Aromduma 9

Yinɛ n looe Izirale

1Mam tɔgeri la yelemɛŋerɛ Kiresta puan, Mam ka pareni. Fa'a Sia la yele mam puti'irɛ puan ti la dela bala. 2Mam tari la susageŋɔ kãtɛ, la daaŋɔ en ka tari ba'ahegɔ n suuren wa. 3Mam ti'ihɛ yeti, nɔpɔtɛ wan pɔ ni bahɛ mam mɛŋa zuo, ti ba ŋmaaɛ ni mam Kiresta zi'an bahɛ ni, mam mɛŋa nɛreba wa zuo. Mam suurɔ inganɛ puan wa zuo. 4#Yɛh 4.22 Ba dela Izirale buuri wa. Bama ti Yinɛ to'e ba biha, pa'alɛ ba a suŋa, nɔnaarɛ, ze'elego, na'ahegɔ, la a nɔbiŋere la dɛna ba dinɛ. 5Bama en de Hiburuduma kansanhi yaahi, gee ti inganɛ puan, Kiresta la yehe ba puan na, se'em en gani za'a la. Sum dɛna Yinɛ dinɛ wuuha wuuha. Taari.

6La dagi ti Yinɛ yelehum la koŋe mɛ. Dagi Izirale buuri la za'a en de Izirale buuri yelemɛŋerɛ, 7#Pi'il 21.12 ti la me dagena Aberaham kɔma la za'a en de a yaahi yelemɛŋerɛ. “Gee la dela Aziki yaahi en wan dikɛ sigɛ hɔ.” 8Ŋwana pa'alɛ ti, dagi kɔma woo ti ba dɔgɛ ba inganɛ puan en de Yinɛ kɔma, gee nɔbiŋere kɔma la ti ba kãala ba yaahi. 9#Pi'il 18.10 Se'ere en sɔi la, nɔbiŋere la en yele se'em en ŋwana, “Saŋa kana wa puan n wan lebe na, ti Saara wan pɛga bia en de budibela.” 10Gee dagi za'a en bala. Sɛla en ani wuu ŋwana wa me yuum iŋɛ Arebɛka mɛ. Eŋa en yuum tari puurɛ la a sira Aziki en de tu sɔyaaba la. 11Gee ti ba baŋɛ dɔgɛ kɔma la, bii kɔma la baŋɛ tum sɛla en de be'em bii sum la, (La wan iŋɛ se'em ti se'ere zuo ti Yinɛ lɔɔha a loohego wa wan kelum kina, 12#Pi'il 25.23 ti la dagena la nɛra tuuma zuo, gee Yinɛ yi'a la), ti ba yuum yele en yeti, “Kiima la wan tugum dɛna bɛ'a la yameŋa.” 13#Mal 1.2-3 Wuu lan gulehɛ se'em yeti,

“Mam nɔŋɛ la Yakɔbe,

Gee yaaɛ Esɔ la.”

14Beni ti tu wan yele? Ŋmɛlema en boi Yinɛ puan bii? Sore kai' boi fii me. 15#Yɛh 33.19 Se'ere en sɔi la, Yinɛ yele Moose yeti,

“N wan zɔ nimbu'ɔ bo' la se'em ti mam bɔta ti n zɔ a nimbu'ɔ,

gee tara giile bo' se'em ti mam bɔta ti n tara a giile.”

16Bala, la dagi la asaala suboolum, bii a tiregerɛ, gee la dela Yinɛ mɛŋa se'em n tari nimbɔ'zɔrɛ la. 17#Yɛh 9.16 Gulehegɔ la gulehɛ Faro yele yeti, “Mam yɛɛlɛ fum na'am la yele dina wa zuo, ti n pa'alɛ n paŋa fum puan, ti muulɛ n yu'urɛ wa timpaberɛ wa zuo za'a.” 18Bala zuo, Yinɛ tari nimbɔ'zɔrɛ bɔ'ɔra la se'em woo ti a looe, gee me kãbera se'em woo suure ti a bɔta.

