တမၢၼ်ႇၸဝ်ႈ 16
16
တီႉမေႃးသေႇၵႂႃႇၸွမ်းတမၢၼ်ႇၸဝ်ႈပေႃးလူႉတင်းသီႇလႃႉ
1လိုၼ်းၼၼ်ႉပေႃးလူႉလူင်းမႃးၵႃႈတီႈဝဵင်းတေႇရပေႇ တင်းဝဵင်းလုတ်ႉတရႃႉဢေႃႈ။ ၵႃႈတီႈၼၼ်ႈ မီးတပႄးၸဝ်ႈဢၼ်လႆႈၸိုဝ်ႈတီႉမေႃးသေႇ ၵေႃႉၼိုင်ႈဢေႃႈ။ မႄႈမၼ်းၸမ်ႉ ပဵၼ်မႄႈယိင်းယူႉတႃႉ ဢၼ်ယုမ်ႇမၢတ်ႈဢေႃႈ။ ပေႃႈမၼ်းၸမ်ႉပဵၼ်ၵူၼ်းႁေႇလသႃႉဢေႃႈ။- 2မၼ်းၼၼ်ႉပဵၼ်ၵူၼ်းဢၼ်မီးသရေႇၵႃႈတီႈပီႈၼွင်ႉဢၼ်မီးယူႇၵႃႈၼႂ်းဝဵင်းလုတ်ႉတရႃႉ တင်းဝဵင်းဢီႉၵေႃးၼီႉၸိူဝ်းၼၼ်ႉဢေႃႈ။- 3ပေႃးလူႉ မီးဢလူဝ်ႇ ၶႂ်ႈႁွင်ႉဢဝ်မၼ်းၼၼ်ႉၸွမ်းၵႂႃႇလႄႈ ဢဝ်မၼ်းပၼ်တၢင်းဢၼ်ထိူဝ်ႁိမ်း ၵွပ်ႈပိူဝ်ႈၵူၼ်းယူႉတႃႉၸိူဝ်းဢၼ် မီးယူႇၵႃႈၼႂ်းတီႈၼၼ်ႈဢေႃႈ။ လွင်ႈမၼ်းၸမ်ႉ ၶဝ်တင်းသဵင်ႈတင်းလူင်ႁူႉလွင်ႈဢၼ်ပေႃႈမၼ်းပဵၼ်ၵူၼ်းႁေႇလသႃႉဢေႃႈ။
4ၼႂ်းမိူဝ်ႈဢၼ်ၶဝ်လႄႇၵႂႃႇၵႃႈတီႈဝဵင်းၸိူဝ်းၼၼ်ႉယူႇၼၼ်ႉၸိုင်၊ ၶဝ်ဢဝ်ပိင်းၺၢပ်ႈဢၼ်တမၢၼ်ႇၸဝ်ႈ ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈ ဢၼ်မီးယူႇၵႃႈၼႂ်းဝဵင်းယေႇရူႉသလႅမ်ႇၸိူဝ်းၼၼ်ႉၸီႇယၢင်ႇဝႆႉၼၼ်ႉ ဢၢပ်ႈပၼ်ပုၼ်ႈဢၼ်တၵ်းႁႂ်ႈၸိူဝ်းၸဝ်ႈတင်းလၢႆၵမ်ၵျၢင်ႉဢေႃႈ။- 5ပိူဝ်ႈၼႆလႄႈၸိူဝ်းၸဝ်ႈတင်းလၢႆၼၼ်ႉမၼ်ႈၶိူင်ႇၵႃႈၼႂ်းတၢင်းဢၼ်ယုမ်ႇမၢတ်ႈလႄႈ ဝၼ်းၼိုင်ႈထႅင်ႈဝၼ်းၼိုင်ႈ တၢင်းဢၼ်ၼပ်ႉဢၼ်ဢၢၼ်ႇၼၼ်ႉၼမ်မႃးၵိုၼ်းမႃးယူႇဢေႃႈ။
တမၢၼ်ႇၸဝ်ႈပေႃးလူႉလႆႈပျႃႇတိၵ်ႈၼႂ်းဝဵင်းတရေႃး
