ယူဝ်းႁၢၼ်ႇ 10
10
ၵႂၢမ်းဢူႉပမႃႇၵူၼ်းလဵင်ႉထိင်းသူဝ်းလႄႈၽုင်သူဝ်း
1ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵေႃႉဢၼ်ယင်းဢမ်ႇၸူးႁူးၽၵ်းတူ ၶဝ်ႈၵႃႈၼႂ်းၶွၵ်ႈသူဝ်းလႄႈ ၶၢမ်ႈၶဝ်ႈၵႂႃႇတၢင်ႇတၢင်းၼၼ်ႉ ပဵၼ်ၽူႈလၵ်ႉၵူၼ်းၸူၼ်ဢေႃႈ။- 2ၵေႃႉဢၼ်ၸၢင်ႈၸူးႁူးၽၵ်းတူၶဝ်ႈၵႂႃႇၼၼ်ႉၸမ်ႉ၊ ပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢေႃႈ။- 3တီႈၵေႃႉၼၼ်ႉၸိုင်၊ ၵေႃႉဢၼ်ပႂ်ႉၽၵ်းတူၵေႃႈ ၸၢင်ႈၽုၺ်ႇပၼ်ဢေႃႈ။ သူဝ်းတင်းလၢႆၵေႃႈၸၢင်ႈထွမ်ႇသဵင်မၼ်းဢေႃႈ။ မၼ်းၸၢင်ႈႁွင်ႉၸိုဝ်ႈႁွင်ႉသဵင်သူဝ်းမၼ်းလႄႈ ဢဝ်ဢွၵ်ႇၵႂႃႇဢေႃႈ။- 4မိူဝ်ႈဢၼ်မၼ်းဢဝ်သူဝ်းမၼ်းဢွၵ်ႇၵႂႃႇၼၼ်ႉၸိုင်၊ မၼ်းၸၢင်ႈၵႂႃႇပႃႈၼႃႈသူဝ်းလႄႈ သူဝ်းၸိူဝ်းၼၼ်ႉ ပိူဝ်ႈဢၼ်ႁူႉၸၵ်းသဵင်မၼ်းလႄႈ ၸၢင်ႈၸွမ်းမၼ်းၵႂႃႇဢေႃႈ။- 5ပိူဝ်ႈဢၼ် ၶဝ်ဢမ်ႇႁူႉၸၵ်းသဵင်ၵေႃႉဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉလႄႈ၊ ပႃႈလင်ၵေႃႉဢၼ်ဢမ်ႇၸၢပ်ႈဢမ်ႇသႅင်ႇၼၼ်ႉ ၶဝ်ယင်းဢမ်ႇၸွမ်းလႄႈ ၸၢင်ႈၶုၼ်ႇလႅၼ်ႈပၢႆႈၵႂႃႇသေဢေႃႈ၊ ဝႃႈၼင်ႇၼႆဢေႃႈ။- 6မိူဝ်ႈဢၼ်ယေႇသူႉႁေႃးလၢတ်ႈဢူႉပမႃႇပုင်ႇၼႆႉယူႇၼၼ်ႉၸိုင်၊ ပရဵၵ်ႈသၢတ်ႈၸိူဝ်းၼၼ်ႉ ဢမ်ႇႁူႉလွင်ႈဢၼၢၵ်ႈဢထိၵ်ႈပႄႇၵႂၢမ်းဢၼ်မၼ်းၸဝ်ႈဝႃႈၼၼ်ႉ။
