တမၢၼ်ႇၸဝ်ႈ 6
6
ၽူႈၵမ်ႉၵႅမ်ၸဵတ်းၵေႃႉ
1မိူဝ်ႈၼၼ်ႉၼႂ်းမိူဝ်ႈဢၼ် တပႄးၸဝ်ႈယင်းတိုၵ်ႉၼမ်မႃးၵိုၼ်းမႃးယူႇၼၼ်ႉၸိုင်၊ ၵူၼ်းမဵဝ်းႁေႇလေႇၼိတ်ႉတင်းလၢႆ ပွင်ႉမိူၼ်ႇလႄႈဝႃႈ၊ မိူဝ်ႈဢၼ်ႁဵတ်းလဵင်ႉႁဵတ်းလူၵူႈမိုဝ်ႉၵူႈဝၼ်းၼၼ်ႉၸိုင်၊ ဢမ်ႇပေႃးႁဵတ်းလဵင်ႉႁဵတ်းလူတီႈမႄႈမၢႆႈမႄႈမူၵ်းမဵဝ်းၵူၼ်းႁဝ်းၼႆႉ၊ ဝႃႈၼင်ႇၼႆလႄႈ တၢင်ႇဢပႅတ်ႈတီႈၵူၼ်း ႁေႇပြႄးတင်းလၢႆဢေႃႈ။- 2မိူဝ်ႈၼၼ်ႉ တမၢၼ်ႇၸဝ်ႈသိပ်းသွင်ပႃးၸိူဝ်းၼၼ်ႉ ႁွင်ႉဢဝ်တပႄးၸဝ်ႈတင်းလၢႆမႃးသေယဝ်ႉ၊ လၢတ်ႈလႄႈဝႃႈ၊ ႁဝ်းဢမ်ႇထုၵ်ႇလီႁဵတ်းလွင်ႈဢၼ်တၵ်းပႅတ်ႈဝႆႉ ၼုၵ်ႈၵပၢတ်ႈတြႃးၽြႃးပဵၼ်ၸဝ်ႈသေလႄႈ ႁဵတ်းတၢင်းဢၼ်လဵင်ႉဢၼ်လူၵႃႈတီႈၶူင်ႇတီႈၵိၼ်ၼၼ်ႉ။- 3ပိူဝ်ႈၼႆလႄႈ ပီႈၼွင်ႉၶဝ်ဢိူၺ်း၊ ႁႃဢဝ်ၵူၼ်းဢၼ်မီးသရေႇ ဢၼ်ပျေႉၸုမ်ႇတင်းဝီႉၺိၺ်ႇဢၼ်မူတ်းၸၢင်ႇၸဝ်ႈ ဢိၵ်ႇတင်းပိင်ႇၺႃႇၼၼ်ႉၸဵတ်းၵေႃႉၵႃႈၼႂ်းသူတႃႉ။ ႁဝ်းတၵ်းၶၢၼ်းၶဝ်ဝႆႉ ႁႂ်ႈၶဝ်လႆႈႁဵတ်းပွင်လွင်ႈတၢင်းၼႆႉဢေႃႈ။- 4ႁဝ်းၸမ်ႉတၵ်းႁဵတ်းတၢင်းဢၼ်သူးတွင်းပထၼႃႇ ဢိၵ်ႇတင်းတၢင်းဢၼ်ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၼၼ်ႉယူႇတႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။
