Macaafa Hisqi'el Raajichaa 39

Goog Mo'amuu Isaa

1Waaqayyo gooftaan,<<Yaa mucaa namaa! Ati Goog irratti raajii dubbadhu!<<Yaa Goog angafa Rosh, angafa Meshek, angafa Tubaalis! Kunoo, ani si irratti ka'eera*; 2ani gara si galchee si fuudhee nan adeema, gara bitaa isa fagoodhaas si fidee tulloota Israa'el irratti sin kaasa; 3ergasii ani iddaa kee harka kee bitaa keessaa, xiyya kees harka kee mirgaa keessaa rukutee nan buusa; 4ati, loltuun kee hundinuu, namoonni sii wajjin jiranis tulloota Israa'el irratti in kukkuftu; ani allaattii raqaa hundumaaf bineensota caakkaa hundumaafis nyaata godhee isin nan kenna. 5Akkuman kanaan dura dubbadhe, ati bakkee adii keessatti in kufta, ani Waaqayyo gooftaan kana dubbadheera>> jedha; 6ani, Maagoogii fi warra qarqara galaanaa bir'aa malee jiraatan irratti ibidda nan erga, isaanis ani Waaqayyo akkan ta'e in beeku.#1 38:2

7<<Ani maqaan koo inni qulqulluun saba koo Israa'el gidduutti akka beekamu nan godha; maqaan koo inni qulqulluun deebi'ee akka xuraa'u hin godhu; kana irraa kan ka'es sabni warri kaan ani Waaqayyo qulqulluu isa kan Israa'el akkan ta'e in beeku*. 8Kunoo! Guyyaan ani<<In dhufa>> jedhee dubbadhe sun dhufuutti jira, inni dhuguma in dhufa>> jedha; Waaqayyo gooftaan kana dubbateera*.#7 36:23; 37:28 8 38:17

9<<Yommus warri mandaroota Israa'el keessa jiraatan achi keessaa gad yaa'anii mi'a waraanaa akka qoraaniitti ibiddatti naqanii in bobeessu; gaachana xixinnaa, gaachana gurguddaas, iddaadhaa fi xiyya, ulee qabannaa fi eeboo in gubu; waggaa torbas akka qoraaniitti in bobeessu*; 10yeroo sanatti mi'a waraanaa sana waan bobeeffataniif qoraan bakkeedhaa hin funaanan, mukas caakkaa keessaa hin muran; isaan warra isaan booji'an in booji'u, warra isaan saamanis in saamu>> jedha; Waaqayyo gooftaan kana dubbateera*.#9 Isa 9:4; Far 46:9 10 Er 30:16

11Waaqayyo,<<Bara sana biyya Israa'el keessaa Googiif iddoo awwaalaa dachaa warra kara-adeemtuu isa galaana irraa gara ba'a-biiftuutiin jiru sana nan kennaaf; Googii fi loltuun isaa hundinuu achitti waan awwaalamaniif warra kara-adeemtuutti karaan in cufama; maqaan iddoo sanaas <<Dachaa Hamoon-Goog>> in jedhama. 12Namoonni Israa'el biyya sana qulleessuudhaaf jedhanii ji'a torba guutuu isaan in awwaalu; 13sabni biyya sanaa hundinuu isaan in awwaalu, guyyaan ani itti ulfina argadhu sun guyyaa yaadatamu isaaniif in ta'a>> jedha; Waaqayyo gooftaan kana dubbateera. 14Namoonni yeroo hundumaa biyya keessa naanna'anii diina warra reeffi isaanii bakkeetti hafe awwaalanii fi warri biyya qulleessan itti in qacaramu; dhuma ji'a torbaatti biyya keessa adeemanii isa hafe barbaaduu in jalqabu; 15isaan yommuu biyya keessa adeeman lafee namaa yoo lafatti argan, hamma warri awwaalan dhufanii<<Dachaa Hamoon-Goog>> keessatti awwaalanitti iddoo sanatti milikkita haa godhan! 16Isaanis akkasitti biyyicha in qulleessu; maqaan mandara iddoo sana jirtus <<Hamoonaa>> jedhama*.#11-16 Lak 19:11-16

17Ati immoo yaa mucaa namaa! Allaattota qilleensa keessa balali'anii fi bineensota caakkaa hundumaatti dubbadhuu,<<Waaqayyo gooftaan,<<Iddoo hundumaattii walitti qabamaatii kottaa, foon aarsaa isa guddaa ani tulloota Israa'el irratti isiniif qopheesse nyaadhaa, dhiiga isaas dhugaa! 18Isin foon warra jajjabootaa nyaadhaa, dhiiga gurguddoota warra biyya lafaas akka nama dhiiga korbeeyyii fi dhiiga xobbaallaa, dhiiga re'ootaa fi dhiiga sangoota warra Baashaanitti coomanii dhuguutti dhugaa! 19Cooma aarsaa isa ani isiniif qopheessu kana hamma quuftanitti nyaadhaa! Dhiiga isaas hamma machooftanitti dhugaa! 20Isin maaddii koo irratti fardeenii fi abboota fardeenii, loltoota jajjaboota hundumaas nyaattanii in quuftu>> jedha; Waaqayyo gooftaan kana dubbateera*.#17-20 Mul 19:17-18; Isa 34:6

21<<Ani ulfina koo saba warra kaan gidduutti nan argisiisa, sabni hundinuus firdii koo isa ani isaan irratti raawwadhe, harka koo isa ani isaan irratti ol fudhadhes in argu*; 22akkasitti manni Israa'el gaafasii jalqabee gara fuula duraatti ani Waaqayyo gooftaa isaa akkan ta'e in beeka*. 23Sabni warri kaanis manni Israa'el sababii yakka isaatiif akka booji'ame in beeku; isaan ana hin amananne, kanaafan fuula koo isaan dhoksee harka diinota isaaniitti dabarsee isaan kenne; hundumti isaaniis billaadhaan in dhuman*; 24ani akka xuraa'ummaa isaaniitii fi akka irra daddarbaa isaaniittan isaaniif godhe; fuula koos isaan duraa nan dhokse>> jedhe.#21 38:16 22 39:28 23 Isa 54:8

25Amma garuu Waaqayyo gooftaan,<<Ani amma sanyii Yaaqoob boojuudhaa nan deebisa, mana Israa'el hundumaafis nan oo'a, maqaa koo isa qulqulluudhaafis nan hinaafa*; 26isaan biyya isaanii keessa namni tokko illee utuu isaan hin naasisin bir'aa malee yommuu jiraatan, yeelloo isaanii fi isa ana ganan hundumaa in irraanfatu. 27Yommuu ani saba warra kaan keessaa deebisee isaan fidu, biyya diinota isaanii keessaas walitti isaan qabu, ani qulqulluu ta'uu koo karaa isaanii fuula saba baay'ee duratti nan argisiisa. 28Yommus ani Waaqayyo gooftaan isaanii saba warra kaan gidduutti akka booji'aman ergan godhee booddee, biyya isaaniitti immoo deebisee akkan walitti isaan qabe, nama tokko illees achitti akkan hin hambifne isaan in beeku*. 29Ani hafuura koo mana Israa'el irratti waanan dhangalaaseef, si'achi fuula koo isaan duraa hin dhoksu>> jedha; Waaqayyo gooftaan kana dubbateera*.#25 16:53-63; 36:20-23 28 34:30 29 36:27

Currently Selected:

Macaafa Hisqi'el Raajichaa 39: MacQul

Highlight

Copy