YOHAANNISI 21

YESUUSI LAMALA ROSAANOSIRA LEELLI

1Hakkunni gedensaanni Yesuusi xaano rosaanosira Xibiriyadoosi Baari mule leelli. Leellinohu, 2Simiooni Pheexiroosira, Didimoosi yinannihura Toomaasira, Qaana Galiilunnihura Naatinaeelira, Zebidewoosi oosoranna wole lame rosaanoraati. 3Simiooni Pheexiroosi, «Ani qulxu'me woshshaaxxammora ha'reemmo» yiinsa.

Insano, «Ate ledo ha'neemmo» yitu. Fulte marte yowolo e'u. Ikkollana hakko hashsha mitte qulxu'me nafa diamaddino.

4Soodo guto Yesuusi baaru gama uurre no. Rosaanosi kayinni Yesuusa ikkinota diaffino. 5Yesuusino, «Ooso, mitiri qulxu'mu noo'neni?» yiinsa.

Insano, «Mitturino dinonke» yitu.

6Isi qole, «Afidhinannina, woshshaado'ne yowolote qiniiteenni tugge» yiinsa. Insano woshshaado baaru giddora tuggu. Woshshaado lowo qulxu'me amaddino daafira giddonni goshooshshe fushsha hooggu.

7Hatte yannara Yesuusi baxannosi rosaanchi Pheexiroosira, «Mootichahowe!» yii.

Simiooni Pheexiroosi, «Mootichahowe!» yiita macciishshe, loosoho yee uddano fushshi're noo daafira, hakkawoyintenni uddano uddi're baaru giddora kubbe ei. 8Wole rosaano kayinni baaru gaminni 100 qaafo faffe noo daafira, qulxu'mu wo'mino woshshaado goshooshidhanni yowolotenni daggu.

9Yowolote aaninni dirritu woyite, qulxu'michu aanaho nooha maashshi yiino kashilchonna shiima tima affu.

10Yesuusino, «Xa amaddini qulxu'mi giddonni shiima haadhine abbe!» yii.

11Simiooni Pheexiroosino yowolo gidde jajjabba 153 qulxu'me amaddino woshshaado goshooshe fushshi. Hakkeeshshi qulxu'me amadde heedhenni woshshaado didadhantino. 12Hakkunni gedensaanni Yesuusi, «Daggine shoo'me!» yiinsa. Mooticha ikkinota baalunku affino daafira, rosaanosi giddonni mittuno ugge, «Ati ayeti?» yee xa'minosihu dino. 13Yesuusi daye tima haa're uyinsa; qulxu'meno haa're uyinsa.

14Yesuusi reyotenni kaihu gedensaanni rosaanosira leellanna tini sayikkite.

YESUUSINNA PHEEXIROOSI

15Shoo'mite ka'uhu gedensaanni, Yesuusi Simiooni Pheexiroosi, «Yoona beetto Simiooni, kuri baxxannoehunni roorsite baxattoeni?» yiisi.

Pheexiroosino, «Eewa Mooticha'ya, baxeemmoheta atinni afootto» yiisi.

Yesuusino, «Wilii'le'ya towati!» yiisi.

16Layinkimeeshshono, «Yoona beetto Simiooni, baxattoeni?» yiisi.

Isino, «Eewa Mooticha'ya, baxeemmoheta atinni afootto» yii.

Yesuusino, «Goodanna'ya agari!» yiisi.

17Sayikkimeeshshono, «Yoona beetto Simiooni, baxattoeni?» yii.

Sayikkimeeshsho, «Baxattoeni?» yiino daafira Pheexiroosi dadille, «Mooticha'ya, ati wo'manka coye egennootto; ani baxeemmohetano afootto» yii.

Yesuusino, «Ge'reewo'ya allaali! 18Halaale yeemmohena, ati aju nootto yannara angakkinni qodhite hasi'rittowa ha'rootto. Geedhittoro kayinni angakki diriirsidheenna wolu manni qodhisiisannohe. Hasi'roottokkiwano haa're massannohe» yiisi. 19Hatto yiinosihu, Pheexiroosi ma gari reyonni Magano ayirrisannoro kulanniiti.

Hakkunni gedensaanni Yesuusi Pheexiroosi, «Hoode'ya amo!» yii.

YESUUSANNA ISI BAXANNO ROSAANCHO

20Pheexiroosi caaqqi yee la"anno woyite Yesuusi baxannosi rosaanchi hoodesi daanna afi. Kuni rosaanchi hurbaate ittu yannara Yesuusiwa goowa shiqqi asse, «Mooticha, sayise aannohehu ayeti?» yee xa'miho. 21Pheexiroosi iso lae, «Mooticha, kuni manchi hiikkannoyya?» yee Yesuusa xa'mi.

22Yesuusino, «Ani daammo geeshsha hee'riro atera mayi xiwihe? Ati hoode'ya amo!» yii. 23Kunni daafira roduuwu mereero, «Kuni rosaanchi direyanno» yinanni hasaawi bati'ri. Ikkollana Yesuusi, «Ani daammo geeshsha hee'riro atera mayi xiwihe?» yiinota ikkinnina, «Direyanno» diyiino.

24Kunnira, konne coye farci'rinohunna borreessinohu konne rosaanchooti. Isi farci'rinorino halaale ikkinota egenninoommo.

25Yesuusi assinohu wolu lowo coyi no. Ani hedeemmo gede ikkiro kayinni, isi assino coye baala mitto mittonka borreessinoommero, borreessinoonni maxaaffa gobba baala dibayidhanno.

Currently Selected:

YOHAANNISI 21: QulMax

Highlight

Copy