ငဝ်ႈၵမ်ႇၽႃႇ 11

သဝ်လၢင်းလူင်ၼႂ်းမိူင်းပႃႇပေႇလႃႉ

1ၵူၼ်းၼိူဝ်လိၼ်မိူင်းတင်းသဵင်ႈတင်းလူင် ပဵၼ်ၽႃႇသႃႇဢၼ်လဵဝ်ၵၼ်၊ ၵႂၢမ်းဢၼ်လဵဝ်ၵၼ်လႄႈ၊- 2ၼႂ်းမိူဝ်ႈဢၼ်ၶဝ်ယင်းတိုၵ်ႉပႆတၢင်းၵႂႃႇၼႃႈဝၼ်းဢွၵ်ႇယူႇၼၼ်ႉၸိုင်၊ ၶဝ်ထူပ်းႁၼ်တီႈဢၼ်လိၼ်ပၢင်ႇလီပဵင်းလီၵႃႈၼႂ်းမိူင်းသီႉၼႃႉလႄႈ ၶျႃးတီႈယူႇၵႃႈတီႈၼၼ်ႈဢေႃႈ။- 3ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊ မႃးမႃးဢိူၺ်း၊ ဢွၼ်ၵၼ်ႁဵတ်းမၢၵ်ႇဢုတ်ႇလႄႈ ၽဝ်မၼ်ႈမၼ်ႈၶိူင်ႇၶိူင်ႇတႃႉႁဝ်း၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ၶဝ်လႆႈမၢၵ်ႇဢုတ်ႇပုၼ်ႈမၢၵ်ႇႁိၼ် ဢိၵ်ႇတင်းၵႆးတဝ်းမဵဝ်းၼိုင်ႈပုၼ်ႈဢၢင်းၵတေႇသေယဝ်ႉ၊- 4သမ်ႉလၢတ်ႈၵၼ်လႄႈဝႃႈ၊ မႃးမႃးဢိူၺ်း၊ ၵွပ်ႈပိူဝ်ႈဢၼ် ၵူဝ်ႁဝ်းတၵ်းၽၢတ်ႇၽႄၵၼ်ၵႂႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈ၊ ဢွၼ်ၵၼ်တႄႇႁဵတ်းဝဵင်း ဢိၵ်ႇတင်းထဵင်လၢင်းဢၼ်တၵ်းသုင်ၶိုၼ်ႈၶိုတ်းထိုင်ၼိူဝ်ၽႃႉၵၢင်ႁၢဝ်ပုၼ်ႉလႄႈ ႁဵတ်းႁႂ်ႈၸိုဝ်ႈႁဝ်းသဵင်ႁဝ်းဢွၵ်ႇတႃႉႁဝ်း၊ ဝႃႈၼင်ႇၼႆဢေႃႈ။- 5ထႃႇဝရႃႉၽြႃးလူင်းမႃးႁႂ်ႈလႆႈလူတူၺ်းဝဵင်း ဢိၵ်ႇတင်းထဵင်လၢင်းဢၼ်လုၵ်ႈၵူၼ်းတႄႇႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။- 6ထႃႇဝရႃႉၽြႃးၵေႃႈဝႃႈ၊ တူၺ်းလူး၊ ၶဝ်ပဵၼ်ၵူၼ်းမဵဝ်းဢၼ်လဵဝ်ၵၼ်၊ ၵႂၢမ်းဢၼ်လဵဝ်ၵၼ်လႄႈ ၸင်ႇၸႃႉႁဵတ်းလွင်ႈတၢင်းၼႆႉဢွၼ်တၢင်းဢေႃႈ။ တေႃႈလဵဝ်ၼႆႉ ဢၼ်ႁႄႉဢၼ်ၶႅၼ်လွင်ႈတၢင်းၵႃႈဢၼ်ၶဝ်တၵ်းၵျၢမ်ႇပွင်ၼၼ်ႉဢမ်ႇမီးလႄႈ ၶဝ်တၵ်းႁဵတ်းလူးၵွၼ်ႇဢေႃႈ။- 7မႃးမႃးဢိူၺ်း၊ လူင်းၵႂႃႇတႃႉႁဝ်း။ ၼင်ႇႁိုဝ်ၶဝ်ၼင်ႇၵၼ်ၵၼ်တၵ်းဢမ်ႇႁူႉၵၼ်ၸိုင်၊ ႁဵတ်းႁႂ်ႈၵႂၢမ်းၶဝ်သုၵ်ႉသၵ်ႉသူၼ်သၢၼ်ၵၼ်တႃႉႁဝ်း၊ ဝႃႈၼင်ႇၼႆဢေႃႈ။- 8ၼင်ႇၼၼ်လႄႈ ထႃႇဝရႃႉၽြႃးႁႂ်ႈၶဝ်ၽၢတ်ႇၽႄၵၼ်ၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈ ၶဝ်ၼၼ်ႉၸင်ႇဢမ်ႇတႄႇႁဵတ်းဝဵင်းၼၼ်ႉလႄႈယူႇဢေႃႈ။- 9ၵွပ်ႈႁွႆးၼႆႉ၊ ၵွပ်ႈပိူဝ်ႈဢၼ်ထႃႇဝရႃႉၽြႃးႁႂ်ႈၵႂၢမ်းလုၵ်ႈၵူၼ်းတင်းသဵင်ႈတင်းလူင်ၵႃႈဢၼ်မီးၵႃႈၼိူဝ်လိၼ်မိူင်းသုၵ်ႉသၵ်ႉသူၼ်သၢၼ်သေလႄႈ ၽၢတ်ႇၽႄၵၼ်သေၵႃႈတီႈၼၼ်ႈၵႂႃႇၵူႈတီႈၵူႈလႅၼ် ၵႃႈၼိူဝ်လိၼ်မိူင်းၼၼ်ႉလႄႈ ဝဵင်းၼၼ်ႉလႆႈၸိုဝ်ႈဝဵင်းပႃႇပေႇလႃႉဢေႃႈ။

