ငဝ်ႈၵမ်ႇၽႃႇ 15

ပတီႉၺိၺ်ႇဢၼ်ၽြႃးပဵၼ်ၸဝ်ႈဝႆႉတီႈဢႃႇပြမ်ႇ

1ဝၢႆးၼၼ်ႉ၊ ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈဢႃႇပြမ်ႇၼႂ်းပျႃႇတိၵ်ႈရူႇပႃႇရူင်ႇလႄႈဝႃႈ၊ ဢႃႇပြမ်ႇဢိူၺ်း၊ ယႃႇပေမႆႈၸႂ်။ ၵဝ်ပဵၼ်တီႈႁႄႉတီႈၵင်ႈမႂ်း၊ ဢၵျူဝ်းမႂ်းဢၼ်ယႂ်ႇၼႃႇလူင်လၢင်ဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 2ဢႃႇပြမ်ႇလဝ်ႊလၢတ်ႈလႄႈဝႃႈ၊ ထႃႇဝရႃႉၽြႃးပဵၼ်ၸဝ်ႈတီႈၶႃႈ၊ ၶႃႈၸဝ်ႈယင်းဢမ်ႇမီးလုၵ်ႈမီးလၢင်းလႄႈ ၵႂႃႇယူႇတီႈၶႃႈဢေႃႈ။ ၵူၼ်းဝဵင်းထမ်ႇမသႅတ်ႉ၊ ဢေးလေႇၸႃႇၼႆႉ လႆႈပဵၼ်ၵေႃႉဢၼ်တၵ်းၶၢမ်ႇဢမူၺ်ႇၶႃႈၸဝ်ႈတီႈၶႃႈဢေႃႈ။ ပိူဝ်ႈၼႆလႄႈ ၸဝ်ႈႁဝ်းတၵ်းႁဵတ်းၵျေးၸူးဢၼ်လႂ်တီႈၶႃႈၸဝ်ႈတီႈၶႃႈ၊ ဝႃႈၼင်ႇၼႆဢေႃႈ။- 3ဢႃႇပြမ်ႇသမ်ႉလဝ်ႊလၢတ်ႈလႄႈဝႃႈ၊ ၸဝ်ႈႁဝ်းဢမ်ႇပၼ်ၸိူဝ်ႉပၼ်ၶိူဝ်းတီႈၶႃႈၸဝ်ႈလႄႈ ၵေႃႉဢၼ်ၵိူတ်ႇလဵင်ႉၵႃႈၼႂ်းႁိူၼ်းၶႃႈၸဝ်ႈၼႆႉ လႆႈပဵၼ်ၵေႃႉဢၼ်တၵ်းလႆႈၶၢမ်ႇဢမူၺ်ႇၶႃႈၸဝ်ႈတီႈၶႃႈလူင်ပႄႇ၊ ဝႃႈၼင်ႇၼႆဢေႃႈ။- 4ၵမ်းၼၼ်ႉ ၼုၵ်ႈၵပၢတ်ႈထႃႇဝရႃႉၽြႃးသမ်ႉႁွတ်ႈမႃးတီႈမၼ်းလႄႈဝႃႈၸမ်ႉ၊ ၵေႃႉဢၼ်မႂ်းဝႃႈၼၼ်ႉ ဢမ်ႇလႆႈပဵၼ်ၵေႃႉဢၼ်တၵ်းၶၢမ်ႇဢမူၺ်ႇမႂ်း။ ၵေႃႉဢၼ်ဢွၵ်ႇမႃးၵႃႈၼႂ်းတွင်ႉမႂ်း တၵ်းလႆႈပဵၼ်ၵေႃႉဢၼ်တၵ်းၶၢမ်ႇဢမူၺ်ႇမႂ်းဢေႃႈ၊ ဝႃႈၼင်ႇၼႆသေယဝ်ႉ၊- 5ဢဝ်မၼ်းဢွၵ်ႇၵႃႈၼွၵ်ႈသေလႄႈဝႃႈ၊ ႁႅၼ်တူၺ်းၵၢင်ႁၢဝ်တႃႉ။ ပေႃးၼပ်ႉဢၢၼ်ႇလၢဝ်လႆႈၸိုင်၊ ၼပ်ႉဢၢၼ်ႇတႃႉ၊ ဝႃႈၼင်ႇၼႆလႄႈ သမ်ႉလၢတ်ႈလႄႈဝႃႈ၊ ၸိူဝ်ႉၶိူဝ်းမႂ်းတၵ်းလႆႈပဵၼ်ၸိူဝ်ႉၼင်ႇၼၼ်ဢေႃႈ ဝႃႈၼင်ႇၼႆဢေႃႈ။- 6ပိူဝ်ႈဢၼ်မၼ်းယုမ်ႇမၢတ်ႈထႃႇဝရႃႉၽြႃးလႄႈ၊ မၼ်းၸဝ်ႈမၢတ်ႈတၢင်းယုမ်ႇမၢတ်ႈမၼ်းၼၼ်ႉ ပဵၼ်ၸိူဝ်ႉၼင်ႇတၢင်းဢၼ်သိုဝ်ႈတေႃႇဢေႃႈ။

