တမၢၼ်ႇၸဝ်ႈ 11
11
ပေႇတရူႉလၢတ်ႈၼႄၵၢၼ်ငၢၼ်းမၼ်းတီႈၸိူဝ်းၸဝ်ႈ
1လွင်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ ၶၢမ်ႇဢဝ်ၼုၵ်ႈၵပၢတ်ႈတြႃးၸဝ်ႈၼၼ်ႉၸိုင် တမၢၼ်ႇၸဝ်ႈဢိၵ်ႇတင်းပီႈၼွင်ႉ ဢၼ်မီးယူႇၵႃႈၼႂ်းမိူင်းယူႉတႃႉတင်းလၢႆငိၼ်းဢေႃႈ။- 2မိူဝ်ႈဢၼ် ပေႇတရူႉ ၶိုၼ်းၵႂႃႇႁွတ်ႈထိုင်ၵႃႈတီႈ ဝဵင်းယေႇရူႉသလႅမ်ႇၼၼ်ႉၸိုင်၊ ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉ ႁဵတ်းဢမ်ႇထုၵ်ႇၶတ်းၵၼ်လႄႈဝႃႈ၊- 3မႂ်းၼႆႉ ၶဝ်ႈၵႃႈတီႈၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉလႄႈ ၵိၼ်ႁူမ်ႈၵၼ်တင်းၶဝ်လူင်ပႄႇ၊ ဝႃႈၼင်ႇၼႆဢေႃႈ။
4 ပေႇတရူႉၵေႃႈ ၽုၺ်ႇလၢတ်ႈၼႄပၼ် လွင်ႈတီႈႁဵင်းၼၼ်ႉတီႈၶဝ် ၸႃႉၸဵမ်ငဝ်ႈတေႃႇပၢႆလႄႈဝႃႈၸမ်ႉ၊- 5ၼႂ်းမိူဝ်ႈဢၼ်ၵဝ်သူးတွင်းယူႇၵႃႈတီႈဝဵင်းယွပ်ႉပႃႉပုၼ်ႉၸိုင် ပဵၼ်ၸိူဝ်ႉၼင်ႇၼွၼ်းၽၼ်ႁၼ်ၵႃႈၼႂ်းတူဝ်ၸဝ်ႈၵဝ်ႇလႄႈ ၵဝ်လႆႈႁၼ်ၶိူင်ႈပိူင်ဢၼ်ပဵၼ်ၸိူဝ်ႉၼင်ႇ တၢၼ်းသိူဝ်ႇလူင် ဢၼ်ဢဝ်တင်းသီႇၸဵင်ႇ ၶျႃးယွၼ်ႇတူၵ်းၵႃႈၼိူဝ်ၵၢင်ႁၢဝ်ၼၼ်ႉမႃးႁွတ်ႈထိုင်ၵႃႈတီႈၵဝ် ၼႂ်းပျႃႇတိၵ်ႈရူႇပႃႇရူင်ႇဢေႃႈ။- 6မိူဝ်ႈဢၼ်ၵဝ်တူၺ်းၶိူင်ႈပိူင်ၼၼ်ႉ ၸေးၸေးၸွတ်ႇၸွတ်ႇသေလႄႈ ၶႆႈၸႂ်ဝူၼ်ႉၸႂ်ယူႇၼၼ်ႉၸိုင်ၵဝ်လႆႈႁၼ် ၸႃႉၸဵမ်တရိၵ်ႈသၢၼ်ႇၵႃႈၼိူဝ်လိၼ် ဢၼ်မီးတိၼ်သီႇၶွၼ်၊ တူဝ်လိူင်း၊ တရိၵ်ႈသၢၼ်ႇ ဢၼ်ၸၢင်ႈၵႂႃႇၸၢင်ႈၵၢၼ်း၊ ၼူၵ်ႉဢၼ်မိၼ်ၵႃႈၼိူဝ်ၽႃႉၵၢင်ႁၢဝ်တင်းလၢႆဢေႃႈ။- 7မိူဝ်ႈၼၼ်ႉ ၵဝ်လႆႈငိၼ်းသဵင်ၵႂၢမ်းဢၼ်ဝႃႈ၊ ပေႇတရူႉဢိူၺ်း၊ လုၵ်ႉဢဝ်တၢႆသေလႄႈၵိၼ်တႃႉ၊ ဝႃႈၼင်ႇၼႆဢေႃႈ။- 8ၵဝ်ၵေႃႈလၢတ်ႈလႄႈဝႃႈ၊ ဢမ်ႇပဵၼ်လႆႈၶႃႈၸဝ်ႈ။ ၶိူင်ႈပိူင်ဢၼ်ၵူဝ်ႈၵိူၵ်ႇ တင်းၶိူင်ႈပိူင်ဢၼ်ဢမ်ႇမူတ်းသႂ်ၸိုင် ဢမ်ႇတွၼ်ႉၶဝ်ႈၵႃႈၼႂ်းသူပ်းၵဝ်ၶႃႈသေပွၵ်ႈၶႃႈ၊ ဝႃႈၼင်ႇၼႆဢေႃႈ။- 9လိုၼ်းၼၼ်ႉပွၵ်ႈတူႉတီႉယႃႉ၊ သဵင်ၵႂၢမ်းပဵၼ်မႃးၵႃႈၼိူဝ်ၵၢင်ႁၢဝ်လႄႈဝႃႈၸမ်ႉ ဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉၸိုင်၊ မႂ်းယႃႇပေထၢင်ႇၵူဝ်ႈၵိူၵ်ႇတႃႉ၊ ဝႃႈၼင်ႇၼႆဢေႃႈ။- 10ပဵၼ်ၸိူဝ်ႉၼင်ႇၼၼ် ထူၼ်ႈထိုင်သၢမ်ပွၵ်ႈယဝ်ႉၸင်ႇ သမ်ႉၶိုၼ်းတိုတ်ႉၸၼ်ဢဝ်ၶိူင်ႈပိူင်ၵႃႈမီးၸိူဝ်းၼၼ်ႉ ၶိုၼ်ႈၵႂႃႇၵႃႈၼႂ်းၵၢင်ႁၢဝ်ပုၼ်ႉသေဢေႃႈ။
11ၵမ်းဢွၼ်ႇၼိုင်ႈၵူၼ်းသၢမ်ၵေႃႉဢၼ်ၶၢမ်ႇတၢင်းဢၼ်ပွႆႇၸႂ်ႉ သေၵႃႈတီႈဝဵင်းၵေႇသရီႉ မႃးၸူးၵႃႈတီႈၵဝ်ၼၼ်ႉ ၸုၵ်းယူႇၵႃႈတီႈႁိမ်းႁိူၼ်းတီႈဢၼ်ၵဝ်မီးၼၼ်ႉဢေႃႈ။- 12လွင်ႈၼင်ႇႁိုဝ်ၵဝ်တၵ်းဢမ်ႇၶႆႈၸႂ်ဝူၼ်ႉၸႂ်လႄႈ ၵႂႃႇလူၺ်ႈၵၼ်တင်းၶဝ်ၼၼ်ႉၸိုင်၊ ဝီႉၺိၺ်ႇၸဝ်ႈမီးဢမိင်ႉဢေႃႈ။ ပီႈၼွင်ႉႁူၵ်းၵေႃႉၸိူဝ်းၼႆႉၵေႃႈ ၵႂႃႇလူၺ်ႈၵၼ်တင်းၵဝ်လႄႈ ႁဝ်းၶဝ်ႈၵႃႈၼႂ်းႁိူၼ်းၵေႃႉၼၼ်ႉဢေႃႈ။- 13ၵေႃႉၼၼ်ႉမွၵ်ႇလၢတ်ႈလွင်ႈဢၼ်မၼ်းႁၼ်တမၢၼ်ႇၵၢင်ႁၢဝ်ၸုၵ်းယူႇ ၵႃႈၼႂ်းႁိူၼ်းမၼ်းသေလႄႈလၢတ်ႈဝႃႈ မႂ်းပွႆႇၸႂ်ႉၵူၼ်းၵႂႃႇၵႃႈတီႈဝဵင်းယွပ်ႉပႃႉ ပုၼ်ႉလႄႈ ပၢင်းဢဝ်သီႉမုၼ်ႇ ဢၼ်လႆႈၸိုဝ်ႈမႂ်ႇ ပေႇတရူႉၼၼ်ႉမႃးတႃႉ။- 14မၼ်းၼၼ်ႉတၵ်းႁေႃးလၢတ်ႈၵႂၢမ်းဢၼ်တၵ်းၵႄႇၶျွတ်ႈဢဝ်မႂ်း ဢိၵ်ႇတင်းၵူၼ်းၵႃႈမီးၼႂ်းႁိူၼ်းမႂ်းၼႆႉတီႈမႂ်းဢေႃႈ၊ ဝႃႈၼင်ႇၼႆၼၼ်ႉတီႈႁဝ်းဢေႃႈ။
