ယူဝ်းႁၢၼ်ႇ 12
12
ဢဝ်ၼမ်ႉမၼ်းႁွမ်လေႃႇတိၼ်ၸဝ်ႈယေႇသူႉ
1မိူဝ်ႈဢၼ်ၶိင်ႇ ဢၼ်တၵ်းၶၢမ်ႇပွႆးပႃႉသၶႃႇၼၼ်ႉ ယင်းလူဝ်ႇထႅင်ႈႁူၵ်းဝၼ်းၸိုင်၊ ယေႇသူႉႁွတ်ႈထိုင်ၵႃႈတီႈ ဝၢၼ်ႈပေႇထၼီႉ ဢၼ်ပဵၼ်တီႈယူႇလႃႇၸရူႉ ဢၼ်တၢႆၵႂႃႇမိူဝ်ႈၼၼ်ႉၼၼ်ႉလႄႈ ယေႇသူႉႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢေႃႈ။- 2ပိူဝ်ႈၼႆလႄႈ ၵႃႈတီႈၼၼ်ႈ ၶဝ်ႁဵတ်းပွႆးလႄႈ မႃႇထႃႉႁဵတ်းလွင်ႈတၢင်းဢၼ် ႁဵတ်းလဵင်ႉႁဵတ်းလူဢေႃႈ။ လႃႇၸရူႉၸမ်ႉ၊ ၶဝ်ႈပႃးၼႂ်းၶဝ်ၸိူဝ်းဢၼ်ဢိင်ယူႇလူၺ်ႈၵၼ်တင်းမၼ်းၸဝ်ႈဢေႃႈ။
3မိူဝ်ႈၼၼ်ႉမႃႇရီႉ ဢဝ်ၼမ်ႉမၼ်းႁွမ်ၼႃႇတူႉၸႅတ်ႈၸႅတ်ႈသၢမ်ၶၼ် ဢၼ်ထိူၵ်ႈၵႃႈယႂ်ႇၼႃႇၼၼ်ႉလႄႈတႃးတိၼ်ယေႇသူႉသေယဝ်ႉ၊ ဢဝ်ၶူၼ်ႁူဝ်မၼ်းၸဵတ်ႉလႄႈ ဢၢႆႁွမ်ၼမ်ႉမၼ်းၼၼ်ႉၸွတ်ႇတူဝ်ႈၵႂႃႇတင်းႁိူၼ်းဢေႃႈ။- 4ယူႉတႃႉဢီႉသၵႃႇရေႇဢုတ်ႈ လုၵ်ႈၸၢႆးသီႉမုၼ်ႇ ဢၼ်ၶဝ်ႈပႃးၼႂ်းတပႄးၸဝ်ႈတင်းလၢႆ၊ ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼၼ်ႉ ၵေႃႈလၢတ်ႈလႄႈဝႃႈ၊- 5ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ဢမ်ႇဢဝ်ၼမ်ႉမၼ်းႁွမ်ၼႆႉ ၶၢႆဢဝ်တင်းၵႃႈမၼ်းၶၼ်မၼ်း တေႇၼႃႇရီႇသၢမ်ပၢၵ်ႇၶႅပ်းသေလႄႈ ပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။- 6မိူဝ်ႈဢၼ်ဝႃႈၸိူဝ်ႉၼင်ႇၼႆၼၼ်ႉၸိုင်၊ မၼ်းထွၵ်ႈလူၺ်ႈဢၵျူဝ်းၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉလႄႈဝႃႈ၊ ဢမ်ႇၸႂ်ႈ။ ပိူဝ်ႈဢၼ်မၼ်းပဵၼ်ၽူႈလၵ်ႉယူႇ၊ ပႃးထူင်ငိုၼ်းယူႇသေလႄႈ ပႃးဢဝ်ၵႂႃႇၵႃႈဢၼ် သႂ်ႇဝႆႉၵႃႈၼႂ်းထူင်ၼၼ်ႉလႄႈ ၸင်ႇဝႃႈဢေႃႈ။- 7ယေႇသူႉၵေႃႈလၢတ်ႈလႄႈဝႃႈ၊ ယႃႇမၼ်းတႃႉ။ မၼ်းဢဝ်ၼမ်ႉမၼ်းႁွမ်ၼႆႉသိမ်းဝႆႉ တေႃႇထိုင်ႁွတ်ႈဝၼ်းဢၼ် တၵ်းမႄးႁႅၼ်းပုၼ်ႈဢၼ်တၵ်းသၢင်းၵျူဝ်ႇတူဝ်တၢႆၵဝ်ၼၼ်ႉယဝ်ႉ။- 8ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၸမ်ႉ၊ မီးယူႇတီႈသူတႃႇသေႇဢေႃႈ။ ၵဝ်ၸမ်ႉ၊ မီးယူႇတီႈသူတႃႇသေႇဢမ်ႇၸႂ်ႈ၊ ဝႃႈၼင်ႇၼႆဢေႃႈ။
9ပိူဝ်ႈၼႆလႄႈ ၵူၼ်းယူႉတႃႉ ဢၼ်ၸူႉဢၼ်တုမ်ၼမ်ၼႃႇ ႁူႉလွင်ႈဢၼ် ယေႇသူႉ မီးယူႇၵႃႈတီႈၼၼ်ႈလႄႈ မႃးၵွပ်ႈပိူဝ်ႈမၼ်းၸဝ်ႈၵူၺ်းဢမ်ႇၸႂ်ႈ။ မႃးႁႂ်ႈလႆႈႁၼ် လႃႇၸရူႉ ဢၼ်မၼ်းၸဝ်ႈႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢေႃႈ။
10ပိူဝ်ႈဢၼ်ၵူၼ်းယူႉတႃႉၼမ်ၼႃႇဢွၵ်ႇၵႂႃႇလႄႈ ယုမ်ႇမၢတ်ႈယေႇသူႉၵွပ်ႈပိူဝ်ႈလွင်ႈလႃႇၸရူႉၼၼ်ႉလႄႈ 11ယိတ်ႈပရေႃးႁဵၵ်ႈလူင်တင်းလၢႆတိူင်ႇပၢင်ႇ ၸီႇယၢင်ႇၵၼ်ႁႂ်ႈလႆႈဢဝ်လႃႇၸရူႉတၢႆဢေႃႈ။
ၸဝ်ႈယေႇသူႉၶဝ်ႈၵႂႃႇၵႃႈၼႂ်းဝဵင်းယေႇရူႉသလႅမ်ႇ
(တူၺ်း၊ မၢတ်ႈ 21:1-11။ မႃႇ 11:1-11။ လူႉ 19:28-40)
12ၼႂ်းဝၼ်းမိူဝ်ႈၽုၵ်ႈ ၵူၼ်းဢၼ်ၸူႉဢၼ်တုမ်ၼမ်ၼႃႇ ဢၼ်မႃးၵႃႈတီႈပွႆးၼၼ်ႉ မိူဝ်ႈဢၼ်ငိၼ်းလွင်ႈဢၼ်ယေႇသူႉ မႃးၵႃႈတီႈ ဝဵင်းယေႇရူႉသလႅမ်ႇ ယူႇၼၼ်ႉၸိုင်၊- 13ယိပ်းၵမ်ၵၢၼ်ႈမႂ်ၸုၼ်ႇပလုၼ်ႇသေလႄႈ ဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈလႄႈႁွင်ႉသႅၼ်ႇဝႃႈ၊ ႁႂ်ႈပဵၼ်ႁူဝ်းသၼ်ႇၼႃႉ သေၵမ်းလူၺ်ႈ။ ႁႂ်ႈၶုၼ်ႁေႃၶမ်းဢီႉသရေႇလႃႉ ဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈမႃးၼႆႉ မီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။- 14မႅၼ်ႈၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊ လုၵ်ႈယိင်းသၢဝ်ၸီႉဢုၼ်ႇဢိူၺ်း၊- 15ယႃႇပေမႆႈၸႂ်။ တူၺ်းလူး၊ ၶုၼ်လူင်မႂ်းၼၼ်ႉ ၶီႇလီႈဢွၼ်ႇသေလႄႈမႃး ၵႃႈတီႈမႂ်းဢေႃႈ၊ ဝႃႈၼင်ႇၼႆၼၼ်ႉ၊ ယေႇသူႉထူပ်းလီႈဢွၼ်ႇလႄႈၶီႇဢေႃႈ။- 16လွင်ႈတၢင်းၸိူဝ်းၼၼ်ႉၸိုင်၊ မိူဝ်ႈၵေႃႇၸႃႉမၼ်း၊ ပိၵ်ႉသမ်ႉတပႄးၸဝ်ႈတင်းလၢႆ ဢမ်ႇႁူႉသေၵေႃႈ၊ ဝၢႆးသေမုၼ်ၽုင်းမၼ်းၸဝ်ႈၵီႈမႃးယဝ်ႉၼၼ်ႉ၊ ၶဝ်ၶုၵ်းၸႂ်လႆႈၶႆႈၸႂ်ထူပ်းလွင်ႈဢၼ် လွင်ႈတၢင်းၸိူဝ်းၼၼ်ႉတႅမ်ႈဝႆႉ လွင်ႈမၼ်းၸဝ်ႈဢိၵ်ႇတင်း လွင်ႈဢၼ်ၶဝ်လႆႈႁဵတ်း လွင်ႈတၢင်းၸိူဝ်းၼၼ်ႉတီႈမၼ်းၸဝ်ႈယဝ်ႉၼၼ်ႉဢေႃႈ။
17ၵူၼ်းဢၼ်ၸူႉဢၼ်တုမ် ဢၼ်ပႃးလူၺ်ႈၵၼ်တင်းမၼ်းၸဝ်ႈ၊ ၼႂ်းမိူဝ်ႈဢၼ်မၼ်းၸဝ်ႈႁွင်ႉဢဝ်လႃႇၸရူႉ ဢွၵ်ႇသေ ၵႃႈၼႂ်းၶုမ်သၢင်းၶႅင်းလႄႈ ႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ ၸိူဝ်းၼၼ်ႉၸမ်ႉ၊ဢွၼ်ၵၼ်ၶၢမ်ႇသၢၵ်ႈသေႇဢေႃႈ။- 18ၵူၼ်းဢၼ်ၸူႉဢၼ်တုမ်တင်းလၢႆ ၵွပ်ႈပိူဝ်ႈဢၼ်ငိၼ်းသတၢင်းသဵင်ၶၢဝ်ႇ လွင်ႈဢၼ်မၼ်းၸဝ်ႈၼႄပျႃး ၼီႉမိၵ်ႈလၢၵ်ႈၶၼႃႇၼၼ်ႉလႄႈ ဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။- 19ပိူဝ်ႈၼႆလႄႈၽႃႇရီႉသႄးတင်းလၢႆ ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်လႄႈဝႃႈ၊ သူဢမ်ႇတၢတ်ႈၼိူင်ႇလႆႈလႃးလႃး။ လေႃးၵႃႉၼႆႉၸွမ်းပႃႈလင်ၵေႃႉၼၼ်ႉၵႂႃႇယဝ်ႉလူင်ပႄႇ၊ ဝႃႈၼင်ႇၼႆဢေႃႈ။
