ငဝ်ႈၵမ်ႇၽႃႇ 25

ၸိူဝ်ႉၶိူဝ်းဢႃႇပြႃႇႁၢမ်ႇတၢင်ႇၶိူဝ်း

(တူၺ်း၊ 1 ရႃႇၶျုၵ်ႈ 1:32-33)

1ၵမ်းၼၼ်ႉ ဢႃႇပြႃႇႁၢမ်ႇသမ်ႉဢဝ်မႄႈယိင်းဢၼ်လႆႈၸိုဝ်ႈၵေႇတူႉရႃႉထႅင်ႈလႄႈ၊- 2မၼ်းၼၼ်ႉၵိူတ်ႇလဵင်ႉလုၵ်ႈၸၢႆးၸိမ်းရမ်၊ ယွၵ်ႉသၢၼ်ႇ၊ မေႇတၢၼ်ႇ၊ မီႉတျၼ်ႇ၊ ဢီႉသၽၵ်ႉ တင်းသူႉဢႃႇဢေႃႈ။- 3ယွၵ်ႉသၢၼ်ႇၸမ်ႉ၊ မီးလုၵ်ႈၸၢႆး သေးၽႃႉတင်းတေႇတၼ်ႇဢေႃႈ။ လုၵ်ႈၸၢႆးတေႇတၼ်ႇၸမ်ႉ၊ ပဵၼ်ၵူၼ်းဢႃႇသူႉရိမ်ႇ၊ ၵူၼ်းလေႇတူႉသိမ်ႇ တင်းၵူၼ်းလုမ်ႇမိမ်ႇဢေႃႈ။- 4လုၵ်ႈၸၢႆး မီႉတျၼ်ႇၸမ်ႉ၊ ပဵၼ်ဢေးၽႃႉ၊ ဢေးၽေႇရႃႉ၊ ႁႃႇၼုတ်ႉ၊ ဢပီႉတႃႉ တင်းဢေးလတႃႇဢေႃႈ။ ၶဝ်တင်းသဵင်ႈတင်းလူင်ၸိူဝ်းၼႆႉၸမ်ႉ၊ ပဵၼ်ၸိူဝ်ႉၶိူဝ်းၵေႇတူႉရႃႉဢေႃႈ။

5 ဢႃႇပြႃႇႁၢမ်ႇဢဝ်ဢုၵ်ႉၸႃႇမၼ်းၵႃႈမီးတင်းသဵင်ႈတင်းလူင်ပၼ်တီႈဢီႉၸၢၵ်ႈဢေႃႈ။- 6တီႈလုၵ်ႈၸၢႆးဢၼ်လႆႈတီႈမေးၼွႆႉၸိူဝ်းၼၼ်ႉၵေႃႈ၊ ဢႃႇပြႃႇႁၢမ်ႇပၼ်သူးပၼ်လၢပ်ႈလႄႈ ၼႂ်းမိူဝ်ႈဢၼ်ဢသၢၵ်ႈမၼ်းယင်းလိပ်းယူႇၼၼ်ႉၸိုင်၊ မၼ်းပွႆႇၶဝ်ဢွၵ်ႇသေ ၵႃႈတီႈလုၵ်ႈၸၢႆးမၼ်းဢီႉၸၢၵ်ႈၼၼ်ႉ ၵႂႃႇၼႃႈဝၼ်းဢွၵ်ႇၸူး ၵႃႈတီႈမိူင်းဝၼ်းဢွၵ်ႇဢေႃႈ။

လွင်ႈတၢင်းဢႃႇပြႃႇႁၢမ်ႇတၢႆ

7ၶိင်ႇၵႃႇလႃႉပီႊဝၼ်းဢသၢၵ်ႈ ဢႃႇပြႃႇႁၢမ်ႇဢၼ်မၼ်းဢသၢၵ်ႈလိပ်းယူႇၼၼ်ႉၸမ်ႉ၊ လႆႈပၢၵ်ႇပၢႆၸဵတ်းသိပ်းပၢႆႁႃႈပီႊဢေႃႈ။- 8မၼ်းမီးတၢင်းဢၼ်ဢသၢၵ်ႈၵႄႇထူၼ်ႈယဝ်ႉလႄႈ ထဝ်ႈယဝ်ႉ ဢိၵ်ႇတင်းတၢင်းဢၼ်ၶိင်ႇၵႃႇလႃႉ ဝၼ်းမၼ်းတဵမ်ယဝ်ႉ ၸေးယဝ်ႉၼၼ်ႉလႄႈ ၶျုၵ်ႈၸႂ်တၢႆသေယဝ်ႉ၊ ႁွတ်ႈထိုင်ၵႃႈတီႈဢၼ် ၵူၼ်းမဵဝ်းမၼ်းတင်းလၢႆ ၸူႉတုမ်ၼၼ်ႉဢေႃႈ။

