ယူဝ်းႁၢၼ်ႇ 15

ၸဝ်ႈယေႇသူႉပဵၼ်ၶိူဝ်းမၢၵ်ႇၸပိတ်ႈ

1ၵဝ်ပဵၼ်ၶိူဝ်းမၢၵ်ႇၸပိတ်ႈဢၼ်ၸိုဝ်ႈဢၼ်ၸႂ်ႈဢေႃႈ။ ၸဝ်ႈပေႃႈၵဝ်ၼၼ်ႉၵေႃႈ ပဵၼ်ၵေႃႉဢၼ်ပႂ်ႉသူၼ်ဢူးယဵၼ်ႇဢေႃႈ။- 2ဢၼ်ပဵၼ်ၵိင်ႇပဵၼ်ၶႃႊတီႈၵဝ်ဢၼ်ဢမ်ႇမၢၵ်ႇမၢၵ်ႇမၼ်းၵႃႈမီးတင်းသဵင်ႈတင်းလူင်ၼၼ်ႉၸိုင်၊ မၼ်းၸဝ်ႈၽၼ်းပႅတ်ႈဢေႃႈ။ ဢၼ်ပဵၼ်ၵိင်ႇပဵၼ်ၶႃႊ ဢၼ်မၢၵ်ႇမၢၵ်ႇမၼ်းၵႃႈမီးတင်းသဵင်ႈတင်းလူင်ၼၼ်ႉၸိုင် မၼ်းၸဝ်ႈမႄးၽဵဝ်ႈႁႂ်ႈမူတ်းသႂ် ႁႂ်ႈယဵင်ႈၶႅၼ်းလႆႈမၢၵ်ႇမၢၵ်ႇထႅင်ႈဢေႃႈ။- 3တေႃႈလဵဝ်ၼႆႉၵေႃႈ သူပဵၼ်ဢၼ်မူတ်းသႂ် ၵွပ်ႈပိူဝ်ႈၵႂၢမ်းဢၼ်ၵဝ်ႁေႃးလၢတ်ႈၼႆႉယူႇဢေႃႈ။

4တႄႇယူႇၵႃႈၼႂ်းၵဝ်တႃႉ။ ၵဝ်ၵေႃႈတၵ်းတႄႇယူႇၵႃႈၼႂ်းသူဢေႃႈ။ ၸိူဝ်ႉၼင်ႇဢၼ်ပေႃးၵိင်ႇမၢၵ်ႇၸပိတ်ႈဢမ်ႇတႄႇယူႇၵႃႈၼႂ်းတူၼ်ႈမၼ်းၸိုင်၊ မၼ်းဢမ်ႇမၢၵ်ႇမၢၵ်ႇမၼ်းလႆႈၼၼ်ႉ၊ ပေႃးသူဢမ်ႇတႄႇယူႇၵႃႈၼႂ်းၵဝ်ၸိုင်၊ သူဢမ်ႇမၢၵ်ႇမၢၵ်ႇလႆႈ။- 5ၵဝ်ပဵၼ်ၶိူဝ်းမၢၵ်ႇၸပိတ်ႈဢေႃႈ။ သူပဵၼ်ၵိင်ႇမၼ်းၶႃႊမၼ်းဢေႃႈ။ ၽူႈလႂ်သေဢမ်ႇဝႃႈ၊ ၵေႃႉဢၼ်တႄႇယူႇၵႃႈၼႂ်းၵဝ်လႄႈၵဝ်ၵေႃႈတႄႇယူႇၵႃႈၼႂ်းမၼ်းၼၼ်ႉ ၵေႃႉၼၼ်ႉၸၢင်ႈမၢၵ်ႇမၢၵ်ႇမၼ်းၼမ်ၼႃႇဢေႃႈ။ ပေႃးသူၽၢတ်ႇယၢၼ်ၵၼ်တင်းၵဝ်ၸိုင် သူဢမ်ႇတၢတ်ႈၼိူင်ႇလႆႈသေၸိူဝ်ႉသေပိူင်။- 6ၵေႃႉဢၼ်ဢမ်ႇတႄႇယူႇၵႃႈၼႂ်းၵဝ်ၼႆႉၼၼ်ႉ လႆႈၶၢမ်ႇတၢင်းဢၼ်ထိမ်ႈဢွၵ်ႇပႅတ်ႈၸိူဝ်ႉၼင်ႇၵိင်ႇၼင်ႇၶႃႊၼၼ်ႉလႄႈ ႁဵဝ်ႇႁႅင်ႈၵႂႃႇဢေႃႈ။ ၵိင်ႇၶႃႊၸိူဝ်ႉၼင်ႇၼၼ်ၼၼ်ႉၸိုင် ၵူၼ်းၵဵပ်းသိမ်းဢဝ်သႂ်ႇၵႃႈၼႂ်းၽႆးလႄႈ လႆႈၶၢမ်ႇတၢင်းဢၼ်ၽႆးမႆႈဢေႃႈ။- 7ပေႃးသူတႄႇယူႇၵႃႈၼႂ်းၵဝ်လႄႈ၊ ၵႂၢမ်းၵဝ်ၼႆႉတႄႇယူႇၵႃႈၼႂ်းသူၸိုင် ယွၼ်းၵႃႈဢၼ်သူၶႂ်ႈယွၼ်း တင်းသဵင်ႈတင်းလူင်ၼၼ်ႉလႄႈ တၵ်းလႆႈဢေႃႈ။

