ယူဝ်းႁၢၼ်ႇ 1
1
ၼုၵ်ႈၵပၢတ်ႈၸဝ်ႈဢၼ်ဢသၢၵ်ႈလိပ်း
1မိူဝ်ႈၵေႃႇၸႃႉႁူဝ်ပိုင်းၼၼ်ႉ မီးၼုၵ်ႈၵပၢတ်ႈၸဝ်ႈဢေႃႈ။ ၼုၵ်ႈၵပၢတ်ႈၸဝ်ႈၼၼ်ႉ မီးယူႇလူၺ်ႈၵၼ်တင်းၽြႃးပဵၼ်ၸဝ်ႈဢေႃႈ။ ၼုၵ်ႈၵပၢတ်ႈၸဝ်ႈၼၼ်ႉၵေႃႈပဵၼ်ၽြႃးပဵၼ်ၸဝ်ႈဢေႃႈ။- 2မၼ်းၸဝ်ႈၼၼ်ႉ မိူဝ်ႈၵေႃႇၸႃႉႁူဝ်ပိုင်းၼၼ်ႉ မီးယူႇလူၺ်ႈၵၼ်တင်းၽြႃးပဵၼ်ၸဝ်ႈဢေႃႈ။- 3မၼ်းၸဝ်ႈၼၼ်ႉ ၽၢၼ်ႇသၢင်းႁဵတ်းပဵၼ်ၶိူင်ႈပိူင်တင်းသဵင်ႈတင်းလူင်ဢေႃႈ။ ၶိူင်ႈပိူင်ဢၼ်ၵၢင်းလွတ်ႈသေတၢင်းဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ၼၼ်ႉဢမ်ႇမီးသေၸိူဝ်ႉသေပိူင်။- 4ၵႃႈၼႂ်းမၼ်းၸဝ်ႈၼၼ်ႉမီးဢသၢၵ်ႈဢေႃႈ။ ဢသၢၵ်ႈၼၼ်ႉၵေႃႈပဵၼ်ဢၼ်လႅင်းတီႈၵူၼ်းတင်းလၢႆဢေႃႈ။- 5ဢၼ်လႅင်းၼၼ်ႉႁိူဝ်ႈလႅင်းၼႂ်းဢၼ်လပ်းသိင်ႇလႄႈ ဢၼ်လပ်းသိင်ႇဢမ်ႇၶၢမ်ႇဢမ်ႇဢဝ်။
6ၽြႃးပဵၼ်ၸဝ်ႈပွႆႇၸႂ်ႉ ၵူၼ်းၵေႃႉၼိုင်ႈဢၼ်လႆႈၸိုဝ်ႈယူဝ်းႁၢၼ်ႇ မႃးဢေႃႈ။- 7မၼ်းၼၼ်ႉ မႃးႁႂ်ႈလႆႈပဵၼ်ၵေႃႉဢၼ်ၶၢမ်ႇသၢၵ်ႈသေႇလႄႈ ၶၢမ်ႇသၢၵ်ႈသေႇလွင်ႈဢၼ်လႅင်းၸဝ်ႈၼၼ်ႉ ႁႂ်ႈၵူၼ်းတင်းသဵင်ႈတင်းလူင်လႆႈဢိင်ပိုင်ႈမၼ်းၸဝ်ႈသေလႄႈ ႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။- 8မၼ်းၼၼ်ႉ ပဵၼ်ဢၼ်လႅင်းၸဝ်ႈဢမ်ႇၸႂ်ႈ။ မၼ်းမႃးႁႂ်ႈလႆႈၶၢမ်ႇသၢၵ်ႈသေႇလွင်ႈဢၼ်လႅင်းၸဝ်ႈၵူၺ်းဢေႃႈ။- 9ဢၼ်လႅင်းဢၼ်ၸိုဝ်ႈဢၼ်ၸႂ်ႈၼၼ်ႉၸမ်ႉ မႃးၼႂ်းလေႃးၵႃႉၼႆႉယူႇသေလႄႈ ပဵၼ်ၵေႃႉဢၼ်ပၼ်ဢၼ်လႅင်း တီႈၵူၼ်းတင်းသဵင်ႈတင်းလူင်ဢေႃႈ။- 10မၼ်းၼၼ်ႉမႃးၼႂ်းလေႃးၵႃႉၼႆႉယဝ်ႉ။ လေႃးၵႃႉၼႆႉၵေႃႈမၼ်းၽၢၼ်ႇသၢင်းႁဵတ်းပဵၼ်ယဝ်ႉ၊ ၼႂ်းဝႃႈၼၼ်သေၵေႃႈ လေႃးၵႃႉၼႆႉဢမ်ႇႁူႉမၼ်းၼၼ်ႉ။- 11ပိၵ်ႉသမ်ႉမၼ်းမႃးၸူးတီႈယူႇမၼ်းသေၵေႃႈ၊ ၵူၼ်းမဵဝ်းမၼ်းတင်းလၢႆ ယင်းဢမ်ႇႁပ်ႉတုင်းဢဝ်မၼ်းလႄႈယူႇဢေႃႈ။- 12တီႈၶဝ်ၸိူဝ်းဢၼ်ႁပ်ႉတုင်းဢဝ်မၼ်းၼၼ်ႉ ၵႃႈမီးတင်းသဵင်ႈတင်းလူင်ဢၼ်ဝႃႈ ၶဝ်ၸိူဝ်းဢၼ်ယုမ်ႇမၢတ်ႈ ၼႃႇမႃႉၸိုဝ်ႈသဵင်မၼ်းၸဝ်ႈတင်းလၢႆၼၼ်ႉ၊ မၼ်းၸဝ်ႈပၼ်ဢၶႂၢင်ႉ ဢၼ်လႆႈပဵၼ်လုၵ်ႈၽြႃးပဵၼ်ၸဝ်ႈဢေႃႈ။- 13လုၵ်ႈၸိူဝ်းၼၼ်ႉၸမ်ႉ၊ ပဵၼ်လုၵ်ႈဢၼ် ၸၢပ်ႈသႅင်ႇၵၼ်တင်းလိူတ်ႈၵူၼ်းလႄႈၵိူတ်ႇလဵင်ႉမႃးဢမ်ႇၸႂ်ႈ။ ပဵၼ်လုၵ်ႈဢၼ်ၵိူတ်ႇလဵင်ႉမႃးၵွပ်ႈပိူဝ်ႈ ဢလူဝ်ႇၼိူဝ်ႉၵူၼ်းဢမ်ႇၸႂ်ႈ။ ပဵၼ်လုၵ်ႈဢၼ်ၵိူတ်ႇလဵင်ႉမႃး ၸွမ်းၼင်ႇဢလူဝ်ႇၵူၼ်းဢမ်ႇၸႂ်ႈ။ ပဵၼ်လုၵ်ႈဢၼ်ၵိူတ်ႇလဵင်ႉမႃး ၵွပ်ႈပိူဝ်ႈၽြႃးပဵၼ်ၸဝ်ႈဢေႃႈ။
14ၼုၵ်ႈၵပၢတ်ႈၸဝ်ႈၼၼ်ႉၵေႃႈ ၶၢမ်ႇဢဝ်ၸႃႇတီႉၵူၼ်းလႄႈ ပျေႉၸုမ်ႇတင်းၵျေးၸူးၸဝ်ႈ ဢိၵ်ႇတင်းသဵတ်ႈၸႃႇၸဝ်ႈယူႇသေလႄႈ တႄႇယူႇၼႂ်းႁဝ်းလႄႈ ႁဝ်းၼႆႉလႆႈႁၼ်မုၼ်ၽုင်းမၼ်းပဵၼ်ၸိူဝ်ႉၼင်ႇမုၼ်ၽုင်းလုၵ်ႈၸဝ်ႈ ဢၼ်မီးယူႇတီႈပေႃႈၸဝ်ႈပႃးလဵဝ်ၵူၺ်းၼၼ်ႉယဝ်ႉ။
15 ယူဝ်းႁၢၼ်ႇ ၶၢမ်ႇသၢၵ်ႈသေႇလွင်ႈမၼ်းၸဝ်ႈၼၼ်ႉသေလႄႈ ႁွင်ႉပၢဝ်ႇႁွင်ႉလၢတ်ႈလႄႈဝႃႈၸမ်ႉ၊ ဢၼ်ၵဝ်လၢတ်ႈလႄႈဝႃႈ၊ ၵေႃႉဢၼ်မႃးလိုၼ်းၵဝ်ၼၼ်ႉ၊ ပိူဝ်ႈဢၼ်မီးဝႆႉယူႇယဝ်ႉ ၸူဝ်ႈဢၼ်ၵဝ်ဢမ်ႇပႆႇမီးၼၼ်ႉလႄႈ ယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ၊ ဝႃႈၼင်ႇၼႆၼၼ်ႉ ၶႂ်ႈဝႃႈၵေႃႉၼၼ်ႉဢေႃႈ၊ ဝႃႈၼင်ႇၼႆဢေႃႈ။- 16ၵႃႈၼႂ်းတၢင်းဢၼ်ပျေႉၸုမ်ႇမၼ်းၸဝ်ႈၼၼ်ႉၵေႃႈ ႁဝ်းၵႃႈမီးတင်းသဵင်ႈတင်းလူင်လႆႈၶၢမ်ႇဢဝ် တၢင်းဢၼ်ဢဝ်ၵျေးၸူးပႃးၼိုင်ႈ သမ်ႉထၢပ်ႈသႂ်ႇထႅင်ႈၵျေးၸူးပႃးၼိုင်ႈယဝ်ႉ။- 17လွင်ႈမၼ်းၸမ်ႉ ပိင်းၺၢပ်ႈတြႃးၸိုင်၊ မၼ်းၸဝ်ႈပၼ်ၼႂ်းမိုဝ်းမူဝ်းသေႇၼၼ်ႉဢေႃႈ။ ၵျေးၸူးတြႃးတင်းသဵတ်ႈၸႃႇတြႃးၸမ်ႉ ပဵၼ်မႃးၼႂ်း ယေႇသူႉၶရိၸ်ႈဢေႃႈ။- 18ပိၵ်ႉသမ်ႉၽူႈလႂ်ဢမ်ႇပႆႇတွၼ်ႉလႆႈႁၼ်ၽြႃးပဵၼ်ၸဝ်ႈသေၵေႃႈ၊ လုၵ်ႈၸဝ်ႈပႃးလဵဝ်ၵူၺ်း ဢၼ်မီးၼႂ်းဝၢင်ႈႁူဝ်ဢူၵ်းပေႃႈၸဝ်ႈၼၼ်ႉ ႁႂ်ႈမၼ်းၸဝ်ႈထၢင်ႇသႃးမႃးယဝ်ႉ။
19မိူဝ်ႈဢၼ်ၵူၼ်းယူႉတႃႉတင်းလၢႆ ပွႆႇၸႂ်ႉယိတ်ႈပရေႃးႁဵၵ်ႈလူင်ဢိၵ်ႇတင်း ၵူၼ်းလေႇဝီႉတင်းလၢႆ ဢွၵ်ႇသေၵႃႈၼႂ်းဝဵင်းယေႇရူႉသလႅမ်ႇ ၵႂႃႇၸူးၵႃႈတီႈ ယူဝ်းႁၢၼ်ႇႁႂ်ႈလႆႈထၢမ်မၼ်းလႄႈဝႃႈ၊ မႂ်းပဵၼ်ၽူႈလႂ်၊ ဝႃႈၼင်ႇၼႆၼၼ်ႉၸိုင်၊ ယူဝ်းႁၢၼ်ႇၶၢမ်ႇသၢၵ်ႈသေႇလႄႈဝႃႈၸမ်ႉ၊- 20ၵဝ်ဢမ်ႇၸႂ်ႈၸဝ်ႈၶရိၸ်ႈၵူၺ်ႉ ဝႃႈၼႆ၊ ယင်းဢမ်ႇသိူင်ႇဝႆႉမႅပ်ႉဝႆႉလႄႈ လၢတ်ႈဝႃႈလႅင်းလႅင်းဢေႃႈ။- 21ၶဝ်ၼၼ်ႉၵေႃႈ သမ်ႉၶိုၼ်းထၢမ်လႄႈဝႃႈ၊ ပေႃးပဵၼ်ၼင်ႇၼႆၸိုင်၊ မႂ်းပဵၼ်ၽူႈလႂ်၊ ပဵၼ်ဢေးလီႉယႃႉႁိုဝ်၊ ဝႃႈၼင်ႇၼႆဢေႃႈ။ ယူဝ်းႁၢၼ်ႇၵေႃႈ လၢတ်ႈလႄႈဝႃႈ၊ ၵဝ်ဢမ်ႇၸႂ်ႈ ဢေးလီႉယႃႉ၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈ သမ်ႉၶိုၼ်းထၢမ်လႄႈဝႃႈ၊ ပဵၼ်ပရေႃးၽႅတ်ႈဢၼ်ဝႃႈၼၼ်ႉႁိုဝ်။ မိူဝ်ႈဢၼ်ဝႃႈၼင်ႇၼႆၸိုင် မၼ်းသမ်ႉၶိုၼ်းလၢတ်ႈလႄႈဝႃႈ၊ ဢမ်ႇၸႂ်ႈၵူၺ်ႉ၊ ဝႃႈၼင်ႇၼႆဢေႃႈ။- 22ၶဝ်ၼၼ်ႉၵေႃႈသမ်ႉၶိုၼ်းထၢမ်လႄႈဝႃႈ၊ မႂ်းပဵၼ်ၽူႈလႂ်၊ ၼင်ႇႁိုဝ်တၵ်းမီးလွင်ႈဢၼ်တၵ်းၶိုၼ်းလၢတ်ႈတီႈၶဝ်ၸိူဝ်းဢၼ် ပွႆႇၸႂ်ႉႁဝ်းမႃးၸိူဝ်းၼၼ်ႉၸိုင်မႂ်းၶႂ်ႈဝႃႈ လွင်ႈတူဝ်ၸဝ်ႈၵဝ်ႇၸိူဝ်ႉၼင်ႇႁိုဝ်၊ ဝႃႈၼင်ႇၼႆဢေႃႈ။- 23မၼ်းၵေႃႈလၢတ်ႈလႄႈဝႃႈ၊ ၵႃႈၼင်ႇဢၼ်ပရေႃးၽႅတ်ႈဢီႉသႃႇယႃႉ ႁေႃးလၢတ်ႈဝႆႉၼၼ်ႉ၊ ၵဝ်ပဵၼ်သဵင်ၵေႃႉဢၼ်ႁွင်ႉသႅၼ်ႇၵႃႈတီႈၼႂ်းထိူၼ်ႇလႄႈဝႃႈ၊ ႁႂ်ႈသဵၼ်ႈတၢင်းထႃႇဝရႃႉၽြႃးသိုဝ်ႈတႃႉ၊ ဝႃႈၼင်ႇၼႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။
24ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ပွႆႇၸႂ်ႉမႃးၼၼ်ႉၸမ်ႉ၊ ပဵၼ်ၽႃႇရီႉသႄးဢေႃႈ။- 25ၶဝ်ၼၼ်ႉသမ်ႉၶိုၼ်းထၢမ်တီႈမၼ်းလႄႈဝႃႈ၊ ပေႃးမႂ်းဢမ်ႇၸႂ်ႈၸဝ်ႈၶရိၸ်ႈ၊ ဢမ်ႇၸႂ်ႈ ဢေးလီႉယႃႉ၊ ဢမ်ႇၸႂ်ႈပရေႃးၽႅတ်ႈဢၼ်ဝႃႈၼၼ်ႉၸိုင်၊ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ မႂ်းပၼ်ပပ်ႉတီႉၸမ်ႇၼင်ႇႁိုဝ်၊ ဝႃႈၼင်ႇၼႆဢေႃႈ။- 26ယူဝ်းႁၢၼ်ႇၵေႃႈ ၶိုၼ်းလၢတ်ႈလႄႈဝႃႈ၊ ၵဝ်ပၼ် ပပ်ႉတီႉၸမ်ႇၼႂ်းၼမ်ႉဢေႃႈ။ ၼႂ်းၵၢင်သူမီးၵေႃႉၼိုင်ႈဢၼ်သူဢမ်ႇႁူႉဢေႃႈ။- 27ၵေႃႉၼၼ်ႉပိၵ်ႉသမ်ႉမႃးလိုၼ်းၵဝ်သေၵေႃႈယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ၊ ၵဝ်ၼႆႉယင်းဢမ်ႇထိူၵ်ႈၵႄႈဢဝ်သၢႆၶႅပ်းတိၼ်ၵေႃႉၼၼ်ႉ၊ ဝႃႈၼင်ႇၼႆဢေႃႈ။- 28လွင်ႈတၢင်းၸိူဝ်းၼႆႉပဵၼ်ၼႂ်းဝၢၼ်ႈပေႇထၼီႉ ၵႃႈတီႈၽၢႆႇပုၼ်ႉၼမ်ႉႁွင်ႈယေႃးတၢၼ်ႇ တီႈဢၼ် ယူဝ်းႁၢၼ်ႇ ပၼ်ပပ်ႉတီႉၸမ်ႇၼၼ်ႉဢေႃႈ။
