YOHAANNISI 14

MAGANU ANNUNNIWA MASSITANNO DOOGO YESUUSAATI

1Hakkiinni aanche Yesuusi, «Wodani'ne masoonke; Magano ammanne; aneno ammanne. 2Anni'ya mine lowo dargi no; hatto ikka hoogoommero, ‹Heedhinanni darga qixxeessate ha'reemmo› diyeemmo'ne. 3Ha're darga qixxeessummo'nehu gedensaanni, ani noommowa heedhinanni gede galagale daye haa'reemmo'ne. 4Ani ha'reemmowa massitanno doogono egentinoonni» yii.

5Toomaasi, «Mooticha, ati hiikka ha'rattoro dianfoommo; doogono hige maminni anfeemmo?» yii.

6Yesuusi qole, «Doogono, halaaluno, heeshshono aneeti. Ane widoonni ikka hoogiro, ayino Anni'yawa daannohu dino. 7Ane egentinoonniha ikkoommero, Anna'yano egentinanni. Kunni ka'a iso egentinanni; qoltineno la'inoonnisi» yiisi.

8Filiphoosino, «Mooticha, Magano Anna leellishittonkero, ikkannonke» yii.

9Yesuusi daware, «Filiphoosi, kageeshshi geeshsha ledo'ne hee'ranna diafoottoe? Ane afinohu anna'yano afino. Ati hiitto, ‹Magano Anna leellishinke› yaatto? 10Ani Anni'yanni noommota, Anni'yano anenni noota diammanootto? Ki'nera kuleemmo qaale ani umi'yanni dicoyi'reemmo. Baalanka looso anenni hee'rannohu Anni'ya loosanno. 11Ani Anni'yanni, Anni'yano anenni noota ammanne. Hattenne hoogginiro, loosoommo loosinnino ikka ammanne"e. 12Halaale kuleemmo'nena, ane ammaninohu ani looseemmo looso loosanno; hakkiinni saino looso nafa loosanno. Hatto loosa dandaannohu, ani Anni'yawa ha'reemmo daafiraati. 13Maganu Annu, Beettunni ayirranno gede su'mi'yanni huuccidhinannire baala asseemmo'ne. 14Aye coyeno su'mi'yanni huuccidhiniro, ani eemmo'ne.

YESUUSI QULLAAWA AYYAANA SOYANNOTA KULI

15«Baxxinannieha ikkiro, hajajo'ya agadhitinanni. 16Ani Anna'ya huucceenna, isi hegere geeshsha ledo'ne hee'rannoha wole jawaachishaancho aanno'ne. 17Isino halaalu Ayyaanaati. Tenne gobba manni afinosikkinna egenninosikki daafira, adhasira didandaanno. Ki'ne kayinni, isi ledo'nenna giddo'ne hee'ranno daafira affinannisi. 18Amanna anna afidhinokki ooso gede calluwa'ne diagureemmo'ne; galagale ki'newa dayemmo. 19Shiima yanna gedensaanni tini gobba diaffannoe; ki'ne kayinni affinannie. Ani heeshshonniha ikkoommo daafira, ki'neno lubbotenni heedhinanni. 20Ani Anni'yanni hee'reemmota, ki'neno anenni heedhinannita, anino ki'nenni hee'reemmota hakko barra affinanni.

21«Hajajo'ya adhannohunna wonshannohu baxannoeho; ane baxannoha Anni'yano baxannosi. Anino baxeemmosi. Isira aneneete'ya leellisheemmosi» yii.

22Asiqorootunniha ikkikkinni wolu Yihudi, «Mooticha, ateneete tenne gobbara leellisha agurte ninkera mayira leellishatto?» yii.

23Yesuusino, «Baxannoehu qaale'ya wonshanno. Anni'yano baxannosi; lamunku dange ledosi hee'neemmo. 24Ane baxannokkihu qaale'ya diwonshanno. Kuni macciishshitinannihu ane umi'yaha ikkikkinni soyinoehu Anni'ya qaaleeti.

25«Ani xa ki'ne ledo hee're konne coye kuloommo'ne. 26Anni'ya ane su'minni soyanno'nehu jawaachishannohu Qullaawu Ayyaani kayinni baalankare rosiisanno'ne; ani kuloommo'nere baalanka qaagiissanno'ne» yii.

YESUUSI AANNO KEERE

27«Keere'ya ki'newa woreemmo; keere'ya eemmo'ne. Ani eemmo'ne keeri tini gobba uyitanno'nehu gedeeha di"ikkino. Wodani'ne masoonke; waajjitinoonte! 28Coyi'ranna macciishshitininte gede ani ha'reemmo; galagaleno ki'newa dayemmo. Anni'ya anewiinni rooranno daafira, baxxinoomme"ero Anni'yawa ha'reemmota hagiidhitinanni. 29Kuni coyi ikkanno woyite ammantinanni gede, xa alba asse kuloommo'ne. 30Tenne gobba gashshaanchi Sheexaanu daanni noo daafira, ki'ne ledo lowore dihasaaweemmo. Isi ane aana wolqa diafi'rino. 31Ikkollana ani Anna'ya baxeemmota tini gobba affanno gede, Anni'ya hajajinoere baala wonsheemmo. Xa ka'e! Kawiinni ha'nona» yii.

Currently Selected:

YOHAANNISI 14: QulMax

Highlight

Copy