ၸိူဝ်ႉၶိူဝ်းလုၵ်ႈလၢၼ်သေႇမႃႉ

(တူၺ်း၊ 1 ရႃႇၶျုၵ်ႈ 1:24-27)

10ၸရၢင်းၸူဝ်ႈလုၵ်ႈပၢၼ်လၢၼ်ၸိူဝ်ႉၶိူဝ်းသေႇမႃႉၸမ်ႉ၊ သေႇမႃႉၼၼ်ႉဢသၢၵ်ႈလႆႈပၢၵ်ႇပီႊလႄႈ ဝၢႆးသေၼမ်ႉထူမ်ႈမိူင်းယဝ်ႉသွင်ပီႊၼၼ်ႉ၊ မီးလုၵ်ႈၸၢႆးဢႃႇၽၵ်ႉၸတ်ႉဢေႃႈ။- 11ဝၢႆးသေမီးဢႃႇၽၵ်ႉၸတ်ႉၼၼ်ႉ၊ သေႇမႃႉဢသၢၵ်ႈလိပ်းထူၼ်ႈႁႃႈပၢၵ်ႇပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

12 ဢႃႇၽၵ်ႉၸတ်ႉၼၼ်ႉ ဢသၢၵ်ႈလႆႈသၢမ်သိပ်းပၢႆႁႃႈပီႊလႄႈ မီးလုၵ်ႈၸၢႆးသႃႇလႃႉဢေႃႈ။- 13ဝၢႆးသေမီးသႃႇလႃႉၼၼ်ႉ ဢႃႇၽၵ်ႉၸတ်ႉဢသၢၵ်ႈလိပ်းထူၼ်ႈသီႇပၢၵ်ႇပၢႆသၢမ်ပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။- 14သႃႇလႃႉၼၼ်ႉဢသၢၵ်ႈလႆႈသၢမ်သိပ်းပီႊလႄႈ မီးလုၵ်ႈၸၢႆးႁေႇပႃႇဢေႃႈ။- 15ဝၢႆးသေမီးႁေႇပႃႇၼၼ်ႉ၊ သႃႇလႃႉဢသၢၵ်ႈလိပ်းထူၼ်ႈသီႇပၢၵ်ႇပၢႆသၢမ်ပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