7ပိူဝ်ႈၼႆလႄႈယေႇသူႉၵေႃႈသမ်ႉလၢတ်ႈထႅင်ႈလႄႈဝႃႈ၊ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၵဝ်ပဵၼ်ႁူးၽၵ်းတူဢၼ်သူဝ်းၶဝ်ႈဢေႃႈ။- 8ၶဝ်ၸိူဝ်းဢၼ်ပေႃႇမႃးဢွၼ်တၢင်းၵဝ်ၵႃႈမီးတင်းသဵင်ႈတင်းလူင်ၼၼ်ႉ ပဵၼ်ၽူႈလၵ်ႉၵူၼ်းၸူၼ်ဢေႃႈ။ သူဝ်းတင်းလၢႆဢမ်ႇထွမ်ႇဢဝ်သဵင်ၵႂၢမ်းၶဝ်ၼၼ်ႉ။- 9ၵဝ်ပဵၼ်ႁူးၽၵ်းတူဢေႃႈ။ ၵေႃႉဢၼ်ၸူးတီႈၵဝ်ၶဝ်ႈၵႂႃႇၼၼ်ႉ တၵ်းၵၢင်းလွတ်ႈတင်းၽေးလႄႈ ၶဝ်ႈၶဝ်ႈဢွၵ်ႇဢွၵ်ႇ ၵႂႃႇၵႂႃႇမႃးမႃး ထူပ်းတီႈဢၼ်ၵိၼ်ယူႇသေႇသေႇဢေႃႈ။- 10ၽူႈလၵ်ႉၸိုင် မႃးႁႂ်ႈလႆႈလၵ်ႉႁႂ်ႈလႆႈဢဝ်တၢႆ ႁႂ်ႈလႆႈယႃႉပႅတ်ႈၵူၺ်းဢေႃႈ။ ၵဝ်ၸမ်ႉ၊ မႃးႁႂ်ႈသူဝ်းတင်းလၢႆ လႆႈဢသၢၵ်ႈၵူၺ်းဢမ်ႇၵႃး၊ ႁႂ်ႈလႆႈပျေႉၸုမ်ႇဝႆႉတင်းဢသၢၵ်ႈဢေႃႈ။
11ၵဝ်ပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢၼ်လီဢေႃႈ။ ၵေႃႉဢၼ်လဵင်ႉသူဝ်းထိင်းသူဝ်းဢၼ်လီၼၼ်ႉ ၸၢင်ႈၸုၼ်ႉဢသၢၵ်ႈတူဝ်ၸဝ်ႈၵဝ်ႇ ပုၼ်ႈသူဝ်းတင်းလၢႆဢေႃႈ။- 12ၵေႃႉဢၼ်လဵင်ႉသူဝ်းဢၼ်ဢမ်ႇၸိုဝ်ႈဢမ်ႇၸႂ်ႈ ဢၼ်ဢမ်ႇပိူင်ႇသူဝ်း ဢၼ်ပဵၼ်ၵူၼ်းၵိၼ်ၸၢင်ႈၵိၼ်ငႃၼၼ်ႉၸမ်ႉ၊ မိူဝ်ႈဢၼ်ႁၼ်မႃထိူၼ်ႇမႃးၸိုင်၊ ၸၢင်ႈပႅတ်ႈဝႆႉသူဝ်းတင်းလၢႆသေလႄႈဢွၵ်ႇပၢႆႈဢေႃႈ။ မႃထိူၼ်ႇၵေႃႈႁိမ်ဢဝ်သူဝ်းၸိူဝ်းၼၼ်ႉလႄႈ ႁႂ်ႈမိူၵ်ႇမိူဝ်ၵႂႃႇဢေႃႈ။- 13ၵေႃႉၼၼ်ႉ ပိူဝ်ႈဢၼ်ပဵၼ်ၵူၼ်းဢၼ်ၵိၼ်ၸၢင်ႈၵိၼ်ငႃလႄႈ ယင်းဢမ်ႇၶႆႈၸႂ်လူၺ်ႈလွင်ႈ သူဝ်းတင်းလၢႆလႄႈ ၸၢင်ႈဢွၵ်ႇပၢႆႈသေဢေႃႈ။- 14ၵဝ်ပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢၼ်လီဢေႃႈ။ ၸိူဝ်ႉၼင်ႇဢၼ်ပေႃႈၸဝ်ႈႁူႉၵဝ်လႄႈ၊ ၵဝ်ၵေႃႈႁူႉပေႃႈၸဝ်ႈၼၼ်ႉ၊ ၵဝ်ႁူႉသူဝ်းၵဝ်တင်းလၢႆယူႇဢေႃႈ။ သူဝ်းၵဝ်တင်းလၢႆၸိူဝ်းၼၼ်ႉၵေႃႈႁူႉၵဝ်ယူႇဢေႃႈ။- 