KALAQAMA 39

YOOSEEFINNA PHOXIFAARI GALTE

1Ismaeelete daddalaasine Yooseefi haadhe Gibitse massitue, Feriooni agaraasine roorrichi Phoxifaarira hirtu. 2Kaaliiqi Yooseefi ledo noo daafira, heeshsho baala qiniitusi. Isino Gibitsaawichu mootichisi mine hee'ri. 3Mootichisino Kaaliiqi Yooseefi ledo nootanna assiri baalu qiniinosita afe 4baxe, gamba yiino soqqamaancho assi'risi; minisirano hajajaancho assisi; noosi jajja baalanka angasi wori. 5Hatte yannanni kayise Kaaliiqi Yooseefinni kainohunni Gibitsichu mine, jajjasinna gobbaanni noosire baala maassi'ri. 6Kunnira, Phoxifaari noosire baalanka gudise Yooseefi anga wori; itanno sagale agurranna mittoreno dila"anno.

Yooseefi uurrinshanna dana xumaho. 7Shiima yanna gedensaanni, mootichisi galte Yooseefi la'e halchite, «Ane ledo goxi» yitusi. 8Isi kayinni yitinota giwe, «Kune mootichi'ya minesi noore mittoreno diegennino; noosire baalanka gudise ane anga worino. 9Konne mine ane roorinohu dino; galtesi ikkoottahura ate agurranna uyinoekkiri dino; Maganu albaanni tenne jawa bunshenna konne cubbo hiitto asse looseemmo?» yiise. 10Konne coye barru baala xa'mitinosi; isi kayinni ledose goxannota agurranna ise noowa uurrara nafa dihasi'rino.

11Mitto barra Yooseefi loosannorira minira ei; eanno woyite soqqamaasinete giddonni mittuno noohu dino. 12Hatte yannara mootichisi galte, «Amo ane ledo goxi» yite uddanosi xaaxxe amaddu. Isi kayinni uddanosi angase agure xooqe gobbara fuli. 13Uddano angase agure gobbara xooqita affe, 14minise manna woshshite, «Ayiddaanni'ya mininkera abbinohu Ibiraawichu shollishe hooginketa affini? Noommawa daye uggaera kaeenna, qoonqo'ya naggi asse raaroomma. 15Qoonqo'ya naggi asse raarummata, uddanose mule'ya tuge xooqe gobbara fulino» yite kultunsa.

16Mootichisi minira daa geeshsha uddanosi angase keeshshiishshu. 17Ayiddaannise dayenna, «Minira abboottohu Ibiraawichu soqqamaanchi shollishaera anewa eino. 18Qoonqo'ya naggi asse raarummata uddanosi anga'ya agure fule gobbara xooqino» yite kultusi.

19Mootichuno, «Soqqamaanchikki togo assinoe» yitinoha galtesi coye macciishshe lowo geeshsha hanqi. 20Yooseefino mootete usuranyooti noowa usuru minira masse eessi. Yooseefi usuru mine noo yannara, 21Kaaliiqi ledosi hee're, bagamannokki baxillinni towatanni, usuru mini roorrichi albaanni gaacheena uyisi. 22Usuru mini roorrichino usuru mine noo usuranyoota baalanka Yooseefi anga wori; hakkiicho noo haja baalanta Yooseefi wonshanno. 23Usuru mini roorrichino Yooseefi anga noore mittoreno dila"anno. Kaaliiqi ledosi noo daafira, assannori baalu qiniisi.

Currently Selected:

KALAQAMA 39: QulMax

Highlight

Copy