7ၵမ်းၼၼ်ႉ မၼ်းၸဝ်ႈလၢတ်ႈတီႈမၼ်းလႄႈဝႃႈ၊ ၵဝ်ၼႆႉပဵၼ်ထႃႇဝရႃႉၽြႃးဢၼ်ဢဝ်မႂ်းဢွၵ်ႇသေၵႃႈၼႂ်းဝဵင်းဢူႉရႃႉ တီႈယူႇၵူၼ်းမိူင်းၶႃႇလတေးၼၼ်ႉမႃး ႁႂ်ႈလႆႈပၼ်မိူင်းၼႆႉတီႈမႂ်းပုၼ်ႈဢၼ်မႂ်းတၵ်းလႆႈၶၢမ်ႇဢမူၺ်ႇၼၼ်ႉဢေႃႈ။- 8မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင် ဢႃႇပြမ်ႇၵေႃႈလဝ်ႊထၢမ်လႄႈဝႃႈ၊ ထႃႇဝရႃႉၽြႃးပဵၼ်ၸဝ်ႈတီႈၶႃႈ၊ ၶႃႈၸဝ်ႈတၵ်းလႆႈႁူႉလွင်ႈဢၼ် ၶႃႈၸဝ်ႈတၵ်းလႆႈၶၢမ်ႇဢမူၺ်ႇမိူင်းၼႆႉၼၼ်ႉၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။- 9မၼ်းၸဝ်ႈၵေႃႈလၢတ်ႈတီႈမၼ်းလႄႈဝႃႈ၊ ဢဝ်ဝူဝ်းမႄႈသိုဝ်ႇတူဝ်ၼိုင်ႈ ဢၼ်ဢသၢၵ်ႈလႆႈသၢမ်ပီႊ၊ ပႄႉမႄႈတူဝ်ၼိုင်ႈ ဢၼ်ဢသၢၵ်ႈလႆႈသၢမ်ပီႊ၊ သူဝ်းပေႃႈတူဝ်ၼိုင်ႈ ဢၼ်ဢသၢၵ်ႈလႆႈသၢမ်ပီႊ၊ ၼူၵ်ႉတူႈတူဝ်ၼိုင်ႈ၊ ၵႃၵႄဢွၼ်ႇတူဝ်ၼိုင်ႈပုၼ်ႈၵဝ်တႃႉ၊ ဝႃႈၼင်ႇၼႆသေယဝ်ႉ၊- 10မၼ်းဢဝ်တူဝ်တင်းသဵင်ႈတင်းလူင်ၸိူဝ်းၼၼ်ႉ ယေႈတူဝ်ယေႈတူဝ်ၽႃႇႁဵတ်းသွင်ၽၢၵ်ႇသွင်ၽၢၵ်ႇလႄႈ ဢဝ်ၼိူဝ်ႉဢၼ်ၽႃႇၼၼ်ႉဝႆႉသွင်ၽၢႆႇ ယေႈၽၢႆႇယေႈၽၢၵ်ႇဢေႃႈ။ ၼူၵ်ႉၸိူဝ်းၼၼ်ႉၸမ်ႉ မၼ်းဢမ်ႇၽႃႇ။- 11မိူဝ်ႈဢၼ်ၼူၵ်ႉႁၢႆႉလူင်းၸူးၵႃႈၼိူဝ်တူဝ်တၢႆၸိူဝ်းၼၼ်ႉၸိုင်၊ ဢႃႇပြမ်ႇႁေႃႈပႅတ်ႈဢေႃႈ။- 12မိူဝ်ႈဢၼ်ၵၢင်ဝၼ်းတူၵ်းၸိုင်၊ တၢင်းၼွၼ်းဢၼ်ၼူၵ်ႇၼႃႇတူၵ်းႁွတ်ႈၵႃႈၼိူဝ်ဢႃႇပြမ်ႇလႄႈ တၢင်းဢၼ်တူၵ်းၸႂ်ၵူဝ်ႁႄ တၢင်းဢၼ်လပ်းသိင်ႇဢၼ်ယႂ်ႇၼႃႇလူင်လၢင်ႁွတ်ႈထိုင်ၵႃႈၼိူဝ်မၼ်းဢေႃႈ။- 13မၼ်းၸဝ်ႈၵေႃႈလၢတ်ႈတီႈဢႃႇပြမ်ႇလႄႈဝႃႈ၊ မၢတ်ႈတွင်းလွင်ႈဢၼ်ၸိူဝ်ႉၶိူဝ်းမႂ်း တၵ်းလႆႈပဵၼ်ၶႅၵ်ႇယူႇၵႃႈၼႂ်းမိူင်းဢၼ် ၶဝ်ဢမ်ႇပိူင်ႇၼၼ်ႉသေလႄႈ ၶၢမ်ႇတၢင်းဢၼ်ၶၢမ်ႇႁဵတ်းၶႃႈၵႃႈတီႈပိူၼ်ႈ ဢိၵ်ႇတင်းတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄး သီႇပၢၵ်ႇပီႊတဵမ်တဵမ်ၼၼ်ႉဝႆႉတႃႉ။- 14ၵူၼ်းမဵဝ်းဢၼ်ၸႂ်ႉၵိၼ်ၶဝ်ၼၼ်ႉၵေႃႈ၊ ၵဝ်တၵ်ႉၸီႇယၢင်ႇဢေႃႈ။ လိုၼ်းၼၼ်ႉ ၶဝ်တၵ်းလႆႈပႃးဢဝ်ဢုၵ်ႉၸႃႇၼမ်ၼႃႇလူင်လၢင်သေလႄႈ ဢွၵ်ႇဢေႃႈ။- 15မႂ်းတၵ်းလႆႈၵႂႃႇၸူးၵႃႈတီႈပူႇမႂ်းမွၼ်ႇမႂ်းၼိမ်ၼိမ်လီလီဢေႃႈ။ မႂ်းတၵ်းလႆႈၶၢမ်ႇတၢင်းဢၼ်သၢင်းၵျူဝ်ႇ မိူဝ်ႈဢၼ်ဢသၢၵ်ႈမႂ်းၵႄႇထူၼ်ႈယႂ်ႇၼႃႇၼၼ်ႉဢေႃႈ။- 16မိူဝ်ႈဢၼ်မဵဝ်းၵူၼ်းထိုင်ႁွတ်ႈသီႇသိုပ်ႇယဝ်ႉၸိုင်၊ ၶဝ်တၵ်းလႆႈၶိုၼ်းမႃးၵႃႈတီႈမိူင်းၼႆႉဢေႃႈ။ လွင်ႈမၼ်းၸမ်ႉ တူႉၸရိူၵ်ႈဢပႅတ်ႈၵူၼ်းဢႃႇမေႃးရီႉတင်းလၢႆၼၼ်ႉ ဢမ်ႇပႆႇပျေႉပႆႇၸုမ်ႇ၊ ဝႃႈၼင်ႇၼႆဢေႃႈ။- 17ၵမ်းၼၼ်ႉ မိူဝ်ႈဢၼ်ၵၢင်ဝၼ်းတူၵ်းလႄႈ လပ်းသိင်ႇၸိုင်၊ မုၵ်ႉၽႆးဢၼ်ဢွၵ်ႇၵႂၼ်းၽႆးဢိၵ်ႇတင်း ဝၢၼ်ႇၽႆးဢၼ်တႆႈႁိူဝ်ႈလႅင်းၼၼ်ႉ ပႆၵႂႃႇၵႃႈၼႂ်းၵႄႈဝူင်ႈၵၢင်ၼိူဝ်ႉဢၼ်ၽႃႇဝႆႉၸိူဝ်းၼၼ်ႉထၢင်ႇထၢင်ႇသႃးသႃးဢေႃႈ။