သြႃႇယူဝ်းႁၢၼ်ႇၶၢမ်ႇသၢၵ်ႈသေႇလွင်ႈၸဝ်ႈယေႇသူႉ
(တူၺ်း၊ မၢတ်ႈ 4:18-22။ မႃႇ 1:16-20။ လူႉ 5:2-11)
29ဝၼ်းမိူဝ်ႈၽုၵ်ႈ ယူဝ်းႁၢၼ်ႇၼၼ်ႉ ႁၼ်ယေႇသူႉမႃးလႄႈ လၢတ်ႈလႄႈဝႃႈ၊ တူၺ်းသူဝ်းဢွၼ်ႇၽြႃးပဵၼ်ၸဝ်ႈဢၼ်ဢဝ်ဢပႅတ်ႈလေႃးၵႃႉၼႆႉၵႂႃႇၼၼ်ႉတႃႉ။- 30ဢၼ်ၵဝ်လၢတ်ႈလႄႈဝႃႈ၊ ၵေႃႉဢၼ်မႃးလိုၼ်းၵဝ်ၼၼ်ႉ၊ ပိူဝ်ႈဢၼ်မီးဝႆႉယူႇယဝ်ႉ ၸူဝ်ႈဢၼ်ၵဝ်ဢမ်ႇပႆႇမီးၼၼ်ႉလႄႈ ယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ၊ ဝႃႈၼင်ႇၼႆၼၼ်ႉ ၶႂ်ႈဝႃႈၵေႃႉၼၼ်ႉဢေႃႈ။- 31မိူဝ်ႈၸႃႉမၼ်းၵဝ်ဢမ်ႇႁူႉၵေႃႉၼၼ်ႉ၊ ၼႂ်းဝႃႈၼၼ်သေၵေႃႈ ၼင်ႇႁိုဝ်ၵေႃႉၼၼ်ႉတၵ်းလႆႈထၢင်ႇသႃးတီႈၵူၼ်း ဢီႉသရေႇလႃႉတင်းလၢႆၸိုင်၊ ၵဝ်ၸင်ႇမႃးပၼ်ပပ်ႉတီႉၸမ်ႇၼႂ်းၼမ်ႉဢေႃႈ၊ ဝႃႈၼင်ႇၼႆဢေႃႈ။- 32လိူဝ်သေၼၼ်ႉ၊ ယူဝ်းႁၢၼ်ႇၶၢမ်ႇသၢၵ်ႈသေႇလႄႈဝႃႈ၊ ၵဝ်လႆႈႁၼ်ဝီႉၺိၺ်ႇၸဝ်ႈလူင်းသေၵႃႈၼိူဝ်ၵၢင်ႁၢဝ်ပုၼ်ႉမႃးၸိူဝ်ႉၼင်ႇႁၢင်ႈၼူၵ်ႉတူႈလႄႈ ၸပ်းယူႇၵႃႈၼိူဝ်မၼ်းၼၼ်ႉယဝ်ႉ။- 33မိူဝ်ႈၸႃႉမၼ်းၵဝ်ဢမ်ႇႁူႉၵေႃႉၼၼ်ႉ၊ ၵေႃႉဢၼ်ပွႆႇၸႂ်ႉၵဝ်မႃးႁႂ်ႈလႆႈပၼ်ပပ်ႉတီႉၸမ်ႇၼႂ်းၼမ်ႉၼၼ်ႉၵေႃႈလၢတ်ႈလႄႈဝႃႈ၊ ၵႃႈၼိူဝ်ၽူႈလႂ်သေဢမ်ႇဝႃႈ၊ ၵေႃႉဢၼ်မႂ်းလႆႈႁၼ်ဝီႉၺိၺ်ႇၸဝ်ႈလူင်းမႃးလႄႈၸပ်းယူႇၼၼ်ႉ၊ ၵေႃႉၼၼ်ႉၸမ်ႉ၊ ပဵၼ်ၵေႃႉဢၼ်ပၼ်ပပ်ႉတီႉၸမ်ႇၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ ဝႃႈၼႆ၊ ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ၊- 34ၵဝ်ႁၼ်လႄႈၶၢမ်ႇသၢၵ်ႈသေႇ လွင်ႈဢၼ်ၵေႃႉၼၼ်ႉပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ ဝႃႈၼင်ႇၼႆဢေႃႈ။