15ၵဝ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇ ပုၼ်ႈသူဝ်းၸိူဝ်းၼၼ်ႉဢေႃႈ။- 16သူဝ်းတၢင်ႇတီႈတၢင်ႇလႅၼ် ဢၼ်ဢမ်ႇၶဝ်ႈၵႃႈၼႂ်းၶွၵ်ႈၼႆႉၵေႃႈ ၵဝ်ပိူင်ႇယူႇလူးၵွၼ်ႇဢေႃႈ။ ၵဝ်တၵ်းလႆႈဢဝ်သူဝ်းၸိူဝ်းၼၼ်ႉမႃးဢေႃႈ။ ၶဝ်ၵေႃႈတၵ်းထွမ်ႇသဵင်ၵဝ်လႄႈ၊ တၵ်းလႆႈမီးၶွၵ်ႈသူဝ်းဢၼ်ၼိုင်ႈ ဢိၵ်ႇတင်းၵေႃႉလဵင်ႉသူဝ်းထိင်းသူဝ်းၵေႃႉလဵဝ်ၵူၺ်းဢေႃႈ။- 17ပိူဝ်ႈဢၼ်ၵဝ်ၸုၼ်ႉဢသၢၵ်ႈ တူဝ်ၸဝ်ႈၵဝ်ႇႁႂ်ႈလႆႈၶိုၼ်းဢဝ် ထႅင်ႈၵမ်းလိုၼ်းလူးၵွၼ်ႇလႄႈ ပေႃႈၸဝ်ႈႁၵ်ႉၵဝ်ဢေႃႈ။- 18ၽူႈလႂ်ဢမ်ႇႁိမ်ဢမ်ႇဢဝ်ဢသၢၵ်ႈၵဝ်။ ၵဝ်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇၸုၼ်ႉဢေႃႈ။ ဢၶႂၢင်ႉဢၼ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉ မီးတီႈၵဝ်ဢေႃႈ။ ဢၶႂၢင်ႉဢၼ်တၵ်းၶိုၼ်းဢဝ်ဢသၢၵ်ႈထႅင်ႈၵမ်းလိုၼ်းၼၼ်ႉ မီးတီႈၵဝ်ဢေႃႈ။ ပေႃႈၸဝ်ႈပၼ်ဢၶႂၢင်ႉၼၼ်ႉယဝ်ႉ၊ ဝႃႈၼင်ႇၼႆဢေႃႈ။
19ၵွပ်ႈပိူဝ်ႈၵႂၢမ်းမၼ်းၸဝ်ႈၼၼ်ႉလႄႈ ၵူၼ်းယူႉတႃႉၸိူဝ်းၼၼ်ႉ မီးတၢင်းဢၼ်ဢမ်ႇထုၵ်ႇဢမ်ႇပေႃးၵၼ် ၽၢတ်ႇၽႄၵၼ်ထႅင်ႈဢေႃႈ။- 20ၵူၼ်းၼမ်ၼႃႇဝႃႈ၊ မၼ်းၼႆႉၽီႁၢႆႉၶဝ်ႈလႄႈပဵၼ်ၵူၼ်းယွင်ႇဢေႃႈ။ ႁဵတ်းႁိုဝ်လႄႈ ထွမ်ႇဢဝ်ၵႂၢမ်းမၼ်းၼင်ႇႁိုဝ်၊ ဝႃႈၼင်ႇၼႆဢေႃႈ။- 21ၵမ်ႈၽွင်ႈၵေႃႈဝႃႈ၊ ၵႂၢမ်းမၼ်းၼႆႉပဵၼ်ၵႂၢမ်း ၵူၼ်းဢၼ်ၽီႁၢႆႉၶဝ်ႈဢမ်ႇၸႂ်ႈ၊ ၽီႁၢႆႉတၢတ်ႈၼိူင်ႇႁႂ်ႈလႆႈ ၽုၺ်ႇမၢၵ်ႇတႃၶဝ်ၸိူဝ်းဢၼ်တႃမွတ်ႇၼၼ်ႉလႆႈႁိုဝ်၊ ဝႃႈၼင်ႇၼႆဢေႃႈ။
