KALAQAMA 25
25
WOLOOTA ABIRIHAAMI SIRCHO
(1Dud 1:32-33)
1Abirihaami Kexura yinannita wole galte adhi. 2Iseno Zimiraani, Yoqishaani, Medaani, Midiyaami, Yushibaaqinna Shuhaani yinanni ooso iltusi. 3Yoqishaani, Saabanna Dedaani ili; Dedaani sirchi Ashuurootaho, Lexushootahonna Leaamootaho. 4Midiyaami oosono Eefa, Efeeri, Hanooki, Abidaatinna Elida"aati. Kuri baalunku Kexura godowaati.
5Abirihaami noosi jiro baala Yisihaaqira ragisiisi. 6Wolu meenti ilinosi oosorano lubbotenni hee're mitore uyinsahu gedensaanni wole ooso Yisihaaqiwiinni faffe soojjaato higge hadhe heedhanno gede assinsa.
ABIRIHAAMI REYO
7Abirihaami mitteenni 175 diro hee'rino. 8Kunni garinni Abirihaami diro duuwe mannu aalo ikki. 9Oososi Yisihaaqinna Ismaeeli Makiphela godira madaartusi; kuni godi Memirera soojjaatoonni Hitichu Tsohaari beetti Efirooni gobbara nooho. 10Hakkonne darga Abirihaami Hitootuwiinni waammate yee hidhino; Abirihaamino galtesi Saara madaarroonni godira madaarroonnisi. 11Abirihaami reyihu gedensaanni beettosi Yisihaaqi Maganu maassi'risi. Yisihaaqi Bieeri Lahayi Rooi mule hee'rino.
ISMAEELI SIRCHO
(1Dud 1:28-31)
12Saara borojjicho Gibitsitte Aggaara Abirihaamira iltinosihu Ismaeeli, 13ilino ooso dirinsa garinni aante noote: Nebayooti, Qeedaari, Adibieeli, Mibisaami, 14Mishimai, Duma, Maasa, 15Hadaadi, Teema, Yixuuri, Nafiishiitinna Qedimaati. 16Kuri Ismaeeli ooso 12 ga'rera akaakkate; su'mansano heedhino katammanninna darguwanni woshshinanni. 17Ismaeeli 137 diro ikkisita reyi. 18Ismaeeli sirchi Gibitsete soojjaatoonni Asoori massitanno farora Hawiilanna Beshuuri mereero hee'ranno; insano wolu Abirihaami sirchi baaluwiinni faffe heedhino.
EESAWUNNA YAIQOOBI ILAMA
19Abirihaami beetti Yisihaaqi ilama aante noote: Yisihaaqi Abirihaamiho. 20Yisihaaqi Beetueeli beetto Ribiqa 40 dirihu hee're adhino; Ribiqa anni Beetueelinna rodiise Laaba Sooriyu mannaati; heedhannohuno Mesiphexoomiyahooti. 21Ribiqa ila keeshshiteenna Yisihaaqi ise daafira Kaaliiqa huucci'ri; Kaaliiqino huuccattosi macciishsheenna Ribiqa godobbu. 22Ribiqa godobbinohu lakkuwu giddose hee're mimmito xiiwi; iseno, «Kuni coyi mayira ikkie?» yite Kaaliiqa huuccidhu. 23Kaaliiqino, «Godowikki giddo nooti 2 gosaati; mimmitoho sumuu yitannokkire 2 gosa ilatta; mittu ko'onne roore jawaata ikkanno; bayiru maa'neho soqqamaancho ikkanno» yiise.
24Iseno yanna iillituta 2 labballi ooso iltu. 25Umi beetti dana biishshaho; bisono baancaamoho; kunnira Eesawu#25:25 Eesawu yaa Ibiraawootu afiinni baancaamu yaate. yinisi. 26Layinkihu ilami woyite bayiriidihu ginde amade fulino; kunnira Yaiqoobi#25:26 Yaiqoobi yaa Ibiraawootu afiinni ginde amade sarraaqanno yaate. yini; Ribiqa ooso iltu yannara Yisihaaqira 60 diro ikke noosi.
EESAWU BAYIRROONYESI HIRI
27Oosono lophitu; Eesawu dubboho hosannoha egennamino ugaaxaancho ikki; Yaiqoobi kayinni wodanaamoho; qaetella hosanno. 28Eesawu ugaaxe abbino maala itisannosi daafira Yisihaaqi iso baxanno; Ribiqa kayinni Yaiqoobi baxxanno.
29Mitto barra Yaiqoobi duume missiru woxi gananni hee'reenna Eesawu ugaaxetewiinni dayi; lowo geeshsha hudi're noo daafira, 30«Hude shituena rakke tenne duume woxi iteemmona uyie» yiisi. Su'masi Edoomi#25:30 Edoomi yaa duumoho yaate; Eesawu woshshinannihu kunni su'minniiti. yinoonnihu kunni daafiraati.
31Yaiqoobino, «Balaxxe bayirroonyekki uyiexa» yiisi.
32Eesawuno, «Ani reyanni hee're bayirroonye ma"assi'reemmosi?» yii.
33Yaiqoobino, «Hanni maahoyyena, ‹Bayirroonye oommohe› yite xaariexa» yiisi. Eesawuno bayirroonyesi xaare Yaiqoobira hire aguri.
34Yaiqoobino Eesawura buddeenanna missiru woxi uyisi; Eesawuno itenna age kae ha'ri; kunni garinni Eesawu bayirroonyesi mulla gede asse aguri.
Currently Selected:
KALAQAMA 25: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014