35လိုၼ်းၼၼ်ႉ ၼႂ်းဝၼ်းမိူဝ်ႈၽုၵ်ႈ ယူဝ်းႁၢၼ်ႇၸုၵ်းယူႇလူၺ်ႈၵၼ်တင်းတပႄးမၼ်းသွင်ၵေႃႉလႄႈ၊- 36မိူဝ်ႈဢၼ်ႁၼ်ယေႇသူႉ ၵၢႆၵႂႃႇၵၢႆမႃးၸိုင် လၢတ်ႈလႄႈဝႃႈ၊ တူၺ်းသူဝ်းဢွၼ်ႇၽြႃးပဵၼ်ၸဝ်ႈတႃႉ၊ ဝႃႈၼင်ႇၼႆဢေႃႈ။- 37တပႄးသွင်ၵေႃႉၼၼ်ႉငိၼ်းၵႂၢမ်းမၼ်းလႄႈ ၸွမ်းပႃႈလင်ယေႇသူႉၵႂႃႇဢေႃႈ။- 38ယေႇသူႉဝၢႆႇတူၺ်းလႄႈ မိူဝ်ႈဢၼ်ႁၼ်ၶဝ်ၸွမ်းယူႇၼၼ်ႉၸိုင် ထၢမ်လႄႈဝႃႈ၊ သူႁႃၵႃႈသင်၊ ဝႃႈၼင်ႇၼႆဢေႃႈ။ ၶဝ်ၼၼ်ႉၵေႃႈလဝ်ႊထၢမ်လႄႈဝႃႈ၊ ရပ်ႉၽီႉ၊ ၸဝ်ႈႁဝ်းယူႇၵႃႈလႂ်ၶႃႈ၊ ဝႃႈၼင်ႇၼႆဢေႃႈ၊ ဢထိၵ်ႈပႄႇ ရပ်ႉၽီႉၸမ်ႉ၊ ၶႂ်ႈဝႃႈ သြႃႇၸဝ်ႈဢေႃႈ။- 39မၼ်းၸဝ်ႈၵေႃႈလၢတ်ႈလႄႈဝႃႈ၊ မႃးတူၺ်းတႃႉ၊ ဝႃႈၼင်ႇၼႆဢေႃႈ၊ ၶဝ်ၼၼ်ႉၵႂႃႇလႄႈလူတူၺ်းတီႈဢၼ်မၼ်းၸဝ်ႈယူႇၼၼ်ႉဢေႃႈ။ ပိူဝ်ႈဢၼ်ၶိင်ႇၼၼ်ႉပဵၼ်ၶိင်ႇသိပ်းၼႃႇရီႇလႄႈ၊ ဝၼ်းၼၼ်ႉၸိုင် ၶဝ်ၼၼ်ႉယူႇၵႃႈတီႈမၼ်းၸဝ်ႈၼၼ်ႉဢေႃႈ။- 40ၼႂ်းၶဝ်သွင်ၵေႃႉဢၼ်ငိၼ်းၵႂၢမ်း ယူဝ်းႁၢၼ်ႇလႄႈ ၸွမ်းပႃႈလင်မၼ်းၸဝ်ႈၵႂႃႇၼၼ်ႉ၊ ၵေႃႉၼိုင်ႈၸမ်ႉ၊ ပဵၼ်ဢၼ်ႇတရေႇ ၼွင်ႉၸၢႆး သီႉမုၼ်ႇ ပေႇတရူႉဢေႃႈ။- 41မၼ်းၼၼ်ႉထူပ်းႁၼ်ပီႈၸၢႆးမၼ်း သီႉမုၼ်ႇဢွၼ်တၢင်းပိူၼ်ႈလႄႈ လၢတ်ႈလႄႈဝႃႈ၊ ႁဝ်းလႆႈထူပ်းႁၼ် မေသီႉယဝ်ႉ၊ ဝႃႈၼင်ႇၼႆလႄႈ၊- 42ဢဝ်မၼ်းၵႂႃႇသူင်ႇၵႃႈတီႈယေႇသူႉဢေႃႈ။ ဢထိၵ်ႈပႄႇ မေသီႉၸမ်ႉ၊ ၶႂ်ႈဝႃႈၸဝ်ႈၶရိၸ်ႈဢေႃႈ။ ယေႇသူႉလူတူၺ်းမၼ်းၼၼ်ႉသေလႄႈလၢတ်ႈလႄႈဝႃႈ၊ မႂ်းပဵၼ် သီႉမုၼ်ႇလုၵ်ႈၸၢႆးယူဝ်းၼႃႉဢေႃႈ။ ၸိုဝ်ႈသဵင်မႂ်းၸိုင်တၵ်းလႆႈႁွင်ႉႁဵၵ်ႈ ၵေႇၽႃႉဢေႃႈ။ ဢထိၵ်ႈပႄႇ ၵေႇၽႃႉၸမ်ႉ၊ ၶႂ်ႈဝႃႈ ပေႇတရူႉဢေႃႈ။
