1 ၵေႃးရိၼ်ႇထူႉ 4

ၵၢၼ်ငၢၼ်းတမၢၼ်ႇၸဝ်ႈၶရိၸ်ႈ

1ႁႂ်ႈပိူၼ်ႈတၢင်ႇၵေႃႉမၢတ်ႈတွင်းႁဝ်းဝႆႉ ပဵၼ်ၸိူဝ်ႉၼင်ႇၵူၼ်းၸႂ်ႉၵူၼ်းသွႆၸဝ်ႈၶရိၸ်ႈဢိၵ်ႇတင်း ၽၼ်ႇတႃႇၸူဝ်း ဢၼ်ပႂ်ႉတၢင်းဢၼ်လိုၵ်ႉဢၼ်လမ်ႇၽြႃးပဵၼ်ၸဝ်ႈၼၼ်ႉသေၵမ်းလူၺ်ႈ။- 2လိူဝ်သေၼၼ်ႉ၊ ၽၼ်ႇတႃႇၸူဝ်းဢၼ်ဝႃႈၸမ်ႉ၊ တၵ်းလႆႈမီးသဵတ်ႈၸႃႇဢေႃႈ။- 3ပိၵ်ႉသမ်ႉသူဢိၵ်ႇတင်းပိူၼ်ႈတၢင်ႇၵေႃႉၸီႇယၢင်ႇၵဝ်လႄႈဝႃႈ ဢမ်ႇမီးသဵတ်ႈၸႃႇ၊ ဝႃႈၼင်ႇၼႆသေၵေႃႈ၊ ၵဝ်ဢမ်ႇဝႆႉဢမူႉ၊ ၵဝ်ဢမ်ႇၸီႇယၢင်ႇတူဝ်ၸဝ်ႈၵဝ်ႇ။- 4လွင်ႈမၼ်းၸမ်ႉ ၸႂ်တူဝ်ၸဝ်ႈၵဝ်ႇဢမ်ႇတၢင်ႇဢပႅတ်ႈတီႈတူဝ်ၸဝ်ႈၵဝ်ႇ၊ ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈလွင်ႈၼၼ်ႉလႄႈ ၵဝ်ၵၢင်းလွတ်ႈတင်းဢပႅတ်ႈဢမ်ႇၸႂ်ႈ။ ၵေႃႉဢၼ်ၸီႇယၢင်ႇၵဝ်ၸမ်ႉ၊ ပဵၼ်ထႃႇဝရႃႉၽြႃးဢေႃႈ။- 5ပေႃးပဵၼ်ၸိူဝ်ႉၼင်ႇၼႆၸိုင်၊ ဢမူႉၵႃႈသင်သေဢမ်ႇဝႃႈ၊ ၸူဝ်ႈဢၼ်ၸဝ်ႈၽြႃးဢၼ်တၵ်းႁႂ်ႈလွင်ႈတၢင်းဢၼ်သိူင်ႇဝႆႉမႅပ်ႉဝႆႉ ၵႃႈၼႂ်းဢၼ်လပ်းသိင်ႇတင်းလၢႆပိုတ်ႇလႅင်းလႄႈ တၢင်းၵျၢမ်ႇတၢင်းပွင်ႁူဝ်ၸႂ်တင်းလၢႆထၢင်ႇသႃးၼၼ်ႉ ဢမ်ႇပႆႇပေႃႇပႆႇမႃးၼၼ်ႉ ယႃႇပေၸီႇယၢင်ႇ။ မိူဝ်ႈၼၼ်ႉၵူႈၵေႃႉၵူႈၵူၼ်းႁင်းၽႂ်ႁင်းမၼ်း တၵ်းလႆႈၶၢမ်ႇတၢင်းဢၼ်ၽြႃးပဵၼ်ၸဝ်ႈယွင်ႈယေႃးဢေႃႈ။

