတီႈမၼ်းၸဝ်ႈ ၶိင်ႇၵၢင်ၶိုၼ်းမိူဝ်ႈၼၼ်ႉၼၼ်ႉၵေႃႈ၊ ဢဝ်ယႃႈႁွမ်ဢၼ်လေႃးၵၼ်တင်းမူႉရၼ်ႇတင်းဢၵျေုႇ ဢၼ်ၼမ်ႉၼၵ်းမၼ်းမီးသေသၢမ်သိပ်းၸွႆႉၼိုင်ႈၼၼ်ႉလႄႈ ပႃးမႃးဢေႃႈ။- 40ၶဝ်ၼၼ်ႉဢဝ်တူဝ်တၢႆယေႇသူႉလႄႈ ဢဝ်ၼၢမ်ႇသႃႇဢိၵ်ႇတင်းၽႃႈပိၵ်ႈၶဵၼ်းႁေႃႇၸွမ်းၼင်ႇထုင်းၸၢမ်ႇလွင်ႈတၢင်းဢၼ်မႄးႁႅၼ်းဝႆႉ ဢၼ်ၸၢပ်ႈသႅင်ႇၵၼ်တင်း တၢင်းဢၼ်သၢင်းၵျူဝ်ႇၵူၼ်းယူႉတႃႉတင်းလၢႆၼၼ်ႉဢေႃႈ။- 41ၵႃႈၼႂ်းတီႈဢၼ်ဢဝ်မၼ်းၸဝ်ႈတွၵ်ႇဝႆႉၵႃႈၼိူဝ်သဝ်လၵ်းဝႃးၵၢပ်ႈၼၼ်ႉမီးသူၼ်ဢူးယဵၼ်ႇဢေႃႈ။ ၵႃႈၼႂ်းသူၼ်ဢူးယဵၼ်ႇၼၼ်ႉမီးၶုမ်သၢင်းၶႅင်း ဢၼ်ဢမ်ႇပႆႇတွၼ်ႉသၢင်းၵျူဝ်ႇၽူႈလႂ်သေၵေႃႉၼၼ်ႉၶုမ်ၼိုင်ႈဢေႃႈ။- 42ပိူဝ်ႈဢၼ်ပဵၼ်ဝၼ်းၽိတ်ႈၵူၼ်းယူႉတႃႉဢိၵ်ႇတင်း ပိူဝ်ႈဢၼ်ၶုမ်သၢင်းၶႅင်းၼၼ်ႉ မီးၸမ်ၵႃႈတီႈႁိမ်းၼၼ်ႉလႄႈ ၶဝ်ဢဝ်တူဝ်တၢႆ ယေႇသူႉ ဝႆႉၵႃႈၼႂ်းၶုမ်သၢင်းၶႅင်းၼၼ်ႉဢေႃႈ။
Currently Selected:
ယူဝ်းႁၢၼ်ႇ 19: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