6ၶဝ်လႄႇၵႂႃႇ ၵႃႈၼႂ်းမိူင်းၽႃႇရူႉၵီႉ တင်းမိူင်းၵလႃႇတီႉသေယဝ်ႉ ပိူဝ်ႈဢၼ်ဝီႉၺိၺ်ႇဢၼ်မူတ်းၸၢင်ႇၸဝ်ႈႁႄႉၶႅၼ်ဢမ်ႇႁႂ်ႈၶဝ်လႆႈႁေႃးလၢတ်ႈၼုၵ်ႈၵပၢတ်ႈတြႃးၵႃႈၼႂ်းမိူင်းဢႃႇသီႉၼၼ်ႉလႄႈ၊- 7ၼႂ်းမိူဝ်ႈဢၼ်ၶဝ်ႁွတ်ႈထိုင် ၵႃႈတီႈမိူင်းမူႉသီႉလႄႈ ဢၢင်ႈတၵ်းၵႂႃႇၵႃႈတီႈမိူင်းပီႉသူႉၼီႉၼၼ်ႉၸိုင် ပိူဝ်ႈဢၼ် ဝီႉၺိၺ်ႇၸဝ်ႈယေႇသူႉဢမ်ႇပၼ်ဢၶႂၢင်ႉလႄႈ၊- 8ဝႄႈပႅတ်ႈ မိူင်းမူႉသီႉ လူင်းၵႂႃႇၵႃႈတီႈဝဵင်းတရေႃးဢေႃႈ။
9ၶိင်ႇၵၢင်ၶိုၼ်းပေႃးလူႉ လႆႈႁၼ်ပျႃႇတိၵ်ႈရူႇပႃႇရူင်ႇၸမ်ႉ ၵူၼ်းမႃႇၵေႇတေႃးၼီႉၵေႃႉၼိုင်ႈၸုၵ်းယူႇသေလႄႈတွင်းပၢၼ်ႇလႄႈဝႃႈ ၶၢမ်ႈၵႂႃႇၵႃႈတီႈမိူင်းမႃႇၵေႇတေႃးၼီႉပုၼ်ႉသေၵမ်း။ ၸွႆႈထႅမ်ႁဝ်းသေၵမ်း၊ ဝႃႈၼင်ႇၼႆဢေႃႈ။- 10မိူဝ်ႈဢၼ်မၼ်းလႆႈႁၼ်ပျႃႇတိၵ်ႈရူႇပႃႇရူင်ႇၼၼ်ႉၸိုင် ပိူဝ်ႈဢၼ်ႁဝ်းတူၵ်းၵၢင်ၸႂ် လွင်ႈဢၼ်ၸဝ်ႈၽြႃးႁွင်ႉႁဝ်းႁႂ်ႈလႆႈႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈ ၵႃႈၼႂ်းမိူင်းမႃႇၵေႇတေႃးၼီႉၼၼ်ႉလႄႈ ႁဝ်းၵျၢမ်ႇႁႃႁႂ်ႈလႆႈၵႂႃႇၵႃႈတီႈမိူင်းၼၼ်ႉၵမ်းလဵဝ်ဢေႃႈ။
လူႉတီႉလႆႈယုမ်ႇမၢတ်ႈၼႂ်းဝဵင်းၽီႉလိပ်ႉပီႉ
11ပိူဝ်ႈၼႆလႄႈ ႁဝ်းၸင်ႇလုၵ်ႉသေၵႃႈတီႈ ဝဵင်းတရေႃးၼၼ်ႉ ၶီႇႁိူဝ်းသၢင်းၽေႃးၵႂႃႇသိုဝ်ႈသိုဝ်ႈၸူးၵႃႈတီႈ ၵုၼ်သမေႃးထရိတ်ႉလႄႈ ၼႂ်းဝၼ်းမိူဝ်ႈၽုၵ်ႈ ႁွတ်ႈထိုင်ၵႃႈတီႈဝဵင်းၼႃႇပေႃးလီႉဢေႃႈ။- 12သမ်ႉဢွၵ်ႇသေၵႃႈတီႈဝဵင်းၼၼ်ႉ ႁွတ်ႈထိုင်ၵႃႈတီႈဝဵင်းၽီႉလိပ်ႉပီႉ ဢၼ်ဢုပ်ႉပိူင်ႇမိူင်းမႃႇၵေႇတေႃးၼီႉ ပွတ်းၼိုင်ႈ ဢၼ်ပဵၼ်ဝဵင်းဢၼ်ၵူၼ်းတၢင်ႇဝၢၼ်ႈတၢင်ႇမိူင်း တႄႇဝႆႉမိူဝ်ႈၼၼ်ၼၼ်ႉလႄႈ ယူႇၵႃႈတီႈဝဵင်းၼၼ်ႉႁိုင်တၢၼ်ႇတၢၼ်ႇဢေႃႈ။
