Macaafa Isaayaas Raajichaa 32
32
Mootummaa Qajeelaan Akka Dhufu Himuu Isaa
1Kunoo! Mootiin qajeelummaadhaan mo'uu fi
gurguddoonni firdii qajeelaadhaan
geggeessan in dhufu*;
2tokkon tokkon isaanii
akka iddoo qilleensa jabaa
jalaa itti baqatanii,
akka da'oo bubbee jalaa itti baqatanii,
akka bishaan lafa gogaa keessa yaa'uu,
akka gaaddisa kattaa guddaa
isa lafa dheebotaa keessa
jiruus in ta'u.#1 11:1-5; Er 23:5
3Yommus iji warra ilaaluu mul'inatti in arga;
gurri warra dhaga'uus in dhaggeeffata;
4garaan warra hawwa qabanii
ogummaa in hubata,
arrabni warra giingees qajeelchee
mul'isees in dubbata*.
5Yommus namni gowwaan
ulfina hin argatu;
namni doqnis <<Arjaa dha>> hin jedhamu.
6Namni gowwaan gowwummaa in dubbata,
yaadni isaas jal'inaan guutuu dha;
inni wanta hamaa in hojjeta,
wanta dubbatuunis
Waaqayyoon in arrabsa;
warra beela'an hagabuu gad in dhiisa,
warra dheebotanis bishaan in dhowwata;
7malli nama jal'aa hammina,
namni hiyyeessi wanta qajeelaa
yoo dubbate iyyuu,
namni jal'aan immoo dubbii sobaatiin
warra dhaboo gara badiisaatti oofuudhaaf,
akeeka jal'aa in qopheeffata;
8namni guddaan garuu,
wanta ulfina qabu
yaadee in qopheessa,
wanta ulfina-qabeessa
duwwaadhaafis in dhaabata.#4 35:6
Dubartoota Yerusaalem Gorsuu Isaa
9Isin yaa dubartoota
yaaddoo tokko malee jiraattanii,
ka'aa, sagalee koo dhaga'aa!
Isin yaa intaloota bir'aa tokko malee jiraattanii,
dubbii koo dhaggeeffadhaa*!
10Isin yaa dubartoota bir'aa tokko malee jiraattanii,
dhaabaan waynii ija
waan hin godhanneef,
makariin ija mukaas
waan hin jirreef,
si'achi waggaa tokkoo fi
yeroo muraasa booddee
naatanii hollachuuf jirtu!
11Isin yaa dubartoota
yaaddoo tokko malee jiraattanii rom'aa!
Isin yaa warra bir'aa tokko malee jiraattanii holladhaa!
Uffata keessan of irraa baasaa,
mudhii keessanittis
uffata gaddaa hidhadhaa!
12Maasii isa ba'eessaa fi
dhaabaa waynii isa ija gaarii godhatuuf
qoma keessan rurrukutaatii boo'aa!
13Maasii saba koo isa qoraattii fi
kosorruu biqilcheef,
manneen namoonni keessatti gammadaa
turan hundumaaf,
mandara ililleen keessaa
badeefis boo'aa*!
14Manni mootii in ona,
mandarri isheen waci
keessa guutes gab in jetti;
gaarri, riqaan irra ijaajjanii
biyya eegan irra jirus
bara baraan bakkee harroonni diidaa fi
saawwan dheedan in ta'a.#9 3:16?4:1; Amo 6:1 10-13 Yoe 1:8-12
Hafuurri Waaqayyoo Isaan In Haaressa
15Waaqayyo hafuura isaa olii
nu irratti yommuu dhangalaasu,
lafti onaan iddoo dhaabaa
mukkeetiin iji isaanii nyaatamu
keessatti argamu in ta'a,
mukkeetiin kunis guddatanii
akka caakkaa in ta'u*;
16firdii qajeelaan lafa onaa keessa,
qajeelummaanis lafa midhaan baasu keessa in buufata;
17iddoo qajeelummaan jiru nagaan jira,
iji qajeelummaa bir'aa malee
gabiitti jiraachuu dha;
18yommus sabni koo
manneen nagaa keessa in jiraata,
iddoo sodaanii fi bir'aan hin jirres
iddoo boqonnaa isaa in godhata*;
19caakkaa warra diinotaa garuu
cabbiin in balleessa,
mandarri isaaniis in diigama;
20isin warri qarqara bishaanotaatti
midhaan facaafattan,
saawwanii fi harrootas
iddoo barbaaddanitti yaafattan gammadaa!#15 44:3; 29:17; Yoe 2:28 18 33:20
Currently Selected:
Macaafa Isaayaas Raajichaa 32: MacQul
Highlight
Share
Copy
Want to have your highlights saved across all your devices? Sign up or sign in
(C) The Bible Society of Ethiopia, 1997; OROMO LATIN BIBLE BSE-UBS 26M 2006.
