Macaafa Moototaa Isa Duraa 8

Sanduuqi Kakuu Mana Qulqullummaatti Ol Galfamuu Isaa

(2Sen 5:2–6:2)

1Yommus Solomoon mootichi sanduuqa kakuu Xiyoon mandara Daawitii gara mana qulqullummaatti akka ol fidaniif jaarsolii, dura-buutota gosaa fi angafoota qomoo Israa'el Yerusaalemitti ofitti in waamsise. 2Namoonni Israa'el hundinuu ji'a torbaffaa isa <<Etaaniim>> jedhamutti yeroo ayyaanni Gordommaa itti ayyaaneffamutti Solomoon mooticha duratti walitti in qabaman*. 3Yeroo jaarsoliin Israa'el hundinuu achi ga'anitti, luboonni sanduuqa kakuu sana fudhatanii in ka'an; 4akkasitti luboonnii fi Lewwoonni sanduuqa kakuu sana akkasumas dunkaana itti wal ga'anii fi mi'a qulqullaa'aa dunkaanicha keessaa hundumaa gara mana qulqullummaatti in geessan. 5Solomoon mootichii fi guutummaan waldaa Israa'el warri isa duratti walitti qabaman sanduuqa kakuu sana duratti bushaayee fi saawwan baay'inni isaanii caafamuu fi lakkaa'amuu hin dandeenye aarsaa in dhi'eessan.#2 Bau 23:16

6Yommus luboonni sanduuqa kakuu sana ol galchanii iddoo isaaf qophaa'e isa hundumaa irra qulqullaa'aa keessa qoochoowwan Kiruubel jala in kaa'an*. 7Kiruubel qoochoowwan isaanii iddoo sana gubbaatti bal'isanii sanduuqa kakuu sanaaf danqaraa ittiin sanduuqicha baatan in golbooban. 8Danqaraawwan kun dhedheeroo waan ta'aniif, fiixeen isaanii iddoo qulqullaa'aa isa hundumaa irra qulqullaa'aa dura jiru sana keessatti in argama; garuu iddoo qulqullaa'aa sana keessa darbee alatti hin mul'atu; danqaraawwan sun hamma har'aatti iyyuu achuma jiru*. 9Sanduuqa kakuu sana keessa gabatoota dhagaa warra erga sabni Israa'el biyya Gibxiitii ba'anii booddee abboommiin kurnan irratti caafaman lamaan irraa kan hafe wanti biraa hin turre; gabatoota kana Museetu tulluu Siinaa iddoo Waaqayyo saba isaatiif kakuu itti gale gubbaatti sanduuqicha keessa kaa'e*.#6 2Sam 6:17 8 Bau 25:13-15 9 Bau 25:21; Kes 10:5

10Akkuma luboonni iddoo qulqullaa'aa sana keessaa gad ba'aniin duumessi mana qulqullummaa sana keessa in guute. 11Ulfinni Waaqayyoo manicha keessa waan guuteef, duumessichis manicha keessa waan jiruuf, luboonni obsanii hojii isaanii hojjechuu hin dandeenye*. 12Yommus Solomoon,<<Yaa Waaqayyo, ati,<<Duumessa dukkanaa'aa keessan jiraadha>> jetteetta*; 13ani garuu dhugumaan akka ati bara baraan keessa jiraattuuf mana qulqullummaa guddaa miidhagaa kana siif ijaareera>> jedhe*.#11 Bau 40:34-35 12 Bau 20:21; Far 18:11; 97:2 13 Far 132:14

Solomoon Sabatti Dubbachuu Isaa

(2Sen 6:3-11)

14Kana booddee mootichi guutummaa waldaa Israa'el warra achi dhaabatanii jiranitti gara galee isaan in eebbise.

15Inni,<<Waaqayyo gooftaan Israa'el! Inni wanta afaan isaatiin abbaa koo Daawitin abdachiisee ture raawwateef haa galateeffamu! Yommus inni,

16<<Saba koo Israa'elin biyya Gibxii ergan baasee jalqabee, Daawit akka isaan bulchuufan fo'adhe malee, ulfina maqaa kootiif manni qulqullummaa isa keessatti akka ijaaramuuf mandaroota gosa Israa'el hundumaa keessaa tokko illee hin fo'anne>> jedhe.

17Daawit abbaan koo ulfina maqaa Waaqayyo gooftaa Israa'eliif mana qulqullummaa ijaaruuf garaa isaatti yaadee ture.

