YOHAANNISI 13

YESUUSI ROSAANOSIRA LEKKA HAYISHSHI

1Yanna Agure Sa"ate Ayyaanira albaanniiti. Yesuusi tenne gobba agure Annisiwa ha'rannoti yanna iillitinota afe, tenne gobbara noore isire ikkitinore baxannonsare, goofimarchu geeshsha baxinsa.

2Yesuusinna rosaanosi hashshi hurbaate ittanni heedheenna, Simiooni beetti Asiqorootu Yihudira Yesuusa sayise aanno gede Sheexaanu wodanisi giddo busha hedo wori. 3Yesuusi, Maganu Annu roorre baala uyinosita afino. Maganuwiinni dayinotanna galagale Maganunniwa ha'rannota egennino. 4Sagalete aaninni kae uddano uulla wodhe feyanno hocco halloho xaaxi'ri. 5Waa gawatete wore rosaanosira lekka hayishsha hanafi. Halloho xaaxi'rino hoccinni fee mooshshinsa. 6Yesuusi Simiooni Pheexiroosiwa iillita isi, «Mooticha'ya, ati ane lekka hayishshattoraatini?» yii.

7Yesuusi qole, «Ani asseemmore ati xa diafatto; gedensaanni kayinni afatto» yiisi.

8Pheexiroosino, «Ati ane lekka horontanni dihayishshatto» yii.

Yesuusi qole, «Ani hayishsha hoogummohero ane ledo xaadu dinohe» yiisi.

9Simiooni Pheexiroosino, «Mooticha'ya, hattootiro lekka'ya calla ikkikkinni anga'yano umo'yano hayishshie» yii.

10Yesuusino, «Biso hayishshi'rinohu, bisisi baalu xuru nookkiha ikkino daafira, lekka hayishshi'ra agurranna wolere dihasiisannosi. Ki'ne fayyaaleeyyete; kayinnilla baalunku fayyaaleeyye di"ikkitinoonni» yiisi.

11Yesuusi, «Baalunku fayyaaleeyye di"ikkitinoonni» yiinohu, reyote sayise aannosihu ayetiro afinohuraati.

12Lekkansa hayishshihu gedensaanni uddanosi uddi're mare dargasi ofolle, «Assoommo'nere wodana assitinoonni? 13Ki'ne, ‹Rosiisaanchonna Mooticha› yitinannie; hatto yaa'ne garaho; yitinannintalla yitinoonni. 14Xa ani Rosiisaancho'nenna Mooticha'ne ikke hee'renni lekka'ne hayishshummonte gede, ki'neno mimmiti'ne lekka hayishsha hasiissanno'ne. 15Ani ki'nera assoommore ki'neno assitinanni gede lawishsha ikka'nera assoommo. 16Halaale kuleemmo'nena, faantichu mootichasi dirooranno; sokkaanchu soyinosiha dirooranno. 17Konne coye affinoonni; affinoonniha assitiniro maassantinanni. 18Konne coye coyi'roommohu ki'ne baalunku daafira di"ikkino. Ani doodhoommore egennoommo. Ikkirono, ‹Hurbaate'ya itinohu anera badhe wodhinoe› yaannohu Maganu qaali wo'ma hasiissanno.

19«Kuni coyi ikkara albaanni kulanni noommo'nehu, ikkihu gedensaanni yinannihu ane ikkoommota ammantinanni gedeeti. 20Halaale kuleemmo'nena, ani soyemmoha adhannohu ane adhanno. Ane adhannohuno ane soyinoha adhanno» yiinsa.

YESUUSI SAYINSE UYINANNISITA BALAXE KULI

(Mat 26:20-25; Maq 14:17-21; Luq 22:21-23)

21Yesuusi konne coye coyi'rihu gedensaanni dadille maaxi'ra hooge, «Halaale kuleemmo'nena, ki'ne giddonni mittu ane reyote sayise aannoe» yee kulinsa. 22Rosaanosino aye hede coyi'rinoro afa hoogge mimmito alba la'u. 23Rosaanosi giddonni mittichu Yesuusi baxannosihu isira aane ofolle no. 24Simiooni Pheexiroosi hakkonne rosaancho qiphi asse, «Hanni aye hede coyi'ranni nooro xa'mi» yii.

25Kunnira Yesuusiwa goowa shiqqi asse, «Mooticha, yaattohu ayeti?» yee xa'mi.

26Yesuusino, «Ani tima hiiqqe qaamattotenni qase chuucisheemmoho» yii. Hatto yee kae Asiqorootunnihura Simiooni beettira tima hiiqqe qaamattotenni qase chuucishi. 27Yihudi, chuucihu gedensaanni hakkawoyintenni Sheexaanu eisi.

Yesuusino, «Assate hedoottore rakke assi!» yiisi. 28Yesuusi hatto yiinohu mayiraatiro, sagalete ofolte noori giddonni mittuno wodana assinohu dino. 29Yihudi woxe amadannoha ikkino daafira rosaanote giddonni mito mitoho, «Ayyaana ayirrisate ikkannore hiri» woy, «Woxe buxanete uyi» yiinoha lawinonsa. 30Yihudi, tima ite kaihu gedensaanni fule ha'ri. Yannano hashshaati.

HAARO HAJAJO

31Yihudi fule ha'rihu gedensaanni Yesuusi, «Manchi Beetti xa ayirrino; Maganuno isinni ayirrino. 32Maganu isi widoonni ayirriro, Maganuno Manchi Beetto ayirrisannosi; rahotenni ayirrisannosi.

33«Ooso'ya, ki'ne ledo lowo yanna dikeeshsheemmo; ki'neno hasidhinannie. Ayihudete gashshaanora, ‹Ani noommowa ki'ne daa didandiitinanni› yuummonsante gede, ki'nerano hatto yeemmo.#Yoh 7:34 lai. 34Ki'ne ki'neneewa baxantinanni gede, haaro hajajo eemmo'ne; ani baxummo'nente gede ki'ne ki'neneewa baxamme! 35Ki'ne ki'neneewa baxantiniro, ane rosaano ikkitinoonnita mannu baalu tennenni egennanno'ne» yii.

YESUUSI, PHEEXIROOSI KAADANNOSITA ALBA ASSE KULI

(Mat 26:31-35; Maq 14:27-31; Luq 22:31-34)

36Simiooni Pheexiroosi Yesuusa, «Mooticha, ha'rattohu hiikkiichiraati?» yee xa'misi.

Yesuusi daware, «Ani ha'reemmowa, hoode'ya dagge diafatto; gedensaanni kayinni, hoode'ya daatto» yiisi.

37Pheexiroosi, «Mooticha, xa mayira hoodekki daa hoogeemmo? Ani lubbo'ya nafa ate daafira sayise aa dimarareemmo» yee coyi'ri.

38Yesuusi qole, «Ati halaalinta lubbokki ane daafira sayisse aatto? Halaale kuleemmohena, lukkichu gana geeshsha sase higge ‹Iso diegennoommo!› yaattoe» yii.

Currently Selected:

YOHAANNISI 13: QulMax

Highlight

Copy