Moa Tïïc Nyïïatwieli Luubö Mo Cäänö Kaper Wëël Moa Tïïc Nyïïatwieli
Luubö Mo Cäänö Kaper Wëël Moa Tïïc Nyïïatwieli
Wëëlö man beeye riet weeli moa göör Luki. Wëëlö mare mana dïkwøŋ cwøl ni Wëël Luk, ni beeye wëëlö mana cäänö kiper japa tïïc Jecu bëët ki pwöc moe, ki mana täge ki kanya cak tïïc mare këël mana døø maal. (1:1,2) 'Ba yi wëëlö man, Luk poot kuupa dhøk luup moøgø ki japa cäŋ tägö kanya ö bääge na jïëcge luumma caan Jecu jïge, na kööe,
ni «Tïmu ni uuna lïŋŋe 'moa yi Jerucalem, ki yi Judia bäre, ki yi Cameria, këël yi piny bäre.» (1:8)
Køøre Jwïëc Jwøk na en kur keere aö bäätge ni mooc ge ki teek ki man kïthge luumma caan Jecu jïge bäät tïïc.
Wëël Moa Tïïc Nyïïatwieli, kiper mana tïme ni nyeŋ mïëri mo thööth ocøørø yie, anëënö ni kede göör kaper nyaac luum Jwøk keere. 'Ba nyaac luum Jwøk nut ni ena luubö aciel røk luup moa gööri kipere. Kiper kanya nø døø Jecu maal, pïëc mana kännö ki öölö dïkwøŋ baŋ bääŋi beeye na «?A jøøe noo tïmö na jø Krictø?» 'Ba kiper mana bëëde ni Jecu ki bääge moa dïkwøŋ gena jø Juuth, atïmö ni joot jaak jïge ki man caarge gø ni luum Jwøk beeye per jø Juuth keerge. 'Ba anyooth Jwïëc Jwøki jïge ki man näk mo Jecu ööa kuna piem jø Juuth ki juurre bëët, ni Jwøk manynya gø nee jïte ki bääŋi røk juurre bëët mo tïmö na jiye.
Gïna teek na kwøŋ tägö ya acooŋ Jwøk, tägi ka kanya ö dïbwöthe mo jø Juuth na kwierge luum Jecu ni caarge bääge. (4:1-31; 7:1-59) 'Ba gïna teek døc na tägö ya acooŋ Jwøk yïth nïne moøka beeye kiper mana kuyi ya bääŋi ki man näk mo løny jï dhaanhø jaak ki man tïme na bääŋ Jecu ni eni kär kwøŋ tïmö na ŋat Juuth. 'Ba gena tägö ki man kwanyge tier luummögø køør kanya ö Pilipi na køp luum Jwøk jï jø Cameria (8:7-15), ki kanya ö Piterri na ci po Kørnilia, ŋata näk jur, na näk wïth jø lwaa leny ma dïpa. (10:1-48)
'Ba na tïme na aŋuudi, luummögø abwøth Piterri nyïm acooŋ Jwøk mana en yi Jerucalem (11:1-18), ni cuŋge kiper luummögø. Ni tier acooŋa marge beeye pïëc mo köö, na «?A jøøe noo tïmö na bääŋi mo Krictø?» 'Ba ki køør luup moa caan Piterri jïge, ajootge ni «Këël juurre thuwø awëëk Jwøki løk rege nee kwøw jootge.» (11:18) Ni put nyïïatwieli jïëy bëët ni luumma nyään na met doo caanø jï juurre ki jø Juuth bëët.
'Ba ŋata nyaac luum ŋäädhe døc dï juurre beeye dhaanhø mo cwøl ni Pøøl, ni päl wëëlö man bäre caana pwöc mare mana tïïe dï juurre. Køøre luumma nyään na met acaane yi Röm, ni beeye pääny mana pere letha eni bäät piny yïth nïne moøka. (28:16-31)
Luup moa no ogöörö yi wëël Moa Tïïc Nyïïatwieli beege ii:
Luum nyaac luum Jecu yi Jerucalem (Tielø 1—7)
Luum nyaac luum Jecu yi Judia ki Cameria (Tiel 8—12)
Luum nyaac luum Jecu tiet mïëri møøk mo kwörge bäyö (Tiel 13—28)
Wääth mar Pøøl mana dïkwøŋ dï mïëri (Tiel 13—14)
Luum acooŋa mana cooŋ Jerucalem (Tiel 15:1-35)
Riet wääth mar Pøøl dï mïëri (Tiel 15:36—18:22)
Dää wääth mar Pøøl dï mïëri (Tiel 18:23—21:16)
Luum kanya mak Pøøl ni kïthi Röm no otwöö (Tiel 21:17—28:31) ø
Currently Selected:
Moa Tïïc Nyïïatwieli Luubö Mo Cäänö Kaper Wëël Moa Tïïc Nyïïatwieli: AnyuB
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia