1 ၵေႃးရိၼ်ႇထူႉ 7
7
လွင်ႈပဵၼ်ၽူဝ်ပဵၼ်မေးၵၼ်
1လွင်ႈတၢင်းဢၼ်ပႃးၼႂ်းလိၵ်ႈဢၼ်သူတႅမ်ႈပၼ်မႃးတီႈၵဝ်ၼၼ်ႉၸမ်ႉ၊ ပေႃးၵူၼ်းၸၢႆးယင်းဢမ်ႇသိူၵ်ႈသမ်ႇၵၼ်တင်းၵူၼ်းယိင်းလႄႈယူႇၸိုင်လီဢေႃႈ။- 2ၼႂ်းဝႃႈၼၼ်သေၵေႃႈ ၼင်ႇႁိုဝ်တၵ်းၵၢင်းလွတ်ႈတၢင်းမေႇထုင်ႇဢၼ်ဢမ်ႇတြႃးၸိုင်၊ ႁႂ်ႈၵူၼ်းၸၢႆးၵူႈၵေႃႉမီးမေးတူဝ်ၸဝ်ႈၵဝ်ႇတႃႉ။ ႁႂ်ႈၵူၼ်းယိင်းၵူႈၵေႃႉမီးၽူဝ်တူဝ်ၸဝ်ႈၵဝ်ႇတႃႉ။- 3ႁႂ်ႈၵူၼ်းၸၢႆးႁဵတ်းဝၢတ်ႈတၢင်းဢၼ်သိူၵ်ႈသမ်ႇၵၼ်ၵႃႈတီႈမေးတူဝ်ၸဝ်ႈၵဝ်ႇတႃႉ။ မိူၼ်ၼင်ႇၼၼ် ႁႂ်ႈၵူၼ်းယိင်းႁဵတ်းဝၢတ်ႈတၢင်းဢၼ်သိူၵ်ႈသမ်ႇၵၼ်ၵႃႈတီႈၽူဝ်တူဝ်ၸဝ်ႈၵဝ်ႇတႃႉ။- 4ၵူၼ်းယိင်းၸိုင်ဢမ်ႇပိူင်ႇတူဝ်ၶၼ်ႇထႃႇတူဝ်ၸဝ်ႈၵဝ်ႇ။ ၽူဝ်မၼ်းပိူင်ႇဢေႃႈ။ မိူၼ်ၼင်ႇၼၼ် ၵူၼ်းၸၢႆးၵေႃႈဢမ်ႇပိူင်ႇတူဝ်ၶၼ်ႇထႃႇတူဝ်ၸဝ်ႈၵဝ်ႇ။ မေးမၼ်းပိူင်ႇဢေႃႈ။- 5ၼွၵ်ႈသေတၢင်းဢၼ်သၽေႃးမိူၼ်ၵၼ်သေၵႅပ်ႈသေၸူဝ်ႈႁႂ်ႈလႆႈႁဵတ်းဝၢတ်ႈသူးတွင်းပထၼႃႇၼၼ်ႉၵူၺ်း ၵေႃႉၼိုင်ႈလႄႈၵေႃႉၼိုင်ႈယႃႇပေဝႄႈပႅတ်ႈဝၢတ်ႈၽူဝ်ဝၢတ်ႈမေးတီႈၵၼ်။ ပေႃးဝႄႈပႅတ်ႈၸိူဝ်ႉၼင်ႇၼၼ်ယဝ်ႉ၊ ၼင်ႇႁိုဝ်ၸႃႇတၢၼ်ႇတၵ်းဢမ်ႇမီးဢၶႂၢင်ႉဢၼ်လႆႈၸူဝ်းၵႂႃႇၸူဝ်းပႆၵႃႈၼႂ်းဢပႅတ်ႈၵွပ်ႈပိူဝ်ႈဢၼ်သူဢမ်ႇၶျုၵ်ႈတူဝ်ၸဝ်ႈၵဝ်ႇလႆႈၼၼ်ႉၸိုင်၊ သမ်ႉၶိုၼ်းယူႇလူၺ်ႈၵၼ်တႃႉ။
