Moa Tïïc Nyïïatwieli 2

Kanya Ö Jwïëc Jwøki Na En Kur Keere Bäät Bääk Jecu

1'Ba na tïme na cäŋ Pentikø, bääk Jecu dëëtge ege cooŋø kanya ciel bëët. 2'Ba ki kany mo thiinh dwøl mør aöö ki maal kaamar jamø mo kwödö ni teek ni pääŋ øtø mana bëëtge yie bäre. 3Ni neenge gïï møøk mo nëëna lëëp mäc, ni gïïögø ni nëën lëëp mäc yøø opääŋŋö jïge ni ena bäät ŋati man nø. 4Ni pääŋ dëëtge bëët ki Jwïëc Jwøk na en kur keere, ni täkge ki cäänö ki dhøgi møøk, kaa mana ö Jwïëc Jwøki na en kur keere na wëëk ge cäänö.

5'Ba kanyøgø da jø Juuth mo bëëdö yi Jerucalem mo cwïnyge ege cïp køør Jwøk, mo ge käla tiet mïëri bëët piny bäre. 6'Ba na wïnyge dööt jøøgøøni gena öö kanya ciel na lwaak mo päl, ni yïthge onithay kiper ŋati man nø dhi poge awïnynye dhøk jøøgø kanya cäänge. 7'Ba geni yïthge athäŋŋö ni rëëm yïthge, ni köge, na «?Aŋø, jøøi ni cäänö ii, paa jø Galili bëët? 8?Otägö nidïï, ni tïme ni ŋati man nø dïïø dhi poge wïnynye wïnynyö baŋ jøøgø? 9Jø Parthia, ki jø Miith, ki jø Ilam, ki jø wø bëëdö yi Mecöpatemia, ki Judia, ki Kapadöcia ki Pønta ki Eecia, 10ki Parijia ki Pampilia, ki Ijep, ki jøøa käl thäŋ Libya na bëën Cayriin, ki wëëlle moa käl Röm, këël jø Juuth ki jøøa løk dëëtge na jø Juuth, 11ki jø Kariit ki jø Areebia, luupge wïnyö jïïø ni ge cäänö ka dhøgi mo pøø, ni ge caana tïïe moa døøŋŋø na tïïc Jwøki.» 12Ni thäŋ yïthge bëët ni yïthge onithay, ni pëënyge røkge, ni «?Tier gïn agïnaŋø?»

13Ba gena buu møøki ni köge, ni «Jøøgø geno meer ki køøŋ nyïïomøki mo poot no oguk.»#2:13 Oguk beeye køøŋø mo poot ciek ka diøø.

Kanya Ö Piterri na Cään Jiy

14'Ba Piter ree athïïŋe ki nyïïatwieli moa näk apaar kur ciel, ni tïŋ dwøre maal ni cään jøøgø, ni kööe, ni «U na jø Judia, ki u bëët, u wø bëëdö yi Jerucalem, cegu ïthu ki luupa nee tier gïn caana jïïu. 15Kiper jøøi ii ge paa omeer kaawat man caarru gø enø, kiper man poot na caae abïŋween mo aruunnø.#2:15 Caae abïŋween manøgø beeye caae adäk ki kwäänö mar Ithiöpia. 16'Ba gïn en beeye gïna caan nyikuŋ Jwøki ma Jool, na kööe,

17«ni ‹Jwøk aköö ni ki yïth nïne moo näk aŋuudi,

Jwïëya okïtha bäät jiy bëët.

Ni ö wäätu ki nyïïu ni køpge dwøra,

ni ö wøpe mou ni neenge jammi moo en yi nyïm mo wø nyooth ki yi wïc,

ni ö jäle mou ni läkge ki lääk.

18Yïth nïrögøøni Jwïëya okïtha bäät jøw otïny aani

moa näk cwøw ki mään,

ni ö geni ni køpge dwøra.

19'Ba gïï mo rëëma ec onyoodha maal,

ni ö ŋïïce ni nyoodha ge piny,

ni beege remø ki maac ki jïc maac.

20'Ba cäŋ odøøc mo cøl,

ni ö dwääyi ni tïme na remø,

kanyo poot cäŋ Wuuö ni kär öö,

ni beeye cäŋo dwøŋ døc noo rëëm ec.

21'Ba dïcäŋöce, jøw ocøør nyeŋ Wuuö bëët di piemø.›#Jool 2:28-32

22«U na jø Icriel, wïnynyu luupi ii. Aani, a cäänna uuni kiper Jecu nyï Nadhareth, ŋata nyooth Jwøki jïïu ki tïïe mo døøŋŋø ki gïï mo rëëma ec ki ŋïïce moa tïïc Jwøki dïïu ki køøre, kaa mana ŋäyu gø ki dëëtu. 23Jecu manøgø acïp ceŋŋu keda mana kwøŋi ya Jwøki cooŋ ki cwïnye ni ŋääe cøøn, 'ba acïbu ceŋ jøøa kuc ciik Jwøk, ni guru gø bäät jaadha no odëëdö, ni 'nägu gø. 24'Ba ena tïŋ Jwøki maal ki yi thøø ni pät gø cer thøø, kiper ba doo løny jï thøø ki man mak gø. 25Kiper gïre acaan Deebiti,

«ni ‹Wuuö Jwøk a wara neeta nyïma cooth,

kiper eni wø ena bäät cer cwïïa naa ba pädha.

