တမၢၼ်ႇၸဝ်ႈ 9
9
လွင်ႈဢၼ်သေႃးလူႉပိၼ်ႇၸႂ်မႃး
(တူၺ်း၊ တ 22:6-16။ တ 26:12-18)
1 သေႃးလူႉၼၼ်ႉၸမ်ႉ ၼင်ႇႁိုဝ်တၵ်းလႆႈယူႇၽၢႆႇၼိုင်ႈ တင်းတပႄးၸဝ်ႈၽြႃးတင်းလၢႆလႄႈ လွၵ်ႇငိုတ်ႈဢဝ်တၢႆၸိုင် ယင်းတိုၵ်ႉထူၺ်ႈၸႂ်ႁႅင်းၼႃႇလူင်လၢင်ယူႇသေလႄႈ ၶဝ်ႈၸူးၵႃႈတီႈၶုၼ်ယိတ်ႈပရေႃးႁဵၵ်ႈလႄႈ၊- 2ယွၼ်းဢဝ်လိၵ်ႈ ၵႂႃႇၵႃႈတီႈၵႄႇၸရွပ်ႈႁေႃးတြႃးၸိူဝ်းဢၼ် မီးၵႃႈၼႂ်းဝဵင်းထမ်ႇမသႅတ်ႉၼၼ်ႉ၊ ပေႃးထူပ်းႁၼ်ၽူႈယိင်းၽူႈၸၢႆးၸိူဝ်းဢၼ်ၶဝ်ႈၸွမ်းၼႂ်းသဵၼ်ႈတၢင်းၼၼ်ႉၸိုင် ႁႂ်ႈလႆႈမတ်ႉၽုၵ်ႇဢဝ်ၵႂႃႇသူင်ႇၵႃႈတီႈဝဵင်းယေႇရူႉသလႅမ်ႇသေယဝ်ႉ၊- 3ၼႂ်းမိူဝ်ႈဢၼ်မၼ်းၵႂႃႇလႄႈႁွတ်ႈထိုင် ၵႃႈတီႈႁိမ်းဝဵင်းထမ်ႇမသႅတ်ႉၼၼ်ႉၸိုင်၊ ဢၼ်လႅင်းဢၼ်လုၵ်ႉသေၵႃႈၼိူဝ်ၽႃႉၵၢင်ႁၢဝ်ၼၼ်ႉ ႁိူဝ်ႈလႅင်းႁွပ်ႈႁိမ်းမၼ်းၵမ်းလဵဝ်ဢေႃႈ။- 4မၼ်းၼၼ်ႉ လူမ်ႉဢူပ်ႇပူပ်ႇၵႃႈၼိူဝ်လိၼ်သေလႄႈ လႆႈငိၼ်းသဵင်ဢၼ်လၢတ်ႈတေႃႇမၼ်းလႄႈဝႃႈ၊ သေႃးလူႉဢိူၺ်း၊ သေႃးလူႉဢိူၺ်း၊ ႁဵတ်းသင်လႄႈ မႂ်းၼႆႉၼိၵ်ႈၸၢၵ်ႈငႅၼ်းသႄးၵဝ်ၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊- 5မၼ်းၵေႃႈလဝ်ႊထၢမ်လႄႈဝႃႈ၊ ၸဝ်ႈႁဝ်းပဵၼ်ၽူႈလႂ်ၶႃႈ၊ ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈလႄႈဝႃႈ၊ ၵဝ်ၸမ်ႉ၊ ပဵၼ်ယေႇသူႉ ဢၼ်မႂ်းၼိၵ်ႈၸၢၵ်ႈငႅၼ်းသႄးၼၼ်ႉဢေႃႈ။- 6ၼႂ်းဝႃႈၼၼ်သေၵေႃႈလုၵ်ႉလႄႈ ၶဝ်ႈၵႃႈၼႂ်းဝဵင်းပုၼ်ႉတႃႉ။ တၵ်းလၢတ်ႈပၼ်လွင်ႈဢၼ်မႂ်းတၵ်းလႆႈႁဵတ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။