6ၼႂ်းဝႃႈၼၼ်သေၵေႃႈ ၸွမ်းလူၺ်ႈတၢင်းဢၼ်ယင်းဢမ်ႇဝႆႉပိင်းၺၢပ်ႈလႄႈ ပၼ်ဢၶႂၢင်ႉၵူၺ်းၼၼ်ႉ၊ ၵဝ်ၸင်ႇဝႃႈဢေႃႈ။- 7ၵဝ်မီးဢလူဝ်ႇၶႂ်ႈႁႂ်ႈၵူၼ်းတင်းသဵင်ႈတင်းလူင်မိူၼ်ၸိူဝ်ႉၼင်ႇၵဝ်ၼႆႉဢေႃႈ။ ၵူၺ်းၵႃႈၵူၼ်းၵူႈၵေႃႉႁင်းၽႂ်ႁင်းမၼ်းလႆႈၶၢမ်ႇဢဝ်သူႉၵျေးၸူးဢၼ်ၽြႃးပဵၼ်ၸဝ်ႈဢဵတ်းလူပၼ်ၼၼ်ႉ ယေႈၵေႃႉယေႈၸိူဝ်းယေႈၵေႃႉယေႈမဵဝ်းဢေႃႈ။- 8ပိူဝ်ႈၼႆလႄႈၵဝ်ဝႃႈတီႈၶဝ်ၸိူဝ်းဢၼ်ဢမ်ႇမီးမေး ဢိၵ်ႇတင်းမႄႈမူၵ်းမႄႈမၢႆႈတင်းလၢႆၸမ်ႉ၊ ပေႃးၶဝ်ၼၼ်ႉယူႇမိူၼ်ၸိူဝ်ႉၼင်ႇၵဝ်ၸိုင်လီဢေႃႈ။- 9ၼႂ်းဝႃႈၼၼ်သေၵေႃႈ ပေႃးၶဝ်ဢမ်ႇၶျုၵ်ႈၵႃႇမၵုင်ႇလႆႈၸိုင် ႁႂ်ႈသွင်ႇမင်ႇၵလႃႇဢဝ်ၵၼ်သေတႃႉ။ တၢင်းဢၼ်ဢဝ်ၵၼ်ၼၼ်ႉလီသေတၢင်းဢၼ်ၸႂ်ၵီႉလေႇသႃႇမႆႈၼႃႇလႄႈယူႇၼၼ်ႉဢေႃႈ။
10တီႈၶဝ်ၸိူဝ်းဢၼ်မီးၽူဝ်မီးမေးၼၼ်ႉၵဝ်ပိင်းၺၢပ်ႈဢမ်ႇၸႂ်ႈ။ ၸဝ်ႈၽြႃးပိင်းၺၢပ်ႈဝႆႉၸမ်ႉ၊ ယႃႇပေႁႂ်ႈမေးၽၢတ်ႇယၢၼ်ၵၼ်တင်းၽူဝ်တူဝ်ၸဝ်ႈၵဝ်ႇ။- 11ပေႃးၽၢတ်ႇယၢၼ်ၸိုင်၊ ယင်းဢမ်ႇဢဝ်ၽူဝ်လႄႈႁႂ်ႈယူႇၵူၺ်းမၼ်းတႃႉ။ ဢမ်ႇၼၼ်ၵေႃႈႁႂ်ႈမၼ်းၶိုၼ်းမႃးတီႈၽူဝ်မၼ်းသေလႄႈယူႇထုၵ်ႇထုၵ်ႇၵၼ်တႃႉ။ ၵူၼ်းၸၢႆးၵေႃႈယႃႇပေႁႂ်ႈပႅတ်ႈမေးတူဝ်ၸဝ်ႈၵဝ်ႇ။
12တီႈၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၸိုင်တူဝ်ၸဝ်ႈၽြႃးယင်းဢမ်ႇပိင်းၺၢပ်ႈလႄႈ ၵဝ်ပိင်းၺၢပ်ႈၸမ်ႉ၊ ပေႃးပီႈၼွင်ႉသေၵေႃႉသေၵူၼ်း မီးမေးဢၼ်ဢမ်ႇမီးတၢင်းဢၼ်ယုမ်ႇမၢတ်ႈလႄႈ မေးၼၼ်ႉမီးဢလူဝ်ႇၶႂ်ႈယူႇလူၺ်ႈၵၼ်တင်းၽူဝ်မၼ်းယူႇၸိုင်ယႃႇပေႁႂ်ႈပႅတ်ႈ။- 