YOHAANNISI 10

GE'REEWU ALLAALAANCHI LAWISHSHA

1Yesuusi qole, «Halaale kuleemmo'nena, ge'reewu hoowe giddora waalcho agure wole widoonni mure eannohu mooraanchohonna wolqatenni adhannoho. 2Waalchu widoonni hige eannohu kayinni ge'reewu allaalaanchooti. 3Waalcho agarannohu allaalaanchoho cufana fanannosi; ge'reewu allaalaanchunnita huurosi egennino; isino ge'reewosi su'minsanni woshshannonsa. Hakkunni gedensaanni albaanni ha'ranni gobbara fushshannonsa. 4Ge'reewosi gobbara fushshe, albansaanni ha'ranno. Ge'reewuno huurosi egennino daafira, hoodesi ha'ranno. 5Wolu hoode kayinni diha'ranno; huurosi egenninokki daafira wole afanno woyite xooqanno» yii. 6Yesuusi tenne masalo kulinonsa; insa kayinni, yiinonsare dibuuxxino.

YESUUSI DANCHA ALLAALAANCHOOTI

7Yesuusi lede, «Halaale kuleemmo'nena, ani ge'reewu waalchooti. 8Ane balaxxe dagginori wolootu mooraanotenna wolqatenni adhitannoreeti; ge'reewu kayinni qaalensa dimacciishshino. 9Waalchu aneeti; ane widoonni hige eannohu gatanno; ane widoonni hige eanno; ane widoonni hige fulanno; hosanno qanchono afi'ranno. 10Mooraanchu moorara, shaaranna hunaralla daanno. Ani kayinni, heeshsho afidharanna heeshshonsano hala'litara yee dayommo.

11«Ani dancha allaalaanchooti. Danchu allaalaanchi lubbosi ge'reewoho sayise aanno. 12Kiraho allaalannohu kayinni, hiyyeeyye dagganna afiro, ge'reewo agure xooqanno. Hiyyeeyyeno ge'reewo gawajjitanno; qolteno billaallissanno. 13Allaalaanchu agure xooqannohu kiranya ikkinohuraatinna ge'reewoho diinaggaawannokki daafiraati.

14«Danchu allaalaanchi aneeti; ani ge'reewo'ya egennoommo; ge'reewi'yano ane egenninoe.#Mat 11:27; Luq 22:33; Lew 24:16 lai. 15Ani insa egennoommohu, Anni'ya ane egenninoenna anino Anna'ya egennoommo garinniiti. Lubbo'ya ge'reewi'yara yee sayise eemmo. 16Tenne hoowe giddo nookkihu wolu ge'reewino nooe; insano abba hasiissannoe. Insano huuro'ya macciishshitanno. Mitte hoshsha ikkitanno; allaalaanchuno mitto ikkanno.

17«Qole adheemmota lubbo'ya sayise eemmo daafira, Anni'ya ane baxannoe. 18Lubbo'ya ani baxe eemmo ikkinnina, anewiinni ayino diadhanno. Lubbo'ya aateno qole adhateno wolqa nooe. Tenne hajajo Anni'yawiinni adhoommo» yii.

19Konne coye coyi'rasinni Ayihudete mereero xaano babbadooshshu kalaqami. 20Insa giddonni lowo manni, «Isira durriisu no; wodana difayyinona, isi yaannore mayira macciishshitinanni?» yitu.

21Gamu kayinni, «Kuni coyi durriisu noo manchi coyi'rannoha di"ikkino; durriisu ballitino ille fane afannoni?» yitu.

AYIHUDE YESUUSA GIBBU

22Yerusaalamete Qullaawu Mini gatamarshi ayyaana ayirrinsanni yanna iillitu; yannano hawadooti. 23Yesuusino Qullaawa Mine Selemooni daasira millisanni no. 24Hatte yannara Ayihudootu iso gaangeessite, «Ati ninke mamooti geeshsha huluullisattonke? Ati Kiristoosaatiro xawisse kulinke» yitu.

25Yesuusi qole, «Ani kuloommo'ne; ki'ne kayinni diammantinanni. Anni'ya su'minni looseemmo loosi anere farci'ranno. 26Ki'ne kayinni ge'reewi'ya ledore ikkitinoonnikki daafira, diammantinanni. 27Ge'reewi'ya huuro'ya macciishshanno; anino egennoommonsa; hoode'yano ha'ranno. 28Ani insara hegere heeshsho eemmo; horonta diba'anno. Anga'yanni ayino dihawulukannonsa. 29Insa anera uyinoehu anni'ya, wo'manka rooreho. Anni'ya anganni hawulukannonsahu ayino dino. 30Aninna Anni'ya mittoho» yii.

31Hatte yannara Ayihudootu xaano Yesuusa gantara kinna haadhu. 32Yesuusino, «Anni'ya uyinoeha lowoha dancha looso ki'ne la'inanna loosoommo. Kinnatenni gantinaera ka'inihu hiikko loosi daafiraati?» yii.

33Insa qolte, «Kinnatenni ganneemmohehu Magano xonootto daafiraati ikkinnina, dancha looso loosakkira di"ikkino. Ati manchoholla; kayinni umokki Magano assootto» yitu.

34Yesuusi daware, «Seeri'nera, ‹Ki'ne magannate yoommo›#Far 82:6 lai. yine diborreessinoonni? 35Qullaawu qaali wo'manka woyite halaale ikkinota anfoonni. Maganu qaalisi dayinonsare magannate yiiro, 36ki'ne kayinni Maganu doodhinohanna tenne gobba mannira soyinoha, ‹Ani Maganu Beettooti› yiino daafira, ‹Magano xonootto› mayira yitinanniyya? 37Ani Anni'ya looso looseemmokkiha ikkiro ammantinoonte"e. 38Anni'ya looso looseemmoha ikkiro kayinni, ane ammana hoogginirono, looso'ya ammanne. Kunni garinni Anni'ya anenni nootanna anino Anni'yanni noommota egentinanni» yiinsa.

39Insa xaano Yesuusa amaddara hasidhu; isi kayinni angansanni luxuphe ha'ri.

40Hakkiinni kae galagale Yordaanoosi tayise fule alba Yohaannisi manna cuui darga mare hakkiicho keeshshi. 41Lowo manni isiwa daye, «Yohaannisi mitte maalaleno diassino. Ikkollana Yohaannisi kunni manchi daafira coyi'rinori baalu halaaleho» yitu. 42Hakkiicho lowo manni Yesuusa ammani.

Currently Selected:

YOHAANNISI 10: QulMax

Highlight

Copy