Luk 2

Luum Lwaar Mana Lwaarø Ki Pïëmi Ma Jecu Ki Gø

(Mathiew 1:18-25)

1'Ba yïth nïrögø da dwøl ma aöö ki baŋ Cidhar Agacta, ni jø mïëri bëët nyeŋge doo göörö. 2'Ba manøgø beeye göör nyeŋ mana dïkwøŋ kanya bëët Kwarinia na kwäärö mar jø Ciria. 3Ni ö jiyi bëët ni cige nee nyeŋge göör, ni ŋati man nø nyeŋŋe gööra wï poge. 4'Ba Jocep thuwø, ena tïŋŋö yi Galili yi paac mo cwøl ni Nadhareth, ni cøøa Bethelem po Deebit, na en yi Judia, kiper eni käla dhi øt Deebit, 5nee nyeŋŋe göör, ge ki Meeri na näk ee miiø, na yie jïtö ki dhaanhø. 6'Ba kanya enge kaace, kar lwaar apïï dëër Meeri. 7Ni lwaare ki kanynye ma nyilaal ma dïcwøø, ni rïëp gø ka abïïe ni pïël gø yi pöö, kiper na tïme ni bäŋ kany mo rømge yie yi øt wëëlle.

8'Ba ŋää paanøgø da dïkwääc dïëk mo bëëdö wøk yi bäp ni ge wø køya dïëkge ki wäär. 9'Ba kanyøgø nyïïatwiel maal mar Wuuö dëëre anyoodhe jïge, ni ö ajiem Wuuö ni rienye bäätge, ni lwäcge døc. 10Ni kö nyïïatwiel maalli jïge, ni «Käru lwäyö, kiper a käla luubö mo nyään mo met jïïu, mano mïn yïth jiy bëët ki gø. 11Kiper dïcäŋi Pïëmi anywøl jïïu yi po Deebit, ni beeye Krictø na näk Kwäärö. 12'Ba man otïmö na nyuudhi jïïu. Nyilaal ojootu no orïëbö ka abïïe no opïël yi pöö.» 13Kanyøgø nyïïatwiet maal ma lwaak mo päl aput öö ni dwätge ki maya. Ni ge pwøya Jwøk, ni köge,

14na «Ajiem en jï Jwøk maalø,

ni ö bëët-mëër ni en piny bäät jiy na met yie ki ge.»

15'Ba kanyøgø na døø nyïïatwiet maal moøgø maal, dïkwääye acäänö keerge, ni «Beerra man cøø Bethelem, kuna neenø gïna tägö na nyooth Wuue jïïø.» 16Ni cige ni ge rwäänhnhö, ni jootge Meeri ki Jocep, ki nyilaal no opïël yi pöö. 17'Ba na jootge gø, luumma caan nyïïatwielli jïge kiper nyilaal, acaange. 18'Ba jøøa wïny gø bëët, yïthge athäŋŋö ki gïna caan dïkwääye jïge. 19'Ba Meeri gïïögø bëët akan cwïnye, ni lääŋ geni. 20Ni ö dïkwääye ni døøkge, ni ge jiema Jwøk, ni ge pwøya gø, kiper jammi bëët moa wïnyge, ki moa neenge, keda mana caani jïge.

Kanya Käl Jecu Yi Øt Jwøk Ni Cïba Gø Kur Keere

21'Ba na tïm nïne moe na abära wøk, kanya daŋi, nyeŋŋe acak ni Jecu, ni beeye nyeŋ mana cïp nyïïatwiel maalli, kanya poode ni kär ci ec.

22'Ba kanya thum nïr jiiŋ røk marge#2:22 Luum jiiŋ røk ki man dööŋ dëër dhaagø ni waany køør lwaar di joodø yi wëël Ciik Kiper Dïlämme tiel 12. keda mana näk ogöörö yi ciik Modhe, Jecu akïthge yi Jerucalem kuna cïpge gø kur keere na mar Wuuö Jwøk, 23keda mana gööri ri ciik Wuuö Jwøk, ni «Kaai bëët moa näk cwøw mo wø lwaarø ki ge dou cïba kur keerge na mo Wuuö Jwøk.»#Bwøth Wøk 13:2, 12 24Ni ge ööi kaper nee ge cïpge ko olämi keda mana näk ogöörö yi ciik Wuuö Jwøk, ni «Wär cïpe ka atuuy ariiø, wala nyïï akuyi ariiø.»#Ciik Kiper Dïlämme 12:8

25'Ba kanyøca da ŋat mo ena yi Jerucalem mo nyeŋŋe cwøl ni Cimien. 'Ba ena dhaanhø mo beer ni cwïnye ena køør Jwøk, ni bëëde ni køya ŋato cøm cwïny jø Icriel. Ni Jwïëc Jwøk na en kur keere ena bääte. 26Eni, eno nyuth Jwïëc Jwøki, ni eni ba thøw ni Krictø noo jääŋ Wuuö Jwøki poot käre neenø. 27Ni wëëgi Jwïëc Jwøki ööny yi kal mar Øt Jwøk Mana Dwøŋ. 'Ba kanya ö jøøa nyöödö na kälge nyilaal ma Jecu kuna tïïcge eni keda man wø tïïc ki køør ciik Jwøk wø bëëde, 28Cimien nyilaal atïŋe, ni pwøc Jwøk, ni kööe,

29ni «Ï na Kwäärö Wuuö Jwøk, kawaane wëëk aani wääth nø ki met ec, a na laŋŋï, ki køør luummï.