7ၵူၼ်းဢၼ်ၵႂႃႇလူၺ်ႈၵၼ်တင်းမၼ်းၸိူဝ်းၼၼ်ႉၵူၺ်း ၵွမ်ႉလႆႈငိၼ်းသဵင်ၵူၺ်းလႄႈ ဢမ်ႇႁၼ်ၽူႈလႂ်သေၵေႃႉသေၵူၼ်း၊ ယင်းဢမ်ႇလၢတ်ႈၵႂၢမ်းလႆႈလႄႈ ဢွၼ်ၵၼ်ၸုၵ်းယူႇဢေႃႈ။- 8သေႃးလူႉၼၼ်ႉ လုၵ်ႉသေၵႃႈတီႈလိၼ်လႄႈ မိူဝ်ႈဢၼ်မၼ်းမိုၼ်းတႃမၼ်းၸိုင် ဢမ်ႇႁၼ်ၵႃႈသင်သေဢိတ်း။ ပိူၼ်ႈၸုင်ဢဝ်မိုဝ်းမၼ်းသေယဝ်ႉ ၵႂႃႇသူင်ႇၵႃႈတီႈဝဵင်းထမ်ႇမသႅတ်ႉဢေႃႈ။- 9သၢမ်ဝၼ်းတဵမ်တဵမ် မၼ်းၼၼ်ႉတႃယင်းဢမ်ႇႁၼ် ယင်းဢမ်ႇၵိၼ်ဢမ်ႇၶူပ်းလႄႈယူႇဢေႃႈ။
10မိူဝ်ႈၼၼ်ႉ တပႄးၸဝ်ႈဢၼ်လႆႈၸိုဝ်ႈဢႃႇၼၼီႉ ၵေႃႉၼိုင်ႈ မီးယူႇၵႃႈၼႂ်းဝဵင်းထမ်ႇမသႅတ်ႉၼၼ်ႉဢေႃႈ၊ ၸဝ်ႈၽြႃးလၢတ်ႈတီႈမၼ်းၼၼ်ႉၼႂ်းရူႇပႃႇရူင်ႇလႄႈဝႃႈ၊ဢႃႇၼၼီႉဢိူၺ်း၊ ဝႃႈၼင်ႇၼႆသေယဝ်ႉ၊ဢႃႇၼၼီႉၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၵဝ်ၶႃႈမီးယူႇၶႃႈ၊ ဝႃႈၼင်ႇၼႆဢေႃႈ။- 11ၸဝ်ႈၽြႃးၵေႃႈလၢတ်ႈလႄႈဝႃႈ မႂ်းၼႆႉလုၵ်ႉသေလႄႈ ၵႂႃႇၵႃႈတီႈသဵၼ်ႈတၢင်းဢၼ်လႆႈႁွင်ႉႁဵၵ်ႈၸိုဝ်ႈတၢင်းသိုဝ်ႈၼၼ်ႉတႃႉ။ ႁႃဢဝ်ၵူၼ်းဝဵင်းတႃႇသူႉ ဢၼ်ၸိုဝ်ႈသေႃးလူႉၼၼ်ႉ ၵႃႈၼႂ်းႁိူၼ်းယူႉတႃႉၼၼ်ႉတႃႉ။ လွင်ႈမၼ်းၸမ်ႉ ၵေႃႉၼၼ်ႉသူးတွင်းယူႇဢေႃႈ။- 12မၼ်းလႆႈႁၼ် ၵူၼ်းဢၼ်လႆႈၸိုဝ်ႈဢႃႇၼၼီႉ ၵေႃႉၼိုင်ႈၶဝ်ႈမႃးလႄႈ ဢဝ်မိုဝ်းတၢင်ႇၵႃႈၼိူဝ်မၼ်း ႁႂ်ႈမၢၵ်ႇတႃမၼ်းလႆႈၶိုၼ်းႁၼ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။
