FAARSO 35
35
DAAWITI FAARSO
KAALIIQI KAA'LO AFI'RATE ASSINOONNI HUUCCATTO
1Kaaliiqa ballo! Gibbannoere giwi;
qassannoere qasi.
2Siwiilu uddano uddidhe,
wonqo amaxxite, dagge gatisie.
3Bagadokki adhite shorritannoeri doogo cufi;
aneno, «Lubbokki gatiseemmohe» yiie.
4Shitaera hassannore baala saalunna shollinyu amadannonsa;
anera busha heddannori irraabbe badhera higgo.
5Kaaliiqi sokkaasinchi shorrannansa,
diilallote tungoonni kuri gede ikkito.
6Kaaliiqi sokkaasinchi shorre ganannansa,
doogonsa shalaqonna tunsicho ikkito.
7Beebbatenni huntaera woshshaadonsa wortinoena,
ane amaddara qile bale untinoena,
8hedeweelcho dano iillitonsa;
untino bale egemmitonsa.
9Hatte yannara, anera Kaaliiqinni tashshi yaannoe;
gatisasinnino hagiidheemmo.
10Wo'mu wodani'yanni, Kaaliiqa,
«Ate gedeehu ayi no?
Ati, gadadaamo wolqaataamu anganni,
buxicho gawajjannohu anganni gatisatto» yeemmo.
11Bushuullu beebbatenni bushiishshue;
afoommokkirira kaphunni naqqassue.
12Danchumma bunshetenni qoltue;
aneno callachishshue.
13Ani kayinni insa xiwantu yannara lowo geeshsha dadilloommo;
ita aga agure umo'ya goddaasoommo;
umo'ya heeshshi asse insara huuccoommo.
14Jaali'yaranna rodii'yara ikkeemmo gede ikkoommonsa;
ama shii'rinohu gede hururame wi'loommo.
15Insa kayinni ani qarramummo yannara qacifattaera shiqqino;
egennoommokki manni gaangeessinoe;
agurtannokkiha gantinoe.
16Yawaawulootu qacifattinoe;
sammi yite hinko ga'midhinoe.
17Kaaliiqa! Mamooti geeshsha sammi yite la"attoe?
Ane doobbiyu gede gawajjitannoriwiinni gatisie.
18Hakkawoyite Kaaliiqa!
Lowo songo mereero galaxxeemmohe;
lowo manni mereerono ayirriseemmohe.
19Iimi uullanni ka'e gibbannoerira tashshi yoonkensa;
beebbatenni gibbannoeri aana'ya qeexaa'litanno gede assitootie.
20Afiinsanni danchu coyi difulanno;
manna iillannokki mannira busha maltanno.
21«Hii"i, kune hawallella loosokki anfummo!» yitanni,
su'ma huntue.
22Kaaliiqa'ya! Ati afoottona sammi yitooti;
Mootichi'ya ballo anewiinni faffooti.
23Xaano Mooticha'ya ka'e halamie;
Magano'ya ballo coyi'ramie.
24Kaaliiqa Magano'ya keeraanchimmakki garinni su'ma'ya seekki;
aana'ya qeexaa'litanno gede assitooti.
25«Xa hashshu lubbonke hagiidhitino» yitoonke;
qolteno, «Gabbi assinoommosi» yite coyidhoonke.
26Qarrame hee'reenna hagiidhitannori saalfatto;
mitteenni ti'maa'mito;
ane aana boo'nitannori saalanna shollinye uddidho.
27Keeraanchimma'ya affara baxxannorira kayinni, tashshi yoonsa;
wo'manka woyite hagiidhitanni,
«Soqqamaanchisi keere baxannohu Kaaliiqi, ayirradoho» yito.
28Hatte yannara barra wo'ma,
arrawi'ya keeraanchimmakkinna galatakki kulanno.
Currently Selected:
FAARSO 35: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