16 ႁေႇပႃႇၼၼ်ႉ ဢသၢၵ်ႈလႆႈသၢမ်သိပ်းပၢႆသီႇပီႊလႄႈ မီးလုၵ်ႈၸၢႆးၽႃႇလိၵ်ႉဢေႃႈ။- 17ဝၢႆးသေမီးၽႃႇလိၵ်ႉၼၼ်ႉ ႁေႇပႃႇဢသၢၵ်ႈလိပ်းထူၼ်ႈသီႇပၢၵ်ႇပၢႆသၢမ်သိပ်းပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

18 ၽႃႇလိၵ်ႉၼၼ်ႉ ဢသၢၵ်ႈလႆႈသၢမ်သိပ်းပီႊလႄႈ မီးလုၵ်ႈၸၢႆးရူးဢေႃႈ။- 19ဝၢႆးသေမီးရူးၼၼ်ႉ ၽႃႇလိၵ်ႉဢသၢၵ်ႈလိပ်းထူၼ်ႈသွင်ပၢၵ်ႇပၢႆၵဝ်ႈပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

20 ရူးၼၼ်ႉ ဢသၢၵ်ႈလႆႈသၢမ်သိပ်းပၢႆသွင်ပီႊလႄႈ မီးလုၵ်ႈၸၢႆးၸေႇရွၵ်ႉဢေႃႈ။- 21ဝၢႆးသေမီးၸေႇရွၵ်ႉၼၼ်ႉ ရူးဢသၢၵ်ႈလိပ်းထူၼ်ႈသွင်ပၢၵ်ႇပၢႆၸဵတ်းပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

22 ၸေႇရွၵ်ႉၼၼ်ႉ ဢသၢၵ်ႈလႆႈသၢမ်သိပ်းပီႊလႄႈ မီးလုၵ်ႈၸၢႆးၼႃႇၶေႃႇဢေႃႈ။- 23ဝၢႆးသေမီးၼႃႇၶေႃႇၼၼ်ႉ ၸေႇရွၵ်ႉဢသၢၵ်ႈလိပ်းထူၼ်ႈသွင်ပၢၵ်ႇပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

24 ၼႃႇၶေႃႇၼၼ်ႉဢသၢၵ်ႈလႆႈသၢဝ်းပၢႆၵဝ်ႈပီႊလႄႈ မီးလုၵ်ႈၸၢႆးတေႇရႃႉဢေႃႈ။- 25ဝၢႆးသေမီးတေႇရႃႉၼၼ်ႉ ၼႃႇၶေႃႇဢသၢၵ်ႈလိပ်းထူၼ်ႈပၢၵ်ႇပၢႆသိပ်းၵဝ်ႈပီႊလႄႈ သမ်ႉမီးလုၵ်ႈၸၢႆးလႂ်တင်းလုၵ်ႈယိင်းလႂ်ဢေႃႈ။

26 တေႇရႃႉၼၼ်ႉ ဢသၢၵ်ႈလႆႈၸဵတ်းသိပ်းပီႊလႄႈ မီးလုၵ်ႈၸၢႆးဢႃႇပြမ်ႇ၊ ၼႃႇၶေႃႇ၊ တင်းၶႃႇရၢၼ်ႇဢေႃႈ။