15ၼႂ်းမိူဝ်ႈဢၼ် ၵဝ်ၸႃႉႁေႃးလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်၊ ဝီႉၺိၺ်ႇဢၼ်မူတ်းၸၢင်ႇၸဝ်ႈလူင်းမႃးၵႃႈၼိူဝ်ၶဝ်ၼၼ်ႉ မိူၼ်ၸိူဝ်ႉၼင်ႇဢၼ်လူင်းမႃးၵႃႈၼိူဝ်ႁဝ်း မိူဝ်ႈဢွၼ်တၢင်းၼၼ်ႉဢေႃႈ။- 16မိူဝ်ႈၼၼ်ႉၵဝ်ၶုၵ်းၸႂ်လႆႈၶႆႈၸႂ်ထူပ်း ၵႂၢမ်းဢၼ်ၸဝ်ႈၽြႃးလၢတ်ႈလႄႈဝႃႈ၊ ယူဝ်းႁၢၼ်ႇပၼ်ပပ်ႉတီႉၸမ်ႇၼႂ်းၼမ်ႉဢေႃႈ။ သူတၵ်းလႆႈၶၢမ်ႇပပ်ႉတီႉၸမ်ႇ ၼႂ်းဝီႉၺိၺ်ႇဢၼ်မူတ်းၸၢင်ႇၸဝ်ႈဢေႃႈ၊ ဝႃႈၼင်ႇၼႆၼၼ်ႉဢေႃႈ။- 17ပိူဝ်ႈၼႆလႄႈ ပေႃးၽြႃးပဵၼ်ၸဝ်ႈပၼ် သူႉၵျေးၸူးတီႈၶဝ်ၼၼ်ႉ မိူၼ်ၸိူဝ်ႉၼင်ႇဢၼ်မၼ်းၸဝ်ႈပၼ်တီႈႁဝ်းၸိူဝ်းဢၼ် ယုမ်ႇမၢတ်ႈၸဝ်ႈယေႇသူႉၶရိၸ်ႈၸိူဝ်းၼႆႉၸိုင်ၵဝ်ၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈ ႁၢမ်ႈတၢပ်ႈႁႄႉၶႅၼ်ၽြႃးပဵၼ်ၸဝ်ႈလႆႈ၊ ဝႃႈၼင်ႇၼႆဢေႃႈ။
18မိူဝ်ႈဢၼ်ၶဝ်ငိၼ်းလွင်ႈတၢင်းၸိူဝ်းၼႆႉၸိုင် ၶဝ်ယင်းဢမ်ႇတွပ်ႇဢမ်ႇထဵင်လႄႈ ယွင်ႈယေႃးမုၼ်ၵုင်ႇၽြႃးပဵၼ်ၸဝ်ႈလႄႈဝႃႈ၊ တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵေႃႈ ၽြႃးပဵၼ်ၸဝ်ႈပၼ် တြႃးတၢင်းဢၼ်ၶုၵ်းၸႂ်လႆႈမႆႈၸႂ် ပုၼ်ႈလွင်ႈၼင်ႇႁိုဝ်တၵ်းႁႂ်ႈဢသၢၵ်ႈလိပ်းၼၼ်ႉဝႆႉယဝ်ႉ၊ ဝႃႈၼင်ႇၼႆဢေႃႈ။
ၸိူဝ်းၸဝ်ႈၼႂ်းဝဵင်းဢၼ်ႇတီႉဢူၵ်ႉ
