Moa Tïïc Nyïïatwieli 3

Kanya Køny Ŋat Ma Puuth

1Kanyøgø Piter ki Jøøn gena aay ni ge cøøa Øt Jwøk Mana Dwøŋ ki kar caae adäk ka abøøya#3:1 Caae adäk manøgø beeye caae abïŋween ki kwäänö mar Ithiöpia. kany wø läm jiyi. 2'Ba kanyøgø da dhaanhø mo onywöli na puuth mo obiel kaace, ŋat mo wø kïthge dhi kal cooth mana cwøl ni Mïërö mar Øt Jwøk Mana Dwøŋ kiper nee kwääe ki jap cane baŋ jø wø ci yi Øt Jwøk. 3'Ba na neen Piter ki Jøøn ni ge cøøa Øt Jwøk, ena pëëö ki jap cane. 4'Ba jïre aneen Piterri ge ki Jøøn, ni kö Piterri, ni «Neen jïwa.» 5Ni put nyeŋŋe kem dëëtge ni ee ŋäädhö ni eni jïtö ki gïrpiny baŋge. 6'Ba Piter aköö, ni «Aani jïra bäŋ gwel, 'ba gïn en jïra en mëëga ïïni. Ki nyeŋ Jecu Krictø nyï Nadhareth, cäädhï!» 7Ni mak gø ki cer cwïïe ni tïŋ gø maal. Ni put tiete ki nyeŋ ogweye tëënnö. 8Ni päär maal ni cuŋŋe ni cäädhe ni døny yi kal mar Øt Jwøk Mana Dwøŋ ki ge, ni cäädhi ni pärö ni jiema Jwøk. 9Ni ö jiyi bëët ni neenge gø ni cäädhö ni jiema Jwøk. 10Ni ŋecge gø ni beeye ŋat wø bëëdö ni kwääö ki jap cane dhi kal mana cwøl ni Mïërö mar Øt Jwøk Mana Dwøŋ. Ni thäŋ yïthge døc ni yïthge orëëm ki gïna tägö dëëre.

Luumma Caan Piterri

11'Ba kanya poot ŋatøgø no ogöök ri Piter ki Jøøn, jiy bëët areŋ baŋge kanya ciel ya agööl Cølöman, ni yïthge orëëm. 12'Ba na ö Piterri na neen gïnögø, jøøgø aluumme, ni kööe, ni «?Jø Icriel, aŋø ni thäŋ yïthu ki gïn en, wala aŋø ni raŋŋu jïwa, kee ŋati wëëga wa wääth ki teek marwa wala karwa cään ki Jwøk? 13Beeye Jwø Eeberam ki Aydhak ki Jeekap na näk Jwø kwäyø, na wëëk ajiem dhaanhnhe ma Jecu, ŋata cïbu ceŋ jiy nee 'näkge, ni kwierru gø nyïm Paylat kanya caar gø ni päde pädö. 14'Ba eni na näk mar Jwøk na en kur keere na mare beer akwierru, ni pëënynyu dïnääy nee cïp jïïu, 15ni 'nägu ŋat wø cïp kwøw; 'ba ena tïŋ Jwøki maal ki yi thøø. Ni waani, waana lïŋŋe kiper gïnögø. 16'Ba beeye Jecu manøgø ki ŋäädhe na en ri nyeŋŋe na wëëk ŋati tëënnö ni neennu en ni ŋäyu. Ni beeye ŋäädhe mana öö ki ri Jecu na wëëk dëër ŋati døø kare na bäre nyïmmu bëët.

17«'Ba kawaane, nyïïmera, ŋääa ni gïna tïïyu kar kaaca kuyu, keda mana kuyi ya kwääri mou thuwø. 18'Ba gïïa kwøŋ Jwøki caan dhøk nyïïkuge bëët, ni dhaanhnhe ma Krictø gïï mo leth dee jwørø, luupögø awëëk thur karge na enønø. 19Kiper manøgø nø, cäŋu wïthu caarrø ni løgu cwïnynyu, kiper nee moa bayu puu wøk, nee yïthu cäŋge mïnnö kiper Wuuö Jwøk noo en buutu, 20kiper nee Krictø jääŋŋe na näk ojierø kiperu, na näk Jecu, 21ŋato bëëdö maal gøøc mano ö jammi bëët noo døøyi mo nyään keda mana kwøŋi ya Jwøki køp ki dhøk nyïïkuk moe na en kur keerge. 22Kiper Modhe aköö, ni ‹Wuuö Jwøk na näk Jwøk maru uuno thïïŋŋe ki nyikuŋ Jwøk røk nyïïmëëgu keda mana thïïŋ aani. 'Ba mare owïnynyu yïth luupo care jïïu bëët. 23'Ba dïcäŋöca jiy bëët moo ba wïny luum nyikuŋŋögø, ge di raanynyø bëët dï jiy.›#Tiet Ciik 18:15, 18-19 24'Ba nyïïkuk Jwøk bëët moa cäänö, ki mana tägö ki Camiel ki moa öö køøre, gena cäänö thuwø kiper nïri ii. 25'Ba uuni, uuna wäät nyïïkuk Jwøk, ni nägu wäät luumma tuut na wëëk Jwøki kwäyu, na kööe jï Eeberam, ni ‹Jø bäät piny bëët ogwïëth ki ri kunhnhö marï.›#Wïlöölö 12:3; 22:18; 26:4 26'Ba Jwøk na thïïŋ Wääde, akwøŋ jääŋ baŋu nee u gwïëdhe ni løga u yi rääö maru karubëët.»

Currently Selected:

Moa Tïïc Nyïïatwieli 3: AnyuB

Highlight

Copy