LUQAASI 8

YESUUSA DUKKISINO MEENTO

1Hakkunni gedensaanni Yesuusi katammatenna qachuwate, Maganu Gashshootirenna Danchu Duduwire kulanni ha'ri. Tonaa lamunku rosaanosino ledosi no. 2Bushu ayyaani fulinonsarinna dhibbunni hurino meentino hoode ha'ranni no. Insa giddo lamalu durriisi fulinoseti Megidelitte Maariyaamino no. 3Heeroodisi mini roorrichiti Kuuza galte Yohaana, Soosinanna wolu lowo meenti no. Kuni meenti, Yesuusanna rosaanosi woxinsanni kaa'lanni keeshshino.

WIXA WIXI'RANNO MANCHI LAWISHSHA

(Mat 13:1-9; Maq 4:1-9)

4Lowo manni katamunni daye gamba yiita Yesuusi, 5«Mittu manchi wixa wixi'rara fuli. Wixa wixi'ranni hee'reenna, mitu mitu doogote gama uwe lekkatenni kakkadami; ceano dagge xinqite ittu. 6Wolu gumi bushshu qawaaxxisinokkiwa carete aana uwi. Mu'ranno woyite qufichu nookki daafira mooli. 7Wolu qole utu giddo uwi. Mu'rihu gedensaanni utu fuge amadeenna gumiweele gati. 8Wolu gumi dancha shaqqado baatto aana uwe mu'ri. Lophe xibbe ero laalino» yee lawishsha kulinsa.

Yesuusi lede, «Macca noohu macciishsho!» yiinsa.

YESUUSI LAWISHSHUNNI MAYIRA COYI'RI

(Mat 13:10-17; Maq 4:10-12)

9Rosaanosi Yesuusa, «Kunni lawishshi tiro maati?» yite xa'mitusi. 10Yesuusi daware, «Ki'nera go'linoha Maganu gashshooti coye afate hayyo uyinoonni'ne. Gobbaanni noorira kayinni la'anni heedhe buuxxannokki gede, macciishshitanni heedhe wodanchitannokki gede masalsatenni kullanninsa» yiinsa.

WIXA WIXANNO MANCHI LAWISHSHI TIRO

(Mat 13:18-23; Maq 4:13-20)

11Lawishshu tirono, «Wixu Maganu qaaleeti; 12doogote gama uwi wixi masalo, qaale yannate geeshsha calla macciishshitannoreeti. Ammante gattannokki gede Sheexaanu daye wodaninsa giddonni qaale xinqe adhanno. 13Carete aana uwino wixi masalo, qaale macciishshite hakkawoyintenni hagiidhite adhitannore kulanno. Insa kayinni yannate geeshsha ammantanno; rumushshu noonsakki daafira qarru daanno woyite mulenni gufidhe ubbanno. 14Utu mereero uwino wixi masalo, Maganu qaale macciishshituhu gedensaanni, tenne gobba hedo, jirote baxillinna wole yorto wodaninsa giddora e'e macciishshitino qaale beeshshiteenna gumiweelte gattannore kulanno. 15Shaqqado baattora uwino wixi masalo kayinni, danchu wodaninni qaale macciishshite agadhitinoreeti; insa qaalunni kaajjite guma laaltannoreeti» yii.

GO'LINORE XAWISANNO CAABBICHO

(Maq 4:21-25)

16Yesuusi lede, «Caabbicho xawise kae xawannokki gede aanaho gawate gombisannohu woy daallasaho woroonni worannohu dino. Roorenka minira eanno mannira baalaho xawanno gede assine worranni.

17«Maanxoonnihu leellikkinni digatanno. Go'linohu xawo fulikkinni dihee'ranno.

18«Kunnira qaale ma garinni macciishshitinanniro seekkitine wodanche; noosihura lendanni; noosikkihu aaninni kayinni noosinkanni haa'ne hoollanni» yii.