18Waaqayyo garuu Daawit abbaa kootiin,<<Ati ulfina maqaa kootiif mana qulqullummaa ijaaruu yaaduun kee gaarii dha;

19haa ta'u iyyuu malee, ilma ati dhalchitetu ulfina maqaa kootiif mana qulqullummaa anaaf ijaara malee, ati anaaf hin ijaartu!>> jedhe*.

20Amma Waaqayyo isa dur abdachiisee ture fiixaan baaseera; ani akkuma inni dur abdachiisetti iddoo Daawit abbaa koo mootii ta'ee, teessoo mootummaa Israa'el irra taa'eera, ulfina maqaa Waaqayyo gooftaa Israa'eliifis mana qulqullummaa ijaareera.

21Sanduuqa kakuu, isa abboommii kurnan isa Waaqayyo yommuu abboota keenya biyya Gibxii baase isaaniif kenne sana baatuufis manicha keessatti iddoo qopheesseera>> jedhe.#17-19 2Sam 7:1-13

Kadhata Solomoon

(2Sen 6:12-42)

22Yommus Solomoon ka'ee gara iddoo itti Waaqayyoof aarsaa dhi'eessanii dhaqee, guutummaa waldaa Israa'el dura dhaabatee kadhataaf harka isaa gara waaqaatti ol qabee,

23<<Yaa Waaqayyo gooftaa Israa'el! Ol waaqa irra yookiis gad lafa jala kan akka keetii Waaqayyo kan biraa hin jiru; ati garboota kee warra garaa guutuudhaan fuula kee dura deddeebi'aniif kakuu kee in eegda, gaarummaa kees isaan in argisiifta*.

24Ati garbicha kee abbaa koo Daawitin isa abdachiifte raawwatteetta, isa dur afaan keetiin dubbattes har'a kunoo, ofii keetii fiixaan baafteetta.

25Ammas yaa Waaqayyo gooftaa Israa'el, isa garbicha kee abbaa koo Daawitiin,<<Akkuma ati fuula koo dura deddeebi'aa turte kanatti, ilmaan kees wanta godhan hundumaatti fuula koo dura yoo deddeebi'an, namni isaan keessaa mootii ta'ee teessoo Israa'el irra taa'u hin dhabamu>> jettee, isa abdachiifte sana eegiif*!

26Ammas yaa Waaqayyo gooftaa Israa'el, isa garbicha kee abbaa koo Daawitin abdachiifte sana raawwadhu!#23 Kes 4:35-39; 7:9 25 2:4

27<<Yaa Waaqayyo, ati garuu dhuguma lafa irra jiraattaa ree>> Kunoo, bantiiwwan waaqaa fi bantiin waaqaa inni bantiiwwan waaqaa gara irraa jiru iyyuu si fudhachuu hin danda'u erga ta'ee, manni qulqullummaa ani ijaare kun immoo hammam isa irra haa xinnaatu ree*!

28Yaa Waaqayyo gooftaa ko! Gurra kee gara kadhata ana garbicha keetti qabi, himata koos dhaggeeffadhu, kadhata ani garbichi kee har'a fuula kee duratti kadhachaa jirus yaadaan anaaf qabi!

29Kadhata ani garbichi kee gara iddoo kanaatti gara galee si kadhadhu akka anaaf dhageessutti, iji kee halkanii fi guyyaa gara mana qulqullummaa isa ulfinni maqaa kee achi keessa akka taa'u goote kanaa haa ilaalu!

30Waammata ani garbichi kee fi Israa'el sabni kee gara iddoo kanaatti gara gallee si waammannu waaqa irraa, iddoo jireenya keetiitii nuuf dhaga'iitii nuuf dhiisi!#27 2Sen 2:5; 6:18; Isa 66:1; HoE 17:24

31<<Namni tokko nama irratti cubbuu yoo hojjete, isa hojjete kanaaf gara mana qulqullummaa kana dhufee iddoo aarsa keetii dhi'aatee akka kakatuuf yommuu gaafatamu,

32ati immoo waaqa irraa dhaga'ii firdii kenni, garboota keetiif firdii yommuu kennitu isa yakketti faradi! Yakka isaa mataa isaatti deebisi, isa qajeelaadhaaf immoo akka qajeelummaa isaatti kenniif!

33<<Sabni kee Israa'el sababii si yakkaniif diinota isaaniitiin yeroo mo'amanitti, gaabbanii gara keetti deebi'anii maqaa kee waammatanii mana qulqullummaa kana keessatti fuula kee duratti yommuu si kadhatan,

34ati waaqa irraa isaaniif dhaga'i, cubbuu saba keetii kanas dhiisiif! Biyya isa abboota isaaniitiif kennitettis isaan deebisi!