13မိူၼ်ၼင်ႇၼၼ် မႄႈယိင်းၵေႃႈ၊ ပေႃးမီးၽူဝ်ဢၼ်ဢမ်ႇမီးတၢင်းဢၼ်ယုမ်ႇမၢတ်ႈလႄႈၽူဝ်ၼၼ်ႉမီးဢလူဝ်ႇၶႂ်ႈယူႇလူၺ်ႈၵၼ်တင်းမေးမၼ်းယူႇၸိုင်၊ ယႃႇပေႁႂ်ႈပႅတ်ႈ။- 14လွင်ႈမၼ်းၸမ်ႉ ၽူဝ်ဢၼ်ဢမ်ႇမီးတၢင်းဢၼ်ယုမ်ႇမၢတ်ႈၼၼ်ႉမူတ်းၸၢင်ႇၼႂ်းမေးၼၼ်ႉယူႇဢေႃႈ။ မေးဢၼ်ဢမ်ႇမီးတၢင်းဢၼ်ယုမ်ႇမၢတ်ႈၼၼ်ႉၵေႃႈမူတ်းၸၢင်ႇၼႂ်းၽူဝ်မၼ်းၼၼ်ႉယူႇဢေႃႈ။ ပေႃးဢမ်ႇၼၼ်ၸိုင် လုၵ်ႈလၢၼ်သူတၵ်းဢမ်ႇမူတ်းၸၢင်ႇ။ တေႃႈလဵဝ်ၼႆႉၸိုင်ၶဝ်မူတ်းၸၢင်ႇယူႇဢေႃႈ။
15ၵူၺ်းၵႃႈပေႃးၵေႃႉဢၼ်ဢမ်ႇမီးတၢင်းဢၼ်ယုမ်ႇမၢတ်ႈၼၼ်ႉၶႂ်ႈၽၢတ်ႇၵႂႃႇၸိုင်ႁႂ်ႈၽၢတ်ႇၵႂႃႇတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ပီႈၼွင်ႉၼၼ်ႉပဵၼ်ၽူႈၸၢႆးသေဢမ်ႇဝႃႈ၊ ပဵၼ်ၽူႈယိင်းသေဢမ်ႇဝႃႈ၊ ဢမ်ႇမီးတၢင်းဢၼ်မတ်ႉၽုၵ်ႇဝႆႉယဝ်ႉ။ ၼင်ႇႁိုဝ်ႁဝ်းတၵ်းယူႇထုၵ်ႇထုၵ်ႇၵၼ်ၸိုင်ၽြႃးပဵၼ်ၸဝ်ႈႁွင်ႉဢဝ်ႁဝ်းဝႆႉယဝ်ႉ။- 16ၽူႈယိင်းဢိူၺ်း၊ မႂ်းတၵ်းၵႄႇၶျွတ်ႈဢဝ်ၽူဝ်မႂ်းႁိုဝ်။ ဢမ်ႇၵႄႇၶျွတ်ႈဢဝ်ႁိုဝ်ဝႃႈၼႆ၊ ႁဵတ်းၸိူဝ်ႉၼင်ႇႁိုဝ်တၵ်းႁူႉ။ ၽူႈၸၢႆးဢိူၺ်း၊ မႂ်းတၵ်းၵႄႇၶျွတ်ႈဢဝ်မေးၸဝ်ႈၵဝ်ႇႁိုဝ်။ ဢမ်ႇၵႄႇၶျွတ်ႈဢဝ်ႁိုဝ်ဝႃႈၼႆ၊ ႁဵတ်းၸိူဝ်ႉၼင်ႇႁိုဝ်တၵ်းႁူႉ။
ယူႇၸွမ်းဢလူဝ်ႇၽြႃးပဵၼ်ၸဝ်ႈတႃႉ