ၸဝ်ႈယေႇသူႉလႆႈၶၢမ်ႇတၢင်းဢၼ်ထဵင်ပႅတ်ႈ
22မိူဝ်ႈၼၼ်ႉ ပဵၼ်ၶိင်ႇၵတ်းလႄႈ၊ ပဵၼ်ၶိင်ႇဢၼ် ၶဝ်ၶၢမ်ႇပွႆးဢၸႅၼ်ႇ ဢၼ်ႁဵတ်းဢၼူႉမေႃးတၼႃႇပိၵ်ႈမၢၼ်ႇၸဝ်ႈ ၵႃႈတီႈဝဵင်းယေႇရူႉသလႅမ်ႇၼၼ်ႉယူႇဢေႃႈ။- 23ယေႇသူႉၵေႃႈ ပႆသၢင်းၵျၢၼ်ႇယူႇၵႃႈၼႂ်းပိၵ်ႈမၢၼ်ႇၸဝ်ႈ ၵႃႈတီႈၸၢၼ်းသေႃးလမုၼ်ႇဢေႃႈ။- 24ပိူဝ်ႈၼႆလႄႈ ၵူၼ်းယူႉတႃႉၸိူဝ်းၼၼ်ႉ ဝႅင်းႁွပ်ႈမၼ်းၸဝ်ႈသေလႄႈလၢတ်ႈဝႃႈ၊ မႂ်းႁႂ်ႈႁဝ်းယုမ်ႇၶိုင်ႈၼိုင်ႈ ဢမ်ႇယုမ်ႇၶိုင်ႈၼိုင်ႈ ယူႇၶိင်ႇၵႃႇလႃႉႁိုင်ၵႃႈႁိုဝ်။ ပေႃးမႂ်းၸႂ်ႈၸဝ်ႈၶရိၸ်ႈၸိုင် ၶႅၼ်းတေႃႈလၢတ်ႈလႅင်းလႅင်းသေၵမ်း၊ ဝႃႈၼင်ႇၼႆဢေႃႈ။- 25ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵဝ်လၢတ်ႈယဝ်ႉ။ သူဢမ်ႇယုမ်ႇ။ လွင်ႈတၢင်းဢၼ်ၵဝ်ပႃးတင်းဢၶႂၢင်ႉၸဝ်ႈပေႃႈၵဝ်သေလႄႈႁဵတ်းၸိူဝ်းၼၼ်ႉ ပဵၼ်သၢၵ်ႈသေႇၵဝ်ယူႇဢေႃႈ။- 26ၼႂ်းဝႃႈၼၼ်သေၵေႃႈ သူဢမ်ႇယုမ်ႇ။ လွင်ႈမၼ်းၸမ်ႉ ၸိူဝ်ႉၼင်ႇဢၼ်ၵဝ်လၢတ်ႈဝႆႉဢွၼ်တၢင်းၼၼ်ႉ သူဢမ်ႇၶဝ်ႈပႃး ၼႂ်းသူဝ်းၵဝ်ၼၼ်ႉ။- 27သူဝ်းၵဝ်ၸိူဝ်းၼၼ်ႉထွမ်ႇသဵင်ၵဝ်လႄႈ ၸွမ်းပႃႈလင်ၵဝ်ဢေႃႈ။ သူဝ်းၸိူဝ်းၼၼ်ႉၸိုင်ၵဝ်ႁူႉဢေႃႈ။- 28ထႃႇဝရႃႉဢသၢၵ်ႈၵေႃႈၵဝ်ပၼ်တီႈၶဝ်ဢေႃႈ။ ၶဝ်ၼၼ်ႉတၵ်းၵၢင်းလွတ်ႈတင်းတၢင်းလူႉတၢင်းလႅဝ် တႃႇသေႇဢမ်ႇထၢတ်ႇဢေႃႈ။ ၽူႈလႂ်သေၵေႃႉသေၵူၼ်း ဢမ်ႇၼုၵ်ႈဢဝ်ၵႃႈၼႂ်းမိုဝ်းၵဝ်လႆႈ။- 29ၸဝ်ႈပေႃႈၵဝ်ဢၼ်ဢဝ်သူဝ်းၸိူဝ်းၼၼ်ႉ ဢၢပ်ႈပၼ်တီႈၵဝ်ၼၼ်ႉ ယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈ တင်းသဵင်ႈတင်းလူင်လႄႈ ၽူႈလႂ်သေၵေႃႉသေၵူၼ်း ဢမ်ႇၼုၵ်ႈဢဝ်ၶဝ်ၵႃႈၼႂ်းမိုဝ်းပေႃႈၸဝ်ႈလႆႈ။- 30ၵဝ်ဢိၵ်ႇတင်းပေႃႈၸဝ်ႈပဵၼ်ဢၼ်လဵဝ်ၵၼ်ဢေႃႈ၊ ဝႃႈၼင်ႇၼႆဢေႃႈ။
