MAATEWOOSI 22
22
ADHAMATE JILI LAWISHSHA
(Luq 14:15-24)
1Yesuusi lede masalsanni, 2«Gordu Gashshooti beettisira seenne haa'rara jila jilino moote lawanno. 3Moote woshshinoonni manni jilaho daanno gede qaagiissitara soqqamaanosi insawa soyi. Mannu kayinni jilasi daa dihasi'rino.
4«Moote xaano wole soqqamaano, ‹Woshshini manniwa martine, kuneeti oosote seenne haa'ranni jila ji'loommo. Handanna hardino lalo gorroommo; baalunkuri qixxaawino; kunnira jilaho amme!› yiino yitine kulle. 5Woshshini manni kayinni yinoonnire lashshi asse, mitu gatesi loosi'rara, mitu daddalisira ha'ri. 6Wolootu qolte soqqamaano gante shollishshe shitu. 7Hatte yannara moote hanqe olantosi soyenna, hakkore shiture shite katamansano giirtu. 8Hakkunni gedensaanni soqqamaanosira, ‹Kuneeti jilu qixxaawino; woshshinoonniri kayinni jilu dimalinonsareeti. 9Kunnira, doogga martine affini manna baala jilaho woshshe› yiinsa. 10Soqqamaanono doogga marte affu manna baala danchano bushano gamba assitu. Kunni garinni mannu jilu hara wo'mi.
11«Moote jilaho dayino manna la"ara haru giddora eanno woyite kayinni, jilu uddano uddi'rinokkiha mitto mancho afe, 12‹Jaala'ya, jilu uddano uddi'rittokkinni kawiira hiitto ikkite eitto?› yii. Manchu kayinni mittoreno didawarino. 13Moote soqqamaanosira, ‹Anganna lekka usurtine gobba tunsichoho fushshitine tugge; hakkiicho wi'lanna suume ita agartannosi› yiino» yii.
14Yesuusi lede, «Kunnira, woshshantinori batinyeho; dooraminohu kayinni shiima mannaati» yii.
GIWIRE BAATATE DAAFIRA SHIQQINO XA'MO
(Maq 12:13-17; Luq 20:20-26)
15Hakkunni gedensaanni, Farisootu hadhe Yesuusa coyinni woshshaaddanno gara ma'litu. 16Rosaanonsa Heeroodisi manni ledo Yesuusiwa sokke, «Rosiisaancho, ati halaalaancho ikkoottotanna Maganu doogo halaalunni rosiisattota egenninoommo. Manna waajjite assatto coyi dino; mannahono godowa dihosatto» yituhu gedensaanni, 17«Hanni kulinke; jawu Roomu Mootera Qeesaarira giwire aa seerahonso seerimalete?» yite xa'mitusi.
18Yesuusi kayinni bunshensa afe, «Ki'ne lawisiisaano, mayira fonqoltinannie? 19Hanni giwireho uyinanni woxe leellishshe"e!» yiinsa. Insano mitte saante abbite leellishshusi. 20Isi qole, «Tenne saante aana noo misile ayete? Aanaho borreessinoonni su'mino ayeho?» yee xa'minsa.
21Insano, «Jawu Roomu Mooteho!» yitu.
Yesuusi qole, «Hakkawoyiteetiro, Qeesaariha Qeesaarira, Maganunniha Maganoho uuyye!» yiinsa.
22Insano macciishshituhu gedensaanni, coyi'rinore maala'lite iso agurte hadhu.
REYOTENNI KA"ATE DAAFIRA SHIQQINO XA'MO
(Maq 12:18-27; Luq 20:27-40)
23Hakko barranni, «Reyotenni ka"a dino» yitannori Seduqootu Yesuusiwa dagge, 24«Rosiisaancho! Muse, ‹Mittu manchi galte adhe ooso ilikkinni reyiro, rodiisi galtesi ragi're sircho sayisosi› yiino.#Mar 25:5 lai. 25Ninkewa lamalu roduuwi no. Wo'munkura bayiru galte adhe ooso ilikkinni reyino. Kunnira maa'nu rodiisi galtesi ragi'rino. 26Layinkihuno, sayikkihuno, lamalkihu geeshsha aante aantetenni adhite sircho sa'ukkinni reyitino. 27Insa baalunku gedensaanni manchono reyitino. 28Lamalunku adhitinose daafira, reyitinori ka'anno waro, ise hiikkunni galte ikkitanno?» yite xa'mitu.
29Yesuusi qole, «Ki'ne Qullaawa Borronna Maganu wolqa afa hoogginoonnihura sodhinanni. 30Reyitinori ka'anno waro, mannu gordoho sokkaasinete gedeeha ikkanno ikkinnina diadhanno; diadhamanno. 31Maganu kulino'nere reyotenni ka"annire dinabbabbinoonni? 32Isi, ‹Ani Abirihaami Maganooti; Yisihaaqi Maganooti; Yaiqoobi Maganooti› yiino. Kunnira Maganu, heedhannori Maganooti ikkinnina reyitinori Magano di"ikkino» yee qolinsa. 33Mannuno konne coye macciishshe rosiishshisinni lowo geeshsha dhaggeeffati.
HAJAJO BAALA ROORTINO HAJAJO
(Maq 12:28-34; Luq 10:25-28)
34Yesuusi, Seduqoota sammi assinota macciishshite Farisootu mittowa gamba yitu. 35Insa giddonni mittu Muse Seeri rosiisaanchi Yesuusa jife la"ara hasi're, 36«Rosiisaancho! Baalanta roortino hajajo hiittenneeti?» yee xa'mi.
37Yesuusino, «‹Mooticha Maganokki wo'mu wodanikkinni, wo'ma lubbokkinni, wo'ma hedokkinni baxi!› yitannote. 38Baalanta roortannotinna umi hajajo tenneeti. 39Tenne labbannoti layinki hajajo, ‹Olliichokki umikki gede assite baxi!› yitannote. 40Seerunna himanaanote rosiishshi baalu xintaminohu tenne lamente hajajo aanaati» yiisi.
KIRISTOOSI AYE BEETTOOTI
(Maq 12:35-37; Luq 20:41-44)
41Farisootu gamba yite heedheenna Yesuusi, 42«Kiristoosire ma yitinanni? Isi aye beetto lawanno'ne?» yee xa'minsa.
Insano, «Daawiti Beettooti» yite qoltusi.
43Yesuusi qole, «Hatto ikkiro Daawiti Qullaawu Ayyaani kulannasi coyi'ri yannara hiitto ikke, ‹Mooticha› yee woshshisiyya?
44Daawiti, ‹Kaaliiqi Mootichi'yara,
baarigaarrakki lekkakkira woroonni qolammo geeshsha,
qiniite'yaanni ofolli!›
yiinona. 45Daawiti umisi, ‹Mooticha› yee woshshina, Kiristoosi hiitto ikke isi beetto ikkannoyya?» yee xa'mi.
46Isira mittoreno dawara dandiinohu dino. Hakko barrinni kayise iso ugge xa'mo xa'minosihu dino.
Currently Selected:
MAATEWOOSI 22: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