17ၵႃႈၼင်ႇဢၼ်ၸဝ်ႈၽြႃးမႅင်ႇပၼ်တီႈၵူႈၵေႃႉၵူႈၵူၼ်းႁင်းၽႂ်ႁင်းမၼ်းလႄႈ ၽြႃးပဵၼ်ၸဝ်ႈႁွင်ႉဢဝ်ၵူႈၵေႃႉၵူႈၵူၼ်းႁင်းၽႂ်ႁင်းမၼ်းၼၼ်ႉ ႁႂ်ႈၵူႈၵေႃႉၵူႈၵူၼ်းၵမ်ၵျၢင်ႉလႄႈယူႇတႃႉ။ ၵဝ်ပိင်းၺၢပ်ႈၸိူဝ်ႉၼင်ႇၼႆဝႆႉတီႈၸိူဝ်းၸဝ်ႈၵႃႈမီးတင်းသဵင်ႈတင်းလူင်ဢေႃႈ။
18ပေႃးၵေႃႉဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉလႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၸိုင်ယႃႇပေႁႂ်ႈမၼ်းပႅတ်ႈဝႆႉ တၢင်းဢၼ်ထိူဝ်ႁိမ်းၼၼ်ႉ၊ ၵေႃႉဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉၵေႃႈ ပေႃးမၼ်းလႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၸိုင်ယႃႇပေႁႂ်ႈၶၢမ်ႇတၢင်းဢၼ်ထိူဝ်ႁိမ်း။- 19တၢင်းဢၼ်ၶၢမ်ႇတၢင်းဢၼ်ထိူဝ်ႁိမ်းၼၼ်ႉဢမ်ႇမီးဢၵျူဝ်း။ တၢင်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၼၼ်ႉၵေႃႈဢမ်ႇမီးဢၵျူဝ်း။ တၢင်းဢၼ်ပႂ်ႉၵမ်ပႂ်ႉၸွမ်း ပိင်းၺၢပ်ႈၽြႃးပဵၼ်ၸဝ်ႈၼၼ်ႉၵူၺ်းမီးဢၵျူဝ်းဢေႃႈ။
20ႁႂ်ႈၵေႃႉဢၼ်လႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉၵူႈၵေႃႉၵူႈၵူၼ်း ႁဵတ်းလွင်ႈၵႃႈသင်သေဢမ်ႇဝႃႈ၊ ႁဵတ်းလွင်ႈၼၼ်ႉယူႇသေၵမ်းလူၺ်ႈ။- 21ပေႃးမႂ်းပဵၼ်ၶႃႈၶၢမ်ႇတၢင်းၸႂ်ႉတၢင်းသွႆပိူၼ်ႈလႄႈလႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၸိုင် ယႃႇပေမီးတၢင်းဢၼ်မႆႈၸႂ်ၶီၸႂ်။ ၵူၺ်းၵႃႈပေႃးမႂ်းႁွတ်ႈထိုင်တၢင်းဢၼ်လွတ်ႈလႆႈၸိုင်ယဵင်ႈၶႅၼ်းသုင်းသွင်ႇဢၶႂၢင်ႉတၢင်းဢၼ်လွတ်ႈၼၼ်ႉတႃႉ။- 22လွင်ႈမၼ်းၸမ်ႉ ၼႂ်းမိူဝ်ႈဢၼ်ပဵၼ်ၶႃႈပိူၼ်ႈယူႇၼၼ်ႉၸိုင် ၵေႃႉဢၼ်လႆႈၶၢမ်ႇတၢင်းဢၼ်ၸဝ်ႈၽြႃးႁွင်ႉဢဝ်ၼၼ်ႉပဵၼ်ၵူၼ်းလွတ်ႈၸဝ်ႈၽြႃးဢေႃႈ။ မိူၼ်ၼင်ႇၼၼ် ၼႂ်းမိူဝ်ႈဢၼ်ပဵၼ်ၵူၼ်းလွတ်ႈယူႇၼၼ်ႉၸိုင် ၵေႃႉဢၼ်လႆႈၶၢမ်ႇတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉပဵၼ်ၶႃႈၸဝ်ႈၶရိၸ်ႈဢေႃႈ။- 23သူပဵၼ်ၵေႃႉဢၼ်မၼ်းၸဝ်ႈဢဝ်တင်းၵႃႈမၼ်းၶၼ်မၼ်းသိုဝ်ႉဢဝ်ဢေႃႈ၊ ယႃႇပေႁဵတ်းၶႃႈတီႈၵူၼ်း။
24ပီႈၼွင်ႉၶဝ်ဢိူၺ်း၊ ႁႂ်ႈၵေႃႉဢၼ်လႆႈၶၢမ်ႇၵျေးၸူးတၢင်းဢၼ်မၼ်းၸဝ်ႈႁွင်ႉဢဝ်ၼၼ်ႉၵူႈၵေႃႉၵူႈၵူၼ်း ႁဵတ်းလွင်ႈၵႃႈသင်သေဢမ်ႇဝႃႈ၊ ႁဵတ်းလွင်ႈၼၼ်ႉယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈသေၵမ်းလူၺ်ႈ။
ၵူၼ်းဢမ်ႇတႄႇၼႃႈႁိူၼ်းဢိၵ်ႇတင်းမႄႈမၢႆႈ
25ၼႂ်းလွင်ႈၶဝ်ၸိူဝ်းဢၼ်ဢမ်ႇမီးၽူဝ်ဢမ်ႇမီးမေးၼၼ်ႉၸမ်ႉ၊ ပိၵ်ႉသမ်ႉပိင်းၺၢပ်ႈၸဝ်ႈၽြႃးဢမ်ႇမီးတီႈၵဝ်သေၵေႃႈ၊ ၵဝ်ၸီႇယၢင်ႇၸိူဝ်ႉၼင်ႇၵေႃႉဢၼ်လႆႈၶၢမ်ႇၵျေးၸူးၸဝ်ႈၽြႃး ပုၼ်ႈဢၼ်တၵ်းႁႂ်ႈၵဝ်ပဵၼ်ၵေႃႉဢၼ်မီးသဵတ်ႈၸႃႇၼၼ်ႉဢေႃႈ။- 26တၢင်းဢၼ်ၸီႇယၢင်ႇၼႆႉၸမ်ႉ၊ ၵွပ်ႈပိူဝ်ႈလွင်ႈတၢင်းဢၼ်ၼိၵ်ႈၸၢၵ်ႈငႅၼ်းသႄး ဢၼ်လႆႈၶၢမ်ႇတေႃႈလဵဝ်ၼႆႉၼၼ်ႉလႄႈၵူၼ်းလီပဵၼ်ၸိူဝ်ႉၼင်ႇဢၼ်မၼ်းပဵၼ်ယူႇၼၼ်ႉဢေႃႈ။- 