တမၢၼ်ႇၸဝ်ႈ 27
27
တမၢၼ်ႇၸဝ်ႈပေႃးလူႉၶီႇႁိူဝ်းၵႂႃႇဝဵင်းရူဝ်းမႃႉ
1မိူဝ်ႈၼၼ်ႉၸီႇယၢင်ႇႁႂ်ႈႁဝ်းလႆႈၶီႇႁိူဝ်းသၢင်းၽေႃးလႄႈ ၵႂႃႇၵႃႈတီႈမိူင်းဢီႉတလီႉသေယဝ်ႉ၊ ၶဝ်ဢဝ်ပေႃးလူႉဢိၵ်ႇတင်းၵူၼ်းတၢင်ႇတီႈဢၼ်ၶၢမ်ႇတူၵ်းၵိၼ်းယူႇၸိူဝ်းၼၼ်ႉ ဢၢပ်ႈပၼ်တီႈတပ်ႉမူး ဢၼ်လႆႈၸိုဝ်ႈယူႉလီႉ ဢၼ်ၸၢပ်ႈသႅင်ႇၵၼ်တင်း တပ်ႉဢေႃးၵုတ်ႉတူႉဢေႃႈ။- 2ႁဝ်းၶဝ်ႈၵႃႈၼႂ်းႁိူဝ်းသၢင်းၽေႃး ဢႃႇတြႃႇမုတ်ႉတီႉသေယဝ်ႉ ဢၢင်ႈတၵ်းလဵပ်ႈၸွမ်းၵႃႈတီႈႁိမ်းမိူင်းဢႃႇသီႉသေလႄႈ ပွႆႇႁိူဝ်းၵႂႃႇဢေႃႈ။ ဢႃႇရိတ်ႉတႃႇၶူႉ ၵူၼ်းဝဵင်းထိတ်ႉသႃႇလေႃးၼိၵ်ႈ မိူင်းမႃႇၵေႇတေႃးၼီႉၼၼ်ႉ ၵေႃႈပႃးလူၺ်ႈၵၼ်တင်းႁဝ်းဢေႃႈ။- 3ၼႂ်းဝၼ်းမိူဝ်ႈၽုၵ်ႈႁဝ်းသိူၵ်ႈၵႃႈတီႈဝဵင်းၸီႉတုမ်ႇသေယဝ်ႉ၊ ယူႉလီႉၼၼ်ႉႁဵတ်းၵျေးၸူးတီႈပေႃးလူႉလႄႈ ပၼ်ဢၶႂၢင်ႉဢၼ်မၼ်းလႆႈၵႂႃႇလဵၼ်ႈၵႃႈတီႈၵေႃႉသေႈမၼ်းတင်းလၢႆလႄႈ ၶၢမ်ႇတၢင်းဢၼ်ၶဝ်ၼၼ်ႉႁဵတ်းလဵင်ႉႁဵတ်းလူဢေႃႈ။- 4ႁဝ်းၸင်ႇသမ်ႉဢွၵ်ႇသေၵႃႈတီႈဝဵင်းၼၼ်ႉသေယဝ်ႉ၊ ပိူဝ်ႈဢၼ်လူမ်းမႃးဢမ်ႇထုၵ်ႇၼၼ်ႉ လဵပ်ႈၵႂႃႇၽၢႆႇတၢင်းၼိူဝ် ၵုၼ်ၵူႉပရူႉလႄႈ၊- 5ၶၢမ်ႈပၢင်ႇလၢႆႇဢၼ်ၸပ်းၵၼ်တင်းမိူင်းၵီႉလီႉၵီႉ တင်းမိူင်းပမ်ႇၽူႉလီႉၼၼ်ႉသေယဝ်ႉ၊ ႁွတ်ႈထိုင်ၵႃႈတီႈဝဵင်းမူႉရႃႇ မိူင်းလူႉၵီႉဢေႃႈ။- 6တပ်ႉမူးၸင်ႇထူပ်းႁိူဝ်းသၢင်းၽေႃး ဢႃႇလေႇၸၼ်ႇတရေႇ ဢၼ်တၵ်းၶၢမ်ႈၵႂႃႇၵႃႈတီႈမိူင်းဢီႉတလီႉၼၼ်ႉ ၵႃႈတီႈဝဵင်းၼၼ်ႉလႄႈ ဢဝ်ႁဝ်းသႂ်ႇၵႃႈၼႂ်းမၼ်းဢေႃႈ။- 7မိူဝ်ႈဢၼ်ၵႂႃႇလွႆးလွႆးလႄႈ သဵင်ႈၶိင်ႇဝၼ်းၼမ်ၼႃႇၼၼ်ႉၸိုင်၊ ႁဝ်းလႆႈၵျူဝ်းၸႃးယၢပ်ႇၼႃႇလူင်လၢင်လႄႈ ႁွတ်ႈထိုင်ၵႃႈတီႈဢၼ်သိုဝ်ႈၵၼ်တင်းဝဵင်းၵၼိတ်ႉသေယဝ်ႉ ပိူဝ်ႈဢၼ်လူမ်းမႃးဢမ်ႇထုၵ်ႇၼၼ်ႉ လဵပ်ႈၵုၼ်ၵရေႇတေႇ ၽၢႆႇတၢင်းဢၼ်လပ်ႉလူမ်းၵႃႈတီႈဢၼ် သိုဝ်ႈၵၼ်တင်းဝဵင်းသႃႇလမုၼ်ႇလႄႈ၊- 8ၵျူဝ်းၸႃးလဵပ်ႈၵႃႈတီႈၼၼ်ႈ ၵႂႃႇယၢပ်ႇၼႃႇလူင်လၢင်သေယဝ်ႉ၊ ႁွတ်ႈထိုင်ၵႃႈတီႈဢၼ် လႆႈႁွင်ႉၵႃလူႉလီႉမိၼ်ႇ ဢၼ်ၸမ်ၵၼ်တင်းဝဵင်းလႃႇသေးၼၼ်ႉဢေႃႈ။
9မိူဝ်ႈဢၼ်ၶိင်ႇၵႃႇလႃႉသဵင်ႈၼမ်ၼႃႇၸိုင်၊ ပေႃးလူႉထွၵ်ႈလူၺ်ႈလွင်ႈဢၼ် ၶိင်ႇၵႃႇလႃႉဢူႉတူႉဢၼ်ဢမ်ႇထုၵ်ႇလီၶၢမ်ႈပၢင်ႇလၢႆႇ ၵွပ်ႈပိူဝ်ႈဢၼ်ပူၼ်ႉသေမိုဝ်ႉဝၼ်းဢၼ်လႆႈၵမ်တၢင်းၵိၼ်ၼၼ်ႉမႃးၼၼ်ႉလႄႈ ပၼ်သတီႉလႄႈဝႃႈ၊- 10ၵူၼ်းတင်းလၢႆၶဝ်ဢိူၺ်း၊ ပေႃးၶၢမ်ႈပၢင်ႇလၢႆႇတေႃႈလဵဝ်ၼႆႉၸိုင်၊ ၵဝ်ႁူႉႁၼ်လွင်ႈဢၼ်ႁိူဝ်းသၢင်းၽေႃးဢိၵ်ႇတင်းဢုၵ်ႉၸႃႇၶူဝ်းလဵင်းၵူၺ်းဢမ်ႇၵႃး လွင်ႈဢၼ်ဢသၢၵ်ႈႁဝ်းတၵ်းႁွတ်ႈထိုင် တၢင်းဢၼ်လူႉဢၼ်သုမ်းၼၼ်ႉယူႇဢေႃႈ၊ ဝႃႈၼင်ႇၼႆဢေႃႈ။- 11ၼႂ်းဝႃႈၼၼ်သေၵေႃႈ တပ်ႉမူးၼၼ်ႉထွမ်ႇဢဝ်ၵႂၢမ်းၵူၼ်းမေႃၶတ်းႁၢင်ႁိူဝ်း ဢိၵ်ႇတင်းၵႄႇႁိူဝ်းသၢင်းၽေႃးၼႃႇသေၵႂၢမ်း