Aromduma 7

Pɔgedire makerɛ

1Ya ka mi, n suurɔ wa, ti mam tɔgeri bɔ'ɔra la sɛba en mi' ze'elego la. Ti ze'elego la ta' nɛra la a vom saŋa ma'a? 2Bala, pɔka en ele, ze'elego la lu' pɔka la mɛ ta' la ka sira la, en nan vɔi la. Gee ka sira la han ki, ba yeheri ka sire-ele ze'elego la puan bahera mɛ. 3Lan de se'em dela, ba wan yi' pɔka kabohi daana dela, ka han naaɛ la buraa kayima, gee ti ka sira la nan vɔna. Gee ka sira la han ki, ba yeheri en ze'elego kuŋɔ puan mɛ, ti ka han ele buraa kayima, la dagi kabohi ti ka tum.

4La dela bala mɛa n zɔduma wa, yamam ki mɛ keehe ze'elego la, Kiresta inganɛ la puan, ti ya dɛna ayima dinɛ, ya dɛna se'em daana ti ba ihege en kum puan, ti tu ta'am wam wala bo' Yinɛ la. 5Tumam en daa nan boi tumam en boti se'em puan la, tu be'em kɔrehi la en boi tu puan la daa ihegere mɛ, ze'elego la zuo, tuna tu inganɛ wa puan, wuna kum wala. 6Gee nananawa, ba yehe tumam ze'elego la puan mɛ. Tumam ka le vɔna sɛla en yuum tari tumam ti tu dɛna yamehi la puan, ti tu da dɛna yamehi bo' diimen diimen gulehegɔ la, gee vom paalum la en de Sia puan vom la.

Ze'elego la, la Be'em

7 # Yɛh 20.17; Tii 5.21 Tu wan yeti bu? Ti ze'elego la dela be'em bii? Sore ka boi la fii me! Gee la bala za'a, la han dagi ni la ze'elego la zuo, mam kan mini be'em. Mam kan mini ti piŋa dela sɛla, ze'elego la han ka yele yeti, “Da pim.” 8Gee be'em la en nyɛ yɔ'ɔ nuurɛ bu'a la puan la, nyaa tari la piŋa yɛla kekeko kina n puan na. Ze'elego la han ka boni, be'em ki ni mɛ gã'a. 9Saŋa ka yima, mam tabelɛ vɔna mɛ, ti ze'elego la ka boi. Gee nuurɛ bu'a la n wa'am na la, be'em vo'e mɛ na, 10ti mam ki, ti nuurɛ bu'a de mɛŋa en wan bo' ni mam vom la, nyaa lebege dɛna kum bo' mam. 11#Pi'il 3.13 Se'ere en sɔi la, be'em en nyɛ yɔ'ɔ nuurɛ bu'a la puan la, bu pã'ahɛ mam mɛ, doohe bilam ku mam. 12Bala, ze'elego la dela fa'a ti nuurɛ bu'a la dela Fa'a dɛna dɔ'ɔ, ana suŋa.

13Bala, sɛla en ani suŋa la, en tari kum na bo' mam yoi? Sore ka boi la fii me! La dela be'em en tuni, ti a ku mam, dɔla sɛla en ani suŋa la puan, ti la pa'alɛ ti be'em dela be'em, gee wan doohe nuurɛ bu'a la puan yalegɛ nuurɛ gaŋɛ bala.

Zaberɛ en boi mam puan

14Bala zuo, tu mi' ti ze'elego la dela Sia puan tuunɛ, gee mam en ŋwana dɛna asaala, ti ba koohe mam ti n dɛna da'aberɛ bo' be'em. 15#Gal 5.17N ka bɔkeri n mɛŋa itegɔ. Se'ere en sɔi la, n ka iti mam boti n ita sɛla la, gee n tugum ita la yele sɛ'a ti n ka bɔta la. 16Bala, mam han ita sɛla ti n ka bɔta la. Mam sakɛ ya ti ze'elego la ani suŋa mɛ. 17Gee yelemɛŋerɛ la dela, la dagi la mam en iti bala, gee be'em la en kɛ̃'ɛ̃ri n puan la en iti bala. 18Mam mi' ti yelesunɛ ka boi n puan. N yeti la n inganɛ wa puan n bala. Mam wan ti'ihɛ sɛla en ani suŋa bo' n mɛŋa, gee n kan ta'am tum dɛ. 19Se'ere en sɔi la, mam ka tuni yelesuma sɛ'a ti n bɔta la, gee tuunfi'iha sɛ'a ti n ka bɔta la, en de sɛla ti mam tuna. 20Bala, mam han tuna sɛla ti n ka bɔta, la yi dagi mam en tuni, gee be'em la en kɛ̃'ɛ̃ri n puan la.

21Bala, mam biheri dɛ ti la nyaa dɛna la ze'elego en boi mam puan dɛna ti, n han bɔta ti n tum sum, tuunfi'iha la en ba' lɛm mam. 22Mam nyɛ ti mam boti Yinɛ ze'elego la mɛ zo'e zo'e n puan puan ha, 23gee mam nyɛti la ze'elego kuyima n inganɛ wa puan en zaberɛ la ze'elego seko en boi mam puti'irɛ puan la, bahɛ ti mam dɛna da'aberɛ bo' be'em ze'elego la en boi mam iŋa wa puan la. 24Bihɛ mam n de nɛra vom n tari nimbaalega se'em. Ani en wan faaɛ mam insɛka n tari kum kina wa puan bahɛ? 25Gee Yinɛ n sɔi fara doohe Yezu Kiresta tu Daana la puan.

Bani zuo, mam suure puan, mam dela da'aberɛ bo' Yinɛ ze'elego la, gee n inganɛ puan, mam dela da'aberɛ bo' be'em ze'elego la.

Currently Selected:

Aromduma 7: GBTP

Highlight

Copy