31မိူဝ်ႈၼၼ်ႉ ၵူၼ်းယူႉတႃႉၸိူဝ်းၼၼ်ႉ သမ်ႉၵဵပ်းဢဝ်မၢၵ်ႇႁိၼ် ႁႂ်ႈလႆႈထိမ်ႈမၼ်းၸဝ်ႈဢေႃႈ။- 32ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၵဝ်ၼႆႉပႃးတင်းဢၶႂၢင်ႉပေႃႈၸဝ်ႈသေလႄႈ ၼႄပျႃးလွင်ႈတၢင်းဢၼ်လီဢၼ်ငၢမ်းၼမ်ၼႃႇတီႈသူယဝ်ႉ။ ၼႂ်းလွင်ႈတၢင်းၸိူဝ်းၼၼ်ႉ၊ ၵွပ်ႈပိူဝ်ႈလွင်ႈတၢင်းဢၼ်လႂ်လႄႈ သူဢဝ်မၢၵ်ႇႁိၼ်တၵ်းထိမ်ႈၵဝ်၊ မိူဝ်ႈဢၼ်ဝႃႈၼင်ႇၼႆၸိုင်၊- 33ၵူၼ်းယူႉတႃႉၸိူဝ်းၼၼ်ႉၵေႃႈ ၶိုၼ်းလၢတ်ႈလႄႈဝႃႈ၊ ၵွပ်ႈပိူဝ်ႈလွင်ႈတၢင်းဢၼ်လီဢၼ်ငၢမ်းလႄႈ ႁဝ်းဢဝ်မၢၵ်ႇႁိၼ်တၵ်းထိမ်ႈဢမ်ႇၸႂ်ႈ။ ၵွပ်ႈပိူဝ်ႈၵႂၢမ်းဢၼ်သႄႉသွမ်းၽြႃးပဵၼ်ၸဝ်ႈဢိၵ်ႇတင်း ၵွပ်ႈပိူဝ်ႈဢၼ်မႂ်းပဵၼ်ၵူၼ်းယူႇလႄႈ ႁဵတ်းၸိူဝ်ႉၼင်ႇၽြႃးပဵၼ်ၸဝ်ႈလႄႈ ႁဝ်းဢဝ်မၢၵ်ႇႁိၼ်တၵ်းထိမ်ႈမႂ်းဢေႃႈ၊ ဝႃႈၼင်ႇၼႆဢေႃႈ။- 34ယေႇသူႉၵေႃႈၶိုၼ်းလၢတ်ႈလႄႈဝႃႈ၊ ၼႂ်းၵျၢမ်းလိၵ်ႈပိင်းၺၢပ်ႈတီႉသူၼၼ်ႉမီးမႃးလႄႈဝႃႈ၊ ၵဝ်ဝႃႈ၊ သူပဵၼ်ၽြႃးဢေႃႈ၊ ဝႃႈၼင်ႇၼႆဢမ်ႇၸႂ်ႈႁိုဝ်။- 35ပေႃးလႆႈႁွင်ႉၶဝ်ၸိူဝ်းဢၼ် လႆႈၶၢမ်ႇပျႃႇတိၵ်ႈၽြႃးပဵၼ်ၸဝ်ႈၼၼ်ႉလႄႈဝႃႈ၊ ၽြႃးဝႃႈၼင်ႇၼႆလႄႈသင်၊ ပေႃးဢမ်ႇလႆႈပႄႇပႅတ်ႈ ၵႂၢမ်းၵျၢမ်းလိၵ်ႈၼၼ်ႉလႄႈသင်၊- 36ၵွပ်ႈပိူဝ်ႈဢၼ် ၵေႃႉဢၼ်ပေႃႈၸဝ်ႈႁႂ်ႈမူတ်းၸၢင်ႇလႄႈ ပွႆႇၸႂ်ႉမႃးၼႂ်းလေႃးၵႃႉၼႆႉၼၼ်ႉလၢတ်ႈလႄႈဝႃႈ၊ ၵဝ်ပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆလႄႈ သူတၵ်းလႆႈလၢတ်ႈတီႈ ၵေႃႉၼၼ်ႉလႄႈဝႃႈ၊ မႂ်းသႄႉသွမ်း ၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆႁိုဝ်။- 37သင်ၵဝ်ဢမ်ႇႁဵတ်းလွင်ႈတၢင်းဢၼ် ၸၢပ်ႈသႅင်ႇၵၼ်တင်းပေႃႈၸဝ်ႈၸိူဝ်းၼၼ်ႉၸိုင် ယႃႇပေယုမ်ႇမၢတ်ႈၵဝ်။- 38ၵူၺ်းၵႃႈ ပေႃးၵဝ်ႁဵတ်းၸိုင် ပိၵ်ႉသမ်ႉသူဢမ်ႇယုမ်ႇမၢတ်ႈၵဝ်သေၵေႃႈ၊ ယုမ်ႇမၢတ်ႈလွင်ႈတၢင်းၸိူဝ်းၼၼ်ႉတႃႉ။ ပေႃးယုမ်ႇၸိူဝ်ႉၼင်ႇၼၼ်ၸိုင်၊ သူတၵ်းႁူႉၸႅင်ႈလွင်ႈဢၼ် ပေႃႈၸဝ်ႈမီးယူႇၼႂ်းၵဝ် ဢိၵ်ႇတင်းလွင်ႈဢၼ်ၵဝ်မီးယူႇၼႂ်းပေႃႈၸဝ်ႈၼၼ်ႉဢေႃႈ၊ ဝႃႈၼင်ႇၼႆဢေႃႈ။
39မိူဝ်ႈၼၼ်ႉ ၶဝ်သမ်ႉၶိုၼ်းႁႃႁႂ်ႈလႆႈ တီႉဢဝ်မၼ်းၸဝ်ႈထႅင်ႈလႄႈ မၼ်းၸဝ်ႈဢွၵ်ႇၵႂႃႇသေၵႃႈၼႂ်းမိုဝ်းၶဝ်ၼၼ်ႉဢေႃႈ။- 40မၼ်းၸဝ်ႈသမ်ႉၵႂႃႇၵႃႈတီႈ ၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ တီႈဢၼ်ယူဝ်းႁၢၼ်ႇ ပၼ်ပပ်ႉတီႉၸမ်ႇ မိူဝ်ႈဢွၼ်တၢင်းၼၼ်ႉလႄႈ ယူႇၵႃႈတီႈၼၼ်ႈဢေႃႈ။- 41ၵူၼ်းၼမ်ၼႃႇႁွတ်ႈထိုင်ၵႃႈတီႈမၼ်းၸဝ်ႈလႄႈလၢတ်ႈဝႃႈ၊ ယူဝ်းႁၢၼ်ႇၸိုင် ဢမ်ႇၼႄပျႃးၼီႉမိၵ်ႈလၢၵ်ႈၶၼႃႇ၊ ၼႂ်းဝႃႈၼၼ်သေၵေႃႈ ၵႃႈဢၼ်ယူဝ်းႁၢၼ်ႇ လၢတ်ႈလွင်ႈၵေႃႉၼႆႉ ဝႆႉၼၼ်ႉၸႂ်ႈတႄႉဢေႃႈ၊ ဝႃႈၼင်ႇၼႆဢေႃႈ။- 42ၵႃႈတီႈၼၼ်ႈၵူၼ်းၼမ်ၼႃႇယုမ်ႇမၢတ်ႈမၼ်းၸဝ်ႈဢေႃႈ။
Currently Selected:
ယူဝ်းႁၢၼ်ႇ 10: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