19မိူဝ်ႈၼၼ်ႉ ၶဝ်ၸိူဝ်းဢၼ်ၽၢတ်ႇၽႄၵၼ်ၵႂႃႇၵူႈတီႈၵူႈလႅၼ် ၵွပ်ႈပိူဝ်ႈတၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်ပဵၼ်မႃးၵွပ်ႈပိူဝ်ႈ သထေႇၽၢၼ်ႇၼၼ်ႉ ၵႂႃႇထိုင်ႁွတ်ႈ မိူင်းၽီႉၼိတ်ႉမိူင်းၵူႉပရူႉ တင်းဝဵင်းဢၼ်ႇတီႉဢူၵ်ႉလႄႈ ႁေႃးလၢတ်ႈၼုၵ်ႈၵပၢတ်ႈတြႃးၸဝ်ႈ တီႈၵူၼ်း ယူႉတႃႉတင်းလၢႆၵူၺ်းဢေႃႈ။- 20ၵူၺ်းၵႃႈ ၼႂ်းၶဝ်ၼၼ်ႉၵမ်ႈၽွင်ႈဢၼ်ပဵၼ်ၵူၼ်းမိူင်းၵူႉပရူႉ တင်းၵူၼ်းမိူင်းၵူႉရေႇၼေႇၼၼ်ႉ ၵႂႃႇၵႃႈတီႈဝဵင်းဢၼ်ႇတီႉဢူၵ်ႉ သေယဝ်ႉ၊ ႁေႃးလၢတ်ႈတြႃးသတၢင်းသိူဝ်းပျေႃႇ လွင်ႈၸဝ်ႈယေႇသူႉ တီႈၵူၼ်းႁေႇလေႇၼိတ်ႉတင်းလၢႆဢေႃႈ။- 21ပိူဝ်ႈဢၼ်မိုဝ်းၽြႃးပဵၼ်ၸဝ်ႈ မီးယူႇလူၺ်ႈၵၼ်တင်းၶဝ်ၼၼ်ႉလႄႈ ၵူၼ်းၼမ်ၼႃႇယုမ်ႇမၢတ်ႈသေယဝ်ႉ ၶၢႆႉမႃးၵႃႈတီႈၽၢႆႇၸဝ်ႈၽြႃးဢေႃႈ။
22သတၢင်းသဵင်ၶၢဝ်ႇလွင်ႈၶဝ်ၼၼ်ႉ ၽႅဝ်ထိုင်ၵႃႈတီႈၸိူဝ်းၸဝ်ႈဢၼ်မီးယူႇၵႃႈၼႂ်း ဝဵင်းယေႇရူႉသလႅမ်ႇလႄႈ ၸိူဝ်းၸဝ်ႈၼၼ်ႉ ပွႆႇၸႂ်ႉပႃႇၼပႃႉ ၵႂႃႇႁႂ်ႈတေႃႇထိုင်ႁွတ်ႈ ဝဵင်းဢၼ်ႇတီႉဢူၵ်ႉ ပုၼ်ႉဢေႃႈ။- 23မၼ်းၼၼ်ႉ မိူဝ်ႈဢၼ်ႁွတ်ႈထိုင်လႄႈ လႆႈႁၼ်ၵျေးၸူးၽြႃးပဵၼ်ၸဝ်ႈၼၼ်ႉၸိုင်၊ သိူဝ်းပျေႃႇလႄႈတိုၵ်းယူင်းၸူဝ်းဢဝ် ႁႂ်ႈၶဝ်ၼၼ်ႉတင်းသဵင်ႈတင်းလူင် မီးတၢင်းၸႂ်ဢၼ်မၼ်ႈၶိူင်ႇဢိင်ပိုင်ႈ ဢမ်ႇၽၢတ်ႇဢမ်ႇယၢၼ်ၸဝ်ႈၽြႃးဢေႃႈ။- 24လွင်ႈမၼ်းၸမ်ႉ ပိူဝ်ႈဢၼ်မၼ်းၼၼ်ႉပဵၼ်ၵူၼ်းလီလႄႈ တဵမ်ဝႆႉတင်းဝီႉၺိၺ်ႇဢၼ်မူတ်းၸၢင်ႇၸဝ်ႈ ဢိၵ်ႇတင်းတၢင်းဢၼ်ယုမ်ႇမၢတ်ႈလႄႈ ၵူၼ်းၼမ်ၼႃႇၶဝ်ႈမႃး ၵႃႈတီႈၽၢႆႇၸဝ်ႈၽြႃးဢေႃႈ။