ၸဝ်ႈယေႇသူႉလၢတ်ႈလွင်ႈမၼ်းၸဝ်ႈတၵ်းလႆႈတၢႆ
20ၼႂ်းၶဝ်ၸိူဝ်းဢၼ်ႁွတ်ႈမႃးၵႃႈတီႈပွႆး ႁႂ်ႈလႆႈၵူဝ်းၵႂၢႆႇၼၼ်ႉ ပႃးၵူၼ်းႁေႇလသႃႉၵမ်ႈၽွင်ႈဢေႃႈ။- 21ၶဝ်ၼၼ်ႉၵႂႃႇၸူးၵႃႈတီႈၽီႉလိပ်ႉပူႉ ဢၼ်ပဵၼ် ၵူၼ်းဝဵင်းပႅတ်ႉၸေးတႃႉ၊ မိူင်းၵႃႇလီႉလႄးၼၼ်ႉလႄႈ တွင်းပၢၼ်ႇဝႃႈ၊ ႁဝ်းၶႃႈၶႂ်ႈႁၼ်ယေႇသူႉၶႃႈဢေႃႈ၊ ဝႃႈၼင်ႇၼႆဢေႃႈ။- 22ၽီႉလိပ်ႉပူႉၵေႃႈ ၵႂႃႇလႄႈလၢတ်ႈတီႈ ဢၼ်ႇတရေႇသေယဝ်ႉ၊ သွင်ၶႃလဝ်ႊလၢတ်ႈတီႈယေႇသူႉဢေႃႈ။
23 ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၶိင်ႇၼႃႇရီႇဢၼ်မုၼ်ၽုင်းလုၵ်ႈၵူၼ်း၊ တၵ်းလႆႈၵီႈမႃးၼၼ်ႉႁွတ်ႈထိုင်ယဝ်ႉ။- 24ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ပေႃးမဵတ်ႉၶဝ်ႈပိူၵ်ႇဢၼ်တူၵ်းၵႃႈတီႈလိၼ်ၼၼ်ႉ ဢမ်ႇလူႉၸိုင်၊ တၵ်းလႆႈယူႇဢၼ်လဵဝ်ၵူၺ်းမၼ်းဢေႃႈ။ ပေႃးလူႉၸမ်ႉ၊ ၸၢင်ႈမၢၵ်ႇမၢၵ်ႇမၼ်းၼမ်ၼႃႇဢေႃႈ။- 25ၵေႃႉဢၼ်ႁၵ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉ ဢသၢၵ်ႈတၵ်းသုမ်းဢေႃႈ။ ၵေႃႉဢၼ်ၸင်းဢသၢၵ်ႈတူဝ်ၸဝ်ႈၵဝ်ႇၼႂ်းလေႃးၵႃႉၼႆႉၼၼ်ႉၸမ်ႉ၊ ပႂ်ႉပုၼ်ႈထႃႇဝရႃႉဢသၢၵ်ႈယူႇဢေႃႈ။- 26ၽူႈလႂ်သေဢမ်ႇဝႃႈ၊ ပေႃးပဵၼ်ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၸိုင် တၵ်းလႆႈၸွမ်းပႃႈလင်ၵဝ်ဢေႃႈ။ ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၼၼ်ႉၵေႃႈ တၵ်းမီးၵႃႈတီႈဢၼ်ၵဝ်မီးၼၼ်ႉဢေႃႈ။ ၽူႈလႂ်သေဢမ်ႇဝႃႈ၊ ပေႃးပဵၼ်ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၸိုင်၊ ပေႃႈၸဝ်ႈတၵ်းယုၵ်ႉယွင်ႈၵေႃႉၼၼ်ႉဢေႃႈ။