Yinɛ sunsunyiim la a nimbɔ'zɔrɛ

19Ya wan yele mam yeti, “Ŋwani ti Yinɛ sina gee bihera saaleba tuure? Ani en wan ta'am zagehɛ Yinɛ suboolum?” 20#Aza 29.16; 45.9 Gee ani en de fum, asaala, wan ta'am ŋmɛ' nɔkpe'ene la Yinɛ? Yagumbaherɛ wan ta'am soke yagumbaha la yeti, “Ŋwani ti fum yagum mam ŋwana?” 21Yagumbaha la ka tari yɔgerɔ la paŋa, wan ta'am dikɛ yɔgerɔ tunɔ mɛa yagum lɔkɔ kuyima, ti kuŋɔ dɛna tuulum lɔkɔ, gee yagum kuyima ti kuŋɔ dɛna tuunse'ere yoo lɔkɔ? 22Ŋwani, gee Yinɛ mɛŋa han bɔta ti a pa'alɛ a sunsunyiim, ti a paŋa niiɛ, gee me bɔta gee ŋmibera la sugeri, la lɔgeseto ti a suure nyiie la tɔ, lɔge seto en maalɛ bo' sageŋɔ la. 23Gee ŋwani, a han le iŋɛ bala ti a pa'alɛ a suŋa bo' sɛba en de a zɔ ba nimbu'ɔ la, sɛba ti a pun maahum biŋe a ti a pa'alɛ ba a suŋa kãtɛ la, 24ta' la tumam sɛba ti a yi tu, dagi la Yuu buuri puan ma'a, gee sɛba en dagi Yuu buuri la me la? 25#Hoz 2.23 Wuu lan yele Hozeya gɔŋɔ la puan se'em yeti,

“Sɛba en daa dagi mam nɛreba la, n wan yi' ba ‘n nɛreba.’

Eŋa se'em ti ba yuum ka nɔŋɛ la, n wan yi' en ti ‘n nɔŋerɛ bunɔ.’ ”

26 # Hoz 1.10 “Zɛ'se'ehi ti ba daa yi' ya ti, ‘Ya dagi mam nɛreba la.’

Bilam mɛa ti ba wan yi'ira ya Yinɛ vua la kɔma.”

27 # Aza 10.22-23 Azaaya yuum kaahɛ Izirale yele yeti, “La Izirale buuri la kɔma en zo'e wuu kulega tintɔnɔ la, ba fii wa ma'a en wan nyɛ faarɛ. 28Daana la wan tum a gakerɛ tuunɛ timpaberɛ wa zuo la ninmu'urɛ, gee ba'ahɛ de ŋwana kalam, iŋɛ de ŋwana girega girega.” 29#Aza 1.9 Ŋwana ti Azaaya tɔgɛ biŋe yeti,

“Pɛntiireba nɛŋa Daana wa han ka bahɛ ni tu buuri wa fii wa bo' tu,

Tumam me wan piiɛ ni wuu Sodom la.

Tu wan ani ni wuu Gomora la.”

Izirale buuri bumbu'um

30Beni ti tu nyaa wan yele? Sɛba en dagi Yuda buuri la en daa ka zigeri tuuntɔɔ vom wa yele la, nyɛ tuuntɔɔ vom la mɛ. Tuntɔɔ vom sebo en dole sakerɛ puan la. 31Gee Izirale duma, sɛba en daa zigeri ti ba nyɛ tuntɔɔnɛ sebo en dole ze'elego la, daa koŋe mɛ, ba ka nyaŋɛ doohe ze'elego la kiha la. 32Ŋwani ti ba ka nyaŋɛ? Ba daa ka zigeri ɛɛra dɛ sakerɛ puan, gee ba daa eere de mɛ wuu la dela tuuma puan la. Ba ŋmɛ' ba nama mɛ la kuge se'ere en piti la, 33#Aza 28.16 wuu lan gulehɛ yele se'em la.

“Bihɛ ya, n biŋere la kugere Zaayɔn, en wan pita nɛreba, Taŋa en wan bahɛ ti nɛreba luta,

Gee fum se'em woo en nam en, nyanɛ kan di fum.”

Currently Selected:

Aromduma 9: GBTP

Highlight

Copy