Luk 4

Luum Päänynyö Mana Pääny Jecu

(Mathiew 4:1-11; Maak 1:12-13)

1'Ba Jecu aduuö ki yi Naam Jördan ni päŋ ki Jwïëc Jwøk na en kur keere, ni bwødhi ya Jwïëc Jwøki paap. 2Ni bëëde paap ki nïne ma pïëraŋween, ni pääny anägö päänynyö, ni bäŋ gïn mo ee camø yïth nïrögø. 'Ba na thum nïrögø, ena näk käci. 3Ni kö anägö jïgø, ni «Nee ïïna O Jwøk, kööm kïdi man nee tïme na møø.»

4Ni løgi ya Jecu jïgø, no «Ogöörö, ni ‹Dhaanhø ba doo kwøw ka cam keere.› »#Tiet Ciik 8:3

5Ni kïthi ya anägö maal bäät kïdi ni nyuth gø buc piny bëët ki nyi kany mo thiinh, 6ni kööe jïgø, «Teek mar japøgø bëët ka ajiemge daa wëëga ïïni. Kiper omëëk aani, ni daa mëëga ŋato manynya jaak. 7Kiper manøgønø, ni näk maa wøørï wøørø nø, doo tïmö na moï.»

8Ni løgi ya Jecu jïgø, no «Ogöörö,

«ni ‹Ï doo wøøra Wuuö Jwøk na näk Jwøï,

ni beeye eni keere na diï tïnynyö.› »#Tiet Ciik 6:13

9Ni ö anägö ni bwøth Jecu yi Jerucalem, ni wëëk gø cuŋŋö wï ocul Øt Jwøk Mana Dwøŋ, ni kööe jïgø, ni «Nee ïïna O Jwøk, leeŋ riï piny ki kany. 10Kiper ogöörö,

«ni ‹Eni nyïïatwiet maal moe oköömme kiperï, niï koorge.

11Ïïno jølge maal ki ceŋge,

kiper nee tierï ba cwaanyï ri kïdi.› »#Dut Pwøc 91:11-12

12Ni løgi ya Jecu jïgø, no «Ogöörö, ni ‹Kär Wuuö Jwøk na näk Jwøï päänynyï.› »#Tiet Ciik 6:16

13'Ba kanya løny anägö ki car kwör päänynyö moøgø bëët, ena aay ni wec Jecu, këël mana dee cäŋ jïtö ki jöö.

Kanya Ö Jecu Na Täk Tïïc Mare

(Mathiew 4:12-17; Maak 1:14-15)

14Køøre Jecu aduu yi Galili, ni eni teek ki ri Jwïëc Jwøk, ni ö gïre ni wïnye yïth mïëya en kaace bëët. 15Ni pööe yïth uut acook lam moge, ni bëëdö ni eno jiem jiyi bëët.

Kanya Ö Jecu Na Kwieri Ya Jø Nadhareth

(Mathiew 13:53-58; Maak 6:1-6)

16Ni ö Jecu ni døø yi Nadhareth, kanya piidhi yie, ni ci øt acooŋ lam ki cäŋ jwömö keda man wø bëëde. Ni ö maal nee kwääne. 17Ni mëëk wëël Aydheea na näk nyikuŋ Jwøk eni; ni jap wëëlö, ni joot kanya näk ogöörö, na köö,

18ni «Jwïëc Wuuö Jwøk ena bääta,

kiper aana jiere nee luumma nyään na met caana jï jøøa can.

Ni jääŋ aani nee pät mar jøøa näk otwöö køba jïge,

ki døøn nyeŋ karge jï cööye,

ni päda jøøa näk odïïmö,

19ni køba cwiino ö Wuuö Jwøki noo nyooth met ec mare yie.»#Aydheea 61:1-2

20Ni cïëk wëëlö, ni dwøk gø jï ŋata en weeli cere, ni pï piny. Ni ö nyeŋ jøøa en yi øt acooŋ lam bëët ni këëtge ree. 21Ni täge ki man caan gø jïge, ni «Dïcäŋi en wëëlli athur kare keda mana wïnynyu gø.»

22Ni ö jiyi bëët ni pwøcge gø, ni yïthge orëëm ki luup moa met na ö wøk ki dhee. 'Ba gena köö, na «?Aŋø, ŋati paa o Jocep?»

23Ni kööe jïge, «Ba kääŋi jïïu ki man parru leeyi jïra, na køp, ni ‹Ï na akïïm, køny riï. Gïïa wïnywa na tïïyï Kapernaam, tïïyï dï pou kany thuwø.› » 24Ni kööe, na «Adïëri møn, a caana gø jïïu, ni bäŋ nyikuŋ Jwøk mo ojïëö dï poge. 25'Ba ka adïëri møn, a caana gø jïïu, ni ya acääŋŋe yïth nïr Ilaaja da määr thuunhnhi mo thööth yi Icriel, kanya ö maalli na män køth ki cwiiri adäk ki dwäde abïciel, na jït paaci bäre ki meel mo dwøŋ. 26'Ba Ilaaja bäŋ ŋat mo ii jääŋ baŋ gø dï määr thuunhnhi moøgø, 'ba beeye baŋ cï thøø keere mana en yi Dharepeth, yi po jø Caydan, na jääŋŋi baŋ gø.#1 Nyeye 17:9 27Ni da jiy mo thööth yi Icriel mo dëëtge da dhøøbø#4:27 Dhøøbø. Täw man ni cwøl ni dhøøbø en ki dhi Gïrïïk dwala teeŋ täwe mo thööth mo wø ö wøk ki ri buny dëël. kanya bëët nyikuŋ Jwøki ma Ilaaca. Ni bäŋe ya aciel dïge mo dëëre odwøk kare, 'ba beeye Neeman keere na køny, na näk nyï Ciria.»#2 Nyeye 5:1-14 28'Ba jøøa en yi øt acooŋ lam bëët, kanya wïnyge gïïögø, cwïnyge ajïtö ki gootø døc. 29Ni öge maal ni cöörge Jecu wøk ki dï paac ni peege gø deŋ apala mana näk poge ogeer bääte, kiper nee cöörge piny ki bäät apala. 30'Ba ena pöödhö ki dïge ni aae.

Kanya Ö Jecu Na Køny Dhaanhø Mo Dëëre Da Jwøk Mo Raac

(Maak 1:21-28)

31Ni ö Jecu ni ci yi Kapernaam, paac mo ena yi Galili. Ni pwöny jiy ki cäŋ jwömö. 32Ni rëëm yïthge ki pwöye, kiper pwöc mare yie da teek. 33'Ba yi øt acooŋ lam manøgø da dhaanhø mo dëëre da jwøk mo raac, ni kööe ki dwøl mo päl, 34ni «?Wui, ï na Jecu nyï Nadhareth, agïnaŋø noo tïïyï ki waani? ?Ï ööa kuna raanynyï waani? Ï ŋääa, ni ïïna ŋata en kur keere na näk mar Jwøk.»

35'Ba ajook Jecu, ni kööe, ni «Lïŋï, ni ööï wøk ree.» 'Ba na nø gøyi ya jwøa raaci enø ki piny dïge, aö wøk dëëre, ni bäŋ gïn mo leth mo ee tïïö dëër gø.

36'Ba geni yïthge arëëm bëët, ni cäänge yïthakicge keerge, ni «Man a teeŋ luumma ŋø! Këël juuga reyø aköömme ki teek, ni öge wøk!» 37Ni ö gïre ni wïnye dï mïëyögø bëët.

Kanya Ö Jecu Na Køny Mii Cï Piter

(Mathiew 8:14-15; Maak 1:29-31)

38'Ba Jecu aö maal, ni aa wøk ki yi øt acooŋ lam, ni ci po Cayman. 'Ba kanyøgø mii cï Cayman tuu ka adïrïgi mo teek. Ni kwacge eni kipere. 39Ni gääŋe bäät gø ni jook adïrïgi, ni put adïrïgi aae dëër gø. Ni ö nyijøøgø ni put ö maal ni tïny geni.

Kanya Ö Jecu Na Køny Ŋwiili Mo Thööth Dëët Jiy

(Mathiew 8:16-17; Maak 1:32-34)

40'Ba kanya tïme ni cäŋ pätha piny, jiy akännö ki jiy mo tuu ki täwe ma teeŋi baŋ Jecu. Ni kïth ceŋŋe bäätge bëët, ni dwøk dëëtge kare. 41Ni ö anäge thuwø ni öge wøk dëët jiy mo thööth ni ge rëëdö, ni «Ïïni, ïïna O Jwøk.» 'Ba gena jooe ni ba wëëk ge cäänö, kiper ŋäcge ni beeye eni na Krictø.

Kanya Ö Jecu Na Køp Luum Jwøk Yïth Mïëri Møga

(Maak 1:35-39)

42'Ba na tïme na amöölla, Jecu aay ni ci paap kany mo bäŋ jiy. Ni ö jiyi ni manyge eni, ni öge baŋe, ni ge manynya eni man bëëde buutge ni ba aay. 43'Ba Jecu aköö jïge, na «A cøøa kuna køba luumma nyään na met kiper buc Jwøk jï mïëri møga thuwø, kiper beeye gïnögø na jääŋ aani kipere.» 44Ni tïme ni køpa luum Jwøk yïth uut acook lam mo Judia.

Currently Selected:

Luk 4: AnyuB

Highlight

Copy