9လုၵ်ႈၸၢႆးမၼ်းဢီႉၸၢၵ်ႈဢိၵ်ႇတင်းဢီႉသမေႇလႃႉၸိူဝ်းၼၼ်ႉ ဢဝ်ပေႃႈၶဝ်သၢင်းၵျူဝ်ႇၵႃႈၼႂ်းႁူးလဝ်မၵ်ႉပေႇလႃႉ ၵႃႈတီႈ တူင်ႈၼႃး ဢေႇၽရုၼ်ႇလုၵ်ႈၸၢႆးၸေႃးႁႃႇၵူၼ်းမဵဝ်းႁိတ်ႉတီႉ ၽၢႆႇဝၼ်းဢွၵ်ႇတီႈမမ်ႇရေႇၼၼ်ႉဢေႃႈ။- 10ၵႃႈတီႈတူင်ႈၼႃးဢၼ်ဢႃႇပြႃႇႁၢမ်ႇသိုဝ်ႉဢဝ် တီႈၵူၼ်းႁေႇသႃႉၸိူဝ်းၼၼ်ႉ၊ လႆႈသၢင်းၵျူဝ်ႇဢႃႇပြႃႇႁၢမ်ႇ ဢိၵ်ႇတင်းမေးမၼ်းၸႃႇရႃႇဢေႃႈ။- 11ဝၢႆးသေဢႃႇပြႃႇႁၢမ်ႇတၢႆယဝ်ႉၼၼ်ႉ၊ၽြႃးပဵၼ်ၸဝ်ႈ ပၼ်တၢင်းလီတီႈလုၵ်ႈၸၢႆးမၼ်းဢီႉၸၢၵ်ႈဢေႃႈ။ ဢီႉၸၢၵ်ႈၼၼ်ႉ ယူႇၵႃႈတီႈ ဝဵင်းပေႇလႁေႇရွႆႇဢေႃႈ။

ၸိူဝ်ႉၶိူဝ်းဢီႉသမေႇလႃႉ

(တူၺ်း၊ 1 ရႃႇၶျုၵ်ႈ 1:28-31)