26Kiper manøgø nø, yia atïmö ni met ni kanynya,

ni ö dëëra ni bëën ŋäädhe.

27Kiper jwïëya ba wiiï kar bëët jwïëc jøøa näk othøw,

ni ba wëëgï dëër dhaanhnhï na en kur keere kwääö.

28'Ba uutjïëth kwøw anyuthï aani,

ni yia odøøyï mo met døc kiper noo nudï buuta.›#Dut Pwøc 16:8-11

29«Nyïïmera, a caana gïr kwarø ma Deebit jïïu na adïëri, ni ena thøw ni koonyi, ni bwöye poot ena buutø këël waŋcäŋi en. 30'Ba kiper mana näk ena nyikuŋ Jwøk ni ŋääe ni Jwøk onø kööŋ jïre ni dhaanhø aciel røk nyïïkwaaye ocïp bäät wälle, 31gïnögø akwøŋ neen cøøn ni køp duun Krictø wøk ki yi thøø, ni eni kär wii kar bëët jwïëc jøøa näk othøw, ni rïŋ dëëre kwääö käre joodø. 32'Ba beeye Jecu manøgø na tïŋ Jwøki maal, ni gïnögø aneenwa bëët. 33'Ba kawaane kiper na tïŋi maal ni wëëgi ajiem bäät cwïï Jwøk, ni wëëgi Jwïëc Jwøk na en kur keere na buuk Wuue jïre, gïn neennu en ni wïnynyu en awëëk ööny bäätwa. 34Kiper Deebit kär ci maalø, 'ba eni ki dëëre aköö,

«ni ‹Wuuö Jwøk aköö jï Kwääya, ni «Pï bäät cer cwïïa,

35këël mano døøya nyïïmännï køøm tietï.» ›#Dut Pwøc 110:1

36Kiper manøgønø, wär ŋäc dhi øt Icrielli bäre na adïëri døøc ni ŋatøgø adøøc Jwøki Kwäärö ni näk Krictø, ni beeye Jecu manøgø kiree na guru bäät jaadha no odëëdö.»

37'Ba na wïnyge luummögø, cwïnyge abwøk, ni köge jï Piter ki nyïïatwieli møga, «?Nyïïmëëkwa, agïnaŋø noo tïïcwa?»

38Ni kö Piterri jïge, ni «Løgu cwïnynyu ni lwøk uuni na nyuudhi u bëët, ki nyeŋ Jecu Krictø, kiper nee gïïa bayu nee wec. 'Ba Jwïëc Jwøk na en kur keere ocïp jïïu na muuy. 39Kiper gïna buuk, buuga jïïu ki nyïïu ki jøøa kwörge bäyö bëët, këël jiy bëët moo cwøl Wuuö Jwøki na näk Jwøø baŋe.» 40'Ba gena cäänne ki luup møøk mo thööth ni köömma geni, ni kööe, ni «Gwøgu rou ki jø pinyi ni reyø ii.» 41'Ba kanyøgø nø jøøa jïëy ki luumme, gena lwøk na nyuudhi. 'Ba dïcäŋöca jøøa dwätö ki bääk Jecu, ge jïtö ki kar kume adäk. 42Ni cïpge cwïnyge køør pwöc nyïïatwieli ni dwalge cwïnyge na aciel, ni møø wø pøtge pøtø, ni lämge.

Luum Nywaak Jammi

43'Ba lwär aö bäät jiy bëët. Ni ö gïï mo thööth mo rëëma ec ki ŋïïce ni tïïi ki røk nyïïatwieli. 44'Ba jøøa jïëy bëët, røkge adwalge na aciel ni nywaakge japge bëët. 45Ni dwøkge ŋøøm moa näk moge pwöth ki gïïa en jïge, ni pääŋge gwetge jï jøøa näk ceŋge orëëm bëët. 46'Ba ki yïth cääŋŋe bëët ge wø cøøa Øt Jwøk Mana Dwøŋ na aciel, ni muunni wø pøtge pøtø uutge, ni ge wø cämö na aciel ni ge ŋeethø ni yïthge met. 47Ni ge wø pwøya Jwøk, ni jiy bëët yïthge met ki geni. Ni ö Wuue ni mëën bäät geni ki yïth cääŋŋe bëët ki jø wø piem.

Currently Selected:

Moa Tïïc Nyïïatwieli 2: AnyuB

Highlight

Copy