YOHAANNISI 9

YESUUSI ILLIWEELE ILAMINO MANCHO HURSI

1Yesuusi doogo sae ha'ranni hee're, illiweele ilamino mancho afi. 2Rosaanosi Yesuusa, «Rosiisaancho, kuni manchi illiweele ilaminohu ayi loosino cubbinniiti? Isinso iltinosiri loossino cubbooti?» yite xa'mitu. 3Yesuusi, «Kuni manchi illiweele ilaminohu, isi woy iltinosiri loossino cubbinni di"ikkino; ikkollana Maganu loosi isi aana leellanno gedeeti. 4Barru hee'reenna soyinoehu looso loosa hasiissannoe. Ayino loosa dandaannokkihu hashshu daanno. 5Ani baattote aana noommo geeshsha baattote xawaabbaati» yii.

6Hatto yiihu gedensaanni uulla anja tufe, anjunni liisamino sabba illiweelu illera buuri. 7Hakkiinni, «Cuuammanniwa Selihoomi marte hayishshi'ri!» yiisi. (Selihoomi yaa Sonkoonniho) yaate. Manchuno ha're hayishshi're la"anni higi. 8Olliisinna alba huucci'ranna afinosi manni, «Kuni diofolle huucci'ranna anfummo manchooti?» yitu.

9Gamu, «Ee, isooti» yitu.

Gamu qolte, «Isolla lawannona iso di"ikkino» yitu.

Isi kayinni, «Ee, aneetiwe» yii.

10Insano, «Illekki hiitto ikkite fa'nituheyya?» yitu.

11Isi qole, «Yesuusa yinanni manchi sabba liise ille'yara buure, ‹Marte Selihoomi hayishshi'ri!› yiie. Anino mare hayishshi're la"a dandoommo» yii.

12Insa qolte, «Xa hakku manchi hiikko nooyya?» yitu.

Isino, «Ani diafoommo» yii.

FARISOOTU ILLE HURINO MANCHO QORTU

13Hakka woyite mannu hakkonne huri illiweelo haa're Farisootunniwa massi. 14Yesuusi sabba liise manchu ille hursinohu Fooliishshote Barraati. 15Farisootu, «Hiitto ikkite la"a dandiitto?» yite mancho ledde xa'mitusi.

Isino, «Ille'yara sabba buureenna hayishshi're, la"a dandoommo» yii.

16Gamu Farisooti, «Kuni manchi Fooliishshote Barra diayirrisannona, Maganuwiinni dayinoha di"ikkino» yitu.

Gamu kayinni, «Cubbaataamu manchi togoo maalale loose dandaannoni?» yitu. Kunninni kainohunni mereeronsa babbadooshshu kalaqami.

17Kunnira ille fa'nitusi mancho ledde, «Ati, ‹llle'ya faninoe› yiitto manchi daafira ma yaatto?» yitusi.

Isi qole, «Himanaanchoho» yii.

18Ayihudete roorrooti, kuni manchi illiweelo ikkinotanna gedensaanni illesi fa'nitinota iltinosire woshshite xa'mita geeshsha diammantino. 19Kunnira, iltinosire woshshite, «‹Illiweele ilamino› yitinihu beetti'ne konneeti? Xa hiitto ikke la"a dandiiyya?» yite xa'mitunsa.

20Iltinosirino, «Kuni ee beettonkeeti; illiweele ilaminota anfoommo. 21Xa kayinni hiitto ikke la"a dandiinoronna ille faninosihu ayetiro dianfoommo. Isi umisinni xa'minoonnire qo'la dandaanno geeshshi manchootina, iso xa'me» yitu. 22Iltinosiri hatto yitinohu Yesuusa, «Kiristoosaati» yaannoha xaadu mininni fushshine hunnanni gede kulloonni daafira Ayihudete roorroota waajjiteeti. 23Iltinosiri, «Isi xa'minoonnire qo'la dandaanno geeshshi manchootina iso xa'me» yitinohu kunniraati.

24Hakkonne illiweele ilame huri mancho layinkimeeshsho woshshite, «Ati halaale coyi'ratenni Magano ayirrisi; kuni manchi cubbaataamo ikkinota ninke anfoommo» yitu.

25Isi kayinni, «Isi cubbaataamo ikkasinna hoogasi ani diafoommo; ani afoommohu mitto coyeti. Hakkuno, ani kunni albaanni illiweeloho; xa kayinni kune la"anni noommo» yiinsa. 26Insano, «Ma assihe? Illekki hiitto asse fanihe?» yite xa'mitusi.

27Isi daware, «Alba balaxe kuloommo'ne; kayinni dimacciishshitinoonni. Xaano leddine macciishsha mayira hasidhinanni? Ki'neno isi rosaano ikka hasidhinoonnini?» yiinsa. 28Insa xontanni, «Isi rosaanchi ateeti! Ninke Muse rosaanooti. 29Maganu Musera coyi'rinosita anfoommo; kuni maminni dayinohoro dianfoommo» yitusi. 30Manchu kayinni, «Kuni manchi maminni dayinoro afa hooga'ne maala'linannite. Anera ille'ya fanihu kayinni isooti. 31Maganu cubbaataammunnire macciishshannokkita egenninoonni. Maganu ayirrisannohurenna hedosi wonshannohunnire kayinni macciishshanno. 32Baatto kalaqantuhunni kayise, ‹Illiweele ilaminoha hursino› yinanna anfe egenninoonnihu horonta dino. 33Kuni manchi Maganuwiinni daa hoogoommero, mittoreno assa didandaanno» yii.

34Insa qolte, «Cubbunni sona ba'e ilamoottohu kuni, ninke rosiisattoraatini?» yite xaadu mininni fushshite huntusi.

WODANU BALLIMMA

35Yesuusi mancho xaadu mininni fushshite huntinosita macciishshi. Isi ledo xaadi woyite, «Manchi Beetto amma'natto?» yee xa'misi.

36Isino, «Mooticha'ya, amma'neemmosina isi ayeti?» yii.

37Yesuusino, «Kunni albaannino afoottosi; xa hasaawisanni noohehuno isooti» yiisi.

38Manchu qole, «Mooticha'ya, maahoyye amma'neemmo» yee albasiinni kumbuuli.

39Yesuusino, «La'annokkiri la'anno gede, la'annori ballitanno gede, ani tenne gobba yoo yaammora dayommo» yii.

40Hatte yannara Yesuusi mule noo Farisooti yiino coye macciishshite, «Hatto yaatto woyite, ninkeno ballootaho yaateni?» yitu.

41Yesuusi qole, «Balloota ikkitinoommero, cubbo di"ikkanno'ne; xa kayinni, ‹La'nanni hee'noommo› yitinanni daafira, cubbi'ne ledo'ne hee'ranno» yiinsa.

Currently Selected:

YOHAANNISI 9: QulMax

Highlight

Copy