6ပီႈၼွင်ႉၶဝ်ဢိူၺ်း၊ ၵဝ်ထွၵ်ႈလူၺ်ႈဢၵျူဝ်းသူသေလႄႈ ဢဝ်ပုင်ႇၵဝ်ဢိၵ်ႇတင်း ဢႃႇပေႃးလူႉ လၢတ်ႈလွင်ႈၼင်ႇႁိုဝ် တၵ်းထွၵ်ႈလူၺ်ႈႁဝ်းသေလႄႈ ႁူႉလွင်ႈဢၼ်သူဢမ်ႇလႆႈပူၼ်ႉလႆႈလိူဝ်ၵျၢမ်းလိၵ်ႈ ဢိၵ်ႇတင်းလွင်ႈဢၼ်သူဢမ်ႇလႆႈမီးႁူဝ်ၸႂ်မႃႇၼႃႉဢၼ်သုင် လႄႈဢိင်ၵေႃႉၼိုင်ႈထဵင်ပႅတ်ႈၵေႃႉၼိုင်ႈၼၼ်ႉဢေႃႈ။- 7လွင်ႈမၼ်းၸမ်ႉ ၽူႈလႂ်ႁႂ်ႈသူပႅၵ်ႇပိူင်ႈၵၼ်။ လွင်ႈတၢင်းဢၼ်သူဢမ်ႇၶၢမ်ႇဢမ်ႇဢဝ် ၵႃႈၼႂ်းမိုဝ်းပိူၼ်ႈလႄႈလႆႈၼၼ်ႉ မီးတီႈသူသေၸိူဝ်ႉသေပိူင်ႁိုဝ်။ ပေႃးၶၢမ်ႇဢဝ်ၵႃႈၼႂ်းမိုဝ်းပိူၼ်ႈၸိုင် ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ႁဵတ်းၸိူဝ်ႉၼင်ႇႁၢင်ႈဢၼ်ဢမ်ႇၶၢမ်ႇဢမ်ႇဢဝ်ၼၼ်ႉလႄႈ ဢုပ်ႇဝၢဝ်းယူႇၼင်ႇႁိုဝ်။- 8တေႃႈလဵဝ်ၼႆႉသူဢိမ်ႇတဵမ်ဝႆႉဢေႃႈ။ ၸၢင်ႈမီးငိုၼ်းဢေႃႈ။ ၼႂ်းမိူဝ်ႈဢၼ်ႁဝ်းဢမ်ႇမီးၼၼ်ႉၸိုင်၊ သူၸၢမ်ႇၸႃးယူႇၸိူဝ်ႉၼင်ႇၶုၼ်ႁေႃၶမ်းဢေႃႈ။ ၼင်ႇႁိုဝ်ႁဝ်းတၵ်းမီးဢၶႂၢင်ႉဢၼ်လႆႈၸၢမ်ႇၸႃးလူၺ်ႈၵၼ်တင်းသူၸိုင် ၵဝ်မီးဢလူဝ်ႇၶႂ်ႈႁႂ်ႈသူၸၢမ်ႇၸႃးဢမၢၼ်ႇၶၼ်ပဵၼ်ဢေႃႈ။