27ပေႃးမႂ်းမီးမေးၸိုင်ယႃႇပေၵျၢမ်ႇပေပွင်ႁႂ်ႈလႆႈလွတ်ႈ၊ ပေႃးလွတ်ႈတင်းမေးၸိုင်ယႃႇပေႁႃမေးထႅင်ႈ။- 28ၵူၺ်းၵႃႈပေႃးမႂ်းဢဝ်မေးၸိုင်မႂ်းဢမ်ႇမီးဢပႅတ်ႈ။ ၽူႈယိင်းဢၼ်ဢမ်ႇတွၼ်ႉဢဝ်ၽူဝ်ၼၼ်ႉၵေႃႈ၊ ပေႃးဢဝ်ၽူဝ်ၸိုင်ဢမ်ႇမီးဢပႅတ်ႈ၊ ၼႂ်းဝႃႈၼၼ်သေၵေႃႈ ၶဝ်ၸိူဝ်းဢၼ်ႁဵတ်းၸိူဝ်ႉၼင်ႇၼၼ်ၼၼ်ႉတၵ်းလႆႈၶၢမ်ႇတုၵ်ႉၶႃႉ တၢင်းဢၼ်ၼိၵ်ႈၸၢၵ်ႈငႅၼ်းသႄး လေႃးၵီႇဢေႃႈ။ ၼႂ်းတီႈႁဵင်းၼႆႉၵဝ်လၢတ်ႈဝႆႉႁႂ်ႈသူလွတ်ႈတၢင်းတုၵ်ႉၶႃႉဢေႃႈ။
29ပီႈၼွင်ႉၶဝ်ဢိူၺ်း၊ ၵဝ်ဝႃႈၸမ်ႉ၊ ပိူဝ်ႈဢၼ်ၶိင်ႇၵႃႇလႃႉဢၼ်ၵိုတ်းဢၼ်ၵျၢၼ်ႇပွတ်းၼႃႇလႄႈ ၵေႃႉဢၼ်မီးမေးၼၼ်ႉၸိုင်တၵ်းလႆႈပဵၼ်ၸိူဝ်ႉၼင်ႇဢၼ်ဢမ်ႇမီးမေးဢေႃႈ။- 30ၵေႃႉဢၼ်ႁွင်ႉဢၼ်ႁႆႈၼၼ်ႉၸိုင်တၵ်းလႆႈပဵၼ်ၸိူဝ်ႉၼင်ႇဢၼ်ဢမ်ႇႁွင်ႉဢမ်ႇႁႆႈဢေႃႈ။ ၵေႃႉဢၼ်သိူဝ်းပျေႃႇၼၼ်ႉၸိုင် တၵ်းလႆႈပဵၼ်ၸိူဝ်ႉၼင်ႇဢၼ်ဢမ်ႇသိူဝ်းဢမ်ႇပျေႃႇဢေႃႈ။ ၵေႃႉဢၼ်သိုဝ်ႉဢုၵ်ႉၸႃႇၶူဝ်းလဵင်းၼၼ်ႉၸိုင် တၵ်းလႆႈပဵၼ်ၸိူဝ်ႉၼင်ႇဢၼ်ဢမ်ႇမီးၵႃႈသင်ဢေႃႈ။- 31ၵေႃႉဢၼ်သုင်းသွင်ႇလေႃးၵႃႉၼၼ်ႉၸိုင် တၵ်းလႆႈပဵၼ်ၸိူဝ်ႉၼင်ႇဢၼ်ဢမ်ႇသုင်းဢမ်ႇသွင်ႇဢေႃႈ။ လွင်ႈမၼ်းၸမ်ႉပုင်ႇႁၢင်ႈလေႃးၵႃႉၼႆႉ ၸၢင်ႈၶၢႆႉပုတ်ႈလႄႈႁၢႆလၢႆဢေႃႈ။