13 ဢႃႇၼၼီႉၵေႃႈ လဝ်ႊလၢတ်ႈလႄႈဝႃႈ၊ ၸဝ်ႈႁဝ်း၊ ၵဝ်ၶႃႈလႆႈငိၼ်းၵူၼ်းၼမ်ၼႃႇ လၢတ်ႈလွင်ႈဢၼ်ၵေႃႉၼၼ်ႉၼိၵ်ႈၸၢၵ်ႈငႅၼ်းသႄး ၵူၼ်းဢၼ်မူတ်းၸၢင်ႇ ၵႃႈၼႂ်းဝဵင်းယေႇရူႉသလႅမ်ႇၸိူဝ်းၼၼ်ႉထၢၼ်ႇႁိုဝ်ၼၼ်ႉယူႇတီႈၶႃႈဢေႃႈ။- 14ၵႃႈတီႈၼႆႈၵေႃႈၵေႃႉၼၼ်ႉလႆႈဢၶႂၢင်ႉ ဢၼ်လႆႈမတ်ႉၽုၵ်ႇၶဝ်ၸိူဝ်းဢၼ်ႁဵတ်းသူးတွင်းပထၼႃႇ တီႈၸဝ်ႈႁဝ်းၵႃႈမီးၼၼ်ႉတီႈယိတ်ႈပရေႃးႁဵၵ်ႈလူင် တင်းလၢႆယဝ်ႉတီႈၶႃႈ၊ ဝႃႈၼင်ႇၼႆဢေႃႈ။- 15ၸဝ်ႈၽြႃးၵေႃႈလၢတ်ႈတီႈမၼ်းလႄႈဝႃႈ မႂ်းၵႂႃႇတႃႉ။ ၵေႃႉၼၼ်ႉၸမ်ႉ၊ ပဵၼ်ၶိူင်ႈပိူင်ဢၼ်ၵဝ်လိူၵ်ႈၵဵပ်းဢဝ် ႁႂ်ႈလႆႈဢဝ်ၼႃႇမႃႉၸိုဝ်ႈသဵင်ၵဝ်ၵႂႃႇသူင်ႇ ၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်း ဢိၵ်ႇတင်းၶုၼ်ႁေႃၶမ်း တင်းၵူၼ်းမဵဝ်းဢီႉသရေႇလႃႉတင်းလၢႆဢေႃႈ။- 16လွင်ႈမၼ်းၸမ်ႉ ၵဝ်တၵ်းၼႄပျႃးလွင်ႈဢၼ်ၵေႃႉၼၼ်ႉ တၵ်းလႆႈၶၢမ်ႇၼမ်ထၢၼ်ႇႁိုဝ် ၵွပ်ႈပိူဝ်ႈၼႃႇမႃႉၸိုဝ်ႈသဵင်ၵဝ်ၼၼ်ႉတီႈမၼ်းဢေႃႈ၊ ဝႃႈၼင်ႇၼႆဢေႃႈ။- 17ဢႃႇၼၼီႉ ၵေႃႈၵႂႃႇလႄႈ ၶဝ်ႈၵႃႈၼႂ်းႁိူၼ်းၼၼ်ႉသေယဝ်ႉ၊ ဢဝ်မိုဝ်းတူဝ်ၸဝ်ႈၵဝ်ႇတၢင်ႇၵႃႈၼိူဝ်သေႃးလူႉသေလႄႈ လၢတ်ႈဝႃႈ၊ ၼွင်ႉသေႃးလူႉဢိူၺ်း၊ ၸဝ်ႈယေႇသူႉဢၼ်ပေႃႇမႃးတီႈမႂ်း