ၸိူဝ်ႉၶိူဝ်းလုၵ်ႈလၢၼ်တေႇရႃႉ

27ၸရၢင်းၸူဝ်ႈလုၵ်ႈပၢၼ်လၢၼ်ၸိူဝ်ႉၶိူဝ်းတေႇရႃႉၸမ်ႉ၊ တေႇရႃႉၼၼ်ႉမီးလုၵ်ႈၸၢႆးဢႃႇပြမ်ႇ၊ ၼႃႇၶေႃႇ တင်းၶႃႇရၢၼ်ႇဢေႃႈ။ ၶႃႇရၢၼ်ႇၵေႃႈမီးလုၵ်ႈၸၢႆးလေႃးတႃႉဢေႃႈ။- 28ၶႃႇရၢၼ်ႇၼၼ်ႉ တၢႆၸဵမ်မိူဝ်ႈၸူဝ်ႈဢၼ်ပေႃႈမၼ်းတေႇရႃႉ ဢမ်ႇပႆႇတၢႆၼၼ်ႉ ၵႃႈတီႈမိူင်းဢၼ်မၼ်းၵိူတ်ႇလဵင်ႉမႃး ၵႃႈၼႂ်းဝဵင်း ဢူႉရႃႉ၊ တီႈယူႇၵူၼ်းမိူင်းၶႃႇလတေးၼၼ်ႉဢေႃႈ။- 29ဢႃႇပြမ်ႇတင်းၼႃႇၶေႃႇ ဢဝ်မေးလႄႈ မေးဢႃႇပြမ်ႇၸမ်ႉ လႆႈၸိုဝ်ႈၸႃႇရေးဢေႃႈ။ မေးၼႃႇၶေႃႇၸမ်ႉ လႆႈၸိုဝ်ႈ မီႉလၶႃႇ လုၵ်ႈယိင်းၶႃႇရၢၼ်ႇဢေႃႈ။ ၶႃႇရၢၼ်ႇၼၼ်ႉ ပဵၼ်ပေႃႈမီႉလၶႃႇ တင်းဢီႉၸၶႃႇဢေႃႈ။- 30ၸႃႇရေးၸမ်ႉ ပဵၼ်မႄႈယိင်းဢၼ်မၼ်လႄႈ ဢမ်ႇမီးလုၵ်ႈမီးလၢင်း။- 31တေႇရႃႉၼၼ်ႉ ႁွင်ႉဢဝ်လုၵ်ႈၸၢႆးမၼ်းဢႃႇပြမ်ႇ ဢိၵ်ႇတင်းလၢၼ်မၼ်းလေႃးတႃႉဢၼ်ပဵၼ်လုၵ်ႈၸၢႆးၶႃႇရၢၼ်ႇၼၼ်ႉ တင်းလုၵ်ႈပႂ်ႉမၼ်းၸႃႇရေးဢၼ်ပဵၼ်မေးလုၵ်ႈၸၢႆးမၼ်းဢႃႇပြမ်ႇၼၼ်ႉသေလႄႈ ၶဝ်ၼၼ်ႉဢွၼ်ၵၼ်ဢွၵ်ႇသေၵႃႈၼႂ်းဝဵင်းဢူႉရႃႉ တီႈယူႇၵူၼ်းမိူင်းၶႃႇလတေးၼၼ်ႉ ႁႂ်ႈလႆႈၵႂႃႇၸူးၵႃႈတီႈမိူင်းၶႃႇၼၢၼ်ႇလႄႈ ႁွတ်ႈထိုင်ၵႃႈတီႈဝဵင်းၶႃႇရၢၼ်ႇသေယဝ်ႉ၊ ယူႇၵႃႈတီႈၼၼ်ႈဢေႃႈ။- 32တေႇရႃႉၼၼ်ႉဢသၢၵ်ႈလႆႈသွင်ပၢၵ်ႇပၢႆႁႃႈပီႊလႄႈ တၢႆၵႃႈတီႈၼႂ်းဝဵင်းၶႃႇရၢၼ်ႇၼၼ်ႉဢေႃႈ။

Currently Selected:

ငဝ်ႈၵမ်ႇၽႃႇ 11: CBMS

Highlight

Copy