8မုၼ်ၽုင်းၸဝ်ႈပေႃႈၵဝ် ထၢင်ႇသႃးမႃးၵွပ်ႈပိူဝ်ႈဢၼ်သူမၢၵ်ႇမၢၵ်ႇၼမ်ၼႃႇၼၼ်ႉလႄႈ၊ သူၵေႃႈတၵ်းပဵၼ်တပႄးၵဝ်ဢေႃႈ။- 9ၸိူဝ်ႉၼင်ႇဢၼ်ပေႃႈၸဝ်ႈႁၵ်ႉၵဝ်ၼၼ်ႉ၊ ၵဝ်ႁၵ်ႉသူဢေႃႈ။ တႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇၵဝ်တႃႉ။- 10ၸိူဝ်ႉၼင်ႇဢၼ်ၵဝ်ပႂ်ႉၸွမ်းပိင်းၺၢပ်ႈၸဝ်ႈပေႃႈၵဝ်တင်းလၢႆလႄႈ တႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇမၼ်းၸဝ်ႈယူႇၼၼ်ႉ၊ ပေႃးသူပႂ်ႉၸွမ်းပိင်းၺၢပ်ႈၵဝ်တင်းလၢႆၸိုင်၊ သူတၵ်းတႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇၵဝ်ဢေႃႈ။- 11ၼင်ႇႁိုဝ်လွင်ႈတၢင်းဢၼ်သိူဝ်းပျေႃႇၵဝ်ၼႆႉ တၵ်းမီးယူႇၵႃႈၼႂ်းသူလႄႈသင်၊ ၼင်ႇႁိုဝ်လွင်ႈတၢင်းဢၼ်သိူဝ်းပျေႃႇသူၼၼ်ႉတၵ်းၸေးၸုမ်ႇလႄႈသင်၊ ၵဝ်ႁေႃးလၢတ်ႈၵႂၢမ်းၼႆႉတီႈသူဢေႃႈ။

12ဢၼ်ၵဝ်ပိင်းၺၢပ်ႈၸမ်ႉ၊ ၸိူဝ်ႉၼင်ႇဢၼ်ၵဝ်ႁၵ်ႉသူၼၼ်ႉ သူၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉ။- 13မႅတ်ႈတႃႇဢၼ်ယဵင်ႈၶႅၼ်းယႂ်ႇသေမႅတ်ႈတႃႇ တၢင်းဢၼ်ၵူၼ်းလႆႈၸုၼ်ႉ ဢသၢၵ်ႈတူဝ်ၸဝ်ႈၵဝ်ႇ ပုၼ်ႈတၢင်တူဝ်ၵေႃႉသေႈတူဝ်ၸဝ်ႈၵဝ်ႇတင်းလၢႆၼၼ်ႉ ဢမ်ႇမီးတီႈၽူႈလႂ်သေၵေႃႉသေၵူၼ်း။- 14ပေႃးသူၵမ်ၵျၢင်ႉၵႃႈဢၼ်ၵဝ်ပိင်းၺၢပ်ႈဝႆႉၼၼ်ႉၸိုင်၊ သူပဵၼ်ၵေႃႉသေႈၵဝ်ဢေႃႈ။

15ၸႃႉၸဵမ်တေႃႈလဵဝ်ၼႆႉလႄႈ ၵဝ်ဢမ်ႇႁွင်ႉသူဝႃႈၶႃႈ။ ၶႃႈဢၼ်ဝႃႈၸမ်ႉ၊ ဢမ်ႇႁူႉလွင်ႈတၢင်းဢၼ်ၸဝ်ႈမၼ်းႁဵတ်းၼၼ်ႉ။ ၵဝ်ႁွင်ႉသူဝႃႈၵေႃႉသေႈဢေႃႈ။ လွင်ႈမၼ်းၸမ်ႉ ၵဝ်ၼႄပျႃးၵႃႈဢၼ်ၵဝ်လႆႈငိၼ်းတီႈၸဝ်ႈပေႃႈၵဝ်တင်းသဵင်ႈတင်းလူင်ၼၼ်ႉတီႈသူဢေႃႈ။- 16သူလိူၵ်ႈၵဵပ်းဢဝ်ၵဝ်ဢမ်ႇၸႂ်ႈ။ ၵဝ်လိူၵ်ႈၵဵပ်းဢဝ်သူလႄႈ ၶၢၼ်းသူဝႆႉႁႂ်ႈသူလႆႈၵႂႃႇလႄႈမၢၵ်ႇမၢၵ်ႇ ႁႂ်ႈမၢၵ်ႇသူၸိူဝ်းၼၼ်ႉလႆႈမၼ်ႈၶိူင်ႇ ႁႂ်ႈသူလႆႈဢိင်ပိုင်ႈၼႃႇမႃႉၸိုဝ်ႈသဵင်ၵဝ်သေလႄႈ လႆႈၵႃႈဢၼ်ယွၼ်းတီႈပေႃႈၸဝ်ႈတင်းသဵင်ႈတင်းလူင်ၼၼ်ႉဢေႃႈ။- 17လွင်ႈၼင်ႇႁိုဝ် သူၵေႃႉၼိုင်ႈလႄႈၵေႃႉၼိုင်ႈ တၵ်းႁၵ်ႉၵၼ်ၸိုင်၊ ၵဝ်ပၼ်ပိင်းၺၢပ်ႈၸိူဝ်းၼႆႉ တီႈသူဢေႃႈ။