9ၵဝ်ထၢင်ႇၽြႃးပဵၼ်ၸဝ်ႈဢဝ်ႁဝ်းဢၼ်ဝႃႈ တမၢၼ်ႇၸဝ်ႈၸိူဝ်းၼႆႉဢွၵ်ႇၼႄမိူၼ်ၸိူဝ်ႉၼင်ႇ ၵူၼ်းဢၼ်ဝႆႉပုၼ်ႈဢၼ်တၵ်းဢဝ်တၢႆၼၼ်ႉလိုၼ်းလင်ပိူၼ်ႈဢေႃႈ။ လွင်ႈမၼ်းၸမ်ႉႁဝ်းၼႆႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်ၼႄပျႃးၼႃႈၼႂ်းပွႆး ပုၼ်ႈဢၼ်ပိူၼ်ႈတၵ်းတူၺ်းၵႃႈတီႈၽၢႆႇၼႃႈၵူၼ်းလေႃးၵီႇ ဢိၵ်ႇတင်းတမၢၼ်ႇၵၢင်ႁၢဝ်တင်းလၢႆဢေႃႈ။- 10ႁဝ်းၼႆႉပဵၼ်ၵူၼ်းမိူၵ်ႈၵွပ်ႈပိူဝ်ႈလွင်ႈၸဝ်ႈၶရိၸ်ႈဢေႃႈ။ သူၸမ်ႉ၊ ပဵၼ်ၵေႃႉဢၼ်မီးပိင်ႇၺႃႇၼႂ်းၸဝ်ႈၶရိၸ်ႈဢေႃႈ။ ႁဝ်းၼႆႉပဵၼ်ၵေႃႉဢၼ်ႁႅင်းလဵၵ်ႉႁႅင်းၵေႇဢေႃႈ။ သူၸမ်ႉ၊ ပဵၼ်ၵေႃႉဢၼ်ႁႅင်းယႂ်ႇႁႅင်းၼမ်ဢေႃႈ။ သူၸိုင်ပဵၼ်ၵေႃႉဢၼ်မီးသရေႇဢေႃႈ။ ႁဝ်းၸမ်ႉ၊ ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ဢူၵ်းဢၼ်ဢၢႆဢေႃႈ။- 11တေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ ႁဝ်းလႆႈဢိုပ်းယၢၵ်ႈတၢင်းၵိၼ်တၢင်းၶူပ်းယူႇဢေႃႈ။ လႆႈတွင်ႉမႆႈၼမ်ႉယူႇဢေႃႈ၊ လႆႈမီးတၢင်းဢၼ်ဢမ်ႇမီးၶူဝ်းမီးလဵင်းယူႇဢေႃႈ။ လႆႈၶၢမ်ႇတၢင်းဢၼ်ပိူၼ်ႈၼိၵ်ႈၸၢၵ်ႈငႅၼ်းသႄးယႅၼ်ႉတူပ်းယူႇဢေႃႈ။ ပဵၼ်ၵေႃႉဢၼ်ဢမ်ႇထူပ်းဢမ်ႇႁၼ်တီႈယူႇတီႈသဝ်းဢေႃႈ။- 12ပဵၼ်ၵေႃႉဢၼ်လႆႈဢဝ်မိုဝ်းတူဝ်ၸဝ်ႈၵဝ်ႇႁဵတ်းဢၼ်ယၢပ်ႇဢၼ်ၽိုတ်ႇယူႇဢေႃႈ။ မိူဝ်ႈဢၼ်လႆႈၶၢမ်ႇတၢင်းဢၼ်သႄႉဢၼ်သွမ်းၸိုင်၊ ႁဵတ်းမႅတ်ႈတႃႇဢေႃႈ။ မိူဝ်ႈဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄးၸိုင်ယိူၼ်ႉၶၢမ်ႇဢေႃႈ။- 13မိူဝ်ႈဢၼ်လႆႈၶၢမ်ႇတၢင်းဢၼ်သရေႇလူႉၸိုင်တွင်းပၢၼ်ႇဢေႃႈ။ လႆႈပဵၼ်ၸိူဝ်ႉၼင်ႇလွင်ႈတၢင်းဢၼ်ၵူဝ်ႈၵိူၵ်ႇၵႃႈၼႂ်းလေႃးၵႃႉၼႆႉၼၼ်ႉ ဢိၵ်ႇတင်းၸိူဝ်ႉၼင်ႇမုၼ်ႈဢၼ်ဢဝ်ယူးပတ်းဢွၵ်ႇသေၵႃႈၼႂ်း ၵူႈတီႈၵူႈလႅၼ်ၼၼ်ႉယူႇတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။