ၼႂ်းသဵၼ်ႈတၢင်းဢၼ်မႂ်းမႃးၼၼ်ႉ ပွႆႇၸႂ်ႉၵဝ်မႃးႁႂ်ႈမၢၵ်ႇတႃမႂ်းလႆႈၶိုၼ်းႁၼ် ဢိၵ်ႇတင်းႁႂ်ႈမႂ်းလႆႈတဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈယဝ်ႉ၊ ဝႃႈၼင်ႇၼႆဢေႃႈ။- 18ၼင်ႇၼၼ်လႄႈ တီႈမၢၵ်ႇတႃသေႃးလူႉၼၼ်ႉ ၵွၵ်းတူၵ်းၵႂႃႇၸိူဝ်ႉၼင်ႇၵဵတ်းပႃၼၼ်ႉၵမ်းလဵဝ်လႄႈ တႃမၼ်းၶိုၼ်းႁၼ်သေယဝ်ႉ မၼ်းလုၵ်ႉလႄႈၶၢမ်ႇပပ်ႉတီႉၸမ်ႇသေယဝ်ႉ၊ ၵိၼ်တၢင်းၵိၼ်လႄႈ မီးႁႅင်းမႃးဢေႃႈ။
သေႃးလူႉႁေႃးတြႃးၼႂ်းဝဵင်းထမ်ႇမသႅတ်ႉ
19လိုၼ်းၼၼ်ႉ မၼ်းၵေႃႈယူႇလူၺ်ႈၵၼ်တင်းတပႄးၸဝ်ႈ ဢၼ်မီးယူႇၵႃႈၼႂ်းဝဵင်းထမ်ႇမသႅတ်ႉၸိူဝ်းၼၼ်ႉ ၶိင်ႇၵႃႇလႃႉႁိုင်တၢၼ်ႇတၢၼ်ႇလႄႈ၊- 20ႁေႃးလၢတ်ႈလွင်ႈဢၼ် ယေႇသူႉ ပဵၼ်လုၵ်ႈၽြႃးပဵၼ်ၸဝ်ႈၼၼ်ႉ ၵႃႈၼႂ်းၸရွပ်ႈႁေႃးတြႃးတင်းလၢႆၵမ်းလဵဝ်ဢေႃႈ။- 21ၶဝ်ၸိူဝ်းဢၼ်ငိၼ်းတင်းသဵင်ႈတင်းလူင်ၼၼ်ႉဢၢမ်းလႄႈဝႃႈ၊ ၵေႃႉၼႆႉၸမ်ႉ၊ ယႃႉယူၵ်ႉၶဝ်ၸိူဝ်းဢၼ်ႁဵတ်းသူးတွင်းပထၼႃႇ တီႈၼႃႇမႃႉၸိုဝ်ႈသဵင်ၸဝ်ႈၼႆႉ ၵႃႈတီႈၼႂ်းဝဵင်းယေႇရူႉသလႅမ်ႇပုၼ်ႉၵူၺ်းဢမ်ႇၵႃး၊ ပဵၼ်ၵေႃႉဢၼ်မႃးၵႃႈတီႈၼႆႈ ႁႂ်ႈလႆႈမတ်ႉၽုၵ်ႇဢဝ်ၶဝ်ၼၼ်ႉၵႂႃႇသူင်ႇၵႃႈတီႈ ယိတ်ႈပရေႃးႁဵၵ်ႈလူင်ၸိူဝ်းၼၼ်ႉဢမ်ႇၸႂ်ႈႁိုဝ်၊ ဝႃႈၼင်ႇၼႆဢေႃႈ။
22 သေႃးလူႉၼၼ်ႉၵေႃႈ ယဵင်ႈၶႅၼ်းႁႅင်းယႂ်ႇမႃးလႄႈ ၵႄႈလိတ်ႈၵႂၢမ်းဢၼ်ၵူၼ်းယူႉတႃႉဢၼ်ယူႇၵႃႈၼႂ်းဝဵင်းထမ်ႇမသႅတ်ႉတင်းလၢႆလၢတ်ႈၼၼ်ႉလႄႈ ၽုၺ်ႇဢွၵ်ႇၼႄပျႃး လွင်ႈဢၼ်ယေႇသူႉပဵၼ်ၸဝ်ႈၶရိၸ်ႈၼၼ်ႉလႅင်းလႅင်းဢေႃႈ။