27တေႃႈလဵဝ်ၼႆႉ ၵဝ်မီးတၢင်းဢၼ်ယၢပ်ႇၸႂ်မႆႈၸႂ်ယူႇဢေႃႈ။ ၵဝ်တၵ်းလႆႈလဝ်ႊလၢတ်ႈၸိူဝ်ႉၼင်ႇႁိုဝ်။ တၵ်းလႆႈလဝ်ႊလၢတ်ႈလႄႈဝႃႈ ၵႃႈတီႈၶိင်ႇၼႃႇရီႇၼၼ်ႉၶႅၼ်းတေႃႈ ၵႄႇၶျွတ်ႈဢဝ်ၵဝ်ၶႃႈသေၵမ်းတီႈၶႃႈပေႃႈ၊ ဝႃႈၼင်ႇၼႆႁိုဝ်။ မီးလွင်ႈၼၼ်ႉၵူၺ်းလႄႈ ၸင်ႇႁွတ်ႈထိုင် ၶိင်ႇၼႃႇရီႇၼၼ်ႉယဝ်ႉ။- 28ဢူဝ်းပေႃႈ၊ ၶႅၼ်းတေႃႈယွင်ႈယေႃးၼႃႇမႃႉၸိုဝ်ႈသဵင်ၸဝ်ႈႁဝ်း သေၵမ်းတီႈၶႃႈ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉသဵင်ၵႂၢမ်းပဵၼ်မႃး ၵႃႈတီႈၼိူဝ်ၵၢင်ႁၢဝ်ၸမ်ႉ၊ ၵဝ်ယွင်ႈယေႃးမႃးယဝ်ႉ။ တၵ်းယွင်ႈယေႃးထႅင်ႈလူးၵွၼ်ႇဢေႃႈ၊ ဝႃႈၼင်ႇၼႆဢေႃႈ။
29ၵူၼ်းဢၼ်ၸူႉဢၼ်တုမ် ဢၼ်လွမ်ႉႁွပ်ႈယူႇလႄႈလႆႈငိၼ်းၸိူဝ်းၼၼ်ႉ ဢွၼ်ၵၼ်ဝႃႈ၊ ၽႃႉလင်ဢေႃႈ၊ ဝႃႈၼင်ႇၼႆဢေႃႈ။ ၵမ်ႈၽွင်ႈၵေႃႈဝႃႈ၊ တမၢၼ်ႇၵၢင်ႁၢဝ်လၢတ်ႈတေႃႇမၼ်းၸဝ်ႈဢေႃႈ၊ ဝႃႈၼင်ႇၼႆဢေႃႈ။- 30ယေႇသူႉၵေႃႈၶိုၼ်းလၢတ်ႈလႄႈဝႃႈ၊ သဵင်ၵႂၢမ်းၼၼ်ႉပဵၼ်မႃး ပုၼ်ႈၵဝ်ဢမ်ႇၸႂ်ႈ။ ပဵၼ်မႃးပုၼ်ႈသူဢေႃႈ။
31တေႃႈလဵဝ်ၼႆႉ လေႃးၵႃႉၼႆႉလႆႈၶၢမ်ႇတၢင်းဢၼ် ၸီႇယၢင်ႇတြႃးဢေႃႈ။ တေႃႈလဵဝ်ၼႆႉ ၶုၼ်ဢၼ်လႆႈဢုပ်ႉပိူင်ႇလေႃးၵႃႉၼႆႉ တၵ်းလႆႈၶၢမ်ႇတၢင်းဢၼ် ႁေႃႈဢွၵ်ႇပႅတ်ႈဢေႃႈ။- 32ၵဝ်ၵေႃႈပေႃးလႆႈၽၢတ်ႇယၢၼ်ၵၼ်တင်းလိၼ်မိူင်းလႄႈ ၶၢမ်ႇတၢင်းဢၼ်ယုၵ်ႉဝႆႉၸိုင် တၵ်းတိုတ်ႉၸၼ်ဢဝ်ၵူၼ်းတင်းသဵင်ႈတင်းလူင်မႃးၵႃႈတီႈၵဝ်ဢေႃႈ၊ ဝႃႈၼင်ႇၼႆဢေႃႈ။- 33မိူဝ်ႈဢၼ်မၼ်းၸဝ်ႈဝႃႈၸိူဝ်ႉၼင်ႇၼၼ်ၼၼ်ႉၸိုင် မၼ်းၸဝ်ႈၼႄပျႃး လွင်ႈဢၼ်မၼ်းၸဝ်ႈတၵ်းလႆႈတၢႆၸိူဝ်ႉၼင်ႇႁိုဝ်ၼၼ်ႉယူႇဢေႃႈ။
34ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊ လွင်ႈဢၼ်မႃးၼႂ်းၵျၢမ်းပိင်းၺၢပ်ႈတီႉလႄႈဝႃႈ၊ ၸဝ်ႈၶရိၸ်ႈမီးယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆၼၼ်ႉၸိုင်ႁဝ်းၶႃႈလႆႈငိၼ်းယဝ်ႉၶႃႈယဝ်ႉ။ ပေႃးပဵၼ်ၸိူဝ်ႉၼင်ႇၼၼ်ၸိုင် လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ယုၵ်ႉဝႆႉဢေႃႈဝႃႈၼႆ၊ ႁဵတ်းႁိုဝ်လႄႈၸဝ်ႈဝႃႈၼင်ႇႁိုဝ်။ လုၵ်ႈၵူၼ်းၼၼ်ႉပဵၼ်ၵေႃႉၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။- 35ယေႇသူႉၵေႃႈလၢတ်ႈလႄႈဝႃႈ၊ ဢၼ်လႅင်းမီးယူႇၵႃႈတီႈသူၵမ်းဢွၼ်ႇၼိုင်ႈၵူၺ်းဢေႃႈ။ ၵႂႃႇမႃးၼႂ်းမိူဝ်ႈဢၼ်ဢၼ်လႅင်းယင်းတိုၵ်ႉမီးယူႇၼၼ်ႉတႃႉ။ ပေႃးဢမ်ႇၼၼ်ၸိုင်လပ်းသိင်ႇ တၵ်းၶိုတ်းသူဢေႃႈ။ ၵေႃႉဢၼ်ၵႂႃႇမႃးၼႂ်းဢၼ်လပ်းသိင်ႇၼၼ်ႉ ဢမ်ႇႁူႉလွင်ႈဢၼ်တူဝ်ၸဝ်ႈၵဝ်ႇၵႂႃႇၵႃႈတီႈလႂ်ၼၼ်ႉ။- 36ၼႂ်းမိူဝ်ႈဢၼ် ဢၼ်လႅင်းယင်းတိုၵ်ႉမီးယူႇၼၼ်ႉၸိုင်၊ ယုမ်ႇမၢတ်ႈဢၼ်လႅင်းႁႂ်ႈလႆႈပဵၼ်ၵူၼ်းဢၼ်လႅင်းတႃႉ၊ ဝႃႈၼင်ႇၼႆဢေႃႈ။ ယေႇသူႉဝႃႈၸိူဝ်ႉၼင်ႇၼၼ်ယဝ်ႉၸင်ႇဢွၵ်ႇၵႂႃႇလႄႈ လပ်ႉတဵတ်ႇၶဝ်ၼၼ်ႉ ယူႇသေဢေႃႈ။
ၵူၼ်းယူႉတႃႉတင်းလၢႆဢမ်ႇယုမ်ႇမၢတ်ႈ
37ပိၵ်ႉသမ်ႉမၼ်းၸဝ်ႈၼႄပျႃးၼီႉမိၵ်ႈလၢၵ်ႈၶၼႃႇဢၼ်ယႂ်ႇၼႃႇထၢၼ်ႇၼၼ်ႉသိုဝ်ႈၼႃႈတႂ်ႈတႃၶဝ်သေၵေႃႈ၊ ၶဝ်ၼၼ်ႉဢမ်ႇႁွတ်ႈထိုင်တၢင်းဢၼ်ယုမ်ႇမၢတ်ႈ။- 38လွင်ႈမၼ်းၸမ်ႉ ၼင်ႇႁိုဝ်ၵႂၢမ်းဢၼ် ပရေႃးၽႅတ်ႈ ဢီႉသႃႇယႃႉ ႁေႃးဝႆႉလႄႈဝႃႈ၊ ဢူဝ်းထႃႇဝရႃႉၽြႃး၊ ၵႂၢမ်းသတၢင်းသဵင်ၶၢဝ်ႇ ဢၼ်ႁဝ်းၶႃႈႁေႃးလၢတ်ႈၼႆႉၸိုင် ၽူႈလႂ်ယုမ်ႇတီႈၶႃႈ။ ၶႅၼ်မိုဝ်းထႃႇဝရႃႉၽြႃးၼၼ်ႉၸိုင် ထၢင်ႇသႃးၵႃႈတီႈၽူႈလႂ်တီႈၶႃႈ၊ ဝႃႈၼင်ႇၼႆၼၼ်ႉ တၵ်းႁွတ်ႈထိုင်တၢင်းဢၼ် ပျေႉၸုမ်ႇၸိုင်ၸင်ႇပဵၼ်ဢေႃႈ။- 39ၵွပ်ႈႁွႆးၼႆႉပိူဝ်ႈဢၼ် ပရေႃးၽႅတ်ႈဢီႉသႃႇယႃႉ သမ်ႉႁေႃးလၢတ်ႈထႅင်ႈလႄႈဝႃႈ၊- 40ၼင်ႇႁိုဝ်တႃၶဝ်တၵ်းဢမ်ႇႁၼ်၊ ႁူဝ်ၸႂ်ၶဝ်တၵ်းဢမ်ႇႁူႉဢမ်ႇၸႅင်ႈ၊ တၢင်းၵမ်တၢင်းၵျၢင်ႉၶဝ် တၵ်းဢမ်ႇၶၢႆႉဢမ်ႇပုတ်ႈ၊ ၵဝ်တၵ်းဢမ်ႇႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉၸိုင်၊ မၼ်းၸဝ်ႈႁႂ်ႈတႃၶဝ်လပ်ႉဢေႃႈ။ ႁူဝ်ၸႂ်ၶဝ်ၵေႃႈမၼ်းၸဝ်ႈႁႂ်ႈၵႅၼ်ႇၶႅင်ဢေႃႈ၊ ဝႃႈၼင်ႇၼႆၼၼ်ႉလႄႈ ၶဝ်ၼၼ်ႉဢမ်ႇႁွတ်ႈထိုင်တၢင်းဢၼ်ယုမ်ႇမၢတ်ႈလႆႈ။- 41ဢီႉသႃႇယႃႉၼၼ်ႉ ႁေႃးလၢတ်ႈၵႂၢမ်းၼၼ်ႉ ၵွပ်ႈပိူဝ်ႈဢၼ်လႆႈႁၼ်မုၼ်ၽုင်းဢႃႇၼူႉၽေႃႇၸဝ်ႈလႄႈ ၶိုၼ်းလၢတ်ႈလွင်ႈမၼ်းတၢင်းမၼ်းဢေႃႈ။- 42ၼႂ်းဝႃႈၼၼ်သေၵေႃႈ ၶုၼ်တီႈလုမ်းလူင်ၼမ်ၼႃႇ ယုမ်ႇမၢတ်ႈမၼ်းၸဝ်ႈဢေႃႈ။ ပိူဝ်ႈဢၼ် ၵူဝ်ၽႃႇရီႉသႄးတင်းလၢႆ တၵ်းႁေႃႈၶဝ်ဢွၵ်ႇသေၵႃႈၼႂ်းၸရွပ်ႈႁေႃးတြႃးလႄႈ ၶဝ်ဢမ်ႇႁပ်ႉတုင်းဢဝ်ထၢင်ႇထၢင်ႇသႃးသႃး။- 43လွင်ႈမၼ်းၸမ်ႉ ၶဝ်ၵျိူၵ်ႈမုၼ်သရေႇ ဢၼ်ၵူၼ်းတင်းလၢႆပၼ်ၼၼ်ႉ ယဵင်ႈၶႅၼ်းၼႃႇသေမုၼ်သရေႇ ဢၼ်ၽြႃးပဵၼ်ၸဝ်ႈပၼ်ဢေႃႈ။
44 ယေႇသူႉၵေႃႈႁွင်ႉသႅၼ်ႇသေလႄႈဝႃႈ၊ ၵေႃႉဢၼ်ယုမ်ႇမၢတ်ႈၵဝ်ၼႆႉၼၼ်ႉ ယုမ်ႇမၢတ်ႈၵဝ်ၵူၺ်းဢမ်ႇၸႂ်ႈ။ ယုမ်ႇမၢတ်ႈၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 45ၵေႃႉဢၼ် တူၺ်းႁၼ်ၵဝ်ၼႆႉၼၼ်ႉ တူၺ်းႁၼ်ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။- 46ၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၵဝ် ၵႃႈမီးတင်းသဵင်ႈတင်းလူင်ၼၼ်ႉ တၵ်းဢမ်ႇလႆႈယူႇၵႃႈတီႈၼႂ်းဢၼ်လပ်းသိင်ႇၸိုင်၊ ၵဝ်ပဵၼ်ဢၼ်လႅင်းသေလႄႈမႃးၼႂ်းလေႃးၵႃႉၼႆႉယဝ်ႉ။- 47ၽူႈလႂ်သေဢမ်ႇဝႃႈ၊ ပေႃးငိၼ်းၵႂၢမ်းၵဝ်လႄႈ ဢမ်ႇယုမ်ႇမၢတ်ႈၵႂၢမ်းၼၼ်ႉၸိုင်၊ ၵဝ်ဢမ်ႇၸီႇယၢင်ႇဢပႅတ်ႈတီႈၵေႃႉၼၼ်ႉ။ ၵဝ်မႃးႁႂ်ႈလႆႈၸီႇယၢင်ႇဢပႅတ်ႈလေႃးၵႃႉၼႆႉဢမ်ႇၸႂ်ႈ။ ၵဝ်မႃးႁႂ်ႈလႆႈၵႄႇၶျွတ်ႈဢဝ်လေႃးၵႃႉၼႆႉဢေႃႈ။- 48တီႈၵေႃႉဢၼ်ပႄႇပႅတ်ႈၵဝ်လႄႈ ဢမ်ႇထွမ်ႇဢဝ်ၵႂၢမ်းၵဝ်ၼၼ်ႉ၊ ၵေႃႉဢၼ်ၸီႇယၢင်ႇဢပႅတ်ႈယင်းမီးယူႇလူးၵွၼ်ႇဢေႃႈ။ ၵႂၢမ်းဢၼ်ၵဝ်ႁေႃးလၢတ်ႈၼႆႉ တၵ်းၸီႇယၢင်ႇဢပႅတ်ႈတီႈၵေႃႉၼၼ်ႉ ၼႂ်းဝၼ်းဢၼ်သုတ်းဢၼ်ၵွႆပုၼ်ႉဢေႃႈ။- 49လွင်ႈမၼ်းၸမ်ႉ ၵဝ်ႁေႃးလၢတ်ႈၸွမ်းၼင်ႇဢလူဝ်ႇ တူဝ်ၸဝ်ႈၵဝ်ႇဢမ်ႇၸႂ်ႈ။ ၵဝ်တၵ်းလႆႈဝႃႈၸိူဝ်ႉၼင်ႇႁိုဝ်။ ၵဝ်တၵ်းလႆႈႁေႃးလၢတ်ႈၸိူဝ်ႉၼင်ႇႁိုဝ်ဝႃႈၼႆ၊ ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉ ပၼ်ပိင်းၺၢပ်ႈဝႆႉယဝ်ႉ။- 50လွင်ႈဢၼ်ပိင်းၺၢပ်ႈပေႃႈၸဝ်ႈၼၼ်ႉပဵၼ်ထႃႇဝရႃႉဢသၢၵ်ႈၸိုင်ၵဝ်ႁူႉဢေႃႈ။ ပိူဝ်ႈၼႆလႄႈ ၵႃႈဢၼ်ၵဝ် ႁေႃးလၢတ်ႈၸိူဝ်းၼႆႉၸိုင်၊ ၵဝ်ႁေႃးလၢတ်ႈၸွမ်းၼင်ႇဢၼ် ပေႃႈၸဝ်ႈသင်ႇလၢတ်ႈဝႆႉၼၼ်ႉဢေႃႈ၊ ဝႃႈၼင်ႇၼႆဢေႃႈ။
Currently Selected:
ယူဝ်းႁၢၼ်ႇ 12: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
