መጽሐፈ መዝሙር 58
58
እግዚአብሔር ክፉ ሰዎችን እንዲቀጣ የቀረበ ጸሎት
1እናንተ ገዢዎች!
በትክክል ትናገራላችሁን?
በሰዎችስ መካከል ያለ አድልዎ ትፈርዳላችሁን?
2አይደለም! በልባችሁ ክፉ ነገርን ታቅዳላችሁ፤
በምድር ላይ የምትፈጽሙትም ሁሉ የዐመፅ ሥራ ነው።
3ክፉዎች ከተወለዱበት ጊዜ ጀምሮ በድለዋል፥
ሐሰትንም ተናግረዋል።
4እነርሱ እንደ እባብ መርዘኞች ናቸው፤
እንደ ደንቆሮ እፉኝትም ጆሮአቸውን ይደፍናሉ።
5እፉኝት ጆሮውን የሚደፍነው
የእባብ አፍዛዦችን ድምፅ፥
ወይም የአስማተኞችን ድግምት ላለመስማት ነው።
6አምላክ ሆይ! የእነዚህን እንደ አንበሳ አስፈሪ የሆኑ ሰዎች ጥርስ ስበር፤
መንጋጋቸውንም አውልቅ።
7ፈስሶ እንደሚያልቅ ውሃ ይጥፉ፤
በመንገድ ላይ እንደ በቀለ ሣር ተረጋግጠው ይርገፉ፤
8እየሄደ ሟምቶ እንደሚያልቅ ቀንድ አውጣና
ሞቶ እንደ ተወለደና ብርሃንን ከቶ እንዳላየ ጭንጋፍ ይሁኑ።
9እሾኽ በእሳት ላይ ተደርጎ ከመሞቁ በፊት
ፈጥነህ ጠራርገህ አጥፋቸው።
10ኃጢአተኞችን ሲበቀልላቸው በማየታቸው
ጻድቃን ደስ ይላቸዋል፤
በክፉዎችም ደም እግሮቻቸውን ይታጠባሉ።
11በዚያን ጊዜ ሰዎች “ጻድቃን የመልካም
ሥራቸውን ዋጋ አገኙ፤
በዓለም ላይ የሚፈርድ አምላክ
በእርግጥ አለ” ይላሉ።
Currently Selected:
መጽሐፈ መዝሙር 58: አማ05
Highlight
Share
Copy
Want to have your highlights saved across all your devices? Sign up or sign in
© The Bible Society of Ethiopia, 2005
© የኢትዮጵያ መጽሐፍ ቅዱስ ማኅበር፥ 1997