35Sababii isaan si yakkaniif bantiiwwan waaqaa cufamanii bokkaan lafa irratti roobuu yommuu dhiisutti, sababii cubbuu isaaniitiif rakkina yommuu isaanitti fiddu, isaan gara iddoo kanaatti gara galanii yoo si kadhatan, maqaa kees yoo waammatan, cubbuu isaanii irraas yoo deebi'an,

36yommus ati waaqa irraa isaaniif dhaga'i, cubbuu garboota kee saba Israa'el kanaas dhiisiif! Karaa qajeelaa irra akka isaan deddeebi'an isaan barsiisi, biyya isa saba keetiif dhuunfaa gootee kennite irratti bokkaa roobsi!

37<<Yommuu beellii fi dha'ichi biyyichatti dhufutti, waagiin, gogiin, hawaannisii fi korophisi midhaan balleessanitti yookiis yommuu diinni biyyicha marsee rakkisutti, dheekkamsa keessaa yookiis dhukkuba keessaa tokko illee biyyichatti yommuu dhufutti,

38kadhata isaanii dhaggeeffadhuuf! Guutummaa saba kee Israa'el biraa yookiis nama tokko biraa kadhannii fi waammanni gara keetti yommuu dhi'aatu, tokkon tokkon isaanii rakkina yaada isaaniitti dhaga'ame kanaaf harka isaanii gara mana qulqullummaa kanaatti yommuu bal'isan,

39ati waaqa irraa iddoo jireenya keetiitii isaaniif dhaga'i, isaaniifis dhiisi! Ati hojjedhu! Si duwaatu garaa namaa beeka, kanaafis adduma addaan akka hojii isaaniitti isaaniif deebisi*!

40Yommus isaan biyya isa ati abboota keenyaaf kennite keessa bara jiraatan hundumaatti si in sodaatu.#39 1Sam 16:7; Far 139:2

41<<Akkasuma immoo sanyii saba kee Israa'el keessaa kan hin ta'in, namni ormi waa'ee maqaa keetii dhaga'ee biyya fagootii in dhufa*;

42namni waa'ee maqaa kee isa guddaa, irree kee isa cimaa fi harka kee isa bal'ifamaa dhaga'ee dhufee, gara mana kanaatti gara galee yommuu kadhatutti,

43waaqa irraa, iddoo jireenya keetiitii isaaf dhaga'i! Sabni lafa irraa hundinuu akkuma saba kee Israa'el maqaa kee akka beekanitti, akka si sodaatanitti, manni ani ijaare kunis maqaa keetiin akka waamamu akka beekanitti waan inni ormi sun si kadhatu dhaga'iif!#41 Lak 15:14-16

44<<Sabni kee diinota isaaniitti duuluudhaaf gara ati itti isaan ergitu yommuu dhaqan, gara mandara ishee ati fo'atte kanaa fi gara mana qulqullummaa isa ani ulfina maqaa keetiif ijaare kanaatti gara galanii yommuu si kadhatanitti,

45ati waaqa irraa kadhata isaanii fi iyyata isaanii isaaniif dhaga'i, wanta isaan sitti himatanis raawwadhuuf!

46<<Namni hin yakkine tokko illee waan hin jirreef, sabni kee yommuu si yakkan, ati isaanitti dheekkamtee, diinota isaanii warra isaan booji'anii biyya fagootti yookiis dhi'ootti isaan geessanitti dabarsitee yommuu isaan kennitu*,

47isaan immoo biyya diinota isaanii lafa itti booji'aman sana keessatti yaada garaa isaanii geddaratanii gaabbanii,<<Nuyi cubbuu hojjenneerra, karaa irraa kaanneerra, wanta jal'aas hojjenneerra>> jedhanii yommuu si kadhatan isaaniif dhaga'i!

48Isaan biyya diinota isaanii warra isaan booji'e keessatti garaa isaanii fi yaada isaanii guutuudhaan gara keetti deebi'anii, gara biyya ati abboota isaaniitiif kennitetti, gara mandara ati fo'attetti, gara mana qulqullummaa isa ani ulfina maqaa keetiif ijaare kanaattis gara galanii yommuu si kadhatan,

49ati yommus bantii waaqaa irraa, iddoo jireenya keetiitii kadhata isaaniif wawwaannaa isaanii dhaga'iif, wanta isaan sitti himatanis raawwadhuuf*!

50Saba kee warra si yakkan yakka isaanii, warra abboommii kee irra daddarban irra daddarbaa isaanii isaanitti hin lakkaa'in! Diinota isaanii warra isaan booji'es garaa laafisiif!