32ၵဝ်မီးဢလူဝ်ႇၶႂ်ႈႁႂ်ႈသူၵၢင်းလွတ်ႈတင်းတၢင်းဢၼ်မႆႈၸႂ်ၶီၸႂ်ဢေႃႈ။ ၵေႃႉဢၼ်ဢမ်ႇမီးမေးၼၼ်ႉၸမ်ႉ၊ ၼင်ႇႁိုဝ်တၵ်းထုၵ်ႇၸႂ်ၸဝ်ႈၽြႃးၸိုင် ၸၢင်ႈဝႆႉသတီႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းၸဝ်ႈၽြႃးၵူၺ်းဢေႃႈ။- 33ၵေႃႉဢၼ်မီးမေးၼၼ်ႉၸမ်ႉ၊ ၼင်ႇႁိုဝ်တၵ်းထုၵ်ႇၸႂ်မေးမၼ်းၸိုင် ၸၢင်ႈဝႆႉသတီႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉဢေႃႈ။- 34မိူၼ်ၼင်ႇၼၼ်ၽူႈယိင်းဢၼ်ဢမ်ႇမီးၽူဝ်ဢိၵ်ႇတင်းၽူႈယိင်းဢၼ်မီးၽူဝ်ၼၼ်ႉ မီးတီႈဢၼ်ပႅၵ်ႇပိူင်ႈၵၼ်ဢေႃႈ။ ၽူႈယိင်းဢၼ်ဢမ်ႇမီးၽူဝ်ၼၼ်ႉ ၼင်ႇႁိုဝ်တူဝ်ၶၼ်ႇထႃႇတင်းၸႂ်ဝီႉၺိၺ်ႇသွင်ပႃးတၵ်းမူတ်းၸၢင်ႇၸိုင်ၸၢင်ႈဝႆႉသတီႉ လွင်ႈတၢင်းဢၼ် ၸၢပ်ႈသႅင်ႇၵၼ်တင်းၸဝ်ႈၽြႃးၵူၺ်းဢေႃႈ။ ၽူႈယိင်းဢၼ်မီးၽူဝ်ၼၼ်ႉၸမ်ႉ၊ ၼင်ႇႁိုဝ်တၵ်းထုၵ်ႇၸႂ်ၽူဝ်မၼ်းၸိုင် ၸၢင်ႈဝႆႉသတီႉလွင်ႈတၢင်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉဢေႃႈ။- 35မိူဝ်ႈဢၼ်ၵဝ်ဝႃႈၸိူဝ်ႉၼင်ႇၼႆၼၼ်ႉ၊ ၵဝ်ထွၵ်ႈလူၺ်ႈဢၵျူဝ်းသူၵူၺ်းလႄႈဝႃႈဢေႃႈ။ ၼင်ႇႁိုဝ်တၵ်းဢဝ်တူင်ႇၸိူၵ်ႈထႅပ်းသုပ်းဢဝ်သူၸိုင်ၵဝ်ဝႃႈဢမ်ႇၸႂ်ႈ။ ၼင်ႇႁိုဝ်သူတၵ်းၵမ်ၵျၢင်ႉဢၼ်ထုၵ်ႇဢၼ်လီလႄႈ၊ ယင်းဢမ်ႇမီးတၢင်းဢၼ်သုၵ်ႉၸႂ်ယုင်ႈၸႂ်လႄႈႁဵတ်းဝၢတ်ႈၸဝ်ႈၽြႃးသေႇသေႇၸိုင်၊ ၵဝ်ၸင်ႇဝႃႈၼင်ႇၼႆဢေႃႈ။
