ငဝ်ႈၵမ်ႇၽႃႇ 10

ၸိူဝ်ႉၶိူဝ်းလုၵ်ႈလၢၼ်ၼူဝ်းဢႃႇ

(တူၺ်း၊ 1 ရႃႇၶျုၵ်ႈ 1:5-23)

1ၸရၢင်းလုၵ်ႈၸၢႆးၼူဝ်းဢႃႇဢၼ်ဝႃႈ သေႇမႃႉ၊ ႁႃႇမႃႉ၊ တင်းယႃႇၽႅတ်ႈၸိူဝ်းၼၼ်ႉၸမ်ႉ။ ဝၢႆးသေၼမ်ႉထူမ်ႈမိူင်းယဝ်ႉၼၼ်ႉ ၶဝ်မီးလုၵ်ႈမီးလၢင်းဢေႃႈ။- 2လုၵ်ႈၸၢႆးယႃႇၽႅတ်ႈၸမ်ႉ၊ ပဵၼ်ၵေႃးမႃႇ၊ မႃႇၵေႃးၵႃႉ၊ မႃႇတေႇ၊ ယႃႇဝၼ်ႇ၊ တူႉပလႃႉ၊ မႄႇသႅၵ်ႉ တင်းတီႉရတ်ႉဢေႃႈ။- 3လုၵ်ႈၸၢႆးၵေႃးမႃႇၸမ်ႉ၊ ပဵၼ်ဢသၵႄႇၼတ်ႉ၊ ရီႉၽတ်ႉ၊ တင်းတေႃႇၵမႃႉဢေႃႈ။- 4လုၵ်ႈၸၢႆးယႃႇဝၼ်ႇၸမ်ႉ၊ ပဵၼ်ဢေးလီႉသႃႇ၊ တႃႇသူႉ၊ ၵိတ်ႉတဵမ်၊ တင်းတေႃးတၼိမ်ႇဢေႃႈ။- 5ၶဝ်ၼၼ်ႉၼင်ႇၵၼ်ၵၼ် ၽႄၵူၼ်းၽႄမိူင်းမႅင်ႇၵၼ် ပဵၼ်ၸိုင်ႈပဵၼ်မိူင်းၵူၼ်းၵူႈၸိူဝ်ႉၵူႈမဵဝ်း ၸွမ်းၼင်ႇၽႃႇသႃႇၽႂ်ၽႃႇသႃႇမၼ်း၊ ၸိူဝ်ႉၶိူဝ်းလႂ်ၸိူဝ်ႉၶိူဝ်းၼၼ်ႉဢေႃႈ။

6လုၵ်ႈၸၢႆးႁႃႇမႃႉၸမ်ႉ၊ ပဵၼ်ၵူႉသႃႉ၊ မီႉသရိမ်ႇ၊ ၽူႉတႃႉ၊ တင်းၶႃႇၼၢၼ်ႇဢေႃႈ။- 7လုၵ်ႈၸၢႆးၵူႉသႃႉၸမ်ႉ၊ ပဵၼ်ၸေႇပႃႉ၊ ႁႃႇဝီႉလႃႉ၊ သႃႇပတႃႉ၊ ရႃႇမႃႉ တင်းသပ်ႉတေႇၶႃႉဢေႃႈ။ လုၵ်ႈၸၢႆးရႃႇမႃႉၸမ်ႉ၊ ပဵၼ်သေးပႃႉ တင်း တေႇတၼ်ႇဢေႃႈ။- 8ၵူႉသႃႉသမ်ႉလႆႈလုၵ်ႈၸၢႆး ၼိမ်ႇရေႃးတႃႉထႅင်ႈဢေႃႈ။ မၼ်းၼၼ်ႉပဵၼ်ၵေႃႉဢၼ်ႁႅင်းၼႃႇ ဢွၼ်တၢင်းပိူၼ်ႈၵႃႈၼိူဝ်လိၼ်မိူင်းဢေႃႈ။- 9ပဵၼ်မူးသိူဝ်းဢၼ်ႁႅင်းယႂ်ႇၼႃႇ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။ ပိူဝ်ႈၼႆလႄႈ ၸၢပ်ႈဝႆႉၼႂ်းဢပုမ်ႇၵႂၢမ်းလႄႈဝႃႈၸမ်ႉ၊ ၼိမ်ႇရေႃးတႃႉ ပဵၼ်မူးသိူဝ်း ဢၼ်ႁႅင်းယႂ်ႇၼႃႇၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ၊ ဝႃႈၼင်ႇၼႆဢေႃႈ။- 10မိူင်းမၼ်းဢၼ်ပဵၼ်ၵေႃႇၸႃႉႁူဝ်ပိုင်းၸမ်ႉ၊ ပဵၼ်ဝဵင်းပႃႇပူႉလုၼ်ႇ၊ ဝဵင်းဢေႇရိၵ်ႉ၊ ဝဵင်းဢၵ်ႉၵတ်ႉ၊ ဝဵင်းၵႃႇလၼေႇ ၵႃႈတီႈၼႂ်းမိူင်း သီႉၼႃႉၼၼ်ႉဢေႃႈ။- 11မၼ်းလုၵ်ႉသေၵႃႈတီႈမိူင်းၼၼ်ႉ ၵႂႃႇၵႃႈတီႈမိူင်းဢႃႇသူႉရီႉလႄႈ တႄႇႁဵတ်းဝဵင်းၼီႉၼေႇဝူၺ်ႇ၊ ဝဵင်းရႁေႃးၽုတ်ႉ၊ ဝဵင်းၵႃႇလႃႉ၊- 12ဢိၵ်ႇတင်းဝဵင်းရေးသိၼ်ႇ ဢၼ်မီးၵႃႈၼႂ်းၵႄႈဝူင်ႈၵၢင်ဝဵင်းၼီႉၼေႇဝူၺ်ႇ တင်းဝဵင်းၵႃႇလႃႉလႄႈ ပဵၼ်ဝဵင်းဢၼ်ယႂ်ႇၼႃႇၼၼ်ႉဢေႃႈ။

