FAARSO 38
38
QAAGGONNITA DAAWITI FAARSO
SHETINO MANCHI HUUCCATTO
1Kaaliiqa'ya ballo, hanqikkinni ruffootie;
aarikkinni gantootie.
2Maxxikki qasinoe;
angakkino aana'ya dirritino.
3Hanqikkinni kainohunni maali'ya difayyino;
cubbi'yanni kainohunni manninati'ya keere diafi'rino.
4Cubbi'ya lolahu gede egemminoe;
lowo duhi gede ayirrinoe.
5Hambe'yanni kainohunni,
mada'ya shante bobbu.
6Lowo geeshsha gadadamoommo;
barra wo'ma wi'lanni kadame keeshshoommo.
7Fooggalunni kainohunni giiramoommo;
lowo geeshsha dhiwamoommo.
8Lowo geeshsha daafure shaqqoommo;
dhibbunni kainohunni hakankaroommo;
9Mooticha'ya halcho'ya baala maatiro egennootto;
uratto'ya baala macciishshatto.
10Wodana lowo geeshsha tuminoe; wolqano ba'inoe;
ille'yano jaaroortino.
11Mada'yanni kainohunni baxillaano'yanna jaalla'ya shiqqo gibbinoe;
fiixi'yano xooqinoe.
12Shitaera hasidhannoeri woshshaado wortinoe;
qarrameemmota baxxannori huntannoe gara ma'litino;
anera gano gana diuurrissanno.
13Ani kayinni macciishshannokki macciweelo,
coy'rannokki danqicha lawoommo.
14Macciishsha hoogatenni kainohunni,
tumo qolannokki manchi gede ikkoommo.
15Kaaliiqa'ya ballo, ate hexxeemmona,
Mooticha Magano'ya ati dawarattoe.
16«Qarrameenna baarigaarra'ya hagiidhitoonke;
uwa'yanni kainohunni aana'ya naaxxitoonke» yoommo.
17Ani uwammora rahoommo;
qarri'yano aani'yanni diho'lino.
18Sao'ya ifaaxxeemmo;
cubbi'ya daafira dadilleemmo.
19Baarigaarra'ya wolqatenni no;
beebbatenni gibbannoeri batidhino.
20Danchumma assoommo daafira,
danchumma bunshetenni qoltannoeri gibbannoe.
21Kaaliiqa ballo, ati callachishshootie;
Magano'ya anewiinni faffooti.
22Mooticha gatisaancho'ya,
rakke kaa'lie.
Currently Selected:
FAARSO 38: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