14ၵဝ်တႅမ်ႈၸိူဝ်ႉၼင်ႇၼႆႁႂ်ႈသူဢူၵ်းဢၢႆဢမ်ႇၸႂ်ႈ။ ၵဝ်မၢတ်ႈသူပဵၼ်ၸိူဝ်ႉၼင်ႇလုၵ်ႈႁၵ်ႉၵဝ်လႄႈ ၵဝ်ပၼ်သတီႉဢေႃႈ။- 15ပိၵ်ႉသမ်ႉသူမီးသြႃႇဢၼ်သွၼ်ပၼ်လွင်ႈၸဝ်ႈၶရိၸ်ႈမိုၼ်ႇၼိုင်ႈသေၵေႃႈ၊ သူဢမ်ႇမီးပေႃႈၼမ်ၼႃႇ။ ၵွပ်ႈပိူဝ်ႈတြႃးသတၢင်းသိူဝ်းပျေႃႇလႄႈ ၵဝ်ႁႂ်ႈသူၵိူတ်ႇလဵင်ႉပဵၼ်မႃးၼႂ်းၸဝ်ႈၶရိၸ်ႈယဝ်ႉ။- 16ပိူဝ်ႈၼႆလႄႈ လွင်ႈၼင်ႇႁိုဝ်သူတၵ်းၵမ်ၵျၢင်ႉၸိူဝ်ႉၼင်ႇဢၼ်ၵဝ်ၵမ်ၵျၢင်ႉၼႆႉၸိုင်၊ ၵဝ်တိုၵ်းယူင်းတွင်းပၢၼ်ႇသူဢေႃႈ။

17ၵွပ်ႈပိူဝ်ႈလွင်ႈၼႆႉလႄႈၵဝ်ပွႆႇၸႂ်ႉတီႉမေႃးသေႇလုၵ်ႈႁၵ်ႉၵဝ်ဢၼ်မီးသဵတ်ႈၸႃႇၼႂ်းၸဝ်ႈၽြႃးၼၼ်ႉၵႂႃႇတီႈသူဢေႃႈ။ မၼ်းတၵ်းႁႂ်ႈသူၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းၵမ်တၢင်းၵျၢင်ႉ ဢၼ်ၵဝ်ၵမ်ၵျၢင်ႉၵႃႈၼႂ်းၸဝ်ႈၶရိၸ်ႈၸွမ်းၵႃႈၼင်ႇဢၼ်ၵဝ်သင်ႇသွၼ် ၵူႈတီႈၵူႈလႅၼ်ၼႂ်းၸိူဝ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉဢေႃႈ။

18ၵွပ်ႈပိူဝ်ႈဢၼ်ၵမ်ႈၽွင်ႈထၢင်ႇၵဝ်တၵ်းဢမ်ႇမႃးတီႈသူယဝ်ႉလႄႈ၊ ၶဝ်မီးမႃႇၼႃႉတၢင်းဢၼ်ၸႂ်သုင်ယူႇဢေႃႈ။- 19ၵူၺ်းၵႃႈပေႃးၸဝ်ႈၽြႃးမီးဢလူဝ်ႇၸိုင်ၵဝ်တၵ်းၸဵဝ်းမႃးဢေႃႈ။ မိူဝ်ႈဢၼ်မႃးၼၼ်ႉၸိုင်၊ ၵဝ်တၵ်းႁူႉၸႅင်ႈၵႂၢမ်းၶဝ်ၸိူဝ်းဢၼ်မႃႇၼႃႉၸႂ်သုင်ၼၼ်ႉဢမ်ႇၸႂ်ႈ၊ ၵဝ်တၵ်းႁူႉၸႅင်ႈတၼ်းၶူဝ်းၶဝ်ဢေႃႈ။- 20လွင်ႈမၼ်းၸမ်ႉ မိူင်းၽြႃးပဵၼ်ၸဝ်ႈတႄႇပဵၼ်ၼႂ်းၵႂၢမ်းဢမ်ႇၸႂ်ႈ။ တႄႇပဵၼ်ၼႂ်းတၼ်းၶူဝ်းဢေႃႈ။- 21သူမီးဢလူဝ်ႇၸိူဝ်ႉၼင်ႇႁိုဝ်။ ၵဝ်တၵ်းလႆႈဢဝ်တင်းၶွၼ်ႉႁဵဝ်းမႃးၵႃႈတီႈသူႁိုဝ်။ ဢမ်ႇၼၼ်တၵ်းလႆႈဢဝ်တင်းမႅတ်ႈတႃႇ ဢိၵ်ႇတင်းၸႂ်ဢၼ်ၼိမ်ၶျႃးတႅမ်ႇမႃးႁိုဝ်။

Currently Selected:

1 ၵေႃးရိၼ်ႇထူႉ 4: CBMS

Highlight

Copy