Macaafa Abboota Firdii 12

Yiftaa Fi Namoonni Efreem Wal Komachuu Isaanii

1Warri Efreem lola dhaquudhaaf waamamanii, gara mandara Zaafonitti ce'anii, Yiftaadhaan,<<Ati warra Amoon loluudhaaf gara isaaniitti yommuu darbite nuyi sii wajjin akka dhaqnuuf maaliif nu waamuu didde>> Amma mana kee ibiddaan si irratti in gubna>> jedhan*. 2Yiftaanis deebisee isaaniin,<<Anii fi sabni koo warra Amoonii wajjin wal'aansoo jabaa irra turre; ani gargaarsaaf gara keessanitti yoon iyyadhe iyyuu isin na oolchuudhaaf, anaaf hin birmanne. 3Akka isin anaaf hin birmatin yommuun arges fittee irra of buusee, gara warra Amoonitti nan darbe; Waaqayyo immoo harka koo keessa isaan in buuse; egaa isin maaliif har'a ana loluudhaaf dhuftan ree?>> jedhe*. 4Yommus Yiftaan warra Giil'aad hundumaa waraanaaf walitti qabatee warra Efreem in lole; warri Giil'aad, sababii warri Efreem,<<Yaa warra Giil'aad! Isin Efreem irraa cabsattanii, Efreemii fi Minaasee gidduu in teessu>> jedhanii irratti dubbataniif isaan in rukutan. 5Warri Giil'aad malkaa laga Yordaanos isa warri Efreem ittiin ce'an hundumaa in qabatan; warra Efreem keessaa namni tokko jalaa ba'uudhaaf,<<Nan ce'a>> jedhee, yeroo kadhatutti warri Giil'aad immoo,<<Ati nama sanyii Efreemii?>> jedhanii in gaafatu; inni immoo,<<Waawuu>> yoo jedhe, 6yommus mee,<<Shibolet>> jedhi! in jedhuun; inni garuu kana jechuuf arrabni isaa qajeeluufii didee<<Sibolet>> yoo jedhe, qabanii karaa ce'umsa Yordaanos irratti isa in ajjeesu; yeroo sana akkasitti warra Efreem keessaa namoota kuma afurtamii lamatu dhume.#1 8:1 3 9:17

7Yiftaan Giil'aadichi Israa'elin waggaa ja'aaf erga geggeessee booddee du'ee, mandara isaatti Giil'aad keessatti in awwaalame.

8Yiftaan erga du'ee booddee Ibzaan nama Betlihemtu Israa'elin geggeesse. 9Inni ilmaan soddoma qaba ture; intaloota isaa soddomman namoota ormaatti heerumsiise, ilmaan isaas durboota soddoma sanyii ormaa keessaa in fuusise; Israa'elin waggaa torba erga geggeessee booddee, 10Ibzaan du'ee, Betlihemitti in awwaalame.

11Ibzaan duunaan Eloon namni sanyii Zebuloon Israa'elin waggaa kudhan in geggeesse. 12Eloonis du'ee, biyya Zebuloon keessaa Ayalonitti in awwaalame.

13Eloon erga du'ee booddee, Abdoon ilma Hiilel Phiiraatonichaatu Israa'elin geggeesse. 14Inni ilmaan afurtama in godhate; ilmaan ilmaan isaatii immoo soddoma turan; isaan kun harroota torbaatama yaabbatanii kan adeemanii dha; barri Abdoon Israa'elin geggeesse immoo waggaa saddeet ture. 15Kana booddee Abdoon ilmi Hiilel Phiiraatonichaa du'ee, biyya Efreem keessaa tulluu Amaaleqootaa gubbaatti Phiiraatonitti in awwaalame.

Currently Selected:

Macaafa Abboota Firdii 12: MacQul

Highlight

Copy