18ဝၼ်းၼၼ်ႉ ထႃႇဝရႃႉၽြႃးႁဵတ်းပတီႉၺိၺ်ႇလူၺ်ႈၵၼ်တင်းဢႃႇပြမ်ႇလႄႈဝႃႈ၊ ၵဝ်တၵ်းဢဝ်မိူင်းၼႆႉ ၸႃႉၸဵမ်ၼမ်ႉႁွင်ႈ ဢေႇၵိပ်ႉတူႉ တေႃႇထိုင်ႁွတ်ႈၼမ်ႉႁွင်ႈလူင်ဢၼ်ဝႃႈၼမ်ႉႁွင်ႈဢူႉၽရတ်ႉၼၼ်ႉ၊- 19ဢိၵ်ႇတင်းၵူၼ်းၵေႇၼီႉ၊ ၵူၼ်းၵေႇၼၸီႉ၊- 20ၵူၼ်းၵႃႇတမေႃးၼီႉ၊ ၵူၼ်းႁိတ်ႉတီႉ၊ ၵူၼ်းၽေႇရၸီႉ၊ ၵူၼ်းရေႇၽဵမ်ႇ၊- 21ၵူၼ်းဢႃႇမေႃးရီႉ၊ ၵူၼ်းၶႃႇၼၼီႉ၊ ၵူၼ်းၵီႉရၵႃႇသီႉ၊ ၵူၼ်းယေႇပူႉသီႉၸိူဝ်းၼၼ်ႉ ဢၢပ်ႈပၼ်တီႈၸိူဝ်ႉၶိူဝ်းမႂ်းဢေႃႈ၊ ဝႃႈၼင်ႇၼႆဢေႃႈ။

Currently Selected:

ငဝ်ႈၵမ်ႇၽႃႇ 15: CBMS

Highlight

Copy