12ၸရၢင်းၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်ဢီႉသမေႇလႃႉ၊ လုၵ်ႈၸၢႆးဢႃႇပြႃႇႁၢမ်ႇဢၼ်ႁႃႇၵရႃႉ ၵူၼ်းဢေႇၵိပ်ႉတူႉ မႄႈယိင်းၶႃႈၸႃႇရႃႇၼၼ်ႉ၊ ၵိူတ်ႇလဵင်ႉတီႈဢႃႇပြႃႇႁၢမ်ႇဢၼ်ဝႃႈ၊- 13ၸိုဝ်ႈသဵင်လုၵ်ႈၸၢႆး ဢီႉသမေႇလႃႉဢၼ်ၸွမ်းလူၺ်ႈမဵဝ်းၸိူဝ်ႉၶိူဝ်းမၼ်းၼၼ်ႉၸမ်ႉ၊ လုၵ်ႈၸၢႆးၵေႃႉယႂ်ႇ ၼပႃႇယုတ်ႉ၊ ဝၢႆးၼၼ်ႉ ၵေႇတႃႇ၊ ဢႃႇတပေႇလႃႉ၊ မီႉပသမ်ႇ၊- 14မီႉသေႇမႃႉ၊ တူႉမႃႇ၊ မႃႇၸႃႉ၊- 15ႁႃႇတတ်ႉ၊ တေႇမႃႉ၊ ယေႇတူႉရႃႉ၊ ၼႃႇၽီႉသႃႉ တင်းၵေႇတမႃႇၸိူဝ်းၼၼ်ႉ၊- 16ပဵၼ်လုၵ်ႈၸၢႆး ဢီႉသမေႇလႃႉဢေႃႈ။ ၶဝ်ၸိူဝ်းဢၼ် လႆႈၸိုဝ်ႈလႆႈသဵင်ၸိူဝ်ႉၼင်ႇၼၼ်ၼၼ်ႉ၊ ၵႃႈတီႈဝဵင်းၽႂ်ဝဵင်းမၼ်း၊ လမ်းတပ်ႉၽႂ်လမ်းတပ်ႉမၼ်း၊ ပဵၼ်ၶုၼ်သိပ်းသွင်ပႃးၸွမ်းလူၺ်ႈမဵဝ်းလႂ်မဵဝ်းၼၼ်ႉဢေႃႈ။- 17ၶိင်ႇၵႃႇလႃႉပီႊဢသၢၵ်ႈဢီႉသမေႇလႃႉလႆႈ ပၢၵ်ႇပၢႆသၢမ်သိပ်းပၢႆၸဵတ်းပီႊလႄႈ မၼ်းၶျုၵ်ႈၸႂ်တၢႆသေယဝ်ႉ၊ ႁွတ်ႈထိုင် ၵႃႈတီႈဢၼ် မဵဝ်းၵူၼ်းမၼ်းတင်းလၢႆ ၸူႉတုမ်ၼၼ်ႉဢေႃႈ။- 18ၶဝ်ၼၼ်ႉယူႇၸႃႉၸဵမ်ဝဵင်းႁႃႇဝီႉလႃႉ တေႃႇထိုင်ႁွတ်ႈ ဝဵင်းသူႉရႃႉၽၢႆႇဝၼ်းဢွၵ်ႇမိူင်းဢေႇၵိပ်ႉတူႉ ၸွမ်းသဵၼ်ႈတၢင်းဢၼ်ၵႂႃႇၸူးၵႃႈတီႈမိူင်းဢႃႇသူႉရီႉၼၼ်ႉဢေႃႈ။ ၼင်ႇၼၼ်လႄႈ တီႈယူႇဢီႉသမေႇလႃႉၼၼ်ႉ တူၵ်းၵႃႈတီႈႁိမ်းပီႈႁိမ်းၼွင်ႉမၼ်း တင်းသဵင်ႈတင်းလူင်ၼၼ်ႉဢေႃႈ။