25မၼ်းၵေႃႈသမ်ႉဢွၵ်ႇၵႂႃႇၸူးၵႃႈတီႈဝဵင်းတႃႇသူႉ၊ ႁႂ်ႈလႆႈႁႃသေႃးလူႉလႄႈ ထူပ်းႁၼ်မၼ်းသေယဝ်ႉ၊ ႁွင်ႉဢဝ်မၼ်းမႃးၵႃႈတီႈဝဵင်း ဢၼ်ႇတီႉဢူၵ်ႉဢေႃႈ။- 26ၶဝ်ၼၼ်ႉပီႊၼိုင်ႈတဵမ်တဵမ် ၸူႉတုမ်လူၺ်ႈၵၼ်တင်းၸိူဝ်းၸဝ်ႈလႄႈ သွၼ်ပၼ်တီႈၵူၼ်းၼမ်ၼႃႇဢေႃႈ။ တပႄးၸဝ်ႈတင်းလၢႆၵေႃႈ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ၶရိၸ်ႈယၢၼ်ႇ ၵႃႈၼႂ်းဝဵင်းဢၼ်ႇတီႉဢူၵ်ႉၼၼ်ႉ ဢွၼ်တၢင်းဢေႃႈ။
27ၶိင်ႇမိူဝ်ႈၼၼ်ႉ ပရေႃးၽႅတ်ႈၵမ်ႈၽွင်ႈ လုၵ်ႉသေၵႃႈတီႈဝဵင်းယေႇရူႉသလႅမ်ႇလႄႈလူင်းမႃး ၵႃႈတီႈဝဵင်းဢၼ်ႇတီႉဢူၵ်ႉဢေႃႈ။- 28ဢၼ်ပႃးၼႂ်းၶဝ်ၼၼ်ႉၵေႃႉၼိုင်ႈ ဢၼ်လႆႈၸိုဝ်ႈဢႃႇၵပူႉၼၼ်ႉ လုၵ်ႉၸုၵ်းသေယဝ်ႉ၊ ၵွပ်ႈပိူဝ်ႈဝီႉၺိၺ်ႇၸဝ်ႈလႄႈ ၽုၺ်ႇလၢတ်ႈလႄႈဝႃႈ၊ ၵႃႈၼိူဝ်လိၼ်မိူင်းၼႆႉ တင်းသဵင်ႈတင်းလူင် တၵ်းပဵၼ်တၢင်းဢၼ်ဢိုပ်းတၢင်းၵိၼ်ဢၼ်ယႂ်ႇၼႃႇဢေႃႈ၊ ဝႃႈၼင်ႇၼႆဢေႃႈ။ တၢင်းဢၼ်ဢိုပ်းၼၼ်ႉၸမ်ႉ ပဵၼ်ၼႂ်းၸူဝ်ႈပၢၼ် ၶုၼ်ႁေႃၶမ်းၵေႇသႃႇၵလေႃးတီႉဢေႃႈ။- 29မိူဝ်ႈၼၼ်ႉ တပႄးၸဝ်ႈၸိူဝ်းၼၼ်ႉၸီႇယၢင်ႇ တၵ်းပၼ်တၢင်းဢၼ်ၵမ်ႉဢၼ်ထွၵ်ႈ ၵႂႃႇၵႃႈတီႈပီႈၼွင်ႉၸိူဝ်းဢၼ် မီးၵႃႈၼႂ်းမိူင်းယူႉတႃႉပုၼ်ႉ ၵႃႈၼင်ႇဢၼ်တၢတ်ႈၼိူင်ႇလႆႈႁင်းၽႂ်ႁင်းမၼ်းၼၼ်ႉသေယဝ်ႉ၊- 30ၶဝ်ႁဵတ်းၸွမ်းလႄႈ ဢၢပ်ႈပၼ်ၼႂ်းမိုဝ်းပႃႇၼပႃႉ တင်းသေႃးလူႉ ၵႂႃႇၵႃႈတီႈၵူၼ်းဢုပ်ႉၸိူဝ်းၸဝ်ႈၸိူဝ်းၼၼ်ႉဢေႃႈ။
Currently Selected:
တမၢၼ်ႇၸဝ်ႈ 11: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