YESUUSI AMANNA RODUUWASI

(Mat 12:46-50; Maq 3:31-35)

19Yesuusi amanna roduuwisi isi noowa ka'e daggu. Ikkollana mannu bati'rino daafira iso afa didandiitino. 20Kunnira mannu Yesuusira, «Kuneeti amakkinna roduuwikki ate hasidhe gobbaanni uurrite no» yite kultusi.

21Yesuusi qole, «Maganu qaale macciishshe wonshannohu baalu anere labbaa rodoo'yaati; meyaa rodoo'yaatinna ama'yaati» yiinsa.

YESUUSI DAMBALA SAMMI ASSI

(Mat 8:23-27; Maq 4:35-41)

22Mitto barra Yesuusi rosaanosi ledo yowolote giddora e"e, «Baaru widiidi qacce fulle!» yiinsa. Insano hadhara ka'u. 23Baaru aana hadhanni heedheenna Yesuusi goxi. Hatte yannara baaru aana lowo bubbe ka'e dambala kayisseenna wayi yowolote giddora ea hanafita qarru iillanni noonsata affu. 24Yesuusi goxe noowa marte, «Rosiisaancho, goonfammoraati!» yite baqqi assitusi. Isino kae bubbenna dambala ufi; bubbenna dambaluno hakkawoyintenni gabbi yii. Insa baalunkuno sammi yitu. 25Hakkunni gedensaanni Yesuusi rosaanosi, «Ammana'ne hiikkitu?» yee xa'minsa.

Insa kayinni lowo geeshsha waajjitinohuranna massinohura mimmitinsara, «Bubbenna dambala hajajeenna hajajantanni noosina, isi ayeti ikka» yitu.

YESUUSI DURRIISU AMADINO MANCHO HURSI

(Mat 8:28-34; Maq 5:1-20)

26Baara tayisse fulte Galiilaho widoonni Gergesenooni gobba iillitu. 27Yesuusi yowolote giddonni fulita, durriisu amadino manchi katamunni fule, Yesuusinni xaadi. Kuni manchi uddano uddi'ra agurinkunni lowo yanna ikkino. Mine agure mooggate giddo galanno. 28Yesuusa afi yannara raari; albasiinni kumbuule lowo qoonqonni, «Ati Wo'munkura Aliidi Magani Beetto Yesuusa, atera ane ledo mayi noohe? Eeggakkiitina shetissootie» yii. 29Hatto yiinohu, Yesuusi bushu ayyaani manchuwiinni fulanno gede hajajinohuraati. Bushu ayyaani kunni albaanni batinye hige ka"annosi; cagaagetenninna quwetenni usurre agarranni; ikkollana cagaagenna quwe tattayise tuganno. Durriisuno halallitte gobba haa're ha'rannosi.

30Yesuusi, «Su'mikki ayeti?» yee xa'misi.

Isino giddosi lowo durriissa noo daafira, «Su'mi'ya Legewooniiti» yee dawari.#Maq 5:9 lai. 31Durriissano, «Yesuusa diimete giddora qolte huntootinke» yiite huuccidhu.

32Hakkiicho gaaru hunda kiiro haammata manchaame hayisso ittanni no. Durriissa, «Marre manchaamete giddora e'neemmo gede fajjinke!» yite Yesuusa huuccidhu. Isino fajjinsa. 33Kunnira durriissa manchu giddonni fulte manchaamete giddora e'u. Manchaameno baaru gaminni bitintirtanni wayi giddora e'e egemmantu.