13လုၵ်ႈၸၢႆးမီႉသရိမ်ႇၸမ်ႉ၊ပဵၼ်ၵူၼ်းလူႉတိမ်ႇ၊ ၵူၼ်းဢႃႇၼမိမ်ႇ၊ ၵူၼ်းလႁႃႇပိမ်ႇ၊ၵူၼ်းၼပ်ႉတူႉႁိမ်ႇ၊ ၵူၼ်းပႃႇသရူႉသိမ်ႇ၊ ၵူၼ်း ၵႃႇသလူႉႁိမ်ႇ တင်းၵူၼ်းၵပ်ႉတေႃးရိမ်ႇဢေႃႈ။- 14ၵူၼ်းၽီႉလိတ်ႉတီႉပဵၼ်မႃးၵႃႈၼႂ်းၵူၼ်းၵႃႇသလူႉႁိမ်ႇၼၼ်ႉဢေႃႈ။

15 ၶႃႇၼၢၼ်ႇမီးလုၵ်ႈၸၢႆးတူၼ်ႈၸီႉတုမ်ႇ၊ သမ်ႉမီး ႁေႇသႃႉ၊- 16သမ်ႉမီးၵူၼ်းယေႇပူႉသီႉ၊ သမ်ႉမီးၵူၼ်းဢႃႇမေႃးရီႉ၊ သမ်ႉမီးၵူၼ်းၵီႉရၵႃႇသီႉ၊- 17သမ်ႉမီးၵူၼ်းႁီႉဝီႉ၊ သမ်ႉမီးၵူၼ်းဢႃႇၵီႉ၊ သမ်ႉမီးၵူၼ်းသီႉၼီႉ၊- 18သမ်ႉမီးၵူၼ်းဢႃႇဝတီႉ၊ သမ်ႉမီးၵူၼ်းၸေႇမရီႉ၊ သမ်ႉမီးၵူၼ်းႁႃႇမသီႉဢေႃႈ။ လိုၼ်းၼၼ်ႉၸိူဝ်ႉၶိူဝ်း ၶႃႇၼၢၼ်ႇႁင်းၽႂ်ႁင်းမၼ်း ၸွတ်ႇတူဝ်ႈၵႂႃႇဢေႃႈ။- 19လႅၼ်လိၼ်မိူင်း တီႈယူႇၸိူဝ်ႉၶိူဝ်းၶႃႇၼၢၼ်ႇၼၼ်ႉ လုၵ်ႉသေၵႃႈတီႈဝဵင်းၸီႉတုမ်ႇ ၸူးၵႃႈတီႈဝဵင်းၵေႇရႃႇတေႃႇထိုင်ႁွတ်ႈ ဝဵင်းၵႃႇၸႃႉလႄႈ၊ သမ်ႉလုၵ်ႉသေၵႃႈတီႈၼၼ်ႈ ၸူးၵႃႈတီႈဝဵင်းသေႃးတုမ်ႇ၊ ဝဵင်းၵေႃးမေႃးရႃႉ၊ ဝဵင်းဢႃႇတမႃႇ၊ ဝဵင်းၸေႇၽူဝ်းဢိမ်း တေႃႇထိုင်ႁွတ်ႈ ဝဵင်းလႃႇသႃႉဢေႃႈ။- 20ၶဝ်ၸိူဝ်းၼႆႉ ပဵၼ်လုၵ်ႈၸၢႆးႁႃႇမႃႉ ဢၼ်ၸွမ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်း ၽႃႇသႃႇၽႂ်ၽႃႇသႃႇမၼ်းလႄႈ ယူႇၶေႃၶေႃၵႃႈၼႂ်းမိူင်းၽႂ်မိူင်းမၼ်းဢေႃႈ။