5ၵႂၢမ်းၼၼ်ႉၸိုင် ၵူၼ်းတင်းသဵင်ႈတင်းလူင်ၼၼ်ႉထုၵ်ႇၸႂ်ၵျိူၵ်ႈၸႂ်လႄႈ လိူၵ်ႈၵဵပ်းဢဝ် ၸႃႉၸဵမ်သထေႇၽၢၼ်ႇ ဢၼ်ပျေႉၸုမ်ႇတင်းတၢင်းဢၼ်ယုမ်ႇမၢတ်ႈ တင်းဝီႉၺိၺ်ႇဢၼ်မူတ်းၸၢင်ႇၸဝ်ႈ ဢိၵ်ႇတင်းၽီႉလိပ်ႉပူႉ တင်းပျေႃႇၶေႃႇ တင်းၼီႉၵၼေႃႇ တင်းတီႉမုၼ်ႇ တင်းပႃႇမေႇၼႃႉ တင်းၼီႉၵေႃးလႃႉ ၵူၼ်းဝဵင်းဢၼ်ႇတီႉဢူၵ်ႉ ဢၼ်ၶဝ်ႈၽႃႇသႃႇယူႉတႃႉၼၼ်ႉၸိူဝ်းၼၼ်ႉသေလႄႈ၊- 6ဝႆႉၵႃႈတီႈၽၢႆႇၼႃႈတမၢၼ်ႇၸဝ်ႈဢေႃႈ။ တမၢၼ်ႇၸဝ်ႈၸိူဝ်းၼၼ်ႉၵေႃႈ သူးတွင်းသေယဝ်ႉဢဝ်မိုဝ်းတၢင်ႇၵႃႈၼိူဝ်ႁူဝ်ၶဝ်ၼၼ်ႉဢေႃႈ။
7သႃႇသၼႃႇၽြႃးပဵၼ်ၸဝ်ႈယႂ်ႇၵႂၢင်ႈမႃးယူႇ တပႄးၸဝ်ႈၼမ်မႃးၵိုၼ်းမႃးယူႇ ၵႃႈၼႂ်းဝဵင်းယေႇရူႉသလႅမ်ႇၼၼ်ႉလႄႈ ယိတ်ႈပရေႃးႁဵၵ်ႈၼမ်ၼႃႇထွမ်ႇဢဝ်တြႃးတၢင်းဢၼ်ယုမ်ႇမၢတ်ႈဢေႃႈ။
လွင်ႈတၢင်းဢၼ်တီႉဢဝ်သထေႇၽၢၼ်ႇ
8 သထေႇၽၢၼ်ႇၼၼ်ႉ ပျေႉၸုမ်ႇဝႆႉတင်းၵျေးၸူးၸဝ်ႈဢိၵ်ႇတင်းတၼ်းၶူဝ်းၸဝ်ႈလႄႈ ႁဵတ်းၼီႉမိၵ်ႈလၢၵ်ႈၶၼႃႇဢၼ်ယႂ်ႇလႂ်၊ လွင်ႈတၢင်းဢၼ်လီဢၢမ်းလႂ် ၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။- 9မိူဝ်ႈၼၼ်ႉ ၸႃႉၸဵမ်ၵူၼ်းဢၼ်မီးၼႂ်းမုၵ်ႉၼႂ်းၸိူဝ်းဢၼ်လႆႈႁွင်ႉႁဵၵ်ႈၸိူဝ်း လီႉပေႇရတိၼ်ႇ ဢိၵ်ႇတင်းၵူၼ်းမိူင်းၵူႉရေႇၼေႇ တင်းၵူၼ်းဝဵင်းဢႃႇလေႇၸၼ်ႇတရေႇ တင်းၵူၼ်းမိူင်းၵီႉလီႉၵီႉ တင်းၵူၼ်းမိူင်းဢႃႇသီႉ ၵမ်ႈၽွင်ႈၸိူဝ်းၼၼ်ႉလုၵ်ႉလႄႈထဵင်ၵၼ်တင်းသထေႇၽၢၼ်ႇသေၵေႃႈ၊- 10ၶဝ်ၼၼ်ႉဢမ်ႇၶၢမ်ႇဢမ်ႇႁႄႉပိင်ႇၺႃႇတင်းဝီႉၺိၺ်ႇၸဝ်ႈ ဢၼ်မၼ်းဢဝ်သုင်းသွင်ႇႁေႃးလၢတ်ႈၼၼ်ႉလႆႈ။- 