30Kiper pïëm man piemï jiy ki gø aneena ki nyeŋŋa,

31ni beeye mana näk iï jiiŋŋø nyïm jiy bëët,

32na tar mano nyooth jöö jï juurre,

na ajiemma eni jï jiyï ma jø Icriel.»

33Ni ö wänni ki menni ni rëëm yïthge ki gïïa caan kiper nyilaal. 34'Ba gena gwïëth Cimienni, ni kööe jï Meeri na näk mii Jecu,

ni «Neenï, nyilaari acïp kiper nee jø Icriel mo thööth päthge, ni kwøw mo thööthi.

Ni tïme na ŋïï man car gïï mo reyø dëëre,

35kiper nee moa en cwïny jiy mo thööth nyooth.

'Ba ïïno jwöti thuwø kaamar dhaanhø mo ocwøp opëëlle.»

36'Ba da nyijø mør ma nyikuŋ Jwøk mo nyeŋŋe cwøl ni Anna, nyaa Paniel, na käl yi tuuŋ Acer. 'Ba eno døøŋŋø døc, ni eno kwøŋ bëëte ki cwøre ki cwiiri abïriiø kanya poode ni thiinh. 37Ni bëëde na cï thøø këël mana thöödhe ki cwiiri ma pïërabära kurŋween. Ni eni kär dak yi kal mar Øt Jwøk Mana Dwøŋ. 'Ba bëëdö ni lämö ni wödö, ni wøøra Jwøk ki wärre ki cääŋŋe. 38'Ba yi caannøgø ena ö maal ni pwøc Jwøk, ni caan gïr nyilaal jï jiy bëët, jøøa køc kanyo piem Jerucalem yie.

39'Ba na ö Jocepi ki Meeri na nø thöörge jammi bëët ki tïïc keda mana näk ogöörö yi ciik Wuuö Jwøk, gena døø poge yi Nadhareth na en yi Galili. 40Ni ö nyilaalli ni piidhe ni tïme ni teek, ni wïïe leer døc, ni mëëc Jwøk ena bääte.

Kanya Ci Jecu Øt Jwøk Ni Poot Na Nyilaal

41'Ba wää Jecu ki menni wø cøøa Jerucalem ki yïth cwiiri bëët kiper ajwöm-cam Cäŋa Pööth Thøøe Yie. 42'Ba na tïm Jecu ni cwiiye apaar kurriiø, gena ci kunöce, kaawat man wø tïïc cooth, kiper ajwöm-cam manøgø. 43'Ba kanya thum ajwöm-cam Cäŋa Pööth Thøøe Yie, ni ge døøk nø, nyilaarøgø na Jecu enø, adööŋ yi Jerucalem. Ni kuc wänni ki menni, 44'ba ege caarø ni ena dï jøøa cäädhö ki geni. Ni cääthge ki dïcäŋ aciel bäre, ni täkge ki man cacge gø dï tuuŋge ki nyïïawäätge. 45'Ba na tïme ni kärge joodø, gena døø yi Jerucalem, ni ge caya gø. 46'Ba na tïme na køør nïne adäk, ena jootge yi kal mar Øt Jwøk Mana Dwøŋ, no opï piny dï dïpööye ni leŋa döötge ni pëënynya ge ki pïëc. 47'Ba jøøa wïny luupa caane, yïthge athäŋŋö ki leec wïc mare ki luup moa dwøge. 48'Ba kanya ö wänni ki menni na jootge gø, yïthge athäŋŋö, ni kö menni jïgø, ni «?Nyie, wääda, aŋø ni tïïyï wa na enønø en? Neenï, wäru ki aani, wa bëëdö ni wa caya ïïni ni cwïnywa opädhö døc.»

49Ni kööe jïge, ni «?A kaa ŋø na dou a cayø yie? Kuyu naa doo ena øt Wära?» 50'Ba tier gïna caane jïge kär ci cwïnyge. 51Ni aae ki geni ni ci yi Nadhareth, ni bëëdö ni luupge ee leŋø. 'Ba menni gïïögø bëët akan cwïnye.

52'Ba Jecu adøøŋŋø, ni lëëny wïïe, ni mëëc Jwøk ki mëëc jiy ena bääte.

Currently Selected:

Luk 2: AnyuB

Highlight

Copy