ၸဝ်ႈယေႇသူႉႁွင်ႉဢဝ်ၽီႉလိပ်ႉပူႉတင်းၼႃႇသၼေႇလႃႉ
43ၼႂ်းဝၼ်းမိူဝ်ႈၽုၵ်ႈ မၼ်းၸဝ်ႈၼၼ်ႉမီးဢလူဝ်ႇၶႂ်ႈၵႂႃႇၵႃႈတီႈ မိူင်းၵႃႇလီႉလႄးသေယဝ်ႉ၊ ထူပ်းႁၼ်ၽီႉလိပ်ႉပူႉလႄႈလၢတ်ႈဝႃႈ၊ ၸွမ်းပႃႈလင်ၵဝ်တႃႉ၊ ဝႃႈၼင်ႇၼႆဢေႃႈ။- 44ၽီႉလိပ်ႉပူႉၼၼ်ႉၸမ်ႉ၊ ပဵၼ်ၵေႃႉဢၼ်လုၵ်ႉသေၵႃႈတီႈ ဝဵင်းပႅတ်ႉၸေးတႃႉ တီႈဢၼ် ဢၼ်ႇတရေႇ တင်းပေႇတရူႉ ၵိူတ်ႇလဵင်ႉမႃးၼၼ်ႉ မႃးဢေႃႈ။- 45ၽီႉလိပ်ႉပူႉ ထူပ်းႁၼ် ၼႃႇသၼေႇလႃႉလႄႈလၢတ်ႈဝႃႈ၊ ႁဝ်းလႆႈထူပ်းႁၼ် ၵေႃႉဢၼ်မူဝ်းသေႇ တႅမ်ႈဝႆႉလွင်ႈမၼ်းၼႂ်းၵျၢမ်းလိၵ်ႈပိင်းၺၢပ်ႈတီႉ ဢိၵ်ႇတင်းပရေႃးၽႅတ်ႈတင်းလၢႆတႅမ်ႈဝႆႉလွင်ႈမၼ်းၼႂ်းၵျၢမ်းလိၵ်ႈၶဝ် ဢၼ်ဝႃႈယေႇသူႉ လုၵ်ႈယူဝ်းသႅပ်ႈ ၵူၼ်းဝဵင်းၼႃႇၸရႅတ်ႈၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 46ၼႃႇသၼေႇလႃႉၵေႃႈ ထၢမ်လႄႈဝႃႈ၊ လွင်ႈတၢင်းဢၼ်လီဢၼ်ငၢမ်းဢွၵ်ႇၵႃႈၼႂ်း ဝဵင်းၼႃႇၸရႅတ်ႈၼၼ်ႉ မႃးလႆႈသေၸိူဝ်ႉသေပိူင်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ ၽီႉလိပ်ႉပူႉၵေႃႈ လၢတ်ႈလႄႈဝႃႈ၊ မႃးလႄႈတူၺ်းသေၵမ်းၶႃႈ၊ ဝႃႈၼင်ႇၼႆဢေႃႈ။- 47ယေႇသူႉ ႁၼ်ၼႃႇသၼေႇလႃႉ မႃးတီႈမၼ်းၸဝ်ႈသေယဝ်ႉ၊ လၢတ်ႈလွင်ႈမၼ်းလႄႈဝႃႈ၊ တူၺ်းၵူၼ်း ဢီႉသရေႇလႃႉ ၸႅတ်ႈၸႅတ်ႈဢၼ်ၵၢင်းလွတ်ႈတင်းတၢင်းဢၼ်ပႅတ်ႉဢၼ်လႅၼ်ၼၼ်ႉတႃႉ၊ ဝႃႈၼင်ႇၼႆဢေႃႈ။- 48ၼႃႇသၼေႇလႃႉၵေႃႈ လဝ်ႊထၢမ်လႄႈဝႃႈ၊ ၵွပ်ႈပိူဝ်ႈလွင်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းႁူႉၵဝ်ၶႃႈတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ယေႇသူႉၶိုၼ်းလၢတ်ႈလႄႈဝႃႈ ၸူဝ်ႈဢၼ် ၽီႉလိပ်ႉပူႉ ဢမ်ႇပႆႇႁွင်ႉမႂ်းမႃးၼၼ်ႉ ၵဝ်ႁၼ်မႂ်းမီးယူႇၵႃႈတီႈတႂ်ႈတူၼ်ႈမၢၵ်ႇလိူဝ်ႇသၢင်းၽေႃးပုၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 49ၼႃႇသၼေႇလႃႉၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ၸဝ်ႈႁဝ်း၊ ၸဝ်ႈႁဝ်းၼႆႉပဵၼ်လုၵ်ႈၽြႃးပဵၼ်ၸဝ်ႈတီႈၶႃႈဢေႃႈ။ ၶုၼ်ႁေႃၶမ်း ၵူၼ်းဢီႉသရေႇလႃႉတင်းလၢႆၵေႃႈပဵၼ်တီႈၶႃႈဢေႃႈ၊ ဝႃႈၼင်ႇၼႆဢေႃႈ။- 50ယေႇသူႉၵေႃႈ သမ်ႉလၢတ်ႈလႄႈဝႃႈ၊ ပိူဝ်ႈဢၼ်ၵဝ်ဝႃႈ၊ ၵဝ်လႆႈႁၼ်မႂ်းၵႃႈတီႈတႂ်ႈတူၼ်ႈမၢၵ်ႇလိူဝ်ႇသၢင်းၽေႃးပုၼ်ႉ၊ ဝႃႈၼင်ႇၼႆလႄႈ မႂ်းၸင်ႇယုမ်ႇႁိုဝ်။ လိူဝ်သေၼၼ်ႉဢမ်ႇၵႃး မႂ်းတၵ်းလႆႈႁၼ်လွင်ႈတၢင်းဢၼ် ယဵင်ႈၶႅၼ်းယႂ်ႇၼႃႇသေဢၼ်ၼႆႉလူးၵွၼ်ႇဢေႃႈ။- 51ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်ႉ၊ ၶိင်ႇၵႃႇလႃႉၵမ်းလိုၼ်း သူတၵ်းလႆႈႁၼ်ၵၢင်ႁၢဝ်ၽုၺ်ႇပိုတ်ႇဝႆႉ ဢိၵ်ႇတင်းတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတင်းလၢႆ ၶိုၼ်ႈယူႇလူင်းယူႇၵႃႈၼိူဝ်လုၵ်ႈၵူၼ်းဢေႃႈ၊ ဝႃႈၼင်ႇၼႆဢေႃႈ။
Currently Selected:
ယူဝ်းႁၢၼ်ႇ 1: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