13ဝၼ်းၵမ်သိၼ်ႁဝ်းဢွၵ်ႇၵႃႈၼွၵ်ႈၽၵ်းတူဝဵင်း ၵႂႃႇၵႃႈတီႈႁိမ်းၽင်ႇၼမ်ႉႁွင်ႈ တီႈဢၼ်ယၢမ်ႈမီးၸရွပ်ႈသူးတွင်းပထၼႃႇၼၼ်ႉသေယဝ်ႉ ၼင်ႈလႄႈႁေႃးလၢတ်ႈ တီႈမႄႈယိင်းဢၼ်ၸူႉၵၼ်တုမ်ၵၼ်ယူႇၸိူဝ်းၼၼ်ႉဢေႃႈ။
14မိူဝ်ႈၼၼ်ႉမႄႈယိင်း ဢၼ်လႆႈၸိုဝ်ႈလူႉတီႉ ဢၼ်ပဵၼ်ၵူၼ်းဝဵင်းသႂႃႇတီႉရေႇလႄႈ ၶၢႆၶူဝ်းလဵင်းဢၼ်လႅင်ၶွင်ႇဢၼ်ပဵၼ်ၵေႃႉဢၼ် ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၵေႃႉၼိုင်ႈ ထွမ်ႇငိၼ်းတြႃးယူႇလႄႈ ၸဝ်ႈၽြႃးၽုၺ်ႇႁူဝ်ၸႂ်မၼ်း ႁႂ်ႈမၼ်းဢိင်ပိုင်ႈႁပ်ႉတုင်းဢဝ် လွင်ႈတၢင်းဢၼ်ပေႃးလူႉႁေႃးလၢတ်ႈၼၼ်ႉဢေႃႈ။- 15မၼ်းၼၼ်ႉဢိၵ်ႇတင်းၵူၼ်းႁိူၼ်းၵူၼ်းယေးမၼ်း ၶၢမ်ႇပပ်ႉတီႉၸမ်ႇသေယဝ်ႉ တွင်းပၢၼ်ႇလႄႈဝႃႈ၊ ပေႃးသူၸဝ်ႈထၢင်ႇၵဝ်ၶႃႈယုမ်ႇမၢတ်ႈတီႈၸဝ်ႈၽြႃးဢမၢၼ်ႇၶၼ်ပဵၼ်ၸိုင် ၶဝ်ႈယူႇၵႃႈၼႂ်းႁိူၼ်းၵဝ်ၶႃႈသေၵမ်းၶႃႈ၊ ဝႃႈၼင်ႇၼႆလႄႈၸူဝ်းဢဝ်ႁဝ်းႁႂ်ႈလႆႈဢေႃႈ။
လႆႈတူၵ်းထွင်ႇၼႂ်းဝဵင်းၽီႉလိပ်ႉပီႉ
16လိုၼ်းၼၼ်ႉ ၼႂ်းမိူဝ်ႈဢၼ်ႁဝ်းၵႂႃႇၵႃႈတီႈၸရွပ်ႈသူးတွင်းပထၼႃႇယူႇၼၼ်ႉၸိုင် မႄႈယိင်းဢွၼ်ႇဢၼ်ၽီၶဝ်ႈလႄႈ ၸၢင်ႈႁေႃးလၢတ်ႈၵႂၢမ်း ဢၼႃႇၵၢတ်ႈဢၼ်ႁႂ်ႈၸဝ်ႈမၼ်းတင်းလၢႆ ပဵၼ်တိုၼ်းပဵၼ်ႁွၼ်းၼမ်ၼႃႇၼၼ်ႉၵေႃႉၼိုင်ႈ ႁႄႉႁပ်ႉႁူဝ်တၢင်းႁဝ်းဢေႃႈ။- 17မၼ်းၼၼ်ႉၸွမ်းပႃႈလင်ပေႃးလူႉ တင်းႁဝ်းသေလႄႈ ႁွင်ႉသႅၼ်ႇလႄႈဝႃႈ ၵူၼ်းၸိူဝ်းၼႆႉၸမ်ႉပဵၼ်ၶႃႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉလႄႈ ႁေႃးလၢတ်ႈသဵၼ်ႈတၢင်းတြႃးတၢင်းဢၼ်ၵႄႇၶျွတ်ႈဢဝ်တီႈႁဝ်းဢေႃႈ၊ ဝႃႈၼင်ႇၼႆဢေႃႈ။- 18ပိူဝ်ႈဢၼ်မၼ်းသမ်ႉၶိုၼ်းႁဵတ်းၸိူဝ်ႉၼင်ႇၼၼ်ဝၼ်းၼမ်ၼႃႇလႄႈပေႃးလူႉမီးၸႂ်ဢၼ်မႆႈၸႂ်ၵွပ်ႈယူႇသေလႄႈ ဝၢႆႇၼႃႈတူၺ်းလႄႈ လၢတ်ႈတီႈၽီၼၼ်ႉလႄႈဝႃႈ မႂ်းၼႆႉဢွၵ်ႇသေၵႃႈၼႂ်းမၼ်းၵႂႃႇတႃႉ။ ၵဝ်ဢိင်ပိုင်ႈၼႃႇမႃႉၸိုဝ်ႈသဵင်ၸဝ်ႈယေႇသူႉၶရိၸ်ႈလႄႈ မီးဢမိင်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်ၽီၼၼ်ႉဢွၵ်ႇၵႂႃႇသေၵမ်းလဵဝ်ဢေႃႈ။
19ၸဝ်ႈမၼ်းတင်းလၢႆၼၼ်ႉ မိူဝ်ႈဢၼ်ႁူႉႁၼ် လွင်ႈဢၼ်တီႈမုင်ႈထႃႈမွင်းထႃႈပုၼ်ႈဢၼ်တၵ်းပဵၼ်တိုၼ်းပဵၼ်ႁွၼ်းၵမ်းလိုၼ်းဢမ်ႇမီးယဝ်ႉၼၼ်ႉၸိုင် တီႉၵမ်ဢဝ်ပေႃးလူႉတင်းသီႇလႃႉလႄႈ ၵႂႃႇသူင်ႇၵႃႈတီႈၵၢတ်ႇၸူးတီႈၶုၼ်တင်းလၢႆဢေႃႈ။- 20မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၶုၼ်ၸိူဝ်းၼၼ်ႉၸိုင်၊ ၶဝ်လဝ်ႊလၢတ်ႈလႄႈဝႃႈ၊ ၵူၼ်းၸိူဝ်းၼႆႉပဵၼ်ၵူၼ်းယူႉတႃႉလႄႈ ၸၢင်ႈယႃႉယူၵ်ႉဝဵင်းႁဝ်းၼႆႉၶႃႈဢေႃႈ။- 21ၶဝ်ၸၢင်ႈႁေႃးလၢတ်ႈသင်ႇသွၼ်ပၼ် ထုင်းၸၢမ်ႇဢၼ်ႁဝ်းၸိူဝ်းဢၼ်ပဵၼ်ၵူၼ်းရူဝ်းမႃႉၼႆႉ ဢမ်ႇထုၵ်ႇလီၶၢမ်ႇဢဝ်လႄႈ ၵမ်ၵျၢင်ႉတင်းလၢႆၼၼ်ႉၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊- 22ၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉ ၽွမ်ႉၵၼ်လုၵ်ႉယူႇၽၢႆႇၼိုင်ႈတင်းၶဝ်ဢေႃႈ။ ၶုၼ်ၸိူဝ်းၼၼ်ႉၵေႃႈသိၵ်ႇထွတ်ႇပႅတ်ႈၶူဝ်းၼုင်ႈၶဝ်သေလႄႈ ၸီႇယၢင်ႇႁႂ်ႈဢဝ်ၶွၼ်ႉပေႃႉယႅၼ်ႉဢေႃႈ။- 23ပေႃႉယႅၼ်ႉလႄႈႁွႆးၶွၼ်ႉမီးၼမ်ၼႃႇယဝ်ႉၸင်ႇ ဢဝ်ၶင်ဝႆႉၵႃႈၼႂ်းထွင်ႇလႄႈ သင်ႇလၢတ်ႈဝႆႉတီႈထွင်ႇမူးႁႂ်ႈမၼ်းပႂ်ႉဝႆႉလီလီဢေႃႈ။- 24ၵႃႈၼင်ႇဢၼ်သင်ႇလၢတ်ႈဝႆႉၼၼ်ႉ ထွင်ႇမူးဢဝ်ၶင်ဝႆႉၵႃႈၼႂ်းထွင်ႇလုၵ်းၼႂ်းလႄႈ သႂ်ႇထၢင်ႇဝႆႉဢေႃႈ။
25ၶိင်ႇတဵင်ႈၶိုၼ်းပေႃးလူႉတင်းသီႇလႃႉၼၼ်ႉ သူးတွင်းပထၼႃႇလႄႈ ႁဵတ်းၵႂၢမ်းဢၼ်ယွင်ႈယေႃးၽြႃးပဵၼ်ၸဝ်ႈယူႇဢေႃႈ။ ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်မတ်ႉဝႆႉၶင်ဝႆႉ ၵႃႈၼႂ်းထွင်ႇၼၼ်ႉၵေႃႈဢွၼ်ၵၼ်ထွမ်ႇယူႇဢေႃႈ။- 26ၵမ်းဢွၼ်ႇၼိုင်ႈဢိင်ႇသၼ်ႇၼႃႇလူင်လၢင်လႄႈ တိၼ်ထွင်ႇၵေႃႈသၼ်ႇၶွၼ်းဝႆဢေႃႈ။ ၽၵ်းတူၵႃႈမီးၼၼ်ႉၽုၺ်ႇၵမ်းလဵဝ်လႄႈ ၵူၼ်းတင်းသဵင်ႈတင်းလူင်ၼၼ်ႉ ၵၢင်းလွတ်ႈတင်းၸိူၵ်ႈလဵၵ်းဢၼ်မတ်ႉၽုၵ်ႇဝႆႉၼၼ်ႉဢေႃႈ။- 27ထွင်ႇမူးၼၼ်ႉ တိုၼ်ႇမႃးလႄႈ ႁၼ်ၽၵ်းတူထွင်ႇၸိူဝ်းၼၼ်ႉ ၽုၺ်ႇပိုတ်ႇဝႆႉၼၼ်ႉသေယဝ်ႉ ပိူဝ်ႈဢၼ်ထၢင်ႇၶဝ်ၸိူဝ်းဢၼ်ၶၢမ်ႇတၢင်းဢၼ်မတ်ႉၽုၵ်ႇဝႆႉၼၼ်ႉဢွၵ်ႇပၢႆႈၵႂႃႇယဝ်ႉလႄႈ ထွတ်ႇလၢပ်ႇဢွၵ်ႇၵႃႈၼႂ်းၵပ်းမၼ်းသေလႄႈ ဢၢင်ႈတၵ်းဢဝ်တူဝ်ၸဝ်ႈၵဝ်ႇတၢႆဢေႃႈ။- 28ပေႃးလူႉၵေႃႈ ႁဵတ်းတင်းသဵင်ဢၼ်ယႂ်ႇၼႃႇႁွင်ႉလႄႈလၢတ်ႈဝႃႈ ယႃႇပေႁဵတ်းဢၼ်ဢမ်ႇလီတီႈတူဝ်ၸဝ်ႈၵဝ်ႇသေၵမ်း၊ ႁဝ်းတင်းသဵင်ႈတင်းလူင်မီးယူႇဢေႃႈ၊ ဝႃႈၼင်ႇၼႆဢေႃႈ။- 29မၼ်းၸင်ႇယွၼ်းဢဝ်ၽႆးဢၼ်တႆႈဝႆႉၼၼ်ႉသေယဝ်ႉ လႅၼ်ႈၶဝ်ႈမႃးသၼ်ႇသၼ်ႇသၢႆသၢႆယူႇသေလႄႈၶုပ်ႉမူပ်ႇၵႃႈတီႈႁိမ်းတိၼ်ပေႃးလူႉတင်းသီႇလႃႉၼၼ်ႉဢေႃႈ။- 30မၼ်းဢဝ်ၶဝ်ၼၼ်ႉ ဢွၵ်ႇၵႃႈၼွၵ်ႈသေယဝ်ႉလဝ်ႊထၢမ်လႄႈဝႃႈ ၸဝ်ႈၶဝ်ဢိူၺ်း၊ ၼင်ႇႁိုဝ်ၵဝ်ၶႃႈတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်တၵ်းလႆႈႁဵတ်းၸိူဝ်ႉႁိုဝ်ၶႃႈ၊ ဝႃႈၼင်ႇၼႆဢေႃႈ။- 31ၶဝ်ၵေႃႈလၢတ်ႈလႄႈဝႃႈ ယုမ်ႇမၢတ်ႈၸဝ်ႈယေႇသူႉၶရိၸ်ႈတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် မႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်း တၵ်းႁွတ်ႈထိုင်တၢင်းဢၼ်ၵႄႇၶျွတ်ႈယဝ်ႉဢေႃႈ၊ ဝႃႈၼင်ႇၼႆလႄႈ၊- 32ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈၽြႃးတီႈၸႃႉၸဵမ်မၼ်းၼၼ်ႉဢိၵ်ႇတင်း ၵူၼ်းၵႃႈဢၼ်မီးယူႇၵႃႈၼႂ်းႁိူၼ်းမၼ်းၼၼ်ႉဢေႃႈ။
33ၼႂ်းၶိုၼ်းၼၼ်ႉ ၶိင်ႇၼႃႇရီႇၼၼ်ႉ မၼ်းဢဝ်ပေႃးလူႉတင်းသီႇလႃႉ သုၵ်ႈပွတ်ႈႁွႆးၶွၼ်ႉၸိူဝ်းၼၼ်ႉသေယဝ်ႉ မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်း တင်းသဵင်ႈတင်းလူင် ၶၢမ်ႇပပ်ႉတီႉၸမ်ႇၵမ်းလဵဝ်ဢေႃႈ။- 34ၵမ်းၼၼ်ႉ မၼ်းပၢင်းဢဝ်ပေႃးလူႉတင်းသီႇလႃႉ ၶိုၼ်ႈမႃးၵႃႈၼိူဝ်ႁိူၼ်းမၼ်းယဝ်ႉၸင်ႇ ႁဵတ်းလဵင်ႉႁဵတ်းလူလႄႈ ပိူဝ်ႈဢၼ်ယုမ်ႇမၢတ်ႈၽြႃးပဵၼ်ၸဝ်ႈၼၼ်ႉ မၼ်းဢိၵ်ႇတင်းၵူၼ်းႁိူၼ်းၵူၼ်းယေးတင်းလၢႆ ၸူမ်းသိူဝ်းၼႃႇလူင်လၢင်ဢေႃႈ။
35မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၸိုင် ၶုၼ်ၸိူဝ်းၼၼ်ႉပွႆႇၸႂ်ႉလုၵ်ႈဢွၼ်ႇၶုၼ်မႃးလႄႈ သင်ႇလၢတ်ႈဝႃႈ ႁႂ်ႈပွႆႇၶဝ်ၼၼ်ႉသေ၊ ဝႃႈၼင်ႇၼႆဢေႃႈ။- 36ၵႂၢမ်းၼၼ်ႉၸိုင် ထွင်ႇမူးဢဝ်မွၵ်ႇလၢတ်ႈတီႈပေႃးလူႉလႄႈဝႃႈ ၶုၼ်တင်းလၢႆပွႆႇၸႂ်ႉမႃးႁႂ်ႈလႆႈပွႆႇသူၸဝ်ႈၶႃႈယဝ်ႉ။ ပိူဝ်ႈၼႆလႄႈ တေႃႈလဵဝ်ၼႆႉဢွၵ်ႇသေလႄႈၵႂႃႇၼိမ်ၼိမ်လီလီသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊- 37ပေႃးလူႉၵေႃႈလၢတ်ႈတီႈလုၵ်ႈဢွၼ်ႇၶုၼ်ၸိူဝ်းၼၼ်ႉလႄႈဝႃႈ၊ ႁဝ်းဢၼ်ပဵၼ်ၵူၼ်းရူဝ်းမႃႉၼႆႉၸိုင် ၶဝ်ယင်းဢမ်ႇပႆႇၸီႇယၢင်ႇၸွမ်းၼင်ႇတြႃးလႄႈ ပေႃႉယႅၼ်ႉထၢင်ႇထၢင်ႇသႃးသႃး ဢဝ်ၶင်ဝႆႉၵႃႈၼႂ်းထွင်ႇသေယဝ်ႉ၊ တေႃႈလဵဝ်ၼႆႉ တၵ်းတဵတ်ႇတဵတ်ႇပွႆႇဢွၵ်ႇႁိုဝ်။ ဢမ်ႇထုၵ်ႇလီႁဵတ်းၸိူဝ်ႉၼင်ႇၼႆ၊ ႁႂ်ႈတူဝ်ၶဝ်မႃးၼုၵ်ႈဢဝ်ႁဝ်းလူးၵွၼ်ႇတႃႉ၊ ဝႃႈၼင်ႇၼႆဢေႃႈ။
38လုၵ်ႈဢွၼ်ႇၶုၼ်ၸိူဝ်းၼၼ်ႉ ဢဝ်ၵႂၢမ်းၼၼ်ႉလဝ်ႊလၢတ်ႈတီႈၶုၼ်တင်းလၢႆလႄႈ၊ မိူဝ်ႈဢၼ်ၶဝ်ၼၼ်ႉႁူႉလွင်ႈဢၼ်ပေႃးလူႉတင်းသီႇလႃႉ ပဵၼ်ၵူၼ်းရူဝ်းမႃႉၼၼ်ႉၸိုင်၊ ၶဝ်မီးတၢင်းဢၼ်ၵူဝ်ဢၼ်ႁႄလႄႈ၊- 39တူဝ်ၶဝ်မႃးဢဝ်တင်းၵႂၢမ်းၶျေႃးၵႂၢမ်းဝွၼ်းလၢတ်ႈလႄႈ ၼုၵ်ႈဢဝ်ၶဝ်သေယဝ်ႉတွင်းပၢၼ်ႇႁႂ်ႈၶဝ်ဢွၵ်ႇၵႂႃႇသေၵႃႈၼႂ်းဝဵင်းၼၼ်ႉဢေႃႈ။
40မိူဝ်ႈၼၼ်ႉ ၶဝ်ၸင်ႇဢွၵ်ႇသေၵႃႈၼႂ်းထွင်ႇၼၼ်ႉၵႂႃႇ ၶဝ်ႈၵႃႈၼႂ်းႁိူၼ်းလူႉတီႉသေယဝ်ႉ ထူပ်းႁၼ်ပီႈၼွင်ႉတင်းလၢႆလႄႈ ႁႂ်ႈၶဝ်သၢၵ်ႈသႃႇယဝ်ႉၸင်ႇဢွၵ်ႇၵႂႃႇဢေႃႈ။
Currently Selected:
တမၢၼ်ႇၸဝ်ႈ 16: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