21 သေႇမႃႉဢၼ်ပဵၼ်ၼွင်ႉၸၢႆးယႃႇၽႅတ်ႈၵေႃႉယႂ်ႇ၊ ပေႃႈၵူၼ်းႁေႇပြႄး တင်းသဵင်ႈတင်းလူင်ၼၼ်ႉၵေႃႈ၊ လႆႈလုၵ်ႈလႆႈလၢင်းဢေႃႈ။- 22လုၵ်ႈၸၢႆးသေႇမႃႉၸမ်ႉ၊ ပဵၼ်ဢေႇလမ်ႇ၊ ဢႃႇသူႉရႃႉ၊ ဢႃႇၽၵ်ႉၸတ်ႉ၊ လူႉတႃႉ တင်းဢႃႇရမ်ႇဢေႃႈ။- 23လုၵ်ႈၸၢႆးဢႃႇရမ်ႇၸမ်ႉ၊ ပဵၼ်ဢူႉၸႃႉ၊ ႁူႉလႃႉ၊ ၵေႇသႃႇတင်းမႃႇသႃႉဢေႃႈ။- 24ဢႃႇၽၵ်ႉၸတ်ႉၸမ်ႉ၊ မီးလုၵ်ႈၸၢႆးသႃႇလႃႉဢေႃႈ။ သႃႇလႃႉၼၼ်ႉမီးလုၵ်ႈၸၢႆးႁေႇပႃႇဢေႃႈ။- 25ႁေႇပႃႇၵေႃႈမီးလုၵ်ႈၸၢႆးသွင်ၵေႃႉဢေႃႈ။ လုၵ်ႈၸၢႆးၵေႃႉၼိုင်ႈၸမ်ႉ၊ လႆႈၸိုဝ်ႈၽႃႇလႅၵ်ႉဢေႃႈ။ လွင်ႈမၼ်းၸမ်ႉ ၶဝ်ၽႄလိၼ်မိူင်းမႅင်ႇၵၼ် ၼႂ်းၸူဝ်ႈပၢၼ်မၼ်းၼၼ်ႉဢေႃႈ။ ၼွင်ႉၸၢႆးမၼ်းၸမ်ႉ၊ လႆႈၸိုဝ်ႈယွၵ်ႉတၼ်ႇဢေႃႈ။- 26ယွၵ်ႉတၼ်ႇၼၼ်ႉ မီးလုၵ်ႈၸၢႆး ဢႃႇလမေႃႇတတ်ႉ၊ သေႇလပ်ႉ၊ ႁႃႇၸႃႇမႃႇဝိတ်ႉ၊ ယေႇရႃႇ၊- 27ႁႃႇတေႃးရမ်၊ ဢူႉၸလႃႉ၊ တိၵ်ႉလႃႇ၊- 28ဢေႃႇပလႃႉ၊ ဢပီႉမေႇလႃႉ၊ သေးပႃႉ၊- 29ဢေႃႇၽီႉရႃႉ၊ ႁႃႇဝီႉလႃႉ၊ ယေႃးပပ်ႉဢေႃႈ။ ၶဝ်ၸိူဝ်းၼႆႉတင်းသဵင်ႈတင်းလူင်ပဵၼ်လုၵ်ႈယွၵ်ႉတၼ်ႇဢေႃႈ။- 30တီႈယူႇၶဝ်ၸမ်ႉ၊ မီးၸႃႉၸဵမ်ဝဵင်းမေႇသႃႉ တေႃႇထိုင်ႁွတ်ႈလွႆသေႇၽႃႇ ၵႃႈတီႈၼႃႈဝၼ်းဢွၵ်ႇဢေႃႈ။- 31ၶဝ်ၸိူဝ်းၼႆႉပဵၼ်လုၵ်ႈၸၢႆးသေႇမႃႉဢၼ်ၸွမ်းၸိူဝ်ႉၶိူဝ်းၽႂ်ၸိူဝ်ႉၶိူဝ်းမၼ်း ၽႃႇသႃႇၽႂ်ၽႃႇသႃႇမၼ်းလႄႈ ယူႇၶေႃၶေႃၵႃႈၼႂ်းမိူင်းၽႂ်မိူင်းမၼ်းဢေႃႈ။

32ဢၼ်ၼႆႉၸမ်ႉ၊ ပဵၼ်ၸရၢင်းၸိူဝ်ႉၶိူဝ်း လုၵ်ႈၸၢႆးၼူဝ်းဢႃႇ ဢၼ်သိုပ်ႇတၢမ်းၸွမ်းလူၺ်ႈ မဵဝ်းၶဝ်ႁင်းၽႂ်ႁင်းမၼ်းဢေႃႈ။ ဝၢႆးသေၼမ်ႉထူမ်ႈမိူင်းၼၼ်ႉ၊ ၶဝ်ၸိူဝ်းၼၼ်ႉ တႄႇႁဵတ်းမိူင်းယူႇၶေႃၶေႃ ႁင်းၽႂ်ႁင်းမၼ်း ၵႃႈၼိူဝ်လိၼ်မိူင်းဢေႃႈ။

Currently Selected:

ငဝ်ႈၵမ်ႇၽႃႇ 10: CBMS

Highlight

Copy