ဢေးသေႃးတင်းယႃႇၵုပ်ႈၵိူတ်ႇလဵင်ႉမႃး

19ၸိူဝ်ႉၶိူဝ်းၸူဝ်ႈလုၵ်ႈပၢၼ်လၢၼ်ဢီႉၸၢၵ်ႈလုၵ်ႈၸၢႆးဢႃႇပြႃႇႁၢမ်ႇၸမ်ႉ၊ ဢႃႇပြႃႇႁၢမ်ႇမီးလုၵ်ႈၸၢႆးဢီႉၸၢၵ်ႈဢေႃႈ။- 20ဢီႉၸၢၵ်ႈၼၼ်ႉမိူဝ်ႈဢၼ်ဢသၢၵ်ႈလႆႈ သီႇသိပ်းပီႊၼၼ်ႉၸိုင် ပဵၼ်ႁိူၼ်းႁူမ်ႈၵၼ်တင်းရေႇပႅၵ်ႉၵႃႉ လုၵ်ႈယိင်းပေႇသူၺ်ႇလႃႉ ၵူၼ်းသူႉရီႉ၊ ၵူၼ်းတီႈပႃႇတၼ်ႇဢႃႇရမ်ႇၼၼ်ႉ ၼွင်ႉယိင်းလႃႇပၢၼ်ႇ ၵူၼ်းသူႉရီႉၼၼ်ႉဢေႃႈ။- 21ဢီႉၸၢၵ်ႈၼၼ်ႉ၊ ၵွပ်ႈပိူဝ်ႈဢၼ်မေးမၼ်းရေႇပႅၵ်ႉၵႃႉၼၼ်ႉ ပဵၼ်ဢၼ်မၼ် ဢမ်ႇမီးလုၵ်ႈလႄႈ တွင်းပၢၼ်ႇထႃႇဝရႃႉၽြႃး ပုၼ်ႈမၼ်းၼၼ်ႉဢေႃႈ။ ထႃႇဝရႃႉၽြႃးၵေႃႈ၊ ထွမ်ႇဢဝ်လႄႈမေးမၼ်းၼၼ်ႉပႃးပတိၵ်ႉသၼ်ႇထေႇဢေႃႈ။- 22လုၵ်ႈဢွၼ်ႇတိုၵ်းၵၼ်တေႃးၵၼ်ယူႇၵႃႈၼႂ်းတွင်ႉမၼ်းဢေႃႈ။ မၼ်းၵေႃႈလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼႆၸိုင်၊ ႁဵတ်းႁိုဝ်လႄႈၵဝ်ၶႃႈပဵၼ် ၸိူဝ်ႉၼင်ႇၼႆယူႇၼင်ႇႁိုဝ်။ ဝႃႈၼင်ႇၼႆလႄႈ သမ်ႉၵႂႃႇလဝ်ႊထၢမ်ထႃႇဝရႃႉၽြႃးဢေႃႈ။- 23ထႃႇဝရႃႉၽြႃးၵေႃႈလၢတ်ႈတီႈမၼ်းလႄႈဝႃႈ၊ ၵႃႈတီႈၼႂ်းတွင်ႉမႂ်းၼႆႉမီးၵူၼ်းသွင်မဵဝ်းဢေႃႈ။ ၵူၼ်းသွင်ၸိူဝ်ႉသွင်ၶိူဝ်း ဢၼ်ပႅၵ်ႇပိူင်ႈၵၼ် တၵ်းလႆႈၵိူတ်ႇလဵင်ႉ ဢွၵ်ႇသေၵႃႈၼႂ်းတွင်ႉမႂ်းဢေႃႈ။ ၵူၼ်းမဵဝ်းၼိုင်ႈ တၵ်းႁႅင်းယႂ်ႇၼႃႇသေ မဵဝ်းၼိုင်ႈဢေႃႈ။ ၵေႃႉယႂ်ႇၼၼ်ႉ တၵ်းလႆႈၶၢမ်ႇႁဵတ်းၶႃႈတီႈ ၵေႃႉလဵၵ်ႉဢေႃႈ၊ ဝႃႈၼင်ႇၼႆဢေႃႈ။- 24မိူဝ်ႈဢၼ်ထိုင်ၶိင်ႇ ဢၼ်ၵိူတ်ႇလဵင်ႉလုၵ်ႈၼၼ်ႉၸိုင်၊ ၼႂ်းတွင်ႉမၼ်းၼၼ်ႉ ပဵၼ်လုၵ်ႈၽႃၽႄဢေႃႈ။- 25လုၵ်ႈၸၢႆးၵေႃႉဢွၼ်တၢင်းၼၼ်ႉ ၵိူတ်ႇလဵင်ႉဢွၵ်ႇမႃးပဵၼ်ၸိူဝ်ႉၼင်ႇၶူဝ်းၼုင်ႈ ဢၼ်ပႃးၶူၼ်ၼၼ်ႉလႄႈ ငဝ်းမၼ်းပဵၼ်ဢၼ်လႅင်ဝႆႉ တင်းတူဝ်တင်းၶိင်းဢေႃႈ။ မၼ်းၼၼ်ႉၸိုင်ၶဝ်ႁွင်ႉႁဵၵ်ႈၸိုဝ်ႈဢေးသေႃးဢေႃႈ။- 26လိုၼ်းၼၼ်ႉ ၵေႃႉၼွင်ႉၸၢႆးယိပ်းသူၼ်ႈတိၼ်ဢေးသေႃးလႄႈ ၵိူတ်ႇလဵင်ႉဢွၵ်ႇမႃးဢေႃႈ။ မၼ်းၼၼ်ႉၸမ်ႉ၊ ၶဝ်ႁွင်ႉႁဵၵ်ႈၸိုဝ်ႈ ယႃႇၵုပ်ႈဢေႃႈ။ ဢီႉၸၢၵ်ႈၼၼ်ႉ မိူဝ်ႈဢၼ်မေးမၼ်းၵိူတ်ႇလဵင်ႉလုၵ်ႈၸၢႆးသွင်ၵေႃႉမႃးၼၼ်ႉၸိုင်၊ ဢသၢၵ်ႈမၼ်းလႆႈႁူၵ်းသိပ်းပီႊဢေႃႈ။