51Isaan saba dhuunfaa kee warra ati biyya Gibxii isa akka iddoo sibiila itti baqsanii sana keessaa baaftee dha*.#46 Far 14:3-4; Rom 3:23 47-49 Dan 6:11; 9:4-5 51 Kes 4:20

52<<Yommuu ani garbichi kee fi sabni kee Israa'el si kadhannu gara keenya ilaali! Yommuu sabni kee gargaarsaaf sitti iyyatus dhaga'iif!

53Yaa Waaqayyo gooftaa, ati abboota keenya biyya Gibxiitii yommuu baafte karaa Musee garbicha keetii akkuma dubbatte, saba biyya lafaa hundumaa keessaa dhuunfaa kee akka ta'aniif addaan isaan in baafte>> jedhe.

54Solomoon iddoo itti Waaqayyoof aarsaa dhi'eessan dura jilbeenfatee harka isaas gara waaqaatti ol qabee, Waaqayyoon kadhachuu isaa fi wawwaachuu isaa hundumaa erga raawwatee booddee ol ka'ee,

55dhaabatees sagalee isaa ol fudhatee guutummaa waldaa Israa'el in eebbise. Eebba isaa keessattis,

56<<Waaqayyo inni akkuma dubbatetti saba isaa Israa'eliif boqonnaa kenne haa jajamu! Abdii gaarii inni karaa garbicha isaa Musee kenne hundumaa keessaa tokko illee utuu hin raawwatamin hin hafne*.

57Waaqayyo gooftaan keenya abboota keenyaa wajjin akkuma ture, nuu wajjinis haa ta'u! Inni nu hin gatin, kophaattis nu hin dhiisin!

58Abboommii inni abboota keenya abboome, seerrata isaa fi wanta isa duratti qajeelaa ta'e hundumaa akka eegnuuf, karaa isaa hundumaa irras akka deddeebinuuf yaada keenya gara ofii isaatiitti haa deebisu!

59Kadhanni ani Waaqayyo gooftaa keenya kadhadhe hundinuu yeroo hundumaa isa dura nuuf haa jiraatu! Inni isa dabe qajeelchee wanta guyyaa guyyaatti barbaachisu hundumaas ana garbicha isaatiif, saba isaa Israa'eliifis haa raawwatu!

60Kanaanis sabni biyya lafaa hundinuu inni Waaqayyo akka ta'e, isa malees Waaqayyo kan biraa akka hin jirre haa beekan!

61Isin sabni isaa akkuma har'a hojjechaa jirtan kana akka seerrata isaatti jiraachuudhaaf, abboommii isaas eeguudhaaf Waaqayyo gooftaa keenya duratti garaan keessan tokko haa ta'u!>> jedhe.#56 Iya 21:44-45

Manni Qulqullummaa Eebbifamuu Isaa

(2Sen 7:4-10)

62Kana booddee mootichii fi Israa'eloonni isaa wajjin turan hundinuu Waaqayyo duratti aarsaa in dhi'eessan. 63Solomoon mootichi saawwan kuma digdamii lamaa fi bushaayee kumaatama dhibba tokkoo fi kuma digdama qalma araaraa Waaqayyoof in dhi'eesse; akkasitti mootichii fi Israa'eloonni sun hundinuu mana qulqullummaa in eebbisan. 64Sababii iddoon aarsaa inni sibiila borrajjiitiin fuula teessoo araaraa duratti hojjetame xinnaatee, qalma gubamu, kennaa midhaanii fi moora qalma araaraa fudhachuu hin dandeenyeef, mootichi gaafuma sana oobdii gara gidduu isa fuula mana qulqullummaa dura jiru addaan baasee, oobdicha keessatti qalma gubamu, kennaa midhaanii fi moora qalma araaraa in dhi'eesse. 65Yeroo sana Solomoonii fi Israa'eloonni Leboo-Haamaatii hamma laga Gibxiitti jiran walitti qabama guddaa godhatanii guyyaa torba torba walumatti guyyaa kudha afur ayyaana Gordommaa fuula Waaqayyo gooftaa keenyaa duratti in ayyaaneffatan. 66Ayyaanichi ba'ee bulee Solomoon mootichi,<<Gara mana keessaniitti galaa!>> jedhee, gad isaan dhiise; namoonnis Solomoon mooticha eebbisaa, gaarummaa Waaqayyo garbicha isaa Daawitiif, saba isaa Israa'eliifis godhe hundumaaf isa jajachaa, garaa isaanii guutuu gammadaa, ililchaas gara mana mana isaaniitti in galan.

Currently Selected:

Macaafa Moototaa Isa Duraa 8: MacQul

Highlight

Copy