KALAQAMA 11
11
MANNU ADDI ADDI QAALINNI MAYIRA COYI'RANNO?
1Umo baattote hee'ranno manni baalunku coyi'rannohu qaalu mitto callaho. 2Mannu soojjaatira hige ha'ri yannara, Baabilooni gobbara mitto xawo afi're, hakkiicho hee'ri. 3Insa insanaawa, «Amme doru bano seekkine, kaajjanno gede giirrona!» yitu. Kunni garinni mi'nitanno bano afidhu; mitteenni qa'missannota Qixiraani yinanni haphaayyono afidhu. 4«Amme mitto katama minnona; hakkiicho birxesi gordo iillanno mine minnona; kunni garinni baatto baalate aana billaallinumokkinni su'minke woshshamanno gede assinona» yitu.
5Hakkunni gedensaanni, Kaaliiqi mannu mininoha katamanna gordo iillino mine la"ara dirre, 6«Kuneeti kuni manni mitto mannaati; coyi'rannohu mitto qaaleeti; umonni konne assinohu kunni garinni keeshshikkinni hedinoha baalanka assa dihooganno. 7Kunnira amme dirrinona; insa insanaawa sumuu yitannokki gede qaalensa burduunqona» yii. 8Kunnira, Kaaliiqi baatto baalate aana billaallisinsa; insano katama mina agurtu. 9Katamu su'ma, Baabilooni#11:9 Baabilooni yaa Ibiraawootu afiinni burduuqate yaate. yini; hatto yinoonnihu, hakkiicho Kaaliiqi mannu qaale burduuqinohuranna insano baatto baalate aana billaallisinonsahuraati.
SEEMINNI ABIRIHAAMI GEESHSHA
(1Dud 1:24-27)
10Seemi sirchi ilama aante noote: Seemi baote wayi gedensaanni 2 diro keeshshe, 100 diro ikkisi yannara Arfakisaadi yinanni beetto ili; 11Arkafisaadi ilihu kawa 500 diro hee'rino; wole labballonna seenne ili.
12Arfakisaadi 35 diro hee'rihu gedensaanni Sheelahi ili. 13Hakkunni gedensaanni, 403 diro hee're, wole labballonna seenne ili. 14Sheelahira 30 diro ikkisita Eeboori ili. 15Hakkunni gedensaanni 403 diro hee're, wole labballonna seenne ili.
16Eeboorira 34 diro ikkisita, Faleeqi ili; 17hakkunni gedensaanni 430 diro hee're, wole labballonna seenne ili.
18Faleeqira 30 diro ikkisita Reeu ili; 19hakkunni gedensaanni 209 diro hee're, wole labballonna seenne ili.
20Reeu 32 diro ikkisita Seruugi ili; 21hakkunni gedensaanni 207 diro hee're, wole labballonna seenne ili.
22Seruugi 30 diro ikkisita Naakoori ili; 23hakkunni gedensaanni 200 diro hee're, wole labballonna seenne ili.
24Naakoori 29 diro ikkisita Taara ili; 25hakkunni gedensaanni 119 diro hee're, wole labballonna seenne ili.
26Taara 70 diro ikkisita Abiraami, Naakoorinna Kaaraani ili.
TAARA SIRCHO
27Taara sirchi aane nooho: Taara Abiraami, Naakoorinna Kaaraani ili. Kaaraani Looxi ili. 28Kaaraani annisi Taara lubbotenni hee'reennanni ilamino katamira Uuri reyino. Uuri Baabilooni Gobbara noo katamaati. 29Abiraaminna Naakoori lamunku seenne adhitu; Abiraami ayiddaama Saarayiiti; Naakoori galte Milkaati; Milka Kaaraani beettooti; Kaaraani Milkanna Yosika annaati. 30Saarayi gaana ikkitinohura ooso di"iltino.
31Taara beettosi Abiraami, Kaaraani ilaminoha beettisi beetto Looxinna Abiraami galte Saarayi adhe Baabilooni nooha Uuri Katama agure Kana"aani Gobba ha'rara kai; Kaaraani marte hakkiicho heedhu. 32Taarara 205 diro ikkisita Kaaraani reyi.
Currently Selected:
KALAQAMA 11: QulMax
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia; Sidama Holy Bible BSE-UBS 262 P 2014