YOHAANNISI 15

YESUUSI WOYINETE HAQQICHO DAMATTEETI

1Yesuusi lede, «Halaalaanchu woyinete haqqicho damatte aneeti; loosannohuno Anna'yaati. 2Ane aana hee're guma laalannokki sina baala Anni'ya mure hunanno; guma laalannoha lede guma aanno gede qonqolche seekkanno. 3Ki'ne kuloommo'ne qaalinni kainohunni xaanni fayyaaleeyyete. 4Ki'ne anenni heedhe; anino ki'nenni hee'reemmo. Sinu damattete aana hee'ra hoogiro, umisinni guma laala dandaannokkinte gede, ki'neno anenni hee'ra hoogginiro guma laala didandiitinanni.

5«Ani woyinete haqqicho damatteeti; ki'ne kayinni sinna'yaati. Anenni hee'rannohu, anino isinni hee'reemmohu batinye guma laalanno. Aneweello kayinni mittoreno assa didandiitinanni. 6Anenni hee'rannokkihu, gobbara tunge agurreenna moolanno sini gedeeho. Hattoo sinna gamba assine giirate tungeenna giirantanno. 7Anenni heedhiniro, qaali'yano ki'newa hee'riro, hasidhinannire baala huuccidhe; afidhinannina. 8Batinye guma laaltiniro, kunninni Anni'ya ayirranno. Ki'neno ane rosaano ikkitinoonnita anfanni.

9«Anni'ya ane baxinoe gede, anino ki'ne baxoommo'ne. Ane baxillinni heedhe! 10Ani Anni'ya hajajo wonshanni baxillisinni hee'rummonte gede, ki'neno ane hajajo wonshitiniro, ane baxillinni heedhinanni.

11«Konne coye kuloommo'nehu hagiirri'ya giddo'ne hee'ranno gedeetinna ki'ne hagiirrino wo'ma ikkanno gedeeti. 12Ane hajajo, ani baxummo'nente gede, ki'ne ki'neneewano baxantinaraati. 13Lubbosi jaalisira sayise aanno manchiha roorino baxilli ayewano dino. 14Ani hajajoommo'nere wonshitiniro, ki'ne jaalla'yaati. 15Faantichu mootichu assannore afannokki daafira, kunni ka'a ki'ne faantootaho diyeemmo'ne. Anni'yawiinni macciishshoommore baala kuloommo'ne daafira, jaalla'ya yoommo'ne. 16Anilla ki'ne dooroommo'ne ikkinnina, ki'ne ane didoodhitinoonnie. Hadhine batinye guma laaltinanni gede, gumi'neno ba"annokki gede shoomoommo'ne. Kunnira ane su'minni huuccidhinannire baala Anni'ya aanno'ne. 17Ani hajajeemmo'ne hajajo ki'ne ki'neneewa baxantinanni gedeeti.

YESUUSI, TINI GOBBA ROSAANOSI GIBBANNOTA KULI

18«Tini gobba gibbu'nero, ki'nera albaanni aneno gibbinoeta affe. 19Ki'ne tenne gobbare ikkitinoommero, umiseri gede assite baxxanno'ne. Ikkollana, ani tenne gobbanni bade dooroommo'ne ikkinnina ki'ne tenne gobbare ikkitinoonnikkihura, tini gobba gibbanno'ne. 20‹Faantichu mootichasi dirooranno› yuummo'neta habbinoonte. Ane xiibbunte gede, ki'neno xiibbanno'ne. Ane qaale wonshituro, ki'ne qaaleno wonshitanno. 21Soyinoeha egentinokkihura, anenni kainohunni konne baala assitanno'ne. 22Ani daye kula hoogoommonsaro, cubbo di"ikkannonsa. Xa kayinni, cubbo loosansara ku'lite gattannori dinonsa. 23Ane giwannohu Anna'yano giwanno. 24Wolu loosinokki looso mereeronsa loosa hoogoommoro, cubbo di"ikkannonsa. Xa kayinni, konne baala la'uhu gedensaanni aneno Anna'yano gibbino. 25Kuni ikkinohuno seerinsa giddo, ‹Beebbatenni gibbue› yine borreessinoonni qaali wo'manno gedeeti.

26«Ikkollana, jawaachishannohu, Anni'yawiinni soyemmo'nehunna Anni'yawiinni fulannohu halaalaanchu Ayyaani daanno woyite, isi anere farci'ranno. 27Ki'neno albinkunni ane ledo heedhinoonni daafira farcidhinanni.

Currently Selected:

YOHAANNISI 15: QulMax

Highlight

Copy