34Manchaame allaalte noori ikkino coye la'e xooqqe marte, katamahonna katamu gobbaanni dudubbu. 35Mannuno tenne ikkito la"ara Yesuusiwa dayi. Durriisu amadino manchi wodanu higeennasi hure uddano uddi're Yesuusi lekka mule ofolle nooha affe waajjitu. 36Balaxxe affinori durriisu amadino manchi hiitto ikke hurinoro mannaho kultu. 37Hakkunni gedensaanni Gergesenooni gobba manni, Yesuusa hakkiichinni agure ha'ranno gede huucci'ri. Hatto yitinohuno lowo geeshsha waajjitino daafiraati. Kunnira Yesuusi yowolo e"e galagale dayinowa ha'ri. 38Durriisu fulisi manchi Yesuusa, «Ballo ledokki ha'roni?» yee huucci'ri. Yesuusi kayinni,

39«Qaera hadhe Maganu assinohere kuli!» yiisi. Manchu Yesuusi assinosiha jawa coye katamma baalate duduwanni ha'ri.

IYAIROOSI BEETTONNA YESUUSI UDDANO KISSU MANCHO

(Mat 9:18-26; Maq 5:21-43)

40Yesuusi galagale higita agare noo manni lowo hagiirrinni haa'risi. 41Hatte yannara mittu xaadu mini roorrichi Iyairoosi yinanni manchi daye, Yesuusi lekkara uwe, «Eeggatena rakke mini'yara amoe» yee huucci'ri. 42Hatto yiinohu mitte afi'rinoti tonaa lame diro ikkannose qaaqqo lowo geeshsha dhiwanteenna reyote agarre hee'noonni daafiraati.

Yesuusi insa ledo ha'ranni hee'reenna, ledosi noohu lowo manni doogote aana cifisi. 43Hakko manni mereero tonaa lame diro wo'ma mundee lolakkanna heedhannoti mitte mancho no. Tini mancho xagissannori baalunkuwa hadhanni, woxese baala guxxitino; ayino hursasera didandiino. 44Ise Yesuusiwa dagge, badheenni uddanosi qacce kissu. Hakkawoyintenni du'nantanni noo mundee uurritu. 45Yesuusino, «Kisiehu ayeti?» yee xa'mi.

Mannu baalu «Ninke dikinsoommohe» yii.

Pheexiroosino, «Mooticha'ya, mannu cifamanni hoodenke ha'ranni noota affanni heedhe, ‹Ayi kisie› yaatto?» yiisi.

46Yesuusi kayinni, «Wolqa giddo'yanni fultinona, mittu kisinoehu no» yii.

47Mancho anfoonniseta affe, huxidhanni Yesuusiwa dagge albasiinni ubbu. Hakkunni gedensaanni mayira kissinosironna hiitto ikkite hurtinoro mannu baalu albaanni coyidhu. 48Yesuusi manchote, «Beetto'ya, amma'nakki gatissinohena keerunni ha'ri!» yiise.

49Yesuusi togo yee coyi'ranni hee'reenna, Iyairoosi mininni dayino manni, «Beetto reyitinona, xaate rosiisaancho daafursitooti» yii.

50Yesuusi kayinni konne coye macciishshe Iyairoosi, «Ammani ikkinnina waajjitooti, beettokki hurtannona!» yiisi.

51Yesuusi Iyairoosi minira iilli yannara Pheexiroosinna Yaiqoobi, Yaiqoobi rodoo Yohaannisi hattono beettote annanna ama agurranna wole ayeno ledosi minira ea diuyino. 52Hakkiicho noo manni baalu beettote reyora didanninna kooce wi'lanni no. Yesuusi kayinni, «Beetto goxxinota ikkinnina direyitino» yiinsa.

53Mannu kayinni beetto reyitinota afino daafira maaeelse oso'lisi. 54Yesuusi beettote anga amade, «Tee beetto, gotti yii!» yiise. 55Iseno lubbose base higgeenna hakkawoyintenni ka'e uurritu. Yesuusino, «Ittannore uuyyese» yiinsa. 56Beettote ayiddino dhaggeeffati. Yesuusi kayinni konne coye mannaho kultannokki gede qorophisiisinsa.

Currently Selected:

LUQAASI 8: QulMax

Highlight

Copy