መጽሐፈ መዝሙር 98
98
እግዚአብሔር የዓለም ገዢ ነው
1ድንቅ ነገሮችን ስላደረገና፥
በኀያል ሥልጣኑ ድልን ስለ ተጐናጸፈ፥
ለእግዚአብሔር አዲስ መዝሙር ዘምሩለት!
2እግዚአብሔር አዳኝነቱ እንዲታወቅ አደረገ፤
ጽድቁንም ለአሕዛብ ገለጠ።
3ለእስራኤል ሕዝብ የሰጠውን ፍቅርና ታማኝነት አስታውሶአል፤
በየስፍራው ያሉ ሕዝቦች ሁሉ
የአምላካችንን ድል አድራጊነት አይተዋል።
4በምድር ላይ የምትኖሩ ሕዝቦች ሁሉ
ለእግዚአብሔር በደስታ ዘምሩ!
በመዝሙርና በእልልታ አመስግኑት!
5በገና በመደርደርና በመዘመር
ለእግዚአብሔር ምስጋና አቅርቡ!
6ለንጉሣችን ለእግዚአብሔር
አስደሳች የጥሩንባና የቀንደ መለከት ድምፅ አሰሙ።
7ባሕርና በውስጥዋ ያላችሁ ፍጥረቶች ሁሉ
ድምፃችሁን አሰሙ፤
ዓለምና በእርስዋ የምትኖሩ ሁሉ ዘምሩ!
8እናንተ ወንዞች አጨብጭቡ፤
እናንተ ተራራዎች በእግዚአብሔር ፊት
እልል እያላችሁ በአንድነት ዘምሩ።
9እግዚአብሔር በምድር ላይ ሊፈርድ ስለሚመጣ በፊቱ ይዘምሩ፤
እርሱም በዓለም ላይ በጽድቅ፥
በሕዝቦች ላይ በትክክል ይፈርዳል።
Currently Selected:
መጽሐፈ መዝሙር 98: አማ05
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia, 2005
© የኢትዮጵያ መጽሐፍ ቅዱስ ማኅበር፥ 1997
