KALAQAMA 8
8
BAOTE WAYI GOOFIMARCHO
1Maganu Nohi, markaawete ledosi noo moyichirenna saada baalannire hedi; baattote aanira bubbe soyenna wayi xei. 2Burqanni noo baari tuami; gordu masikootta cufantu; xeenuno uurri; 3wayi baattote aaninni galanni hosanni xei; 150 barri gedensaanni wayi ajanni dayi. 4Markaawe lamalki aganira tonaa lamalki barra Araaraati yinanni ilaalla giddo mittichu aana ofoltu. 5Wayino tonnikki agani geeshsha xeanni xeanni dayi; tonnikki aganira umi barra ilaallate birxe leeltu.
6Shoyilluu barri gedensaanni, Nohi seekkinota markaawete masikoote fane, 7haraqeessa fushshe soyi; haraqeessuno wayi baattote aaninni goofa geeshsha ka'anna kawa doyanni keeshshi. 8Hakkunni gedensaanni, wayi baattote aaninni xeino gedeenni afara, lemboolcho fushshe soyi. 9Ikkollana, lemboolcho lekkasenni kaxxitanno darga hoogge, galagalte markaawete giddora Nohiwa higgu; wayi baattote baalankawa noo daafira, angasi diriirse haa're isiwa markaawete giddora eessise. 10Hakkunni gedensaanni, 7 barri geeshsha keeshshe, lemboolcho galagalche fushshe soyi. 11Lemboolcho hawarrisse afiisera shaqqado ejersu darcho ga'mite galagalte isiwa higgu; Nohino baattote aaninni wayi xeinota afi. 12Galagale 7 barra keeshshihu gedensaanni, xaano lemboolcho fushshe soyi; galagalte kayinni isiwa dihiggino.
13Nohira 601 diro ikkisihunni umi aganira umi barra wayi baattote aaninni goofi; Nohi markaawete tuana fane baatto mooltanni noo gede afi. 14Layinki aganira lemiina lamalki barra baatto co'o yite mooltu.
15Maganu Nohira; 16«Atinna galtekki, oosokkinna, oosokki seenni markaawete giddonni fulle. 17Ate ledo noore lubbo afidhinore moyicho, cea, saadanna baattote aana milli yaannore baala, baattote aana ha'rantanno gede, qalantannonna batidhanno gede, haadhe ledokki fushshinsa» yiisi. 18Nohi galtesi, oososinna oososi seenni mitteenni markaawete giddonni fultu. 19Moyichu, cea, saadanna baattote aana milli yaannori baalu, sirchu sirchunkunni markaawete giddonni fuli.
NOHI KAKKALO SHIQISHI
20Nohi Kaaliiqira kakkallanni darga seekki; maala intanni saadanna maala intanni cea baalante giddonni danu danunkunni mitto mitto haa're, shilqote kakkalo asse shiqishi. 21Kaaliiqi shilqonniha dancha foole su'niissi'ri; wodanisinnino, «Manchu wodani hedo anjesinni kayisse bushate; ikkirono isinni kainohunni baatto dirumeemmo; xa assummo gede lubbo nooha baala layinkimeeshsho dihuneemmo. 22Baatto noo geeshsha wixanna mixxa, qiidunna iibbillu, arrunna hawadu, barrunna hashshu duuchanka woyite hee'ranno» yii.
Currently Selected:
KALAQAMA 8: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