ဢၼ်ပေႃးလူႉ လၢတ်ႈဝႃႈၼၼ်ႉဢေႃႈ။- 12ပိူဝ်ႈဢၼ်ဢမ်ႇလီယူႇၵႃႈတီႈဝဵင်းၼၼ်ႉၶိင်ႇၵတ်းလႄႈ ၵူၼ်းၼမ်ၼႃႇလၢတ်ႈလႄႈဝႃႈ၊ ပေႃးၶီႇႁိူဝ်းသၢင်းၽေႃးၵႂႃႇၵမ်းၼိုင်ႈလႄႈ ၶိုတ်းထိုင်ၵႃႈတီႈတိုဝ်ႉတႃႈ ဝဵင်းၽီႉၼိတ်ႉပုၼ်ႉလႆႈၸိုင် တၢင်းဢၼ်ႁႂ်ႈပူၼ်ႉၶိင်ႇၵတ်းၵႃႈတီႈတိုဝ်ႉတႃႈၼၼ်ႉယဵင်ႈၶႅၼ်းတၵ်းလီဢေႃႈ၊ ဝႃႈၼင်ႇၼႆဢေႃႈ၊ တိုဝ်ႉတႃႈၽီႉၼိတ်ႉၼၼ်ႉၸမ်ႉ၊ မီးၵႃႈတီႈၵုၼ်ၵရေႇတေႇဢေႃႈ။ ဝၢႆႇၼႃႈတေႃႇၽၢႆႇဝၼ်းတူၵ်းၸဵင်ႇၼိူဝ် တင်းၽၢႆႇဝၼ်းတူၵ်းၸဵင်ႇတႂ်ႈယူႇဢေႃႈ။
လွင်ႈလူမ်းၽိဝ်ႁုင်ၵႃႈၼႂ်းပၢင်ႇလၢႆႇ
13မိူဝ်ႈဢၼ်လူမ်းတၢင်းၸၢၼ်းထူဝ်းမႃးလွႆးလွႆးယူႇၼၼ်ႉၸိုင်၊ ၶဝ်မီးတင်းၸႂ်ဢၼ်ထၢင်ႇတၵ်းၶိုတ်းထိုင်လႆႈ တေႃႈလဵဝ်ၼႆႉၼၼ်ႉယူႇသေလႄႈ တိုတ်ႉထွၼ်ၵျွၵ်ႈသူးဢွၵ်ႇသေယဝ်ႉ လဵပ်ႈၵႃႈတီႈႁိမ်းၵုၼ်ၵရေႇတေႇၵႂႃႇဢေႃႈ။- 14ဢမ်ႇပေႃးႁိုင်လူမ်းၽိဝ်ႇႁုင်ဢၼ်လႆႈၸိုဝ်ႈ ဢူႉရွၵ်ႈလူႉတုင်ႇၼၼ်ႉ မႃးပတ်ႉဢဝ်ႁိူဝ်းသၢင်းၽေႃး၊- 15ၵႂႃႇၵမ်းလဵဝ်လႄႈ ပိူဝ်ႈဢၼ်ႁိူဝ်းသၢင်းၽေႃးၼၼ်ႉ ဢမ်ႇၶၢမ်ႇလူမ်းလႆႈ၊ ႁဝ်းၵေႃႈႁႅင်းဢူၼ်ႈလႄႈ ပႃးၸွမ်းၵႂႃႇၽၢႆႇဢၼ်လူမ်းထူဝ်းၼၼ်ႉဢေႃႈ။- 16ၼႂ်းမိူဝ်ႈဢၼ်ယင်းတိုၵ်ႉလႅၼ်ႈၵႂႃႇၽၢႆႇတၢင်းဢၼ်လပ်ႉလူမ်း တီႈၵုၼ်ဢွၼ်ႇၵလေႃးတေႇ ယူႇၼၼ်ႉၸိုင်၊ ႁဝ်းလႆႈၵျူဝ်းၸႃးယၢပ်ႇၼႃႇလူင်လၢင် ႁႂ်ႈႁိူဝ်းဢွၼ်ႇဢမ်ႇလႆႈလူႉလႆႈလႅဝ်လႄႈ၊- 17ဢဝ်တၢင်ႇၵႃႈၼိူဝ်ႁိူဝ်းသၢင်းၽေႃးသေယဝ်ႉ၊ ဢဝ်ၸိူၵ်ႈဢၼ်တၵ်းၸွႆႈၵမ်ႉၸွႆႈထွၵ်ႈၸိူဝ်းၼၼ်ႉ မတ်ႉၶဵၼ်းႁႂ်ႈႁိူဝ်းသၢင်းၽေႃးမၼ်ႈၶိူင်ႇဢေႃႈ။ ပိူဝ်ႈဢၼ်ၵူဝ်တၵ်းတၢင်ႇၵႃႈၼိူဝ်ႁၢတ်ႇသၢႆးသိုဝ်ႇတီႉၼၼ်ႉလႄႈ သိမ်းဢဝ်လၢင်းယၢၼ်းသေယဝ်ႉ၊ ပႃးၸွမ်းၵႂႃႇၽၢႆႇဢၼ်လူမ်းထူဝ်းၼၼ်ႉယူႇဢေႃႈ။
18ပိူဝ်ႈဢၼ်ႁဝ်းလႆႈၶၢမ်ႇတၢင်းဢၼ်ၽူၼ်လူင်လူမ်းလူင် ပတ်ႉထူဝ်းသၼ်ႇၶွၼ်းၼႃႇလူင်လၢင်ၼၼ်ႉလႄႈ၊ ဝၼ်းမိူဝ်ႈၽုၵ်ႈႁဝ်းဢဝ်ဢုၵ်ႉၸႃႇၶူဝ်းလဵင်းဢွၵ်ႇပႅတ်ႈဢေႃႈ။- 19ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ႁဝ်းဢဝ်တင်းမိုဝ်းတူဝ်ၸဝ်ႈၵဝ်ႇယိပ်းဢဝ်ၶိူင်ႈႁိူဝ်းသၢင်းၽေႃးထိမ်ႈပႅတ်ႈဢေႃႈ။- 20ပိူဝ်ႈဢၼ်ဢမ်ႇလႆႈႁၼ်ၵၢင်ဝၼ်းတင်းလၢဝ်ႁိုင်ၼႃႇလႄႈ ၽူၼ်လူင်လူမ်းလူင်ယင်းတိုၵ်ႉႁႅင်းယႂ်ႇၼႃႇယူႇၼၼ်ႉ တီႈမုင်ႈထႃႈမွင်းထႃႈလွင်ႈဢၼ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢမ်ႇမီးလႃးလႃး။
21ၶဝ်ဢမ်ႇၵိၼ်တၢင်းၵိၼ်တၢင်းၶူပ်းယူႇႁိုင်ၼႃႇသေယဝ်ႉ၊ ပေႃးလူႉလုၵ်ႉၸုၵ်း ၵႃႈၼႂ်းၶိုင်ႈၵၢင်ၶဝ်သေလႄႈလၢတ်ႈဝႃႈ၊ ၵူၼ်းႁဝ်းၸိူဝ်းၼႆႉဢိူၺ်း၊ သင်သူထွမ်ႇဢဝ်ၵႂၢမ်းၵဝ်လႄႈ ဢမ်ႇလုၵ်ႉသေၵႃႈတီႈၵုၼ်ၵရေႇတေႇပုၼ်ႉ ၶီႇႁိူဝ်းသၢင်းၽေႃးမႃးၸိုင်၊ တၵ်းလႆႈၵၢင်းလွတ်ႈတင်းတၢင်းဢၼ်လူႉဢၼ်သုမ်းၼႆႉဢေႃႈ။- 