Macaafa Lallabaa 12

Yeroo Dargagummaatti Uumaa Ofii Akka Yaadatan Gorsuu Isaa

1Barri hamaan utuu hin dhufin,

waggoonni ati,<<Anatti hin tolan>>

ittiin jettus utuu hin dhi'aatin,

bara dargagummaa keetti

uumaa kee yaadadhu!

2Aduun, ifni, jiini,

urjiinis utuu hin dukkanaa'in,

bokkaa booddeedhaanis duumessi

utuu hin dhufin,

uumaa kee yaadadhu!

3Yeroo sanatti harki kee

warri si eegaa turan,

miillan kee warri ciccimoonis in hollatu;

ilkaan kee waan muraasataniif

nyaachuu in dadhabu,

iji kee inni ilaalaa tures in dimimmisaa'a;

4yommus gurri kee lamaan

dhaga'uu in dadhabu,

ilkaan keetiin yommuu waa nyaattus

sagaleen isaa hin dhaga'amu,

namoonni yeroo simbirri wacutti in ka'u,

sagaleen faarfannaa isaanii garuu

sitti hin dhaga'amu.

5Yommus ati irraan-olee adeemuu,

karaa irratti wanta sitti bu'us in sodaatta;

rifeensi mataa keetii

akka daraaraa mata-bokkee in ta'a,

caaroon kee akka kan qorophisaa in dadacha'a;

kajeellaan kees in hadooda;

kana booddee iddoo boqonnaa bara baraa in dhaqxa,

warri siif boo'anis karaa irra asii fi achi in yaa'u.

6Kanaafis bu'aa dhagna keetii keessaa

wanti akka fo'aa meetii irraa hojjetame

utuu hin citin,

inni akka harkee warqee irraa hojjetame

utuu hin cabin,

wanti akka gomboo,

burqaa bishaanii biratti utuu hin hurraa'in,

inni akka geengoo ittiin

bishaan boollaa waraabanis

utuu hin cabin uumaa kee yaadadhu!

7Biyyoon gara biyyoo

isa irraa dhufeetti deebi'uun,

hafuurri immoo gara Waaqayyo

isa isa kenneetti

deebi'uun hin hafu*.

8Lallabichi,<<Wanti hundinuu

waa'ee hin baasu!

Dhugumaan waa'ee hin baasu,

waa'ee hin baasu>> jedhe*.#7 3:20-21; Uma 3:19 8 1:2

Jajamuu Hojii Lallabichaa

9Lallabichi ogummaa kan qabu duwwaa utuu hin ta'in, waan ofii beeku saba in barsiise; inni fakkeenya baay'ee itti yaadee, qoree, tarree galchee in qopheesse; 10inni dubbii nama gammachiisu walitti qabee, dubbii qajeelaa, dubbii dhugaas in caafe.

11Dubbiin warra ogeessaa akka ulee isa tiksituu biraa argatanii ittiin horii oofanii ti; jechi isaanii inni funaanamee walitti qabame, akka mismaara tarreetti cinqaarfamee ti.

12Yaa ilma ko, kana irrattis gorsa kanatti aanee jiru fudhadhu! Macaafota caafuu baay'isuun dhuma hin qabu, macaafa qoruu baay'isuunis nama in dadhabsiisa.

13Waaqayyoon sodaadhu, abboommii isaas eegi!

Kun nama hundumaa irraa in barbaadama;

xumurri dubbii dhageenye

kana hundumaas isa kana*.

14Waaqayyo hojii hundumaa, gaarii ta'us hamaa ta'us wanta dhoksaatti hojjetamu hundumaaf firdii in kenna*.#13 3:14; 7:18; Kes 4:10; 6:2 14 Rom 2:16; 2Qor 5:10

Currently Selected:

Macaafa Lallabaa 12: MacQul

Highlight

Copy