ဢေးသေႃးၶၢႆဢရႃႇလုၵ်ႈတူၼ်ႈတူဝ်ၸဝ်ႈၵဝ်ႇ

27လုၵ်ႈဢွၼ်ႇၸိူဝ်းၼၼ်ႉယႂ်ႇမႃးလႄႈ ဢေးသေႃးၸမ်ႉ၊ ပဵၼ်မူးသိူဝ်းဢၼ်လၵ်းလႅမ်လႄႈ ပဵၼ်ၵူၼ်းထိူၼ်ႇၵူၼ်းၶိူဝ်းဢေႃႈ။ ယႃႇၵုပ်ႈၸမ်ႉ၊ ပဵၼ်ၵေႃႉဢၼ်ၸႂ်လီၸႂ်ဝၢၼ်လႄႈ ၸၢင်ႈယူႇၵႃႈၼႂ်းမူဝ်းၵႃႇဢေႃႈ။- 28ဢီႉၸၢၵ်ႈၼၼ်ႉ ႁၵ်ႉပႅင်းဢေးသေႃး ၵွပ်ႈပိူဝ်ႈဢၼ်ယၢမ်ႈလႆႈၵိၼ်ၽၵ်းၼိူဝ်ႉဢၼ်မၼ်းပၼ်ၼၼ်ႉဢေႃႈ။ ရေႇပႅၵ်ႉၵႃႉၸမ်ႉ၊ ႁၵ်ႉပႅင်းယႃႇၵုပ်ႈဢေႃႈ။

29ဝၼ်းၼိုင်ႈၼႂ်းမိူဝ်ႈဢၼ်ယႃႇၵုပ်ႈယင်းတိုၵ်ႉတူမ်ႈႁုင်တၢင်းၵိၼ်တၢင်းၶူပ်းယူႇၼၼ်ႉၸိုင်၊ ဢေးသေႃးလုၵ်ႉသေၵႃႈတီႈထိူၼ်ႇ ႁွတ်ႈမႃးလႄႈ၊ ၵွပ်ႈပိူဝ်ႈဢၼ်ႁိူဝ်ႉၼႃႇ လူင်လၢင်ၼၼ်ႉလႄႈ၊- 30မၼ်းလၢတ်ႈတီႈယႃႇၵုပ်ႈလႄႈဝႃႈ၊ ဢဝ်တၢင်းၵိၼ်ဢၼ်လႅင်ၼၼ်ႉလဵင်ႉလူၵဝ်သေၵမ်းတႃႉ။ ၵဝ်ႁိူဝ်ႉၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၶဝ်ႁွင်ႉႁဵၵ်ႈၸိုဝ်ႈသဵင်မၼ်းၼၼ်ႉဢေႇတုမ်ႇဢေႃႈ။- 31ယႃႇၵုပ်ႈၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ၶၢႆဢရႃႇလုၵ်ႈတူၼ်ႈမႂ်းၼၼ်ႉ ပၼ်တီႈၵဝ်သေၵမ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊- 32ဢေးသေႃးလၢတ်ႈလႄႈဝႃႈ၊ တူၺ်းလူး၊ ၵဝ်ၸမ်တၵ်းတၢႆယဝ်ႉ။ ၵွပ်ႈပိူဝ်ႈဢရႃႇလုၵ်ႈတူၼ်ႈၼႆႉလႄႈ ၵဝ်တၵ်းမီးဢၵျူဝ်း ၵႃႈသင်၊ ဝႃႈၼင်ႇၼႆဢေႃႈ။- 33ယႃႇၵုပ်ႈၵေႃႈလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ႁဵတ်းတၢင်းဢၼ်ၵိၼ်ႇဢၼ်ဝႃႈတီႈၵဝ်သေၵမ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊မၼ်းၵိၼ်ႇဝႃႈလႄႈ ၶၢႆဢရႃႇလုၵ်ႈတူၼ်ႈပၼ် တီႈယႃႇၵုပ်ႈဢေႃႈ။- 34မိူဝ်ႈၼၼ်ႉ ယႃႇၵုပ်ႈဢဝ်ၶဝ်ႈမုၼ်းဢိၵ်ႇတင်းၽၵ်းဢၼ်ပဵၼ်ထူဝ်ႇၼၼ်ႉ ပၼ်တီႈဢေးသေႃးလႄႈ မၼ်းၵေႃႈၵိၼ်ၶူပ်း သေယဝ်ႉ၊ လုၵ်ႉၵႂႃႇသေဢေႃႈ။ ၼင်ႇၼၼ်လႄႈဢေးသေႃး ႁဵတ်းဢမ်ႇပေႃးၼင်ႇႁိုဝ်တီႈဢရႃႇလုၵ်ႈတူၼ်ႈ ဢၼ်ၸၢပ်ႈသႅင်ႇ ၵၼ်တင်းမၼ်းၼၼ်ႉဢေႃႈ။

Currently Selected:

ငဝ်ႈၵမ်ႇၽႃႇ 25: CBMS

Highlight

Copy