22တေႃႈလဵဝ်ၼႆႉ ၵဝ်တိုၵ်းယူင်းၸူဝ်းဢဝ် ႁႂ်ႈၸႂ်သူမီးတၢင်းဢၼ်သၢၵ်ႈသႃႇဢေႃႈ။ လွင်ႈမၼ်းၸမ်ႉ လိူဝ်သေတၢင်းဢၼ်ႁိူဝ်းသၢင်းၽေႃးၼႆႉသုမ်းၵူၺ်း၊ ၼႂ်းသူၽူႈလႂ်ဢမ်ႇလႆႈသုမ်းဢသၢၵ်ႈသေၵေႃႉသေၵူၼ်း။- 23ႁဵတ်းႁိုဝ်လႄႈဝႃႈၸိူဝ်ႉၼင်ႇၼႆၸမ်ႉ၊ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ ဢၼ်ဢုပ်ႉပိူင်ႇၵဝ်ဢၼ်ၵဝ်ၵူဝ်းၵႂၢႆႇၼၼ်ႉ ပေႃႇမႃးၵႃႈတီႈႁိမ်းၵဝ်ၶမ်ႈၼႆႉလႄႈ၊- 24လၢတ်ႈဝႃႈ၊ ပေႃးလူႉဢိူၺ်း၊ မႂ်းယႃႇပေမႆႈၸႂ်၊ မႂ်းတၵ်းလႆႈႁွတ်ႈထိုင်ၵႃႈတီႈၽၢႆႇၼႃႈ ၶုၼ်ႁေႃၶမ်းၵေႇသႃႇဢေႃႈ။ ၽြႃးပဵၼ်ၸဝ်ႈဢဝ်ၵူၼ်းဢၼ်ၶၢမ်ႈပၢင်ႇလၢႆႇလူၺ်ႈၵၼ်တင်းမႂ်း တင်းသဵင်ႈတင်းလူင်ၸိူဝ်းၼႆႉဢၢပ်ႈပၼ်တီႈမႂ်းယဝ်ႉ၊ ဝႃႈၼင်ႇၼႆဢေႃႈ။- 25ပိူဝ်ႈၼႆလႄႈၵူၼ်းႁဝ်းၸိူဝ်းၼႆႉဢိူၺ်း၊ ႁႂ်ႈမီးတၢင်းဢၼ်သၢၵ်ႈသႃႇတႃႉ၊ ၵဝ်ဢိင်ပိုင်ႈၽြႃးပဵၼ်ၸဝ်ႈသေလႄႈ မီးတၢင်းဢၼ်ယုမ်ႇမၢတ်ႈလွင်ႈဢၼ် တၵ်းပဵၼ်ၵႃႈၼင်ႇဢၼ်မၼ်းၸဝ်ႈ လၢတ်ႈဝႆႉတီႈၵဝ်ၼၼ်ႉဢေႃႈ။- 26ၼႂ်းဝႃႈၼၼ်သေၵေႃႈ ႁိူဝ်းသၢင်းၽေႃးၼႆႉၸိုင် တၵ်းလႆႈလူႉလႆႈလႅဝ်ၵႃႈၼိူဝ်ၵုၼ်သေၵုၼ်ၵုၼ်ဢေႃႈ၊ ဝႃႈၼင်ႇၼႆဢေႃႈ။
27ၶမ်ႈဢၼ်ထူၼ်ႈထိုင်သိပ်းသီႇဝၼ်းၼၼ်ႉ ၼႂ်းမိူဝ်ႈဢၼ်ႁဝ်းၵႂႃႇၵႂႃႇၶိုၼ်းၶိုၼ်း ၵႃႈၼႂ်းပၢင်ႇလၢႆႇ ဢႃႇတြီႉယူႇၼၼ်ႉၸိုင်၊ ၵူၼ်းႁိူဝ်းသၢင်းၽေႃးၸိူဝ်းၼၼ်ႉ ထၢင်ႇႁဝ်းၸမ်တၵ်းႁွတ်ႈထိုင်ၵႃႈတီႈႁိမ်းၽင်ႇသေတီႈတီႈလႄႈ၊- 28ယင်ႇတူၺ်းၼမ်ႉလႄႈ ထူပ်းႁၼ်မီးသၢဝ်းဝႃးဢေႃႈ။ ပူၼ်ႉၵႂႃႇဢိတ်းၼိုင်ႈယဝ်ႉၸင်ႇ သမ်ႉယင်ႇတူၺ်းၼမ်ႉထႅင်ႈၵမ်းၼိုင်ႈလႄႈ ထူပ်းႁၼ်မီးသိပ်းႁႃႈဝႃးဢေႃႈ။- 29ပိူဝ်ႈဢၼ်ၵူဝ်တၵ်းတုမ်ႉတွၵ်ႈမႅၼ်ႈမၢၵ်ႇႁိၼ်လႄႈ ၶျႃးၵျွၵ်ႈသူးသီႇမၢၵ်ႈတူၵ်းၵႃႈတီႈႁၢင်ႁိူဝ်းသၢင်းၽေႃးသေလႄႈ မွင်းႁႂ်ႈမိူင်းလႅင်းဢေႃႈ။- 30ၼႂ်းမိူဝ်ႈဢၼ်ၵူၼ်းႁိူဝ်းသၢင်းၽေႃးၸိူဝ်းၼၼ်ႉ ၵျၢမ်ႇငႃတၵ်းပႅတ်ႈဝႆႉႁိူဝ်းသၢင်းၽေႃးလႄႈ ႁဵတ်းၵဵင်ႈၼင်ႇႁၢင်ႈတၵ်းၶျႃးၵျွၵ်ႈသူးတူၵ်းၵႃႈတီႈ ႁူဝ်ႁိူဝ်းသၢင်းၽေႃးသေယဝ်ႉ ၶျႃးႁိူဝ်းဢွၼ်ႇတူၵ်းၵႃႈၼႂ်းပၢင်ႇလၢႆႇၼၼ်ႉၸိုင်၊- 31ပေႃးလူႉလၢတ်ႈတီႈတပ်ႉမူး ဢိၵ်ႇတင်းၵူၼ်းသိုၵ်းၸိူဝ်းၼၼ်ႉလႄႈဝႃႈ၊ ပေႃးၵူၼ်းၸိူဝ်းၼႆႉဢမ်ႇယူႇၵႃႈၼိူဝ်ႁိူဝ်းသၢင်းၽေႃးၸိုင် သူဢမ်ႇၵတ်းယဵၼ်ၶျၢမ်းသႃႇလႆႈၵူၺ်ႉ၊ ဝႃႈၼင်ႇၼႆဢေႃႈ။- 32မိူဝ်ႈၼၼ်ႉ ၵူၼ်းသိုၵ်းၸိူဝ်းၼၼ်ႉ ၽၼ်းၸိူၵ်ႈႁိူဝ်းဢွၼ်ႇၼၼ်ႉတူၵ်းပႅတ်ႈသေဢေႃႈ။
33မိူဝ်ႈဢၼ်မိူင်းၸမ်တၵ်းလႅင်းၼၼ်ႉၸိုင် ပေႃးလူႉတိုၵ်းယူင်းၸူဝ်းဢဝ် ၵူၼ်းတင်းသဵင်ႈတင်းလူင်ႁႂ်ႈၵိၼ်တၢင်းၵိၼ်တၢင်းၶူပ်းလႄႈဝႃႈ၊ ဝၼ်းမိူဝ်ႈၼႆႉ ပဵၼ်ဝၼ်းဢၼ်ထူၼ်ႈထိုင်သိပ်းသီႇဝၼ်း ဢၼ်သူမုင်ႈထႃႈမွင်းထႃႈလႄႈ ယင်းဢမ်ႇၵိၼ်တၢင်းၵိၼ်တၢင်းၶူပ်းလႄႈဢိုပ်းယူႇၼၼ်ႉဢေႃႈ။- 34ပိူဝ်ႈၼႆလႄႈ ၵဝ်တိုၵ်းယူင်းၸူဝ်းဢဝ်ႁႂ်ႈသူၵိၼ်ဢေႃႈ။ ပေႃးသူၵိၼ်ၸိုင်၊ တၵ်းပဵၼ်လွင်ႈတၢင်းဢၼ်သူတၵ်းလႆႈၵတ်းယဵၼ်ၶျၢမ်းသႃႇဢေႃႈ။ ၶူၼ်ႁူဝ်သူတၵ်းဢမ်ႇလႆႈလူႉလႆႈလႅဝ်သေသဵၼ်ႈ၊ ဝႃႈၼင်ႇၼႆသေယဝ်ႉ၊- 35မၼ်းဢဝ်ၶဝ်ႈမုၼ်းလႄႈ ယွင်ႈယေႃးၵျေးၸူးၽြႃးပဵၼ်ၸဝ်ႈ ၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင် ၸိူဝ်းၼၼ်ႉယဝ်ႉၸင်ႇ ဝိတ်းၶဝ်ႈမုၼ်းလႄႈၵိၼ်ဢေႃႈ။- 36ၶဝ်တင်းသဵင်ႈတင်းလူင်ၸိူဝ်းၼၼ်ႉၵေႃႈ မီးတၢင်းဢၼ်သၢၵ်ႈသႃႇမႃးလႄႈ ၵိၼ်တၢင်းၵိၼ်တၢင်းၶူပ်းဢေႃႈ။
37ႁဝ်းၵႃႈဢၼ်ပႃးၵႃႈၼႂ်းႁိူဝ်းသၢင်းၽေႃးၼၼ်ႉ ၼပ်ႉဢၢၼ်ႇမီးသွင်ပၢၵ်ႇၸဵတ်းသိပ်းပၢႆႁူၵ်းၵေႃႉဢေႃႈ။- 38ၶဝ်ၵိၼ်ဢိမ်ႇၵိၼ်တဵမ်သေယဝ်ႉ၊ ဢဝ်ၶဝ်ႈသၢၼ်ၶဝ်ႈပိူၵ်ႇထိမ်ႈတူၵ်းပႅတ်ႈၵႃႈၼႂ်းပၢင်ႇလၢႆႇလႄႈ ႁႂ်ႈႁိူဝ်းသၢင်းၽေႃးမဝ်မႃးဢေႃႈ။
ႁိူဝ်းသၢင်းၽေႃးလူႉလႅဝ်ၵႂႃႇ
39မိူဝ်ႈဢၼ်မိူင်းလႅင်းမႃးၼၼ်ႉၸိုင်၊ ပိၵ်ႉသမ်ႉဢမ်ႇႁူႉတီႈၼၼ်ႈသေၵေႃႈ၊ ၶဝ်ႁၼ်ၸဵင်ႇၵူတ်ႉၼမ်ႉပၢင်ႇလၢႆႇဢၼ်ၼိုင်ႈ ဢၼ်မီးၽင်ႇႁၢတ်ႇသၢႆးဝႆႉလႄႈ မီးတၢင်းၵျၢမ်ႇတၢင်းပွင်ပေႃးဢဝ်ႁိူဝ်းသၢင်းၽေႃးၶဝ်ႈလႆႈၸိုင်၊ တၵ်းဢဝ်ၶဝ်ႈတၢင်ႇၵႃႈၼိူဝ်ၽင်ႇၼၼ်ႉဢေႃႈ။- 40ၶဝ်တႅပ်းပႅတ်ႈၵျွၵ်ႈသူးၸိူဝ်းၼၼ်ႉလႄႈ ႁႂ်ႈၵိုတ်းပႅတ်ႈဝႆႉၵႃႈၼႂ်းပၢင်ႇလၢႆႇသေယဝ်ႉ၊ ၵႄႈၸိူၵ်ႈဢၼ်မတ်ႉႁွႆႈမႆႉလၢမ်ႈဢၼ်ၶတ်းႁၢင်ၼၼ်ႉသေလႄႈ ၵီႈၽုၺ်ႇလၢင်းယၢၼ်းထွင်ႇလူမ်းၵႂႃႇၸူးၵႃႈတီႈၽင်ႇဢေႃႈ။- 41ႁွတ်ႈထိုင်ၵႃႈတီႈဢၼ်ၼမ်ႉသွင်ၽၢႆႇၸပ်းၵၼ်ၼၼ်ႉသေယဝ်ႉ ႁႂ်ႈႁိူဝ်းသၢင်းၽေႃးတၢင်ႇၵႃႈၼိူဝ်ႁၢတ်ႇသၢႆးသေဢေႃႈ၊ ႁူဝ်မၼ်းယင်းဢမ်ႇတူင်ႉဢမ်ႇၼိုင်လႆႈယူႇသေလႄႈ၊ ပိူဝ်ႈဢၼ်လႅင်းၼမ်ႉပိူပ်ႈၼမ်ႉထိပ်ႇၽၢင်ႈၼႃႇၼၼ်ႉ၊ ႁၢင်မၼ်းႁၵ်းၵႂႃႇဢေႃႈ။- 42မိူဝ်ႈၼၼ်ႉၵူၼ်းသိုၵ်းၸိူဝ်းၼၼ်ႉ ပိူဝ်ႈဢၼ်ၵူဝ်ၶဝ်ၸိူဝ်းဢၼ် ၶၢမ်ႇတူၵ်းၵိၼ်းယူႇၼၼ်ႉ တၵ်းလုၺ်းဢွၵ်ႇပၢႆႈၵႂႃႇလႄႈ မီးတၢင်းၵျၢမ်ႇတၢင်းပွင်တၵ်းဢဝ်ၶဝ်တၢႆဢေႃႈ။- 43တပ်ႉမူးၼၼ်ႉပိူဝ်ႈဢၼ်ၶႂ်ႈႁႂ်ႈပေႃးလူႉၵတ်းယဵၼ်ၶျၢမ်းသႃႇလႄႈ ႁႄႉၶႅၼ်တၢင်းၵျၢမ်ႇတၢင်းပွင်ၵူၼ်းသိုၵ်းၸိူဝ်းၼၼ်ႉလႄႈ ၸီႇယၢင်ႇႁႂ်ႈၶဝ် ဢၼ်လုၺ်းၼမ်ႉလႆႈၼၼ်ႉ လူင်းဢွၼ်တၢင်းလႄႈ ၵႂႃႇၵႃႈတီႈၼိူဝ်ၵုင်း၊- 44ဢိၵ်ႇတင်းႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉ ၶီႇပႅၼ်ႈလႂ် ၶိူင်ႈႁိူဝ်းသၢင်းၽေႃးလႂ်ၵႂႃႇဢေႃႈ။ ၼင်ႇၼၼ်လႄႈ ၶဝ်တင်းသဵင်ႈတင်းလူင်ၸိူဝ်းၼၼ်ႉ ၵၢင်းလွတ်ႈတင်းၽေးလႄႈ ႁွတ်ႈထိုင်ၵႃႈၼိူဝ်ၵုင်းဢေႃႈ။
Currently Selected:
တမၢၼ်ႇၸဝ်ႈ 27: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