23ပူၼ်ႉဝၼ်းၼမ်ၼႃႇယဝ်ႉ၊ ၵူၼ်းယူႉတႃႉၸိူဝ်းၼၼ်ႉ တိူင်ႇပၢင်ႇလၢတ်ႈၸႃၵၼ်ႁႂ်ႈလႆႈဢဝ်မၼ်းတၢႆဢေႃႈ။- 24သေႃးလူႉ ႁူႉတၢင်းၵျၢမ်ႇတၢင်းပွင်ၶဝ်ၼၼ်ႉဢေႃႈ၊ ၶဝ်ပႂ်ႉၽၵ်းတူဝဵင်းတင်းလၢႆယူႇၵူႈဝၼ်းၵူႈၶိုၼ်း ႁႂ်ႈလႆႈဢဝ်မၼ်းတၢႆဢေႃႈ။- 25ၶိင်ႇၵၢင်ၶိုၼ်းတပႄးၸဝ်ႈၸိူဝ်းၼၼ်ႉ ဢဝ်မၼ်းသႂ်ႇၵႃႈၼႂ်းပဵတ်ႈသေယဝ်ႉ၊ ယွၼ်ႇတူၵ်းသေၵႃႈၼိူဝ်လမ်းဝဵင်းဢေႃႈ။
သေႃးလူႉႁွတ်ႈၽႅဝ်ဝဵင်းယေႇရူႉသလႅမ်ႇ
26မိူဝ်ႈဢၼ်မၼ်းႁွတ်ႈထိုင် ၵႃႈတီႈဝဵင်းယေႇရူႉသလႅမ်ႇၼၼ်ႉၸိုင် မၼ်းၵျၢမ်ႇတၵ်းႁဵတ်းၵေႃႉႁဵတ်းသေႈ လူၺ်ႈၵၼ်တင်းတပႄးၸဝ်ႈတင်းလၢႆသေၵေႃႈ ၶဝ်တင်းသဵင်ႈတင်းလူင်ၸိူဝ်းၼၼ်ႉ ဢမ်ႇယုမ်ႇလွင်ႈဢၼ်မၼ်းပဵၼ်တပႄးၸဝ်ႈၼၼ်ႉလႄႈ ၵူဝ်မၼ်းဢေႃႈ။- 27မိူဝ်ႈၼၼ်ႉပႃႇၼပႃႉ ၸင်ႇႁွင်ႉဢဝ်မၼ်းလႄႈ ၵႂႃႇသူင်ႇၵႃႈတီႈတမၢၼ်ႇၸဝ်ႈတင်းလၢႆယဝ်ႉၸင်ႇ မွၵ်ႇလၢတ်ႈပၼ်လွင်ႈဢၼ်မိူဝ်ႈဢွၼ်တၢင်းၼၼ်ႉ မၼ်းလႆႈႁၼ်ၸဝ်ႈၽြႃးၵႃႈတီႈၵၢင်တၢင်း၊ လွင်ႈဢၼ်မၼ်းၸဝ်ႈလၢတ်ႈတေႃႇမၼ်း၊ လွင်ႈဢၼ်မၼ်းဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈယေႇသူႉသေလႄႈ ႁေႃးလၢတ်ႈႁတ်းႁတ်းႁၢၼ်ႁၢၼ်ၵႃႈၼႂ်း ဝဵင်းထမ်ႇမသႅတ်ႉၼၼ်ႉတီႈၶဝ်ဢေႃႈ။- 28လိုၼ်းၼၼ်ႉ သေႃးလူႉၶဝ်ႈၶဝ်ႈဢွၵ်ႇဢွၵ်ႇ ၵႃႈၼႂ်းဝဵင်းယေႇရူႉသလႅမ်ႇ လူၺ်ႈၵၼ်တင်းတမၢၼ်ႇၸဝ်ႈၸိူဝ်းၼၼ်ႉလႄႈ ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈယေႇသူႉသေလႄႈ ႁေႃးလၢတ်ႈယူႇႁတ်းႁတ်းႁၢၼ်ႁၢၼ်ဢေႃႈ။- 29မၼ်းတိူင်ႇပၢင်ႇလၢတ်ႈထဵင်ၵၼ်တင်းၵူၼ်း ႁေႇလေႇၼိတ်ႉတင်းလၢႆသေၵေႃႈ ၶဝ်ၵျၢမ်ႇႁႃႁႂ်ႈလႆႈဢဝ်မၼ်းတၢႆယူႇဢေႃႈ။- 30မိူဝ်ႈဢၼ်ပီႈၼွင်ႉၸိူဝ်းၼၼ်ႉငိၼ်းလွင်ႈတၢင်းၼၼ်ႉၸိုင်၊ ၶဝ်ဢဝ်မၼ်းၵႂႃႇသူင်ႇ ၵႃႈတီႈဝဵင်းၵေႇသရီႉလႄႈပွႆႇၸႂ်ႉမၼ်းၵႂႃႇႁႂ်ႈႁွတ်ႈထိုင် ၵႃႈတီႈဝဵင်းတႃႇသူႉ ပုၼ်ႉသေဢေႃႈ။
31မိူဝ်ႈၼၼ်ႉ ၸိူဝ်းၸဝ်ႈဢၼ်မီးယူႇ ၵႃႈၼႂ်းမိူင်းယူႉတႃႉ၊ မိူင်းၵႃႇလီႉလႄး၊ မိူင်းသမႃႇရီႉ ၵူႈတီႈၵူႈလႅၼ်ၸိူဝ်းၼၼ်ႉၼိမ်ၸႂ်လႄႈ မီးတၢင်းဢၼ်တႄႇပဵၼ်ယူႇဢေႃႈ။ ၵွပ်ႈပိူဝ်ႈဢၼ်ၸွမ်းလူၺ်ႈလွင်ႈတၢင်းဢၼ်ၵူဝ်ယမ်ၸဝ်ႈၽြႃး ဢိၵ်ႇတင်းလွင်ႈတၢင်းဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈ သင်ႇသွၼ်ပၼ်ၼၼ်ႉလႄႈ ၼမ်မႃးၵိုၼ်းမႃးဢေႃႈ။
ပေႇတရူႉၵႂႃႇၼႂ်းဝဵင်းလုတ်ႉတႃႉလႄႈယွပ်ႉပႃႉ
32ၼႂ်းမိူဝ်ႈဢၼ်ပေႇတရူႉ လႄႇလဵပ်ႈၵူႈတီႈၵူႈလႅၼ် ၵႃႈၼႂ်းၸိူဝ်းၸဝ်ႈတင်းသဵင်ႈတင်းလူင်ယူႇၼၼ်ႉၸိုင် မၼ်းၵႂႃႇႁွတ်ႈထိုင်ၵႃႈတီႈ ၵူၼ်းမူတ်းၸၢင်ႇဢၼ်မီးယူႇၵႃႈၼႂ်းဝဵင်းလုတ်ႉတႃႉၸိူဝ်းၼၼ်ႉဢေႃႈ။- 33ၵႃႈတီႈၼၼ်ႈ ပေႇတရူႉထူပ်းႁၼ်ၵူၼ်းဢၼ်လႆႈၸိုဝ်ႈဢေႇၼေး ဢၼ်တိၼ်တၢႆမိုဝ်းတၢႆလႄႈ လႆႈၼွၼ်းယူႇၵႃႈၼိူဝ်ၽႃႈၵွပ်းပႅတ်ႇပီႊတဵမ်တဵမ်ၼၼ်ႉၵေႃႉၼိုင်ႈလႄႈ၊- 34လၢတ်ႈဝႃႈ၊ဢေႇၼေးဢိူၺ်း၊ ယေႇသူႉၶရိၸ်ႈ ပၼ်ၵတ်းယဵၼ်ၶျၢမ်းသႃႇတီႈမႂ်းဢေႃႈ။ လုၵ်ႉသေလႄႈ မႄးႁႅၼ်းၽႃႈၵွပ်းမႂ်းတႃႉ၊ မိူဝ်ႈဢၼ်ဝႃႈၼင်ႇၼႆၸိုင် မၼ်းၼၼ်ႉၽုတ်းလုၵ်ႉၵမ်းလဵဝ်ဢေႃႈ။- 35ၵူၼ်းဢၼ်ယူႇၵႃႈၼႂ်းဝဵင်းလုတ်ႉတႃႉ တင်းဝဵင်းသႃႇရုၼ်ႇ တင်းသဵင်ႈတင်းလူင်ၼၼ်ႉ လႆႈႁၼ်ၵေႃႉၼၼ်ႉလႄႈ ဢွၼ်ၵၼ်ၶၢႆႉပုတ်ႈမႃးယူႇၵႃႈတီႈၽၢႆႇၸဝ်ႈၽြႃးဢေႃႈ။- 36ၼႂ်းဝဵင်းယွပ်ႉပႃႉၼၼ်ႉ မီးတပႄးၸဝ်ႈဢၼ်လႆႈၸိုဝ်ႈတပီႉထႃႉ ၵေႃႉၼိုင်ႈဢေႃႈ။ ဢၼ်ၶႂ်ႈဝႃႈ ၸိုဝ်ႈသဵင်မၼ်းၼၼ်ႉၸမ်ႉ၊ ပဵၼ်တေႃႇၵႃႇ ဝႃႈၼင်ႇၼႆဢေႃႈ။ မႄႈယိင်းၼၼ်ႉ ပျေႉၸုမ်ႇဝႆႉတင်းတၢင်းၵမ်တၢင်းၵျၢင်ႉ ဢၼ်လီဢိၵ်ႇတင်း တၢင်းဢၼ်ၽႄၸွၼ်းယိုၼ်ႈမႅင်ႇ ဢၼ်မၼ်းႁဵတ်းၸိူဝ်းၼၼ်ႉဢေႃႈ။- 37မိူဝ်ႈၼၼ်ႉမၼ်းမီးတၢင်းၶႆႈတၢင်းပဵၼ်လႄႈတၢႆၵႂႃႇဢေႃႈ။ ၶဝ်ဢဝ်တူဝ်တၢႆမၼ်းဢၢပ်ႇၼမ်ႉသေယဝ်ႉ၊ တၢင်ႇဝႆႉၵႃႈတီႈလုၵ်းႁၢၼ်ႉၼိူဝ်ဢေႃႈ။- 38ပိူဝ်ႈဢၼ်ဝဵင်းလုတ်ႉတႃႉ မီးၸမ်ၵၼ်တင်းဝဵင်းယွပ်ႉပႃႉၼၼ်ႉလႄႈ တပႄးၸဝ်ႈၸိူဝ်းၼၼ်ႉလႆႈငိၼ်းလွင်ႈဢၼ်ပေႇတရူႉမီးၵႃႈၼႂ်းဝဵင်းၼၼ်ႉသေယဝ်ႉ၊ ပွႆႇၸႂ်ႉၵူၼ်းသွင်ၵေႃႉၵႂႃႇလႄႈတွင်းပၢၼ်ႇ ႁႂ်ႈမၼ်းမႃးၶၼ်ၶၼ်ၽႂ်းၽႂ်းဢေႃႈ။