လွင်ႈဢၼ်ၵူၼ်းလေႃးၵီႇၸင်းတပႄးၸဝ်ႈ

18ပေႃးလေႃးၵႃႉၼႆႉၸင်းသူၸိုင်၊ သူႁူႉလွင်ႈဢၼ်ၸင်းၵဝ်ၸူဝ်ႈဢၼ်ဢမ်ႇပႆႇၸင်းသူၼၼ်ႉဢေႃႈ။- 19ပေႃးသူသိူၵ်ႈသမ်ႇၵၼ်တင်းလေႃးၵႃႉၸိုင်၊ လေႃးၵႃႉၼႆႉတၵ်းႁၵ်ႉသူၸိူဝ်းဢၼ် သိူၵ်ႈသမ်ႇၵၼ်တင်းမၼ်းၼၼ်ႉဢေႃႈ။ ပိူဝ်ႈဢၼ်သူဢမ်ႇသိူၵ်ႈသမ်ႇၵၼ်တင်းလေႃးၵႃႉ၊ ပဵၼ်ၵေႃႉဢၼ်ၵဝ်လိူၵ်ႈၵဵပ်းဢဝ်ၵႃႈၼႂ်းလေႃးၵႃႉၼႆႉလႄႈ လေႃးၵႃႉၼႆႉၸင်းသူဢေႃႈ။- 20ၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ၵဝ်လၢတ်ႈဝႆႉလႄႈဝႃႈ၊ ၶႃႈယဵင်ႈၶႅၼ်းယႂ်ႇမျၢတ်ႈၼႃႇသေၸဝ်ႈမၼ်းဢမ်ႇၸႂ်ႈ၊ ဝႃႈၼင်ႇၼႆၼၼ်ႉတႃႉ။ ပေႃးၶဝ်ၼိၵ်ႈၸၢၵ်ႈငႅၼ်းသႄးၵဝ်ၸိုင်၊ ၶဝ်တၵ်းၼိၵ်ႈၸၢၵ်ႈငႅၼ်းသႄးသူဢေႃႈ။ ပေႃးၶဝ်ထွမ်ႇဢဝ်ၵႂၢမ်းၵဝ်ၸိုင်၊ ၶဝ်တၵ်းထွမ်ႇဢဝ်ၵႂၢမ်းသူဢေႃႈ။- 21ၵွပ်ႈပိူဝ်ႈဢၼ်ၶဝ်ဢမ်ႇႁူႉ ၵေႃႉဢၼ်ပွႆႇၸႂ်ႉၵဝ်မႃးၼၼ်ႉလႄႈ၊ ၶဝ်တၵ်းႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉတီႈသူ ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ဢေႃႈ။- 22ပေႃးၵဝ်ဢမ်ႇမႃးလႄႈဢမ်ႇႁေႃးလၢတ်ႈတီႈၶဝ်ၸိုင်၊ ၶဝ်ၼၼ်ႉဢမ်ႇမီးဢပႅတ်ႈ။ တေႃႈလဵဝ်ၼႆႉၸမ်ႉ၊ ၶဝ်ဢမ်ႇႁူမ်ႇဢပႅတ်ႈၶဝ်ဝႆႉလႆႈ။- 23ၵေႃႉဢၼ်ၸင်းၵဝ်ၼႆႉၼၼ်ႉၸင်းၸဝ်ႈပေႃႈၵဝ်ဢေႃႈ။- 24သင်ၵဝ်ဢမ်ႇႁဵတ်းလွင်ႈတၢင်းဢၼ်ပိူၼ်ႈတၢင်ႇၵေႃႉ ဢမ်ႇပႆႇတွၼ်ႉႁဵတ်းသေပွၵ်ႈၼၼ်ႉ ၵႃႈၼႂ်းၶဝ်ၸိုင် ၶဝ်ၼၼ်ႉဢမ်ႇမီးဢပႅတ်ႈ။ တေႃႈလဵဝ်ၼႆႉၸမ်ႉ၊ ၶဝ်လႆႈႁၼ်လႄႈ ၸင်းၵဝ်ဢိၵ်ႇတင်းၸဝ်ႈပေႃႈၵဝ်ဢေႃႈ။- 25ၵူၺ်းၵႃႈ ပေႃးပဵၼ်ၸိူဝ်ႉၼင်ႇၼႆၸိုင်၊ လွင်ႈၼင်ႇႁိုဝ်ၵႂၢမ်းဢၼ်တႅမ်ႈဝႆႉၼႂ်းၵျၢမ်းလိၵ်ႈပိင်းၺၢပ်ႈတီႉလႄႈဝႃႈ၊ လွင်ႈမၼ်းယင်းဢမ်ႇမီးလႄႈၶဝ်ၸင်းၵဝ်ဢေႃႈ၊ ဝႃႈၼင်ႇၼႆၼၼ်ႉတၵ်းပျေႉၸုမ်ႇၸိုင် ၸင်ႇပဵၼ်ဢေႃႈ။

26မိူဝ်ႈဢၼ်သြႃႇဢူႉပိတ်ႉသေႇ ဢၼ်ၵဝ်တၵ်းပွႆႇၸႂ်ႉသေၵႃႈတီႈပေႃႈၸဝ်ႈမႃးၵႃႈတီႈသူ ဢၼ်ဝႃႈဝီႉၺိၺ်ႇၸဝ်ႈဢၼ်ပျေႉၸုမ်ႇတင်းသမ်ႇမႃႇတြႃးလႄႈ ဢွၵ်ႇၵႃႈတီႈပေႃႈၸဝ်ႈမႃးၼၼ်ႉႁွတ်ႈမႃးၸိုင်၊ မၼ်းတၵ်းၶၢမ်ႇသၢၵ်ႈသေႇလွင်ႈၵဝ်ဢေႃႈ။- 27သူၵေႃႈပိူဝ်ႈဢၼ် မီးယူႇလူၺ်ႈၵၼ်တင်းၵဝ် ၸႃႉၸဵမ်မိူဝ်ႈၵေႃႇၸႃႉမၼ်းၼၼ်ႉလႄႈ တၵ်းလႆႈၶၢမ်ႇသၢၵ်ႈသေႇဢေႃႈ။

Currently Selected:

ယူဝ်းႁၢၼ်ႇ 15: CBMS

Highlight

Copy