36ပေႃးသေၵေႃႉသေၵူၼ်းထၢင်ႇမၼ်းႁဵတ်းလွင်ႈဢၼ်ဢမ်ႇထုၵ်ႇဢမ်ႇလီ တီႈၽူႈသၢဝ်ၵၼ်ႇၺႃႇမၼ်းၼၼ်ႉလႄႈပေႃးၽူႈသၢဝ်ၼၼ်ႉဢသၢၵ်ႈထူၼ်ႈသေယဝ်ႉ၊ ယင်းဢမ်ႇမီးၽူဝ်လႄႈလွင်ႈတၢင်းဢၼ်ဢၢပ်ႈပၼ်ၵၼ်မီးၸိုင်၊ ႁႂ်ႈၵေႃႉၼၼ်ႉႁဵတ်းၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇတႃႉ။ ဢမ်ႇမီးဢပႅတ်ႈ၊ ႁႂ်ႈဢဝ်ပၼ်ၵၼ်သေ။- 37ၵူၺ်းၵႃႈၵေႃႉဢၼ်ႁူဝ်ၸႂ်မၼ်ႈၶိူင်ႇၵွပ်ႈပိူဝ်ႈဢၼ်မၼ်းမီးဢၶႂၢင်ႉဢၼ်လႆႈႁဵတ်းၸိူဝ်ႉၼင်ႇဢၼ်မၼ်းၶႂ်ႈႁဵတ်း ဢိၵ်ႇတင်းဢၶႂၢင်ႉဢၼ်လႆႈၶျုၵ်ႈဝႆႉဢလူဝ်ႇမၼ်းၼၼ်ႉယူႇလႄႈၸီႇယၢင်ႇဝႆႉၵႃႈၼႂ်းႁူဝ်ၸႂ်မၼ်းလႄႈဝႃႈ တၵ်းဢမ်ႇပၼ်ဢဝ်ၽူႈသၢဝ်ၵၼ်ႇၺႃႇမၼ်းတီႈၵၼ်၊ ဝႃႈၼင်ႇၼႆၼၼ်ႉႁဵတ်းဢၼ်လီဢေႃႈ။- 38ၼႂ်းဝႃႈၼၼ်သေၵေႃႈ ၵေႃႉဢၼ်ပၼ်ဢဝ်ၽူႈသၢဝ်ၵၼ်ႇၺႃႇမၼ်းၼၼ်ႉႁဵတ်းဢၼ်လီဢေႃႈ။ ၵေႃႉဢၼ်ဢမ်ႇပၼ်ဢဝ်ၼၼ်ႉၸမ်ႉ၊ ယဵင်ႈၶႅၼ်းႁဵတ်းဢၼ်လီဢေႃႈ။
39ၽူႈယိင်းၸမ်ႉ၊ ၼႂ်းၶိင်ႇၵႃႇလႃႉၸူဝ်ႈဢၼ်ၽူဝ်မၼ်းဢမ်ႇပႆႇတၢႆၼၼ်ႉၸိုင် မတ်ႉၽုၵ်ႇဝႆႉယူႇဢေႃႈ။ ပေႃးၽူဝ်မၼ်းတၢႆၸမ်ႉ၊ ၵႃႈၼင်ႇဢၼ်ဢလူဝ်ႇတူဝ်ၸဝ်ႈၵဝ်ႇမီးၼၼ်ႉ၊ မၼ်းမီးဢၶႂၢင်ႉဢၼ်လႆႈပဵၼ်မေးပိူၼ်ႈၼႂ်းၸဝ်ႈၽြႃးၵူၺ်းဢေႃႈ။- 40ပိၵ်ႉသမ်ႉမၼ်းမီးဢၶႂၢင်ႉသေၵေႃႈ၊ ပေႃးဢမ်ႇပဵၼ်မေးပိူၼ်ႈလႄႈယူႇၸိုင်မၼ်းယဵင်ႈၶႅၼ်းမီးမင်ႇၵလႃႇဝႃႈၼႆ ၵဝ်မီးသၽေႃးဢေႃႈ။ တီႈၵဝ်ၵေႃႈမီးဝီႉၺိၺ်ႇၽြႃးပဵၼ်ၸဝ်ႈယူႇဝႃႈၼႆ ၵဝ်မီးတၢင်းဢၼ်ၸႂ်ၸပ်းၸႂ်ၸွႆးယူႇဢေႃႈ။
Currently Selected:
1 ၵေႃးရိၼ်ႇထူႉ 7: CBMS
Highlight
Share
Copy
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