39 ပေႇတရူႉၼၼ်ႉ လုၵ်ႉလႄႈၸွမ်းလူၺ်ႈၵၼ်တင်းၶဝ်ၼၼ်ႉဢေႃႈ။ မိူဝ်ႈဢၼ်မၼ်းႁွတ်ႈမႃးယဝ်ႉၸိုင်ၶဝ်ၼၼ်ႉ ႁွင်ႉဢဝ်မၼ်းၶိုၼ်ႈၵႂႃႇၵႃႈတီႈလုၵ်းႁၢၼ်ႉၼိူဝ်လႄႈ မႄႈမူၵ်းမႄႈမၢႆႈတင်းသဵင်ႈတင်းလူင် ၸုၵ်းယူႇၵႃႈတီႈႁိမ်းပေႇတရူႉၼၼ်ႉလႄႈ ႁွင်ႉႁႆႈယူႇသေလႄႈ ၼႄပျႃးသိူဝ်ႈလႂ် ၶူဝ်းၼုင်ႈလႂ် ဢၼ်တေႃႇၵႃႇလႆႈႁဵတ်းဝႆႉ ၼႂ်းမိူဝ်ႈဢၼ်မၼ်းယင်းမီးယူႇလူၺ်ႈၵၼ်တင်းၶဝ်ၼၼ်ႉဢေႃႈ။- 40ပေႇတရူႉ ႁႂ်ႈၶဝ်တင်းသဵင်ႈတင်းလူင်ၼၼ်ႉ ဢွၵ်ႇၵႂႃႇၵႃႈၼွၵ်ႈသေလႄႈ တူဝ်မၼ်းၶုပ်ႉၶဝ်ႇသူးတွင်းႁဵတ်းပထၼႃႇယဝ်ႉၸင်ႇ ဝၢႆႇၼႃႈၵႂႃႇၸူးတူဝ်တၢႆၼၼ်ႉသေလႄႈဝႃႈ၊တပီႉထႃႉဢိူၺ်း၊ လုၵ်ႉတႃႉ၊ ဝႃႈၼင်ႇၼႆဢေႃႈ။ မႄႈယိင်းၼၼ်ႉမိုၼ်းတႃလႄႈ မိူဝ်ႈဢၼ်ႁၼ်ပေႇတရူႉၸိုင် လုၵ်ႉၼင်ႈယူႇဢေႃႈ။- 41ပေႇတရူႉဢဝ်မိုဝ်းတူဝ်ၸဝ်ႈၵဝ်ႇပၼ်တီႈမၼ်းလႄႈ တိုတ်ႉၸၼ်ဢဝ်မၼ်းလုၵ်ႉသေယဝ်ႉ၊ ႁွင်ႉဢဝ်ၵူၼ်းမူတ်းၸၢင်ႇ ဢိၵ်ႇတင်းမႄႈမူၵ်းမႄႈမၢႆႈၸိူဝ်းၼၼ်ႉသေလႄႈ ၼႄပျႃးမႄႈယိင်းဢၼ်ပဵၼ်တူဝ်ၶိုၼ်းၼၼ်ႉဢေႃႈ။- 42လွင်ႈတၢင်းၼၼ်ႉႁူႉၸွတ်ႇတူဝ်ႈၵႂႃႇ ၵႃႈၼႂ်းဝဵင်းယွပ်ႉပႃႉၼၼ်ႉလႄႈ ၵူၼ်းၼမ်ၼႃႇ ႁွတ်ႈထိုင်တၢင်းဢၼ်ယုမ်ႇမၢတ်ႈၸဝ်ႈၽြႃးဢေႃႈ။
43 ပေႇတရူႉ ယူႇၵႃႈၼႂ်းဝဵင်းယွပ်ႉပႃႉၼၼ်ႉလူၺ်ႈၵၼ်တင်းၵေႃႉၼိုင်ႈ ဢၼ်လႆႈၸိုဝ်ႈသီႉမုၼ်ႇ ဢၼ်ပဵၼ်ၵူၼ်းႁဵတ်းၼင်ၼၼ်ႉႁိုင်ၼႃႇဢေႃႈ။
Currently Selected:
တမၢၼ်ႇၸဝ်ႈ 9: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