11မိူဝ်ႈၼၼ်ႉၶဝ်ၼၼ်ႉတဵတ်ႇတဵတ်ႇႁွင်ႉဢဝ် ၵူၼ်းဢၼ်တၵ်းၶၢမ်ႇသၢၵ်ႈသေႇလႄႈဝႃႈ၊ ႁဝ်းၶႃႈလႆႈငိၼ်းၵေႃႉၼႆႉလၢတ်ႈပူၼ်ႉလၢတ်ႈလိူဝ်မူဝ်းသေႇတင်းၽြႃးပဵၼ်ၸဝ်ႈၼၼ်ႉၶႃႈယဝ်ႉ၊ ဝႃႈၼင်ႇၼႆၼၼ်ႉဝႆႉဢေႃႈ။
12လိူဝ်သေၼၼ်ႉ ၶဝ်ၼၼ်ႉတိုၵ်းယူင်းၵူၼ်းတင်းလၢႆဢိၵ်ႇတင်း ၵူၼ်းဢၼ်ပဵၼ်ၵႄႇပဵၼ်ႁူဝ် တင်းၵူၼ်းထုတ်ႇၵျၢမ်းတင်းလၢႆသေယဝ်ႉ မႃးၸူးၵႃႈတီႈသထေႇၽၢၼ်ႇလႄႈ တီႉဢဝ်မၼ်းၵႂႃႇသူင်ႇၵႃႈတီႈလုမ်းလူင်ယဝ်ႉ၊- 13ၸင်ႇႁွင်ႉဢဝ်ၵူၼ်းဢၼ်ၶၢမ်ႇသၢၵ်ႈသေႇ ဢၼ်ဢမ်ႇၸိုဝ်ႈဢမ်ႇၸႂ်ႈၸိူဝ်းၼၼ်ႉ မႃးလႄႈလၢတ်ႈဝႃႈ ၵေႃႉၼႆႉလၢတ်ႈပူၼ်ႉလၢတ်ႈလိူဝ်ထႃႇၼႃႉတီႈမူတ်းၸၢင်ႇၸဝ်ႈၼႆႉ ဢိၵ်ႇတင်းပိင်းၺၢပ်ႈတြႃးၸဝ်ႈယူႇတႃႇသေႇဢမ်ႇထၢတ်ႇၶႃႈဢေႃႈ။- 14လွင်ႈမၼ်းၸမ်ႉ ႁဝ်းၶႃႈလႆႈငိၼ်းမၼ်းလၢတ်ႈလႄႈဝႃႈ၊ ယေႇသူႉၵူၼ်းဝဵင်းၼႃႇၸရႅတ်ႈၼၼ်ႉတၵ်းယႃႉတီႈယူႇတၼ်းသဝ်းၸဝ်ႈၼႆႉပႅတ်ႈလႄႈ ႁႂ်ႈထုင်းၸၢမ်ႇဢူႉပတေႇဢၼ်မူဝ်းသေႇဢၢပ်ႈပၼ်တီႈႁဝ်းၼႆႉၼၼ်ႉၶၢႆႉပုတ်ႈသေဢေႃႈ၊ ဝႃႈၼင်ႇၼႆယဝ်ႉၶႃႈ၊ ဝႃႈၼင်ႇၼႆဢေႃႈ။- 15ၶဝ်ၸိူဝ်းဢၼ်ၼင်ႈယူႇၵႃႈၼိူဝ်လုမ်းတင်းသဵင်ႈတင်းလူင်ၸိူဝ်းၼၼ်ႉၵေႃႈ ယႅၵ်ႉတူၺ်းၼႃႈမၼ်းၸေးၸေးၸွတ်ႇၸွတ်ႇယူႇသေလႄႈ ႁၼ်ၼႃႈမၼ်းပဵၼ်ၸိူဝ်ႉၼင်ႇၼႃႈတမၢၼ်ႇၵၢင်ႁၢဝ်ဝႆႉဢေႃႈ။
Currently Selected:
တမၢၼ်ႇၸဝ်ႈ 6: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
